നവകേരള നിർമ്മിതിയിൽ പട്ടികജാതി-പട്ടികവർഗ്ഗ പിന്നാക്ക വിഭാഗങ്ങളുടെ സജീവ പങ്കാളിത്തം ഉറപ്പാക്കാൻ വ്യത്യസ്തങ്ങളായ കർമ്മപദ്ധതികൾ നടപ്പിലാക്കുന്നതിന് കഴിഞ്ഞിട്ടുണ്ടോ; വിശദമാക്കുമോ;

അത്യന്തം അപകടകരമായ ഭൂപ്രകൃതിയും കാലാവസ്ഥയുമുള്ള വനമേഖലകളിൽ അധിവസിക്കുന്ന പട്ടികവർഗ്ഗ വിഭാഗത്തിൽപ്പെട്ടവരെ അതിദാരിദ്ര്യമുക്തമാക്കുന്നതിന് ആവിഷ്കരിച്ച് നടപ്പിലാക്കിയ പദ്ധതികൾ എന്തെല്ലാമാണെന്ന് വിശദമാക്കുമോ;

പട്ടികജാതി-പട്ടികവർഗ്ഗ വിഭാഗങ്ങളിലെ അതിദാരിദ്ര്യമുക്ത ജനവിഭാഗങ്ങളുടെ ജീവിത സാഹചര്യങ്ങൾ കൂടുതൽ മെച്ചപ്പെടുത്തുന്നതിനുവേണ്ടിയുള്ള തുടർപ്രവർത്തനങ്ങൾ എന്തെല്ലാമാണെന്ന് വിശദമാക്കുമോ;

പട്ടികജാതി-പട്ടികവർഗ്ഗ വിഭാഗങ്ങളിൽപ്പെട്ട യുവാക്കൾക്ക് സർക്കാർ- സ്വകാര്യ മേഖലകളിലെ ഏറ്റവും ഉന്നത ശ്രേണിയിലുള്ള തൊഴിലുകളിൽ പ്രവൃത്തി പരിചയവും പരിശീലനവും ലഭ്യമാക്കുന്നതിന് നടപ്പിലാക്കുന്ന പദ്ധതികൾ എന്തെല്ലാമാണെന്ന് വിശദമാക്കുമോ?

സംസ്ഥാനത്തെ ആദിവാസി സമൂഹത്തില്‍പ്പെട്ട വിദ്യാര്‍ത്ഥികളുടെ പഠനം കാര്യക്ഷമമാക്കുന്നതിനായി നിലവില്‍ എന്തെല്ലാം പദ്ധതികളാണ് നടപ്പിലാക്കി വരുന്നതെന്ന് അറിയിക്കാമോ;

ഏതെല്ലാം കോഴ്സുകൾക്കാണ് ഇത്തരത്തിൽ പഠനത്തിനായി ധനസഹായം നൽകുന്നത്; ഏതെല്ലാം പദ്ധതികളിലൂടെയാണ് ഈ സഹായം ലഭ്യമാകുന്നത്; വ്യക്തമാക്കാമോ;

ആദിവാസി കുടിലുകളില്‍ താമസിക്കുന്ന കുട്ടികള്‍ക്ക് അവരുടെ തനത് ഭാഷയില്‍ പ്രാഥമിക വിദ്യാഭ്യാസം നല്‍കണമെന്ന ആവശ്യം ഉയര്‍ന്നു വന്നിട്ടുണ്ടോ; വിശദമാക്കാമോ;

കഴിഞ്ഞ പത്തു വർഷത്തിനിടയിൽ ഏതെല്ലാം സ്കൂളുകളിലൂടെയാണ് ഈ വിദ്യാർത്ഥികളെ അവരുടെ തനത് ഭാഷയിൽ പഠിപ്പിക്കാൻ സാധിച്ചിട്ടുള്ളത്?

സംസ്ഥാനത്ത് കിണറുകൾ കുഴിക്കുന്നതിനും ഭൂഗർഭ ജലത്തിന്റെ ഉപയോഗത്തിനും നിയന്ത്രണങ്ങൾ ഏർപ്പെടുത്തുവാൻ ഉദ്ദേശിക്കുന്നുണ്ടോ; വ്യക്തമാക്കാമോ;

അശാസ്ത്രീയമായ രീതിയിലുളള കിണർ നിർമ്മാണം തടയുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വ്യക്തമാക്കാമോ;

വരൾച്ചയും ജലക്ഷാമവും ഉളള പ്രദേശങ്ങളിലെ അമിത ജല ഉപയോഗത്തിന് നിയന്ത്രണം ഏർപ്പെടുത്താൻ ഉദ്ദേശിക്കുന്നുണ്ടോ; വിശദമാക്കാമോ;

സംസ്ഥാനത്ത് ജലനയം രൂപീകരിച്ചിട്ടുണ്ടോ; എങ്കിൽ വിശദാംശം നൽകുമോ?

വന്യജീവി ആക്രമണ പ്രതിരോധത്തിനായി ഏതൊക്കെ മിഷനുകൾ രൂപീകരിച്ചിട്ടുണ്ട്; ഈ മിഷനുകളുടെ പ്രവ‍ർത്തനം വിലയിരുത്തിയിട്ടുണ്ടോ; വിശദമാക്കാമോ;

സംസ്ഥാനത്ത് എത്ര ഹെക്ടർ ഏകവിളതോട്ടങ്ങൾ സ്വാഭാവിക വനങ്ങളാക്കി മാറ്റിയിട്ടുണ്ട്; വ്യക്തമാക്കാമോ;

കാവുകളുടെ സംരക്ഷണത്തിനും നവീകരണത്തിനുമായി 2016 മുതൽ 2025 വരെ എത്ര തുക ധനസഹായമായി നൽകിയിട്ടുണ്ട്; വ്യക്തമാക്കാമോ;

സംസ്ഥാന വനം വകുപ്പിന്റെ പ്രവർത്തനങ്ങൾക്ക് ഏതൊക്കെ അവാർഡുകൾ 2016 മുതൽ 2025 വരെ ലഭിച്ചിട്ടുണ്ടെന്ന് വിശദമാക്കാമോ?

സംസ്ഥാനത്തെ മത്സ്യമാര്‍ക്കറ്റുകളുടെ അടിസ്ഥാന സൗകര്യ വികസനത്തിനും ആധുനികവല്‍ക്കരണത്തിനും ആവിഷ്കരിച്ചിട്ടുള്ള പദ്ധതികളുടെ വിശദാംശം ലഭ്യമാക്കാമോ;

കിഫ്ബി ധനസഹായത്തോടെ സംസ്ഥാനത്തൊട്ടാകെ എത്ര മത്സ്യമാര്‍ക്കറ്റുകളുടെ നവീകരണം നടപ്പിലാക്കിയിട്ടുണ്ട്;

മത്സ്യമാര്‍ക്കറ്റുകളുടെ നവീകരണത്തിന് കിഫ്ബി വഴി 2021-25 വരെ ഏതൊക്കെ പദ്ധതികള്‍ക്ക് തത്വത്തില്‍ അംഗീകാരം ലഭിച്ചിട്ടുണ്ടെന്നും ഇതില്‍ ഏതൊക്കെ പദ്ധതികള്‍ക്ക് നിര്‍മ്മാണ അനുമതി ലഭിച്ചിട്ടുണ്ടെന്നും വ്യക്തമാക്കാമോ?

സംസ്ഥാനത്തെ കുടിവെള്ള പദ്ധതികൾ സമയബന്ധിതമായി പൂർത്തീകരിക്കാൻ സ്വീകരിച്ചു വരുന്ന നടപടികൾ വിശദമാക്കാമോ;

കുടിവെള്ള പദ്ധതികൾ അനിശ്ചിതമായി നീട്ടികൊണ്ടുപോകുന്നതു മൂലം നിർമ്മാണ ചെലവ് വലിയ തോതിൽ വർദ്ധിക്കുന്നത് തടയാൻ നടപടി സ്വീകരിക്കുമോ; വിശദമാക്കാമോ?

പട്ടികജാതി-പട്ടികവര്‍ഗ്ഗ കുടുംബങ്ങളുടെ അപൂര്‍ണ്ണവും പൂര്‍ത്തീകരിക്കാത്തതുമായ ഭവനങ്ങളുടെ പൂര്‍ത്തീകരണത്തിനും നവീകരണത്തിനുമായി ആരംഭിച്ച സേഫ് പദ്ധതിയുടെ നിലവിലുള്ള പ്രവര്‍ത്തനം വിശദമാക്കാമോ;

അപൂര്‍ണ്ണമായ വീടുകളുടെ പൂര്‍ത്തീകരണത്തിനും നവീകരണത്തിനുമായി സേഫ് പദ്ധതി വഴി എത്ര തുക നല്‍കി വരുന്നു; വ്യക്തമാക്കാമോ;

2021 മുതൽ 2025 വരെയുള്ള കാലയളവിൽ സേഫ് പദ്ധതി വഴി എത്ര പട്ടികജാതി-പട്ടികവര്‍ഗ്ഗ കുടുംബങ്ങള്‍ ഗുണഭോക്താക്കള്‍ ആയിട്ടുണ്ട്; വിശദമാക്കാമോ?

സംസ്ഥാനത്ത് പട്ടികവര്‍ഗ്ഗ വിഭാഗത്തിലുള്ളവരുടെ ആരോഗ്യസംരക്ഷണത്തിനായി വിഭാവനം ചെയ്ത സമഗ്ര ആരോഗ്യ സുരക്ഷാ പദ്ധതിയുടെ പുരോഗതി അറിയിക്കാമോ; എന്തൊക്കെ സഹായങ്ങളാണ് പദ്ധതിയിലൂടെ ലക്ഷ്യമിടുന്നതെന്ന് വിശദമാക്കാമോ;

പട്ടികവര്‍ഗ്ഗ വകുപ്പ് മുഖേന നടത്തിവരുന്ന ഫുഡ് സപ്പോര്‍ട്ട് പ്രോഗ്രാമിന്റെ വിശദാംശം അറിയിക്കാമോ;

പട്ടികജാതി വിഭാഗക്കാര്‍ക്കായി ഈ സര്‍ക്കാര്‍ അധികാരത്തില്‍ വന്നശേഷം നടപ്പിലാക്കിയ പദ്ധതികള്‍ വിശദമാക്കാമോ; അംബേദ്കര്‍ സ്വാശ്രയ ഗ്രാമം പദ്ധതിയുടെ വിശദാംശവും പുരോഗതിയും അറിയിക്കാമോ;

പട്ടികജാതി പട്ടികവര്‍ഗ്ഗ വിഭാഗത്തിലുള്ളവ‍ര്‍ക്ക് സ്പോര്‍ട്സ് രംഗത്ത് ശാസ്ത്രീയമായ പരിശീലനം നല്‍കുന്നതിനും സ്പോര്‍ട്സ് അടിസ്ഥാന സൗകര്യവികസനത്തിനും സ്വീകരിച്ച നടപടികള്‍ അറിയിക്കാമോ; ഏതൊക്കെ പദ്ധതികള്‍ പരിഗണനയിലുണ്ടെന്നും അവയിലേതൊക്കെ പദ്ധതികള്‍ക്ക് അനുമതി നല്‍കിയിട്ടുണ്ടെന്നും വിശദമാക്കാമോ?

വാണിജ്യ വ്യവസായ ആവശ്യങ്ങൾക്കായി സ്വകാര്യ വ്യക്തികളും സ്ഥാപനങ്ങളും ജലചൂഷണം നടത്തുന്നതായി കണ്ടെത്തിയിട്ടുണ്ടോ;

അശാസ്ത്രീയമായ ഭൂജല ഉപയോഗം നിയന്ത്രിക്കുന്നതിന് ഉദ്ദേശിക്കുന്നുണ്ടോ;

ഭൂജലത്തിന്റെ ഉടമസ്ഥാവകാശം സർക്കാരിൽ നിക്ഷിപ്തമാക്കാൻ ഉദ്ദേശിക്കുന്നുണ്ടോ; വിശദമാക്കുമോ;

ഭൂജല ഉപയോഗത്തിൽ എന്തെല്ലാം നിയന്ത്രണങ്ങൾ ഏർപ്പെടുത്താനാണ് ഉദ്ദേശിക്കുന്നത്; വിശദമാക്കുമോ?

സംസ്ഥാനത്തെ വാണിജ്യ-വ്യവസായ ആവശ്യങ്ങൾക്കായി സ്വകാര്യ വ്യക്തികളും സ്ഥാപനങ്ങളും നടത്തിവരുന്നതായി പറയപ്പെടുന്ന ജലചൂഷണം തടയുന്നതിനും ജലവിതരണം കാര്യക്ഷമവും സുതാര്യവുമാക്കുന്നതിനും ജലനയം രൂപീകരിക്കാൻ ഉദ്ദേശിക്കുന്നുണ്ടോ; വ്യക്തമാക്കാമോ;

അശാസ്ത്രീയമായ ജല ഉപയോഗം തടയുന്നതിനും കുഴൽക്കിണർ നിർമ്മാണത്തിന് നിയന്ത്രണം ഏർപ്പെടുത്തുന്നതിനും പ്രസ്തുത കരട് നയത്തിൽ വ്യവസ്ഥ ചെയ്തിട്ടുണ്ടോ; വിശദമാക്കാമോ;

വെള്ളപ്പൊക്കം തടയാൻ റൂം ഫോർ ദ റിവർ പദ്ധതി അനിവാര്യമാണെന്നും നദികൾക്ക് കുറുകെ പാലങ്ങൾ നിർമ്മിക്കുമ്പോൾ റെഗുലേറ്റർ കം ബ്രിഡ്ജ് സാധ്യതകൾ പരിശോധിക്കണമെന്നുമുള്ള അഭിപ്രായം ഉയർന്നു വന്നിട്ടുണ്ടോ; വ്യക്തമാക്കാമോ;

സംസ്ഥാനത്തെ ജലസ്രോതസ്സുകൾ സംരക്ഷിക്കുന്നതിനും ശുചീകരിക്കുന്നതിനുമായി ശാസ്ത്രീയമായ പദ്ധതികൾ ആസൂത്രണം ചെയ്ത് നടപ്പിലാക്കുമോ; വിശദമാക്കാമോ?

കടലിന്റെ അവകാശം മത്സ്യത്തൊഴിലാളികൾക്ക് ഉറപ്പുവരുത്താൻ നടപടി സ്വീകരിച്ചിട്ടുണ്ടോ; വിശദമാക്കാമോ;

മത്സ്യബന്ധനാവകാശവും ആദ്യ വില്പനാവകാശവും മത്സ്യത്തൊഴിലാളികൾക്ക് നിജപ്പെടുത്താൻ നടപടികൾ സ്വീകരിക്കുമോ; വിശദമാക്കാമോ;

മത്സ്യത്തൊഴിലാളികൾക്ക് മത്സ്യബന്ധനത്തിന് പോകാൻ സാധിക്കാത്ത സാഹചര്യങ്ങളിൽ മറ്റ് തൊഴിലുകള്‍ കണ്ടെത്തുവാന്‍ ഉതകുന്ന നടപടികൾ സ്വീകരിക്കുമോ; വിശദമാക്കാമോ?

സംസ്ഥാനത്തെ ആദ്യ ഗോത്രവര്‍ഗ്ഗ പഞ്ചായത്തായ ഇടമലക്കുടിയിലെ ജനങ്ങളുടെ യാത്രാക്ലേശം പരിഹരിക്കുന്നതിനായി എന്തെല്ലാം നടപടികള്‍ സ്വീകരിച്ചുവരുന്നുവെന്ന് വ്യക്തമാക്കാമോ;

ഇടമലക്കുടിയില്‍ നടന്നുവരുന്ന റോഡ് പണിയുടെ പുരോഗതി വ്യക്തമാക്കാമോ; റോഡ് പണി എന്നത്തേക്ക് പൂര്‍ത്തീകരിക്കാനാകുമെന്നാണ് പ്രതീക്ഷിക്കുന്നത്; ഇതിനായി എത്ര തുക വകയിരുത്തിയിട്ടുണ്ട്; വിശദമാക്കാമോ;

ഇടമലക്കുടിയിലെ ജനങ്ങളുടെ ആരോഗ്യ-വിദ്യാഭ്യാസ മേഖലകളിലെ പുരോഗതിക്കായി എന്തെല്ലാം നടപടികള്‍ സ്വീകരിച്ചിട്ടുണ്ട്; വ്യക്തമാക്കാമോ?

2016 മുതൽ നാളിതുവരെ എത്ര മത്സ്യത്തൊഴിലാളികൾക്കാണ് ഭവന നിർമ്മാണ സഹായം അനുവദിച്ചിട്ടുള്ളത്; ജില്ല തിരിച്ചുള്ള കണക്കുകൾ ലഭ്യമാണോ; എങ്കിൽ അത് വിശദമാക്കാമോ;

2011 മുതൽ 2016 വരെ എത്ര പേർക്ക് ഭവന നിർമ്മാണ ധനസഹായം അനുവദിച്ചിട്ടുണ്ടെന്നും ഇക്കാലയളവിൽ എത്ര വീടുകൾ പൂർത്തീകരിച്ചുവെന്നും ജില്ല തിരിചുള്ള കണക്ക് ലഭ്യമാണോ; വ്യക്തമാക്കാമോ;

2011 മുതല്‍ 2016 വരെയും 2016 മുതല്‍ നാളിതുവരേയും മത്സ്യത്തൊഴിലാളി കുടുംബങ്ങള്‍ക്ക് പുനരധിവാസം ഉറപ്പാക്കുവാന്‍ സാധിച്ചിട്ടുണ്ടോ എന്നതിനെ സംബന്ധിച്ച വിശദാംശം ലഭ്യമാക്കാമോ;

മത്സ്യത്തൊഴിലാളികൾക്ക് പുനരധിവാസത്തിനൊപ്പം എന്തെല്ലാം ജീവനോപാധി പദ്ധതികളാണ് ആവിഷ്കരിച്ച് നടപ്പിലാക്കിയിട്ടുള്ളതെന്ന് വിശദമാക്കാമോ?

സംസ്ഥാനത്തെ മത്സ്യമേഖലയില്‍ സര്‍ക്കാര്‍ നടത്തിവരുന്ന ഇടപെടലുകള്‍ പ്രസ്തുത മേഖലയിലെ ജീവിത സാഹചര്യങ്ങള്‍ മെച്ചപ്പെടുത്തുന്നതിനും തൊഴിലിടങ്ങളില്‍ മെച്ചപ്പെട്ട അന്തരീക്ഷം സൃഷ്ടിക്കുന്നതിനും ഇടയായിട്ടുണ്ടെന്ന വിലയിരുത്തല്‍ നടത്തിയിട്ടുണ്ടോ; എങ്കില്‍ വിശദമാക്കാമോ;

രാജ്യത്തെ മികച്ച മറൈന്‍ സംസ്ഥാനമായി കേരളവും മികച്ച മറൈന്‍ ജില്ലയായി കൊല്ലവും തിരഞ്ഞെടുക്കപ്പെട്ടിട്ടുണ്ടോ; വ്യക്തമാക്കാമോ;

മത്സ്യസമ്പത്തിന്റെ സംരക്ഷണത്തിനും പരിപാലനത്തിനും മത്സ്യത്തൊഴിലാളികളുടെ ക്ഷേമവികസന പ്രവര്‍ത്തനത്തിനും സര്‍ക്കാര്‍ നടത്തിവരുന്ന മാതൃകാപരമായ പ്രവര്‍ത്തനങ്ങള്‍ പ്രസ്തുത അംഗീകാരത്തിന് പരിഗണനാ വിഷയമായിട്ടുണ്ടോ; വ്യക്തമാക്കുമോ;

സംസ്ഥാനത്ത് ശാസ്ത്രീയ മത്സ്യകൃഷിരീതികള്‍ നടപ്പിലാക്കിയതിന്റെ ഫലമായി ഉള്‍നാടന്‍ മത്സ്യോത്പാദനത്തിലുണ്ടായ വര്‍ദ്ധനവ് സംബന്ധിച്ച് വിശദമാക്കാമോ;

ജനകീയ മത്സ്യകൃഷി പദ്ധതി ആവിഷ്കരിച്ച് നടപ്പിലാക്കുന്നതിന് സ്വീകരിച്ചു വരുന്ന നടപടികള്‍ വിശദമാക്കാമോ?

വന്യജീവി സംഘര്‍ഷം രൂക്ഷമായതിന്റെ പശ്ചാത്തലത്തില്‍ വന്യജീവികളെ നേരിടാന്‍ ലാന്‍ഡ് സ്കേപ്പ് പദ്ധതി നടപ്പാലാക്കിയിട്ടുണ്ടോ; വിശദമാക്കാമോ;

വന്യജീവി സംഘര്‍ഷം നേരിടുന്നതിനായി വനം വകുപ്പ് ഇതുവരെ സ്വീകരിച്ചിട്ടുള്ള വിവിധ പദ്ധതികളുടെ വിശദാംശം ലഭ്യമാക്കാമോ;

ലാന്‍ഡ് സ്കേപ്പ് പദ്ധതി സംബന്ധിച്ച് പഞ്ചായത്ത് തലത്തില്‍ വീണ്ടും ചര്‍ച്ച നടത്തുവാന്‍ നടപടി സ്വീകരിക്കുമോ?

2016-2021, 2021-2025 കാലഘട്ടങ്ങളില്‍ സംസ്ഥാനത്ത് ശാസ്ത്രീയമായ മാര്‍ഗ്ഗങ്ങളിലൂടെ സമഗ്രമായ ജലവിഭവ മാനേജ്മെന്റ് ഉറപ്പുവരുത്തുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

ഭൂജല സ്രോതസ്സുകളുടെ പരിപോഷണത്തിനായി എന്തൊക്കെ പദ്ധതികള്‍ നടപ്പിലാക്കി വരുന്നു; വിശദമാക്കാമോ;

നദികളെ തന്നെ ജലസംഭരണികളാക്കി മാറ്റി ജലം സംരക്ഷിക്കുവാനുള്ള എന്ത് സമീപനമാണ് കൈക്കൊള്ളാന്‍ ഉദ്ദേശിക്കുന്നതെന്ന് വ്യക്തമാക്കാമോ?

മത്സ്യത്തൊഴിലാളികൾക്ക് നൽകിവരുന്ന മണ്ണെണ്ണ സബ്സിഡി 2016-ന് ശേഷം വർദ്ധിപ്പിച്ചിട്ടില്ലെന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് വർദ്ധിപ്പിക്കാൻ നടപടി സ്വീകരിക്കുമോ; വിശദാംശം നൽകുമോ;

കാലാവസ്ഥ മുന്നറിയിപ്പുകൾ കാരണം ജോലിക്ക് പോകുവാൻ സാധിക്കാത്ത സാഹചര്യത്തില്‍ മത്സ്യത്തൊഴിലാളികൾക്ക് മിനിമം വേതനം ഉറപ്പാക്കുന്നതിന് പദ്ധതി ആവിഷ്കരിക്കുമോ; വിശദാംശം നൽകാമോ?

സംസ്ഥാനത്ത് പട്ടികജാതി വിഭാഗങ്ങൾക്ക് ജനസംഖ്യ അടിസ്ഥാനത്തിലും പട്ടികവര്‍ഗ്ഗ വിഭാഗങ്ങൾക്ക് ജനസംഖ്യയുടെ ഇരട്ടിയും പദ്ധതി അടങ്കൽ വിഹിതം നിശ്ചയിച്ചു നൽകിയിട്ടുണ്ടോ; വിശദമാക്കുമോ;

കഴിഞ്ഞ മൂന്ന് വർഷങ്ങളായി പദ്ധതി അടങ്കൽ ഉയർത്താത്തത് പട്ടികജാതി-പട്ടികവര്‍ഗ്ഗ വിഭാഗങ്ങൾക്കുള്ള വിഹിതം ഉയരാത്ത സാഹചര്യം ഉണ്ടാക്കിയിട്ടുണ്ടോ;

2024-25-ൽ പട്ടികജാതി-പട്ടികവര്‍ഗ്ഗ വിഭാഗങ്ങൾക്കുള്ള പദ്ധതി അടങ്കൽ എക്സിക്യൂട്ടീവ് ഉത്തരവിലൂടെ വെട്ടിക്കുറച്ചിട്ടുണ്ടോ; വിശദമാക്കുമോ; എങ്കില്‍ ഈ തുക നടപ്പ് സാമ്പത്തിക വർഷത്തിൽ അധികമായി നൽകുന്നതിനുള്ള നടപടി സ്വീകരിക്കുമോയെന്ന് വ്യക്തമാക്കുമോ?

ഉന്നതവിദ്യാഭ്യാസത്തിന് അവസരം ലഭിച്ച പട്ടികജാതി വിദ്യാര്‍ത്ഥികള്‍ക്ക് ലാപ്‍ടോപ്പ് വാങ്ങുന്നതിന് നൽകിവരുന്ന സാമ്പത്തിക സഹായം എത്രയെന്ന് വ്യക്തമാക്കുമോ;

ഇതിനായി വകുപ്പ് 2016-21 കാലയളവില്‍ എത്ര തുക അനുവദിച്ചിട്ടുണ്ട്; എത്ര വിദ്യാര്‍ത്ഥികള്‍ ഇതിന്റെ ഗുണഭോക്താക്കളായിട്ടുണ്ട്; വിശദമാക്കുമോ;

2021 മുതൽ 2025 വരെയുള്ള കാലയളവില്‍ എത്ര തുക അനുവദിച്ചിട്ടുണ്ട്; എത്ര വിദ്യാര്‍ത്ഥികള്‍ ഗുണഭോക്താക്കളായിട്ടുണ്ട്; വിശദമാക്കുമോ;

2016 മുതല്‍ 2025 വരെയുള്ള കാലയളവിൽ ആകെ എത്ര തുക അനുവദിച്ചിട്ടുണ്ട്; ആകെ എത്ര വിദ്യാര്‍ത്ഥികള്‍ ഗുണഭോക്താക്കള്‍ ആയിട്ടുണ്ട്; വിശദമാക്കാമോ?

സംസ്ഥാനത്തെ മത്സ്യത്തൊഴിലാളി വിഭാഗത്തിൽപ്പെട്ടവരുടെ കുട്ടികളുടെ വിദ്യാഭ്യാസപരമായ ഉന്നമനത്തിനുവേണ്ടി വിദ്യാതീരം പദ്ധതി ആരംഭിച്ചിട്ടുണ്ടോ; വിശദമാക്കുമോ;

മത്സ്യത്തൊഴിലാളി വിഭാഗത്തിലെ കുട്ടികളുടെ വിദ്യാഭ്യാസപരമായ പുരോഗതിക്ക് വേണ്ടി എന്തെല്ലാം സ്കോളർഷിപ്പുകളും മറ്റാനുകൂല്യങ്ങളുമാണ് അനുവദിച്ചിട്ടുള്ളതെന്ന് വ്യക്തമാക്കാമോ;

സംഘടിത തൊഴിൽ മേഖലയിൽ മത്സ്യത്തൊഴിലാളി വിഭാഗത്തിലെ യുവജനങ്ങളുടെ പ്രാതിനിധ്യം വർദ്ധിപ്പിക്കുന്നതിനുവേണ്ടി ആരംഭിച്ചതും വിവിധ മത്സര പരീക്ഷകൾക്ക് വേണ്ടിയുള്ളതുമായ പരിശീലന പരിപാടികളുടെ പുരോഗതി വിശദീകരിക്കുമോ;

ആധുനികകാലത്ത് ഏറ്റവും മികച്ച തൊഴില്‍ സാധ്യതയുള്ള പൈലറ്റ് ട്രെയിനിങ്, പ്രമുഖ സർവകലാശാലകളിലെ ഉന്നത വിദ്യാഭ്യാസം തുടങ്ങിയ മേഖലകളില്‍ അവസരം ലഭിക്കുന്നതിനായി മത്സ്യത്തൊഴിലാളികളുടെ കുട്ടികൾക്ക് എന്തെല്ലാം സഹായങ്ങളാണ് നൽകിവരുന്നതെന്ന് വിശദമാക്കാമോ?

വന്യമൃഗങ്ങൾ നാട്ടിലേക്ക് ഇറങ്ങുന്നതിന് ഒരു കാരണം അധിനിവേശ സസ്യങ്ങളും ജലം കൂടുതൽ വലിച്ചെടുക്കുന്ന വൃക്ഷങ്ങളുമാണ് എന്നത് വസ്തുതയാണോ; വ്യക്തമാക്കാമോ;

സംസ്ഥാനത്തെ കാടുകളിൽ നിന്നും മഞ്ഞക്കൊന്ന അടക്കമുള്ള അധിനിവേശ സസ്യങ്ങളും യൂക്കാലിപ്റ്റസ് അടക്കമുള്ള വെള്ളമൂറ്റി കുടിക്കുന്ന വൃക്ഷങ്ങളും പിഴുതു മാറ്റി മറ്റു വൃക്ഷങ്ങൾ നട്ടുപിടിപ്പിക്കാൻ സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ?

പട്ടികജാതി വിഭാഗങ്ങളുടെ ക്ഷേമത്തിനായുളള ഫണ്ട് വിനിയോഗം ഫലപ്രദമല്ലെന്ന് കണ്ടെത്തിയിട്ടുണ്ടോ; വ്യക്തമാക്കാമോ;

പട്ടികജാതി വികസന വകുപ്പിന്റെ ആഭ്യന്തര ഓഡിറ്റ് വിഭാഗം ശക്തിപ്പെടുത്തേണ്ടതിന്റെ ആവശ്യകത പരിശോധിച്ചിട്ടുണ്ടോ; വ്യക്തമാക്കാമോ;

പ്രസ്തുത വകുപ്പില്‍ കൃത്യവും സമയബന്ധിതവുമായ ഓഡിറ്റിംഗ് നടപ്പാക്കിക്കാെണ്ട് ക്രമക്കേടുകൾ തടയുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വിശദമാക്കുമോ?

സംസ്ഥാനത്തെ ആദിവാസി സമൂഹം നേരിടുന്ന അവഗണന ഗൗരവമായി കാണുന്നുണ്ടോ; വ്യക്തമാക്കുമോ;

സമരത്തിൽ പങ്കെടുക്കാത്തതിനെ തുടർന്ന് കണ്ണൂർ പേരാവൂരിൽ ആദിവാസി സ്ത്രീക്ക് തൊഴിൽ നിഷേധിച്ച സംഭവത്തിൽ എന്തൊക്കെ നടപടികളാണ് സ്വീകരിച്ചതെന്ന് വ്യക്തമാക്കാമോ;

ഇത്തരം സംഭവങ്ങൾ ആവർത്തിക്കാതിരിക്കാൻ ബന്ധപ്പെട്ട വകുപ്പ് സ്വീകരിക്കാൻ ഉദ്ദേശിക്കുന്ന നടപടികൾ വിശദമാക്കുമോ?

മത്സ്യത്തൊഴിലാളി വനിതകളുടെ ശാക്തീകരണത്തിനായി നടപ്പിലാക്കിയിട്ടുള്ള പദ്ധതികള്‍ എന്തെല്ലാമാണ്; വിശദമാക്കാമോ;

പ്രസ്തുത പദ്ധതികള്‍ വഴി മത്സ്യത്തൊഴിലാളി വനിതകള്‍ക്ക് എന്തെല്ലാം നേട്ടങ്ങള്‍ കൈവരിക്കുവാന്‍ കഴിഞ്ഞിട്ടുണ്ട്; വ്യക്തമാക്കാമോ;

ഇതു സംബന്ധിച്ച് എന്തെങ്കിലും പഠനങ്ങള്‍ നടന്നിട്ടുണ്ടോ; എങ്കില്‍ വിവരങ്ങള്‍ ലഭ്യമാക്കാമോ;

സൂക്ഷ്മ തൊഴില്‍ സംരംഭങ്ങളുടെ പ്രവര്‍ത്തനങ്ങള്‍ വിലയിരുത്തിയിട്ടുണ്ടോ; എങ്കില്‍ വിശദമാക്കാമോ?

മത്സ്യത്തൊഴിലാളി മേഖല നേരിടുന്ന വിവിധ പ്രശ്നങ്ങൾ സർക്കാർ പഠന വിധേയമാക്കിയിട്ടുണ്ടോ; വിശദമാക്കുമോ;

കേരളത്തിന്റെ വ്യക്തിഗത മത്സ്യബന്ധനം ദേശീയ ശരാശരിയുടെ എത്ര ശതമാനമാണ്; കണക്ക് വ്യക്തമാക്കാമോ;

മത്സ്യത്തൊഴിലാളികൾക്കാവശ്യമായ മണ്ണെണ്ണ ലഭ്യമാക്കാൻ എന്തെല്ലാം നടപടികളാണ് സ്വീകരിക്കുന്നത്; നിലവിൽ മണ്ണെണ്ണയ്ക്ക് നൽകി വരുന്ന സബ്സിഡി വർദ്ധിപ്പിക്കാൻ ഉദ്ദേശിക്കുന്നുണ്ടോ; എങ്കിൽ വിശദാംശം നൽകാമോ?

സംസ്ഥാനത്ത് ജല്‍ജീവന്‍ മിഷന്‍ പദ്ധതി നടപ്പാക്കുന്നതിന്റെ നിലവിലെ പുരോഗതി അറിയിക്കാമോ;

പ്രസ്തുത പദ്ധതി നടപ്പാക്കുന്നതില്‍ സംസ്ഥാനത്തിന്റെ സ്ഥാനം ഏറ്റവും പുറകിലാണ് എന്നത് വസ്തുതയാണോ; വ്യക്തമാക്കാമോ;

പദ്ധതി പൂർത്തിയാക്കുന്നതിന് കാലതാമസം നേരിടുന്നതിനുള്ള കാരണം എന്താണെന്ന് പരിശോധിച്ചിട്ടുണ്ടോ; വിശദമാക്കാമോ;

പദ്ധതി എന്ന് പൂർത്തിയാക്കാൻ സാധിക്കുമെന്ന് വ്യക്തമാക്കാമോ?

2016 മുതൽ 2025 വരെ ഭൂരഹിതരായ പട്ടികവർഗ്ഗക്കാരെ പുനരധിവസിപ്പിക്കുന്നതിനായി എത്ര ഏക്കർ ഭൂമി വിതരണം ചെയ്തിട്ടുണ്ടെന്നുള്ള വിവരം ലഭ്യമാണോ; പുനരധിവസിക്കപ്പെട്ടവരിൽ എത്രപേർക്ക് വീടിനുളള ധനസഹായം അനുവദിച്ചിട്ടുണ്ടെന്ന് വ്യക്തമാക്കാമോ;

2016 മുതൽ 2025 വരെ സംസ്ഥാനത്ത് ഭവനരഹിതരും ഭൂരഹിതരുമായ പട്ടികവർഗ്ഗ കുടുംബങ്ങൾക്ക് ഭൂമിയും വീടും നൽകുന്നതിന് സ്വീകരിച്ചിട്ടുളള നടപടികൾ വിശദമാക്കാമോ;

ഈ സർക്കാർ അധികാരത്തിൽ വന്നതിനുശേഷം പട്ടികവർഗ്ഗ വിഭാഗത്തിൽപ്പെട്ടവർക്ക് വനാവകാശ നിയമപ്രകാരം കൈവശാവകാശ രേഖ വിതരണം ചെയ്യുന്നതിന് സ്വീകരിച്ച നടപടികൾ വിശദമാക്കാമോ?

നശിച്ചുകൊണ്ടിരിക്കുന്ന വനങ്ങളെ സംരക്ഷിക്കുന്നതിനും മനുഷ്യ-വന്യജീവി സംഘര്‍ഷം ലഘൂകരിക്കുന്നതിനും സ്വീകരിച്ചു വരുന്ന നടപടികള്‍ എന്തെല്ലാം; വ്യക്തമാക്കാമോ;

സംസ്ഥാനത്തെ സ്വാഭാവിക വനങ്ങളുടെ പുനഃസ്ഥാപനത്തിന് നയരേഖ പ്രഖ്യാപിച്ചിട്ടുണ്ടോ; വ്യക്തമാക്കാമോ;

ആവാസ വ്യവസ്ഥയ്ക്ക് ദോഷകരമായതും വ്യാവസായികാടിസ്ഥാനത്തില്‍ കാലിക പ്രാധാന്യം നഷ്ടപ്പെട്ടതുമായ അക്കേഷ്യ, യൂക്കാലിപ്റ്റ്സ്, മാഞ്ചിയം, മഞ്ഞക്കൊന്ന തുടങ്ങിയ വൃക്ഷങ്ങള്‍ നീക്കം ചെയ്ത് സ്വാഭാവിക വനത്തിന്റെ പുനഃസ്ഥാപനത്തിന് പദ്ധതി ആവിഷ്ക്കരിച്ചിട്ടുണ്ടോ; വിശദാംശം ലഭ്യമാക്കാമോ?

പട്ടിക വിഭാഗത്തിന്റെ ഉന്നമനത്തിനായുളള സര്‍ക്കാര്‍ പദ്ധതികള്‍ ബോധപൂര്‍വ്വം വൈകിപ്പിക്കുകയും ഗുണഭോക്താക്കളെ ഒഴിവാക്കി അനര്‍ഹര്‍ ആനുകൂല്യങ്ങള്‍ തട്ടിയെടുക്കുകയും ചെയ്യുന്ന പ്രവണത തുടര്‍ന്നു വരുന്നത് ശ്രദ്ധയില്‍പ്പെട്ടിട്ടുണ്ടോ;

ഇത്തരം പ്രവര്‍ത്തനങ്ങള്‍ നടത്തുന്ന ഉദ്യോഗസ്ഥര്‍ക്കെതിരെ എന്തെല്ലാം നടപടികള്‍ സ്വീകരിക്കാനാണ് ഉദ്ദേശിക്കുന്നത്;

പദ്ധതികളുടെ പ്രയോജനം ഗുണഭോക്താക്കള്‍ക്ക് ത​ന്നെ ലഭിക്കുന്നുവെന്ന് ഉറപ്പാക്കാന്‍ എന്തെങ്കിലും സംവിധാനം ഏര്‍പ്പെടുത്താന്‍ ഉദ്ദേശിക്കുന്നുണ്ടോ; വിശദമാക്കുമോ?

സംസ്ഥാനത്ത് വന്യജീവി ആക്രമണങ്ങൾ തടയുന്നതിനായി സ്വീകരിച്ച നടപടികൾ എന്തെല്ലാമാണെന്ന് വ്യക്തമാക്കാമോ;

വന്യജീവി ആക്രമണങ്ങളിൽ ജീവൻ നഷ്ടപ്പെട്ടവരുടെ ആശ്രിതർക്ക് മതിയായ നഷ്ടപരിഹാരം നൽകുന്നതിന് സ്വീകരിച്ച നടപടികൾ വിശദമാക്കാമോ?