2016-17 സാമ്പത്തിക വര്‍ഷം മുതല്‍ നാളിതുവരെ ഗതാഗത വകുപ്പ് (കെ. എസ്. ആര്‍. ടി. സി. ഉള്‍പ്പെടെ) മുഖേന പാറശ്ശാല മണ്ഡലത്തില്‍ നടപ്പാക്കിയ പദ്ധതികളുടെയും പ്രവൃത്തികളുടെയും വിശദാംശം ലഭ്യമാക്കുമോ;

ഇക്കാലയളവില്‍ പാറശ്ശാല മണ്ഡലത്തില്‍ ഗതാഗത വകുപ്പ് മുഖേന നടപ്പാക്കുന്നതിന് അനുമതി ലഭിച്ചിട്ടും നാളിതുവരെയായി നടപ്പാക്കാന്‍ കഴിയാതെ പോയതോ ആരംഭിച്ച ശേഷം പൂര്‍ത്തീകരിച്ചിട്ടില്ലാത്തതോ ആയ പദ്ധതികളും പ്രവ‍ൃത്തികളും (ബസ് സ്റ്റേഷന്‍ നവീകരണം, പുതിയ ഡിപ്പോകള്‍, ഗതാഗത പരിഷ്കാരങ്ങള്‍ തുടങ്ങിയവ) ഏതെല്ലാമാണ്; ഇവയുടെ നിലവിലെ സ്ഥിതി വിശദമാക്കാമോ;

പ്രസ്തുത പദ്ധതികള്‍ ഓരോന്നിനും നീക്കിവച്ചിട്ടുള്ള തുക എത്ര വീതമാണ്; വെെകുന്ന പദ്ധതികള്‍ സമയബന്ധിതമായി പൂര്‍ത്തിയാക്കാന്‍ എന്ത് നടപടികളാണ് സ്വീകരിച്ചുവരുന്നതെന്ന് അറിയിക്കുമോ;

പാറശ്ശാല മണ്ഡലത്തിലെ വെള്ളറട കെ. എസ്. ആര്‍. ടി. സി. ഗ്യാരേജിന്റെ ആധുനികവല്‍ക്കരണത്തിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ഗതാഗത വകുപ്പ് മുഖേന ആലത്തൂര്‍ മണ്ഡലത്തില്‍ നടപ്പിലാക്കിയ പദ്ധതികളുടെ വിശദാംശം ലഭ്യമാക്കാമോ; അതിനായി ചെലവഴിച്ച തുകകള്‍ എത്രയെന്നും വിശദമാക്കാമോ?

ഈ സർക്കാരിന്റെ കാലയളവിൽ എത്ര കെ. എസ്. ആര്‍. ടി. സി. ബസുകൾ സർവീസ്സിനിടെ തീപിടിച്ചിട്ടുണ്ട്; എത്ര രൂപയുടെ നാശനഷ്ടം ഉണ്ടായിട്ടുണ്ട്; ജീവനക്കാർക്കും യാത്രക്കാർക്കും അപകടം സംഭവിച്ച സാഹചര്യം ഉണ്ടായിട്ടുണ്ടോ; വിശദാംശം വ്യക്തമാക്കുമോ;

ബസുകളുടെ കാലപ്പഴക്കം, ഇലക്ട്രിക്കൽ തകരാറുകൾ, കൃത്യമായ പരിപാലനത്തിന്റെ അഭാവം എന്നിവ മൂലം ജീവനക്കാരുടെയും യാത്രക്കാരുടെയും സുരക്ഷ അപകടത്തിലാകുന്ന ഗുരുതര സാഹചര്യം ഒഴിവാക്കുന്നതിനായി ഇതുവരെ എന്തെല്ലാം നടപടികൾ സ്വീകരിച്ചിട്ടുണ്ടെന്ന് വ്യക്തമാക്കുമോ?

2022-ൽ വടക്കാഞ്ചേരിയിൽ ഉണ്ടായ വാഹനാപകടത്തിൽ മരണപ്പെട്ടവരുടെ ആശ്രിതർക്കും അപകടത്തിൽ പരിക്കേറ്റവർക്കും സർക്കാർ നൽകാൻ തീരുമാനിച്ചിരുന്ന സഹായങ്ങൾ എന്തെല്ലാമാണെന്ന് വിശദമാക്കാമോ;

പ്രസ്തുത അപകടത്തിൽ കെ.എസ്.ആർ.ടി.സി. ബസിൽ സഞ്ചരിച്ചിരുന്ന യാത്രക്കാർക്ക് ലഭിക്കേണ്ട പത്ത് ലക്ഷം രൂപ ഇൻഷുറൻസ് തുക ഏതെല്ലാം വ്യക്തികൾക്ക് നൽകിയിട്ടുണ്ടെന്ന് വിശദമാക്കാമോ;

നിലവിൽ നഷ്ടപരിഹാര തുക നൽകിയ വ്യക്തികളുടെ പേര്, അനുവദിച്ച തുക, വിലാസം എന്നിവയുടെ വിശദാംശം ലഭ്യമാക്കാമോ;

ഇനിയും എത്ര വ്യക്തികൾക്കാണ് നഷ്ടപരിഹാര തുക നൽകാനുള്ളതെന്ന് അറിയിക്കാമോ?

ഈ സര്‍ക്കാര്‍ അധികാരത്തില്‍ വന്ന ശേഷം റോഡ് സേഫ്റ്റി അതോറിറ്റി മുഖേന ആലപ്പുഴ മണ്ഡലത്തില്‍ എന്തൊക്കെ പദ്ധതികളാണ് നടപ്പിലാക്കിയത്; വിശദവിവരം ലഭ്യമാക്കാമോ;

ഈ സര്‍ക്കാര്‍ അധികാരത്തില്‍ വന്ന ശേഷം റോഡ് സേഫ്റ്റി അതോറിറ്റിയുടെ ആലപ്പുഴ ജില്ലാ സമിതികള്‍ നടത്തിയ മീറ്റിംഗുകളുടെ മിനിട്ട്സ് ലഭ്യമാക്കാമോ?

സ്വകാര്യ ബസ്സുകളുടെ നിയമലംഘനങ്ങള്‍ ‍വര്‍ദ്ധിച്ചുവരുന്നത് ശ്രദ്ധയിൽപ്പെട്ടിട്ടുണ്ടോ; വ്യക്തമാക്കാമോ;

പൊതുഗതാഗത സൗകര്യം കൂടുതൽ കാര്യക്ഷമമാക്കി സ്വകാര്യ ബസ്സുകളുടെ മത്സരയോട്ടം നിയന്ത്രിക്കുന്നതിന് എന്തെല്ലാം നടപടികൾ സ്വീകരിച്ചിട്ടുണ്ടെന്ന് വിശദമാക്കാമോ;

സ്വകാര്യ ബസ്സുകളിലെ യാത്ര സുരക്ഷിതമാക്കുന്നതിനും മത്സരയോട്ടം നിയന്ത്രിക്കുന്നതിനും ജിയോ ഫെൻസിങ് സൗകര്യം ഏർപ്പെടുത്തുന്നതിന് ഉദ്ദേശിക്കുന്നുണ്ടോയെന്ന് വിശദമാക്കാമോ;

ഗതാഗത നിയമങ്ങളെക്കുറിച്ചും റോഡ് സുരക്ഷയെക്കുറിച്ചും സ്വകാര്യ ബസ്സിലെ ജീവനക്കാർക്ക് അവബോധം സൃഷ്ടിക്കുന്നതിന് നടപടികൾ സ്വീകരിച്ചിട്ടുണ്ടോയെന്ന് വിശദമാക്കാമോ?

കാസർഗോഡ് ജില്ലയുടെ മലയോര മേഖലയിലേയ്ക്ക് പയ്യന്നൂര്‍ കെ. എസ്. ആര്‍. ടി. സി ഡിപ്പോയില്‍ നിന്ന് ബസ് സര്‍വീസ് ആരംഭിക്കുന്നതിന് നടപടി സ്വീകരിക്കുമോ; വ്യക്തമാക്കാമോ;

കാസർഗോഡ് ജില്ലയിലെ തീരദേശ മേഖലകളെ കണക്ട് ചെയ്ത് കെ.എസ്.ആര്‍.ടി.സി യുടെ ചെറിയ ബസുകള്‍ സര്‍വീസ് ആരംഭിക്കുന്ന കാര്യം പരിഗണനയില്‍ ഉണ്ടോയെന്ന് വ്യക്തമാക്കുമോ?

സംസ്ഥാനത്ത് സോളോ യാത്രക്കാ‍ർ, കുടുംബങ്ങള്‍, ഗ്രൂപ്പുകള്‍ എന്നിങ്ങനെ പ്രത്യേകമായ ബജറ്റ് സൗഹൃദ ടൂര്‍ പാക്കേജുകള്‍ കെ.എസ്.ആര്‍.ടി.സി. നടപ്പാക്കുന്നുണ്ടോ; വിശദമാക്കാമോ;

കെ.എസ്.ആര്‍.ടി.സി. ഭാരത് ടൂറിസം കോര്‍പ്പറേഷനുമായി ചേര്‍ന്ന് ബസ്-ബോട്ട് ടൂര്‍ പാക്കേജ് ഓപ്പറേറ്റ് ചെയ്തുവരുന്നുണ്ടോ; വിശദാംശം നല്‍കാമോ;

ബജറ്റ് ടൂര്‍ പദ്ധതി കെ.എസ്.ആര്‍.ടി.സി.യുടെ വരുമാനത്തില്‍ വര്‍ധനവ് ഉണ്ടാക്കിയിട്ടുണ്ടോയെന്ന് വിശദമാക്കാമോ?

കെ.എസ്.ആർ.ടി.സി. യുടെ ടിക്കറ്റിതര വരുമാനം വർദ്ധിപ്പിക്കുവാൻ സ്വീകരിച്ചിട്ടുള്ള നടപടികൾ വ്യക്തമാക്കാമോ;

ടിക്കറ്റിതര സ്രോതസ്സുകളിലൂടെ കെ.എസ്.ആർ.ടി.സി. യുടെ വരുമാനത്തിന്റെ എത്ര ശതമാനം ലഭിക്കുമെന്നാണ് കരുതുന്നത്; വ്യക്തമാക്കാമോ;

കെ.എസ്.ആര്‍.ടി.സി. യെ ലാഭകരമാക്കാന്‍ എന്തെല്ലാം നടപടികള്‍ സ്വീകരിക്കുവാനാണ് ഉദ്ദേശിക്കുന്നത്; വിശദമാക്കുമോ?

ഈ സര്‍ക്കാര്‍ അധികാരത്തില്‍ വന്ന ശേഷം കെ. എസ്. ആര്‍. ടി. സി. യ്ക്കായി എത്ര പുതിയ ബസുകള്‍ വാങ്ങി സര്‍വീസ് ആരംഭിച്ചിട്ടുണ്ടെന്നും എത്ര പഴയ ബസുകള്‍ നിരത്തില്‍ നിന്ന് പിന്‍വലിച്ചിട്ടുണ്ടെന്നും വ്യക്തമാക്കാമോ?

01.04.2023 മുതൽ നാളിതുവരെ എത്ര പുതിയ ബസ്സുകൾ വാങ്ങിയെന്ന് വ്യക്തമാക്കുമോ; വാങ്ങിയ ബസ്സുകൾ ഏതൊക്കെ കമ്പനി നിർമ്മിതമാണെന്നും ഇതിൽ എത്ര ഇലക്ട്രിക് ബസുകളുണ്ടെന്നും അറിയിക്കുമോ;

കേന്ദ്ര സർക്കാർ പ്രത്യേക പദ്ധതികളിൽ ഉൾപ്പെടുത്തി എത്ര ബസ്സുകൾ നൽകിയെന്ന് വ്യക്തമാക്കുമോ;

ഇപ്രകാരം വാങ്ങിയതും ലഭിച്ചതുമായ ബസ്സുകൾ ഏതൊക്കെ ഡിപ്പോകളിലേക്ക് എത്രയെണ്ണം വീതം അനുവദിച്ചുവെന്ന് വ്യക്തമാക്കുമോ;

ഓർഡർ നൽകിയതിൽ എത്ര ബസ്സുകൾ ഇനി എത്തുവാനുണ്ടെന്നും ഈ ബസ്സുകൾ ഏതൊക്കെ ഡിപ്പോകളിലും റൂട്ടുകളിലും ഉപയോഗിക്കുന്നതിന് നൽകുവാനാണ് തീരുമാനിച്ചിട്ടുള്ളതെന്നും വിശദമാക്കാമോ?

കെ.എസ്.ആര്‍.ടി.സി ഡിപ്പോകളുടെ ഡിപ്പോ കോഡ്, കോഡ് നമ്പരുകള്‍, ഫോണ്‍ നമ്പരുകള്‍, ഒരു സര്‍വ്വീസിലെ ക്രൂവിന്റെ ഫോണ്‍ നമ്പരുകള്‍ മുതലായ വിവരങ്ങള്‍ എന്റെ കെ.എസ്.ആർ.ടി.സി നിയോ-ഒ.പി.ആർ.എസ്, ചലോ എന്നീ മൊബൈല്‍ ആപ്പുകളിലും കെ.എസ്.ആര്‍.ടി.സി വെബ് സൈറ്റിലും സെര്‍ച്ച് ചെയ്ത് കണ്ടുപിടിക്കാവുന്ന വിധത്തില്‍ ഉള്‍പ്പെടുത്തിയിട്ടുണ്ടോ; എങ്കില്‍ പ്രസ്തുത വിവരങ്ങൾ ലഭ്യമാകുന്ന മെനു ഓപ്ഷനുകൾ ഏതെല്ലാമാണെന്ന് വ്യക്തമാക്കാമോ;

പൊതുജനങ്ങള്‍ക്ക് പ്രസ്തുത വിവരങ്ങൾ എപ്രകാരമാണ് ലഭ്യമാകുന്നതെന്ന് വിശദമാക്കുമോ?

വിദ്യാര്‍ത്ഥികള്‍ക്ക് ഓണ്‍ലൈന്‍ മുഖേന അപേക്ഷ സമര്‍പ്പിച്ച് കൺസഷന്‍ ലഭിക്കുന്നതിന് സംവിധാനം നടപ്പിലാക്കിയിട്ടുണ്ടോയെന്ന് വ്യക്തമാക്കാമോ;

നിലവില്‍ വിദ്യാര്‍ത്ഥികള്‍ ഉപയോഗിച്ചു വരുന്ന പേപ്പര്‍ കൺസഷന്‍ കാര്‍ഡുകള്‍ക്ക് പകരം ഡിജിറ്റല്‍ കാര്‍ഡ് സൗകര്യം ഏര്‍പ്പെടുത്തുന്നതിന് നടപടി സ്വീകരിച്ചിട്ടുണ്ടോ; വിശദാംശം നൽകാമോ;

വിദ്യാര്‍ത്ഥികള്‍ക്കായി വിജ്ഞാനവും വിനോദവും സംയോജിപ്പിച്ച് കൊണ്ടുള്ള വിദ്യാഭ്യാസ ടൂറിസം പദ്ധതി ആരംഭിച്ചിട്ടുണ്ടോ; വിശദാംശം നൽകാമോ?

കെ.എസ്.ആർ.ടി.സി. യെ പൊതുമേഖലയിൽ നിലനിർത്താൻ സർക്കാർ നൽകി വരുന്ന സഹായങ്ങൾ എന്തെല്ലാമെന്ന് വിശദീകരിക്കാമോ;

ഭരണപരവും സാമ്പത്തികപരവുമായ നിര്‍വ്വഹണം കാര്യക്ഷമമാക്കിക്കൊണ്ട് കെ.എസ്.ആർ.ടി.സി. യെ മെച്ചപ്പെട്ട പ്രവർത്തന നിലവാരത്തിലേക്ക് ഉയര്‍ത്താൻ കഴിഞ്ഞിട്ടുണ്ടോയെന്ന് വിശദമാക്കാമോ;

ആധുനിക സാങ്കേതികവിദ്യാ സൗകര്യങ്ങൾ ഫലപ്രദമായി വിനിയോഗിച്ച് യാത്രക്കാർക്ക് അന്തർദേശീയ നിലവാരത്തിലുള്ള സേവനങ്ങൾ ലഭ്യമാക്കുവാൻ കഴിഞ്ഞിട്ടുണ്ടോയെന്ന് വിശദമാക്കാമോ;

വാഹനങ്ങളുടെ ശരിയായ വിനിയോഗം, റൂട്ടുകളുടെ ശരിയായ ഉപയോഗം എന്നിവയിലൂടെ വരുമാനം വർദ്ധിപ്പിക്കുന്നതിന് കഴിഞ്ഞിട്ടുണ്ടോയെന്ന് വിശദമാക്കാമോ?

ഇന്ധനച്ചെലവും മലിനീകരണതോതും കുറവായതിനാല്‍ ഇലക്ട്രിക് ബസുകളുടെ ഉപയോഗം വര്‍ദ്ധിപ്പിക്കുന്നതിന് നടപടികള്‍ സ്വീകരിക്കുമോ; വ്യക്തമാക്കുമോ;

ഡീസല്‍ ബസുകളുമായി താരതമ്യം ചെയ്യുമ്പോള്‍ ഇലക്ട്രിക് ബസുകള്‍ സര്‍വ്വീസ് നടത്തിയാല്‍ ലഭിക്കുന്ന സാമ്പത്തിക ലാഭം എത്രയെന്ന് കണക്കാക്കിയിട്ടുണ്ടോ; വ്യക്തമാക്കാമോ;

ഈ സര്‍ക്കാര്‍ അധികാരത്തില്‍ വന്നതിനുശേഷം കെ.എസ്.ആര്‍.ടി.സി. വാങ്ങിയ ഇലക്ട്രിക്, ഡീസല്‍ ബസുകളുടെ എണ്ണം എത്രയെന്നും ഇതിനായി എത്ര തുക ചെലവഴിച്ചിട്ടുണ്ടെന്നും വ്യക്തമാക്കാമോ?

വിവിധ മേഖലകളിൽ നിന്ന് ഉയർന്നുവന്ന നിർദ്ദേശങ്ങൾ പരിഗണിച്ച് ഗതാഗത വകുപ്പ് നടത്തിയ റൂട്ട് ഫോർമുലേഷനുമായി ബന്ധപെട്ട് പുതിയ ബസ് റൂട്ടുകൾക്ക് അനുമതി നൽകിയിട്ടുണ്ടോ; എങ്കില്‍ വിശദാംശം ലഭ്യമാക്കാമോ;

കെ.എസ്.ആർ.ടി.സി. ബസുകളിൽ പതിവായി യാത്ര ചെയ്യുന്നവർക്ക് സീസൺ ടിക്കറ്റ് ഏർപ്പെടുത്താൻ തീരുമാനിച്ചിട്ടുണ്ടോ; വിശദാംശം നല്‍കാമോ?

പൊതുഗതാഗതം ശക്തിപ്പെടുത്തുവാന്‍ എന്തൊക്കെ നടപടികളാണ് സ്വീകരിച്ചു വരുന്നതെന്ന് വ്യക്തമാക്കാമോ;

കെ.എസ്.ആര്‍.ടി.സി. യെ ലാഭകരമാക്കുന്നതിനായി സ്വീകരിച്ച നടപടികൾ എന്തെല്ലാമെന്ന് അറിയിക്കുമോ;

നിലവിൽ പ്രതിദിനം എത്ര കോടി രൂപയാണ് വരുമാനമായി ലഭിക്കുന്നത്; വിശദാംശം നല്‍കാമോ?

കെ.എസ്.ആര്‍.ടി.സി.യുടെ കഴി‍ഞ്ഞ 4 വര്‍ഷത്തെ വരുമാന കണക്ക് മാസം തിരിച്ച് ലഭ്യമാക്കാമോ;

ഈ സർക്കാർ അധികാരത്തിൽ വന്ന ശേഷം കെ.എസ്.ആര്‍.ടി.സി.യെ ലാഭത്തിലാക്കുവാന്‍ ഇതുവരെ സ്വീകരിച്ച നടപടികള്‍ എന്തൊക്കെയാണ്; പ്രസ്തുത നടപടികൾ പ്രയോജനപ്രദമാണോയെന്ന് വിലയിരുത്തിയിട്ടുണ്ടോ; വ്യക്തമാക്കുമോ;

കെ.എസ്.ആര്‍.ടി.സി.യിലെ ജീവനക്കാര്‍ക്കും പെന്‍ഷന്‍കാര്‍ക്കും യഥാസമയം ശമ്പളത്തിലും പെന്‍ഷനിലും വര്‍ദ്ധനവ് നല്‍കുവാന്‍ കഴിയാത്തതിന്റെ കാരണം വിശദമാക്കുമോ;

കെ.എസ്.ആര്‍.ടി.സി.യുടെ ഉടമസ്ഥതയിലുള്ള ചില പ്രധാന കേന്ദ്രങ്ങളിലെ സ്ഥലവും കെട്ടിടവും കെ.ടി.ഡി.എഫ്.സി.-യ്ക്ക് കൈമാറുവാന്‍ തീരുമാനം എടുത്തിട്ടുണ്ടോ; വിശദാംശം ലഭ്യമാക്കാമോ;

ഓരോ ഡിപ്പോയ്ക്കും ഓപ്പറേറ്റിംഗ് സെന്ററുകള്‍ക്കും പ്രതിമാസം കളക്ട് ചെയ്യേണ്ടതായ തുക സംബന്ധിച്ച് പുതിയ നിര്‍ദേശം നല്‍കിയിട്ടുണ്ടോ; വ്യക്തമാക്കാമോ?

കെ.എസ്.ആര്‍.ടി.സി.യുടെ നിലവിലുള്ള സാമ്പത്തിക പ്രതിസന്ധി മറികടന്ന് ലാഭത്തിലെത്തിക്കുന്നതിനായി എന്തെല്ലാം പരിഷ്കാരങ്ങളാണ് നടപ്പിലാക്കുന്നതെന്ന് വിശദമാക്കാമോ;

നിലവിലെ സര്‍ക്കാര്‍ അധികാരത്തില്‍ വന്ന ശേഷം എത്ര പുതിയ ബസുകളാണ് നിരത്തിലിറക്കിയിട്ടുള്ളതെന്ന് വിശദമാക്കാമോ?

കെ.എസ്.ആർ.ടി.സി. യിൽ കഴിഞ്ഞ അഞ്ച് വർഷത്തിനിടെ എത്ര ബസുകള്‍ക്കാണ് കാലാവധി കഴിഞ്ഞിട്ടും നിരത്തുകളിലൂടെ ഓടുന്നതിനായി കാലാവധി നീട്ടി നൽകിയിട്ടുള്ളതെന്ന് വ്യക്തമാക്കുമോ; ഇതിന് ആധാരമായ സാഹചര്യം വിശദമാക്കുമോ;

നിലവിലുള്ള മാനദണ്ഡങ്ങൾ പ്രകാരം ഗതാഗത വകുപ്പിൽ എത്ര വര്‍ഷം വരെ പഴക്കമുള്ള വാഹനങ്ങളാണ് പൊതുഗതാഗതത്തിന് ഉപയോഗിക്കുവാൻ അനുമതിയുളളത്; വിശദമാക്കുമോ;

കാലാവധി കഴിഞ്ഞ വാഹനങ്ങൾ ഉള്‍പ്പെടെ ബജറ്റ് ടൂറിസത്തിനായി ഉപയോഗിക്കുന്ന സാഹചര്യമുണ്ടോ; വ്യക്തമാക്കുമോ?

തിരുവനന്തപുരം നഗരസഭയിലെ ഇലക്ട്രിക് ബസുകള്‍ ഗ്രാമീണ മേഖലയിലേക്ക് മാറ്റുന്നതുമായി ബന്ധപ്പെട്ട് സര്‍ക്കാരും നഗരസഭയും തമ്മിലുള്ള തര്‍ക്കം ബസ് സര്‍വീസുകളെ ഏതെങ്കിലും തരത്തില്‍ ബാധിക്കുമെന്ന് കരുതുന്നുണ്ടോ; വിശദമാക്കാമോ;

ഈ തര്‍ക്കം പരിഹരിക്കുന്നതിന് സ്വീകരിച്ചിട്ടുള്ള നടപടികള്‍ വിശദമാക്കാമോ?

കെ.എസ്.ആർ.ടി.സി. സ്വിഫ്റ്റ് ബസുകളിലേക്ക് വനിതാ ഡ്രൈവർ കം കണ്ടക്ടർമാരെ നിയമിക്കുന്നതിന് ബോർഡ് തീരുമാനിക്കുകയുണ്ടായോ;

കെ.എസ്.ആർ.ടി.സി. യിൽ നിലവിൽ എത്ര വനിതാ ജീവനക്കാരാണുള്ളതെന്നും എത്ര വനിതാ ഡ്രൈവർ കം കണ്ടക്ടർമാരെ നിയമിക്കുന്നതിനാണ് കോർപ്പറേഷൻ ആലോചിക്കുന്നതെന്നും വിശദമാക്കാമോ;

കെ.എസ്.ആർ.ടി.സി. യിലെയും കെ.എസ്.ആർ.ടി.സി. സ്വിഫ്റ്റിലെയും വനിതാ ഡ്രൈവർ കം കണ്ടക്ടർമാരുടെ നിലവിലെ സേവന വേതന വ്യവസ്ഥകൾ വിശദമാക്കുമോ;

ഇപ്രകാരമുള്ള നിയമനങ്ങള്‍ നടത്തുമ്പോൾ വനിതാ ജീവനക്കാർക്ക് മതിയായ പ്രാഥമിക ആവശ്യങ്ങളുള്‍പ്പടെയുള്ള അടിസ്ഥാന സൗകര്യങ്ങൾ ഉറപ്പാക്കുന്നതിനായി ബോർഡ് എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദാംശം ലഭ്യമാക്കുമോ?

കെ.എസ്.ആര്‍.ടി.സി.യിലെ സ്ഥിരം ജീവനക്കാര്‍ക്ക് എസ്.എല്‍.ഐ. പോളിസി നിര്‍ബന്ധമാക്കിയിട്ടുണ്ടോ; എങ്കില്‍ ഈ പോളിസി ആരംഭിക്കുന്നതിനുളള പ്രായപരിധി എത്രയായിട്ടാണ് എസ്.എല്‍.ഐ. ചട്ടത്തില്‍ വ്യവസ്ഥ ചെയ്തിരിക്കുന്നത്; വ്യക്തമാക്കാമോ;

പ്രായപരിധി കഴിഞ്ഞ ജീവനക്കാരില്‍ ആരുടെയെങ്കിലും പക്കല്‍നിന്നും നിലവിലുളള പോളിസിക്ക് പുറമെ പുതുതായി വീണ്ടും എസ്.എല്‍.ഐ. പോളിസി ആരംഭിക്കുന്നതിനുള്ള അപേക്ഷ ബന്ധപ്പെട്ട കെ.എസ്.ആര്‍.ടി. ഉദ്യോഗസ്ഥര്‍ എഴുതിവാങ്ങുകയും പ്രസ്തുത അപേക്ഷകരുടെ പ്രതിമാസ ശമ്പളത്തില്‍നിന്നും രണ്ടാമതായി ആരംഭിച്ച പോളിസിക്കും പ്രീമിയം തുക പിടിക്കുന്നുണ്ടോ; എങ്കില്‍ അത് ചട്ടപ്രകാരമാണോ എന്ന് അറിയിക്കുമോ;

ഇത്തരക്കാരില്‍ നിന്നും രണ്ടാമതായും ഒരു പ്രീമിയം തുക പിടിക്കാനിടയായ സാഹചര്യം ഗൗരവമായി കണ്ടിട്ടുണ്ടോ; എങ്കില്‍ കുറ്റക്കാര്‍ക്കെതിരെ എന്തെങ്കിലും നടപടി നാളിതുവരെ സ്വീകരിച്ചിട്ടുണ്ടോ; ഇല്ലെങ്കില്‍ സ്വീകരിക്കാനുദ്ദേശിക്കുന്ന നടപടികള്‍ വിശദമാക്കുമോ;

കെ.എസ്.ആര്‍.ടി.സി. പാപ്പനംകോട് ഡിപ്പോയില്‍ സ്ഥിരം ജീവനക്കാരന്‍ (ഐ.ഡി.നം.ജി18376)-ന്റെ പേരില്‍ എത്ര എസ്.എല്‍.ഐ. പോളിസികള്‍ എന്നുമുതല്‍ ആരംഭിച്ചുവെന്നും ഇവയ്ക്ക് പ്രതിമാസം പിടിച്ച പ്രീമിയം തുകയുടെ കണക്കുകളുള്‍പ്പെടെ പട്ടിക തിരിച്ച് ലഭ്യമാക്കുമോ;

എസ്.എല്‍.ഐ.യുടെ നിലവിലുളള മാനദണ്ഡപ്രകാരം ടിയാന് വീണ്ടും ഒരു പോളിസി കൂടി തുടങ്ങുന്നതിന് അര്‍ഹതയുണ്ടോ; ഇല്ലെങ്കില്‍ വീണ്ടും ഒരു എസ്.എല്‍.ഐ. പോളിസി ആരംഭിക്കാന്‍ ടിയാനില്‍നിന്നും അപേക്ഷ ബന്ധപ്പെട്ട കെ.എസ്.ആര്‍.ടി.സി. ഉദ്യോഗസ്ഥര്‍ എഴുതിവാങ്ങിയിരുന്നോ; എങ്കില്‍ അത് ക്രമപ്രകാരമായിരുന്നോ എന്ന് വിശദമാക്കുമോ;

ആരംഭിച്ചിട്ടില്ലാത്ത എസ്.എല്‍.ഐ.യുടെ പേരില്‍ എത്രരൂപ എന്നുമുതല്‍ ടിയാന്റെ പ്രതിമാസ ശമ്പളത്തില്‍നിന്ന് പിരിച്ചിട്ടുണ്ട്; ചട്ടപ്രകാരമല്ലാതെ പ്രീമിയം തുക പിടിച്ച ഉദ്യോഗസ്ഥര്‍ക്കെതിരെ എന്തുനടപടിയാണ് സ്വീകരിച്ചതെന്ന് വ്യക്തമാക്കുമോ; ടിയാന്റെ ശമ്പളത്തില്‍നിന്നും ഇല്ലാത്ത പോളിസിക്ക് വേണ്ടി അനധികൃതമായി കെ.എസ്.ആര്‍.ടി.സി. പിടിച്ചെടുത്ത തുക ഒന്നടങ്കം ഉടന്‍ പ്രാബല്യത്തോടെ തിരിച്ചുനല്‍കുന്നതിന് അടിയന്തര നിര്‍ദ്ദേശം നല്‍കുമോ; വ്യക്തമാക്കാമോ?

കെ.എസ്.ആർ.ടി.സി.യിൽ ഡ്രൈവർ, കണ്ടക്ടർ, ഡ്രൈവർ കം കണ്ടക്ടർ തസ്തികകളിൽ പി.എസ്.സി. മുഖേന അവസാനമായി സ്ഥിരനിയമനം നടത്തിയത് എന്നാണെന്നും ഓരോ തസ്തികയിലും എത്ര പേർക്ക് നിയമനം നൽകിയിട്ടുണ്ടെന്നുമുള്ള വിശദാംശം ലഭ്യമാക്കാമോ;

മേൽപ്പറഞ്ഞ തസ്തികകളിലേക്ക് താൽക്കാലിക നിയമനം നടത്തുന്നതിനായി കെ.എസ്.ആർ.ടി.സി. എംപ്ലോയ്മെന്റ് ഡയറക്ടർക്ക് കത്ത് നൽകിയിട്ടുണ്ടോ; എങ്കിൽ എത്ര തസ്തികകളിലേക്കാണ് ഇപ്രകാരം നിയമനം നടത്താൻ ഉദ്ദേശിക്കുന്നത്; വിശദമാക്കാമോ;

മേൽപ്പറഞ്ഞ തസ്തികകളിൽ പി.എസ്.സി. മുഖേനയുള്ള നിയമനം പൂർണമായും ഒഴിവാക്കുവാൻ തീരുമാനിച്ചതിന്റെ അടിസ്ഥാനത്തിലാണോ താൽക്കാലിക നിയമനം നടത്തുന്നത്; വ്യക്തമാക്കുമോ;

ലക്ഷക്കണക്കിനുവരുന്ന ഉദ്യോഗാർത്ഥികളായ യുവജനങ്ങളെ പരിഗണിച്ച് താൽക്കാലിക നിയമനം നടത്താനുള്ള നിലപാടിൽ നിന്ന് പിന്മാറാൻ സർക്കാർ തയ്യാറാകുമോ; വ്യക്തമാക്കാമോ?

കായംകുളം കെ.എസ്.ആര്‍.ടി.സി. ഡിപ്പോയില്‍ 2016 മുതല്‍ നാളിതുവരെ അനുവദിച്ച പുതിയ സര്‍വീസുകള്‍ ഏതൊക്കെ; വിശദാംശം നല്‍കാമോ?

2021 മെയ് മാസം മുതല്‍ ഇതുവരെ കുറ്റ്യാടി മണ്ഡലത്തിലെ ഗതാഗത പ്രശ്നങ്ങള്‍ പരിഹരിക്കുന്നതിനായി സ്വീകരിച്ച നടപടിക്രമങ്ങള്‍ എന്തൊക്കെയാണെന്ന് വിശദമാക്കാമോ;

ഗതാഗത പ്രശ്നങ്ങള്‍ പരിഹരിക്കുന്നതിന്റെ ഭാഗമായി പ്രസ്തുത കാലയളവില്‍ എത്ര കെ.എസ്.ആര്‍.ടി.സി. ബസ് സര്‍വീസുകള്‍ അനുവദിച്ചിട്ടുണ്ടെന്ന് വിശദമാക്കാമോ?

തിരുവമ്പാടി കെ.എസ്.ആര്‍.ടി.സി. സബ്‍ഡിപ്പോ നിര്‍മ്മാണം ഇപ്പോള്‍ ഏത് ഘട്ടത്തിലാണുളളതെന്ന് വ്യക്തമാക്കാമോ;

പ്രസ്തുത നിര്‍മ്മാണം എപ്പോള്‍ പൂര്‍ത്തിയാക്കുവാൻ കഴിയുമെന്ന് വിശദമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ഗുരുവായൂര്‍ ഡിപ്പോയില്‍ നിന്നും പുതിയതായി ആരംഭിച്ച സര്‍വീസുകളുടെ വിവരങ്ങള്‍ ലഭ്യമാക്കാമോ;

കെ.എസ്.ആര്‍.ടി.സി. ഡ്രൈവിംഗ് സ്കൂള്‍ ആരംഭിക്കുന്നതുമായി ബന്ധപ്പെട്ട് ഇതുവരെ സ്വീകരിച്ച നടപടികള്‍ വിശദമാക്കാമോ?

തൃശ്ശൂര്‍ ജില്ലയിലെ പുതുക്കാട് മുതല്‍ മുപ്ലിയം വരെ വര്‍ഷങ്ങളായി ലാഭകരമായി സര്‍വ്വീസ് നടത്തിയിരുന്ന കെ.എസ്.ആര്‍.ടി.സി. ബസ് സര്‍വ്വീസ്, നിശ്ചിത സമയക്രമമനുസരിച്ച് രാവിലെയും വൈകിട്ടും സര്‍വ്വീസ് നടത്തുന്നതില്‍ വീഴ്ച വരുത്തുന്നത് ശ്രദ്ധയില്‍പ്പെട്ടിട്ടുണ്ടോ;

പ്രസ്തുത സര്‍വ്വീസ് മുടക്കം കൂടാതെ നടത്തുന്നതിന് ആവശ്യമായ നടപടികള്‍ സ്വീകരിക്കുമോ;

തൃശ്ശൂരില്‍ നിന്നും പുതുക്കാട് - ചെങ്ങാലൂര്‍ വഴി ഇഞ്ചക്കുണ്ട് വരെ സര്‍വ്വീസ് നടത്തുന്ന കെ. എസ്. ആര്‍.ടി.സി.ബസ് കോടാലി സെന്റര്‍ വരെ സര്‍വ്വീസ് നീട്ടുന്നതിനായി സമര്‍പ്പിച്ചിട്ടുളള അപേക്ഷയില്‍ നടപടി സ്വീകരിച്ചിട്ടുണ്ടോ; ഇല്ലെങ്കിൽ നടപടി സ്വീകരിക്കുമോ;

കൂടുതല്‍ കെ.എസ്.ആര്‍.ടി.സി.ബസ് സര്‍വ്വീസുകള്‍ പുതുക്കാട് മണ്ഡലത്തിലെ മലയോര മേഖലകളിലേക്ക് സര്‍വ്വീസ് നടത്തുന്നതിന് നടപടി സ്വീകരിക്കുമോ; വ്യക്തമാക്കുമോ?

നിലവിലെ സർക്കാരിന്റെ കാലയളവിൽ നാദാപുരം മണ്ഡലത്തില്‍ അനുവദിച്ച ബസ് റൂട്ടുകളുടെ വിശദാംശം ലഭ്യമാക്കാമോ?

എറണാകുളത്ത് പുതിയ കെ.എസ്.ആർ.ടി.സി. ബസ് സ്റ്റാന്‍‍ഡ് നിർമ്മിക്കുന്നത് സംബന്ധിച്ച നടപടിക്രമങ്ങളുടെ നിലവിലെ സ്ഥിതി വ്യക്തമാക്കാമോ?

പൂഞ്ഞാർ മണ്ഡലത്തിലെ എരുമേലിയിൽ പ്രവർത്തിക്കുന്ന കെ.എസ്.ആർ.ടി.സി. ഓപ്പറേറ്റിങ് സെന്ററിന്റെ ഓഫീസ് ആയി പ്രവർത്തിക്കുന്ന ദേവസ്വം ബോർഡ് വക കെട്ടിടം 2021-ലെ പ്രളയത്തിൽ തകര്‍ന്ന് അങ്ങേയറ്റം ശോച്യാവസ്ഥയിലായിരിക്കുന്നതിനാൽ പ്രസ്തുത ഓഫീസ് മാറ്റി പ്രവർത്തിപ്പിക്കുന്നതിന് നടപടി സ്വീകരിക്കണമെന്ന ആവശ്യത്തിന്മേൽ സ്വീകരിച്ചുവരുന്ന നടപടികളുടെ വിശദാംശം വ്യക്തമാക്കുമോ?

ഹരിപ്പാട് കെ. എസ്. ആര്‍. ടി. സി. ഡിപ്പോയില്‍ നിന്നും സര്‍വീസ് നടത്തുന്ന ഹരിപ്പാട്-ബാംഗ്ലൂര്‍ വീക്കെന്‍ഡ് ഡീലക്സ് സര്‍വ്വീസ് യാത്രക്കാരുടെ ആവശ്യം പരിഗണിച്ച് എ. സി. സീറ്റര്‍ കം സ്ലീപ്പര്‍, ഡെയിലി സര്‍വ്വീസ് ആക്കി മാറ്റുന്നതിനുള്ള നടപടി സ്വീകരിക്കാമോ;

ഹരിപ്പാട് കെ.എസ്.ആര്‍.ടി.സി. ഡിപ്പോയില്‍ നിന്നും കല്‍പ്പറ്റയിലേക്ക് സൂപ്പര്‍ഫാസ്റ്റ് ഡീലക്സ് സര്‍വ്വീസും കോയമ്പത്തൂര്‍, നെടുമ്പാശ്ശേരി എയര്‍പോര്‍ട്ടിലേക്ക് എ.സി. പ്രീമിയം സൂപ്പര്‍ഫാസ്റ്റ് ബസ്സ് സര്‍വീസും ആരംഭിക്കുന്നതിനുള്ള നടപടി സ്വീകരിക്കുമോ; ഹരിപ്പാട് ഡിപ്പോയിലേക്ക് കൂടുതല്‍ പുതിയ ബസുകള്‍ അനുവദിക്കുമോ;

ഹരിപ്പാട് മണ്ഡലത്തിലെ വിവിധ പ്രദേശങ്ങളിലേക്ക് കൂടുതല്‍ ഓര്‍ഡിനറി സര്‍വ്വീസുകള്‍ ആരംഭിക്കുന്നതിന് നടപടി സ്വീകരിക്കുമോ;

ഹരിപ്പാട് മണ്ഡലത്തില്‍ ആരംഭിക്കാന്‍ ഉദ്ദേശിക്കുന്ന കെ. എസ്. ആര്‍. ടി. സി. ഡ്രൈവിംഗ് സ്കൂളിന്റെ നിര്‍വഹണ വിശദാംശവും പുരോഗതിയും അറിയിക്കാമോ?

2022-23 വർഷത്തെ ബജറ്റില്‍ അഞ്ച് കോടി രൂപ വകയിരുത്തിയിട്ടുള്ള കെ.എസ്.ആര്‍.ടി.സി. ബസ് സ്റ്റേഷന്റെ ഇളംമ്പളളൂരിൽ കണ്ടെത്തിയ സ്ഥലത്ത് നിർമ്മാണ പ്രവർത്തനങ്ങൾ ആരംഭിക്കുന്നതിനുള്ള എസ്റ്റിമേറ്റ് തയ്യാറാക്കുന്നതുമായി ബന്ധപ്പെട്ട് പൊതുമരാമത്ത് വകുപ്പ് കെ.എസ്.ആര്‍.ടി.സി.ക്ക് നൽകിയ കത്തിന്മേല്‍ (കത്ത്.നം. AEEBL -SDOKLM/178/2025/D3-PWD. തീയതി, 5/8/2025) എന്തൊക്കെ നടപടികളാണ് സ്വീകരിച്ചിട്ടുളളതെന്ന് വിശദമാക്കാമോ;

പ്രസ്തുത ബസ് സ്റ്റേഷന്‍ നിര്‍മ്മാണവുമായി ബന്ധപ്പെട്ട് കുണ്ടറയില്‍ കെ.എസ്.ആര്‍.ടി.സി. യുടെ ഓപ്പറേറ്റിംഗ് സ്റ്റേഷന്‍ ആരംഭിക്കുന്നത് സംബന്ധിച്ച് എന്തൊക്കെ നടപടികളാണ് സ്വീകരിച്ചിട്ടുളളതെന്ന് വിശദമാക്കാമോ;

കുണ്ടറ മണ്ഡലത്തിന്റെ പരിധിയില്‍ നിലവില്‍ കെ.എസ്.ആര്‍.ടി.സി. ബസ് സ്റ്റേഷനോ ഓപ്പറേറ്റിംഗ് സ്റ്റേഷനോ ഇല്ലായെന്നത് കണക്കിലെടുത്ത് ആയത് അനുവദിക്കുന്നതിനുളള നടപടി സ്വീകരിക്കുമോ?

എറണാകുളം ഭാഗത്ത് നിന്ന് തിരുവനന്തപുരത്തേക്ക് വരുന്ന കെ.എസ്.ആര്‍.ടി.സി. സൂപ്പർ ഫാസ്റ്റ് ബസുകൾ ചേർത്തല ബസ് സ്റ്റാൻഡിൽ കയറാതെ പോകുന്നത് ശ്രദ്ധയിൽപ്പെട്ടിട്ടുണ്ടോ;

ചേർത്തല റെയിൽവേ സ്റ്റേഷൻ വഴി സ്ഥിരമായി ഓടിക്കൊണ്ടിരുന്ന കെ.എസ്.ആര്‍.ടി.സി. ഓർഡിനറി ബസ്സുകളുടെ റൂട്ട് മാറ്റിയതിനാൽ വൈകുന്നേരം ആറ് മണി മുതൽ എട്ട് മണിവരെയുളള സമയങ്ങളിൽ യാത്രക്കാർ ബുദ്ധിമുട്ടുന്ന കാര്യം ശ്രദ്ധയിൽപ്പെട്ടിട്ടുണ്ടോയെന്ന് വ്യക്തമാക്കാമോ; എങ്കിൽ ആയത് പരിഹരിക്കുന്നതിന് സ്വീകരിച്ച നടപടികൾ വിശദമാക്കുമോ?

പാലക്കാട് നിന്ന് കോങ്ങാട് വഴി ചെർപ്പുളശ്ശേരിക്കും തിരിച്ച് പാലക്കാട്ടേക്കും രാത്രി സമയങ്ങളിൽ ബസ് സർവീസ് ഇല്ലാത്തതിനാൽ കോങ്ങാട്, കേരളശ്ശേരി തുടങ്ങിയ പ്രദേശങ്ങളിലെ യാത്രക്കാർ നേരിടുന്ന ബുദ്ധിമുട്ട് ശ്രദ്ധയിൽപ്പെട്ടിട്ടുണ്ടോ;

പ്രസ്തുത പ്രദേശ നിവാസികളുടെ രാത്രി സമയത്തെ യാത്രാക്ലേശം പരിഹരിക്കുന്നതിനായി മുണ്ടൂർ-കോങ്ങാട്–ചെർപ്പുളശ്ശേരി വഴി കെ.എസ്.ആർ.ടി.സി. ബസ് സർവീസ് അനുവദിക്കുന്നതിന് നടപടി സ്വീകരിക്കുമോ?

ലാഭകരമായി സര്‍വീസ് നടത്തിയിരുന്ന കൊടിയത്തൂര്‍-കോഴിക്കോട് കെ.എസ്.ആര്‍.ടി.സി. സര്‍വീസ് പുനഃസ്ഥാപിക്കണമെന്ന ആവശ്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത സര്‍വീസ് പുനഃസ്ഥാപിക്കുന്നതിന് നടപടികള്‍ സ്വീകരിക്കുമോ; വ്യക്തമാക്കാമോ?

കോഴിക്കോട് ബസ് സ്റ്റാന്‍ഡില്‍ നിന്നും കാരപ്പറമ്പ്, കൃഷ്ണമേനോന്‍ മ്യൂസിയം, കേന്ദ്രീയവിദ്യാലയം എന്നിവ സ്ഥിതിചെയ്യുന്ന ഈസ്റ്റ്ഹില്‍ വഴി കൂത്തുപറമ്പിലേക്ക് ബസ് റൂട്ട് അനുവദിക്കുന്നതിന് നടപടി സ്വീകരിച്ചിട്ടുണ്ടോ;

ഇല്ലെങ്കില്‍ ഈ റൂട്ടില്‍ ബസ് അനുവദിക്കുന്നതിന് നടപടി സ്വീകരിക്കുമോ?

കെ.എസ്.ആർ.ടി.സി. പമ്പയിലും നിലയ്ക്കലും മറ്റ് ശബരിമല സ്പെഷ്യൽ സർവ്വീസ് സെന്ററുകളിലും 25-12-2025 മുതൽ 06-01-2026 വരെ ഓരോ ദിവസവും 00.00 AM മുതൽ 11.59 PM വരെ എത്ര ഷെഡ്യൂളുകൾ ഓപ്പറേറ്റ് ചെയ്തുവെന്നും അതിൽ ഓരോ ഷെഡ്യൂളുകളുടേയും പ്രതിദിന വരുമാനം എത്രയെന്നും വ്യക്തമാക്കാമോ;

പ്രസ്തുത ദിവസങ്ങളിലെ പമ്പ-നിലയ്ക്കൽ ചെയിൻ സർവീസുകളുടെ പ്രതിദിന കളക്ഷൻ ഇനം തിരിച്ച് വ്യക്തമാക്കാമോ?

ആറ്റിങ്ങല്‍ കച്ചേരിനടയും കെ.എസ്.ആര്‍.ടി.സി. ബസ് സ്റ്റാന്‍ഡും ഐഡന്റിക്കല്‍ ഫെയര്‍ സ്റ്റേജ് ആക്കി നിര്‍ണ്ണയിക്കണമെന്ന അപേക്ഷ ലഭിച്ചിട്ടുണ്ടോ; എങ്കില്‍ സ്വീകരിച്ച നടപടികള്‍ വിശദമാക്കാമോ?

ഈരാറ്റുപേട്ട കെ.എസ്.ആർ.ടി.സി. ഡിപ്പോയില്‍ ഒഴിഞ്ഞുകിടക്കുന്ന സ്ഥലം പ്രയോജനപ്പെടുത്തി എം.എൽ.എ. ഫണ്ട് ഉപയോഗിച്ച് ഒരു ഡോർമെറ്ററി കോംപ്ലക്സ് നിർമ്മിക്കുന്നതിനുള്ള അനുമതിക്കായി നൽകിയ അപേക്ഷയിന്മേൽ സ്വീകരിച്ചുവരുന്ന നടപടികളുടെ വിശദാംശം വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം അരുവിക്കര മണ്ഡലത്തിലെ വിതുര, ആര്യനാട്, വെള്ളനാട് എന്നീ കെ.എസ്.ആർ.ടി.സി. ഡിപ്പോകളില്‍ നിന്നും പുതിയതായി ആരംഭിച്ച സര്‍വീസുകളുടെയും പുനസ്ഥാപിച്ച സര്‍വീസുകളുടെയും വിശദാംശം അറിയിക്കുമോ?

ഗുരുവായൂര്‍ കെ.എസ്.ആര്‍.ടി.സി. ബസ് സ്റ്റാന്‍ഡില്‍ നിന്നും മണലൂര്‍ മണ്ഡലത്തിലെ പാവറട്ടി, പുവ്വത്തൂര്‍ വഴിയും തിരിച്ച് അതേ റൂട്ടില്‍ ഗുരുവായൂരിലേക്കും എത്ര കെ.എസ്.ആര്‍.ടി.സി. ബസുകള്‍ സര്‍വ്വീസ് നടത്തുന്നുണ്ടെന്ന് വിശദമാക്കാമോ;

പ്രസ്തുത റൂട്ടിലെ കായംകുളം ബസ് നിലവില്‍ കൃത്യമായി സര്‍വ്വീസ് നടത്തുന്നുണ്ടോ എന്ന് വ്യക്തമാക്കാമോ;

പ്രസ്തുത ബസ് സര്‍വ്വീസ് ഇടയ്ക്കിടക്ക് മുടങ്ങുന്നതുമൂലം യാത്രക്കാര്‍ വലിയ ബുദ്ധിമുട്ടനുഭവിക്കുന്നതിനാല്‍ പ്രസ്തുത സര്‍വ്വീസ് മുടക്കംകൂടാതെ നടത്തുന്നതിന് വേണ്ട നടപടികള്‍ സ്വീകരിക്കുമോയെന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്ന ശേഷം ചങ്ങനാശ്ശേരി കെ.എസ്.ആര്‍.ടി.സി. ഡിപ്പോയില്‍ നിന്ന് പുതിയതായി ഏതെല്ലാം സര്‍വീസുകളാണ് ആരംഭിച്ചിട്ടുള്ളതെന്ന് വ്യക്തമാക്കുമോ;

പ്രസ്തുത ഡിപ്പോയില്‍ നിന്ന് അമൃത ആശുപത്രിയിലേക്കുള്ള സര്‍വീസ്, ചങ്ങനാശ്ശേരി-ഗുരുവായൂര്‍ സര്‍വീസ് എന്നിവ പുനരാരംഭിക്കുന്നതിന് നടപടികള്‍ സ്വീകരിച്ചിട്ടുണ്ടോ; വിശദമാക്കാമോ;

ചങ്ങനാശ്ശേരി ഡിപ്പോയില്‍ നിന്ന് ബാംഗ്ലൂര്‍ സര്‍വീസ് ആരംഭിക്കണമെന്ന് അഭ്യര്‍ത്ഥിച്ച് നിവേദനം ലഭിച്ചിട്ടുണ്ടോ; എങ്കിൽ പ്രസ്തുത സര്‍വീസ് ആരംഭിക്കുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ?

നിലമ്പൂർ കെ.എസ്.ആർ.ടി.സി സബ് ഡിപ്പോയിൽ നിന്ന് മുൻപ് 42 സർവീസുകൾ ഓപ്പറേറ്റ് ചെയ്തിരുന്നതിൽ നിലവിൽ 31 സർവീസുകൾ മാത്രമേയുള്ളൂവെന്നത് ശ്രദ്ധയിൽപ്പെട്ടിട്ടുണ്ടോ; എങ്കിൽ റദ്ദാക്കിയ സർവീസുകൾ പുനഃസ്ഥാപിക്കുന്നതിന് ആവശ്യമായ നടപടികൾ സ്വീകരിക്കുമോ?

താമരശ്ശേരി കൊയിലാണ്ടി റൂട്ടില്‍ നേരത്തെ ഉണ്ടായിരുന്നതും ഇപ്പോള്‍ നിലവിലില്ലാത്തതുമായ എത്ര കെ.എസ്.ആര്‍.ടി.സി. സര്‍വീസുകളുണ്ടെന്ന് അറിയിക്കുമോ;

താമരശ്ശേരി കൊയിലാണ്ടി റൂട്ടില്‍ രാത്രികാലയാത്രയ്ക്ക് വളരെ പ്രയാസമുണ്ടാകുന്നതിനാല്‍ പ്രസ്തുത റൂട്ടിലേക്ക് പുതിയ ബസ് അനുവദിക്കാന്‍ നടപടി സ്വീകരിക്കുമോ; വ്യക്തമാക്കാമോ?

കോഴിക്കോട് നിന്ന് മെഡിക്കല്‍ കോളേജ്, കുറ്റിക്കാട്ടൂര്‍, പൂവ്വാട്ടുപറമ്പ്, പെരുവയല്‍, മാവൂര്‍ വഴി കൂളിമാട് ഭാഗത്തേക്ക് രാത്രി 08.30 ന് ശേഷം ബസ് സര്‍വ്വീസ് ഇല്ലാത്തത് ജനവാസ കേന്ദ്രമായ ഈ പ്രദേശങ്ങളിലേക്കുള്ള യാത്രക്കാരെ ഏറെ പ്രയാസപ്പെടുത്തുണ്ടെന്ന പരാതി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യത്തില്‍ സ്വീകരിക്കാന്‍ ഉദ്ദേശിക്കുന്ന നടപടികള്‍ വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം ഗതാഗത വകുപ്പ് മുഖേന കല്ല്യാശ്ശേരി മണ്ഡലത്തിൽ നടപ്പിലാക്കിയ പദ്ധതികളുടെ വിശദാംശം ലഭ്യമാക്കാമോ?

ഗതാഗത വകുപ്പിന്റെ നേതൃത്വത്തിൽ അഴീക്കോട് മണ്ഡലത്തിൽ നടപ്പിലാക്കിയിട്ടുളള പ്രവൃത്തികൾ ഏതൊക്കെയാണെന്ന് വ്യക്തമാക്കാമോ?

ഗതാഗത പ്രശ്നങ്ങള്‍ പരിഹരിക്കുന്നതിനായി വിളിച്ചുചേര്‍ത്ത ജനകീയ സദസ്സുകളില്‍ വാമനപുരം മണ്ഡലത്തില്‍ നിന്നുയര്‍ന്ന പരാതികളിന്മേല്‍ ഇതുവരെ സ്വീകരിച്ച നടപടികള്‍ വിശദമാക്കാമോ?

അരൂർ മണ്ഡലത്തിലെ പാണാവളളി-എറണാകുളം ബോട്ട് സർവീസ് നിർത്തലാക്കിയതിന്റെ കാരണം വിശദമാക്കാമോ;

പ്രസ്തുത ബോട്ട് സർവ്വീസ് നടത്തിയിരുന്ന പ്രദേശത്ത് മറ്റ് ബോട്ടുകൾ സർവീസ് നടത്തുന്ന കാര്യം ശ്രദ്ധയിൽപ്പെട്ടിട്ടുണ്ടോ;

പാണാവളളി-എറണാകുളം ബോട്ട് സർവീസ് പുനരാരംഭിക്കാൻ നടപടികൾ സ്വീകരിച്ചിട്ടുണ്ടോ; എങ്കില്‍ വിശദമാക്കാമോ?

ട്രാഫിക് നിയമ ലംഘനങ്ങൾക്കുള്ള ചെലാൻ യഥാസമയം അടയ്ക്കാതെ കേസ് കോടതികളിലേക്ക് കൈമാറിയാൽ പിന്നീട് ചെലാൻ അടയ്ക്കുന്നതിനുള്ള നടപടിക്രമങ്ങൾ എന്തൊക്കെയാണെന്ന് വ്യക്തമാക്കുമോ;

ഈ സർക്കാരിന്റെ കാലയളവിൽ കോടതികളിലേക്ക് കൈമാറിയ ചെലാനുകളിൽ എത്രയെണ്ണം നാളിതുവരെ തീർപ്പാക്കിയിട്ടുണ്ട്; എത്രയെണ്ണം തീർപ്പാക്കുവാൻ ഉണ്ട്; വിശദാംശം ലഭ്യമാക്കുമോ?

മലപ്പുറം റീജിയണൽ ട്രാൻസ്‌പോർട്ട് ഓഫീസിന് പുതിയ കെട്ടിടം നിർമ്മിക്കുന്നതിലേക്കായി 30 സെന്റ് സ്ഥലത്തിന്റെ കൈവശാവകാശം മോട്ടോർ വാഹന വകുപ്പിന് കൈമാറി ഒരു വർഷമായിട്ടും കെട്ടിടം നിർമ്മിക്കുന്നതിലുള്ള കാലതാമസം വ്യക്തമാക്കാമോ;

കേരള പോലീസ് ഹൗസിങ് ആന്റ് കൺസ്ട്രക്ഷൻ കോർപ്പറേഷൻ തയ്യാറാക്കിയ പുതുക്കിയ പ്ലാനും എസ്റ്റിമേറ്റും സഹിതം ഗതാഗത കമ്മീഷണർ സർക്കാരിൽ സമർപ്പിച്ച റീ-അപ്രൊപ്രിയേഷൻ പ്രൊപ്പോസലിന് അംഗീകാരം നൽകിയിട്ടുണ്ടോ; വിശദാംശം നൽകുമോ;

പ്രസ്തുത പദ്ധതിക്ക് പുതുക്കിയ ഭരണാനുമതി എന്നത്തേക്ക് നൽകാൻ സാധിക്കുമെന്ന് വെളിപ്പെടുത്തുമോ?

വാഹനങ്ങളുടെ ഫിറ്റ്നസ് പരിശോധനയ്ക്കുള്ള ഫീസ് കുറച്ച് ഉത്തരവിറക്കിയിട്ടും മോട്ടോർ വാഹന വകുപ്പ് ഉയർന്ന ഫീസ് ഈടാക്കുന്നത് ശ്രദ്ധയിൽപ്പെട്ടിട്ടുണ്ടോ; വ്യക്തമാക്കുമോ;

ഉദ്യോഗസ്ഥരുടെ അനാസ്ഥ മൂലം സാധാരണക്കാരായ ഓട്ടോ-ടാക്സി ഉടമകളും തൊഴിലാളികളും പ്രതിസന്ധിയിലാകുന്നത് തടയാന്‍ കുറഞ്ഞ ഫീസ് ഈടാക്കുന്നതിന് കർശന നിർദ്ദേശം നൽകുമോ; ഫീസ് നിരക്ക് കുറച്ചശേഷം ഉയർന്ന നിരക്ക് നൽകേണ്ടി വന്നവർക്ക് ആയത് റീഫണ്ട് ചെയ്യുന്നതിനുള്ള നടപടി സ്വീകരിക്കുമോ?

ചാത്തന്നൂരിൽ ഒരു സബ് ആർ.ടി. ഓഫീസ് ആരംഭിക്കുന്നത് സംബന്ധിച്ച് എം.എൽ.എ. നൽകിയ നിവേദനങ്ങള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് സംബന്ധിച്ച ഫയലിന്മേല്‍ അടിയന്തര നടപടി സ്വീകരിക്കുമോ; വ്യക്തമാക്കാമോ;

ചാത്തന്നൂരിൽ നിലവിൽ ആഴ്ചയിൽ ഒരു ദിവസം പ്രവർത്തിക്കുന്ന കൊല്ലം ആർ.ടി.ഒ.യുടെ സബ് ആഫീസ് ആഴ്ചയിൽ നാല് ദിവസമാക്കി മാറ്റാൻ നടപടി സ്വീകരിക്കുമോ; ആയതിന് തടസ്സങ്ങൾ ഉണ്ടെങ്കിൽ എന്തെല്ലാമെന്ന് അറിയിക്കാമോ?

വെള്ളരിക്കുണ്ട് റീജിയണൽ ട്രാൻസ്പോർട്ട് ഓഫീസ് നിലവിൽ പ്രവർത്തിക്കുന്നത് ഏത് കെട്ടിടത്തിലാണെന്ന് അറിയിക്കാമോ;

വെള്ളരിക്കുണ്ട് മിനി സിവിൽ സ്റ്റേഷനിൽ പ്രസ്തുത സ്ഥാപനം പ്രവർത്തിക്കുന്നതിന് ആവശ്യമായ നടപടികൾ സ്വീകരിച്ചിട്ടുണ്ടോ; എങ്കിൽ വിശദമാക്കാമോ;

പ്രസ്തുത സ്ഥാപനം എപ്പോഴത്തേക്ക് മിനി സിവിൽ സ്റ്റേഷനിലേക്ക് മാറ്റി പ്രവർത്തനം തുടങ്ങാൻ കഴിയുമെന്ന് അറിയിക്കാമോ?

മോട്ടോർ വാഹനങ്ങളിൽ രൂപമാറ്റം വരുത്തി കാതടപ്പിക്കുന്ന ശബ്ദവും അമിത ശബ്ദമുണ്ടാക്കുന്ന എയർ ഹോണും ഉപയോഗിച്ച് വരുന്നതായി ശ്രദ്ധയില്‍പ്പെട്ടിട്ടുണ്ടോ;

ഇത്തരം വാഹനങ്ങളെ കണ്ടെത്തി പിഴ ഈടാക്കാറുണ്ടോയെന്ന് വ്യക്തമാക്കാമോ;

വാഹന ഉടമകൾക്കെതിരെ മറ്റ് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വ്യക്തമാക്കാമോ;

ഇത്തരം ശബ്ദമലിനീകരണം തടയാൻ കർശന നടപടി സ്വീകരിക്കുമോ; വിശദമാക്കാമോ?

അനുവദനീയമായ ഡെസിബെൽ ശബ്ദത്തേക്കാള്‍ കൂടുതൽ ശബ്ദമുണ്ടാക്കുന്ന എയർ ഹോണുകൾ വാഹനങ്ങളിൽ ഉപയോഗിക്കുന്നതായി കണ്ടെത്തിയിട്ടുണ്ടോ;

നിരോധിത എയർ ഹോണുകളുടെ ഉപയോഗം തടയാൻ നിലവിൽ പരിശോധനകൾ നടത്താറുണ്ടോ;

നിരോധിത എയർഹോണുകള്‍ ഉപയോഗിക്കുന്നില്ലെന്ന് ഉറപ്പുവരുത്തുന്നതിന് എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വിശദമാക്കാമോ?