പൊതുവിതരണ വകുപ്പിന്റെ 1978-ലെ മാനുവല്‍ പരിഷ്കരിക്കുന്നതിനും പൊതുവിതരണ വകുപ്പിന്റെ ചരിത്രം എഴുതി തയ്യാറാക്കുന്നതിനുമായി 2020-ല്‍ റിട്ടയേര്‍ഡ് റേഷനിംഗ് കണ്‍ട്രോളറെ ചുമതലപ്പെടുത്തിയിരുന്നോ; വിശദമാക്കാമോ;

പ്രസ്തുത റിപ്പോര്‍ട്ട് സര്‍ക്കാരില്‍ സമര്‍പ്പിച്ചിരുന്നോ; എങ്കില്‍ റിപ്പോര്‍ട്ടിന്മേല്‍ എന്തെല്ലാം നടപടികള്‍ സ്വീകരിച്ചുവെന്ന് വിശദമാക്കാമോ;

പ്രസ്തുത പരിഷ്കരിച്ച മാനുവലും വകുപ്പിന്റെ ചരിത്രവും എന്ന് പ്രസിദ്ധീകരിക്കുമെന്ന് അറിയിക്കാമോ;

എത്ര തുകയാണ് റിപ്പോര്‍ട്ട് തയ്യാറാക്കുന്നതിനായി സര്‍ക്കാര്‍ ചെലവാക്കിയിട്ടുള്ളതെന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം വടകര താലൂക്കില്‍ എത്ര പുതിയ മാവേലി സ്റ്റോറുകള്‍ അനുവദിച്ചിട്ടുണ്ട് എന്ന് അറിയിക്കാമോ;

നാദാപുരം മണ്ഡലത്തിലെ കായക്കൊടി പഞ്ചായത്തിലെ കായക്കൊടിയിലും ചെക്ക്യാട് ഗ്രാമപഞ്ചായത്തിലെ കുറുവന്തേരിയിലും മാവേലി സ്റ്റോര്‍ അനുവദിക്കാന്‍ നല്‍കിയ കത്തില്‍ നാളിതുവരെ എന്തൊക്കെ നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ;

പ്രസ്തുത പ്രദേശങ്ങളില്‍ മാവേലി സ്റ്റോര്‍ അനുവദിക്കുന്നതിന് നിലനില്‍ക്കുന്ന തടസ്സം എന്താണെന്ന് അറിയിക്കാമോ?

വിശപ്പുരഹിത കേരളം പദ്ധതിയില്‍ ഉള്‍പ്പെടുത്തി ചങ്ങനാശ്ശേരി മണ്ഡലത്തില്‍ അനുവദിച്ച സുഭിക്ഷ ഹോട്ടലുകള്‍ ഏതെല്ലാമാണെന്ന് വിശദമാക്കാമോ;

പ്രസ്തുത മണ്ഡലത്തില്‍ സുഭിക്ഷ ഹോട്ടലുകള്‍ ആരംഭിക്കുന്നതിനായി എത്ര അപേക്ഷകള്‍ ലഭിച്ചിട്ടുണ്ടെന്നും അപേക്ഷകളിന്മേല്‍ സ്വീകരിച്ച തുടര്‍നടപടികളും വിശദമാക്കാമോ?

വടക്കാഞ്ചേരി മണ്ഡലത്തില്‍ കെ-സ്റ്റോര്‍ പദ്ധതി ആദ്യഘട്ടത്തില്‍ എവിടെയൊക്കെയാണ് നടപ്പിലാക്കാനുദ്ദേശിക്കുന്നതെന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം വടകര താലൂക്കില്‍ മുൻഗണന കാർഡ് കൈവശം വച്ചിരുന്ന എത്ര അനര്‍ഹരെ കണ്ടെത്തിയിട്ടുണ്ട്;

ഈ കാലയളവില്‍ സംസ്ഥാനത്തെ വിവിധ താലൂക്കുകളില്‍ നിന്നും എത്ര രൂപ വീതം ഈ ഇനത്തിൽ പിഴ ഈടാക്കിയിട്ടുണ്ടെന്ന് വിശദമാക്കുമോ;

ഈ കാലയളവില്‍ ഏറ്റവും കൂടുതല്‍ മുന്‍ഗണനാ കാര്‍ഡ് നല്‍കിയ താലൂക്ക് ഏതെന്ന് അറിയിക്കാമോ?

സംസ്ഥാനത്ത് നിലവിലുള്ള ആകെ റേഷന്‍ കാര്‍ഡുകള്‍ എത്രയെന്നും ഇതില്‍ മഞ്ഞ, പിങ്ക്, നീല, വെള്ള, ബ്രൗണ്‍ വിഭാഗങ്ങളിലുള്ളവ എത്രയെന്നുമുള്ള വിശദാംശം ലഭ്യമാക്കാമോ;

ഈ സര്‍ക്കാര്‍ അധികാരത്തില്‍ വന്നശേഷം പുതിയ റേഷന്‍ കാര്‍ഡിനായി ലഭിച്ച അപേക്ഷകള്‍ എത്രയെന്നും അനുവദിച്ച് തീര്‍പ്പാക്കിയത് എത്രയെന്നും വിവിധ വിഭാഗങ്ങള്‍ തിരിച്ചുള്ള വിശദവിവരം ലഭ്യമാക്കുമോ;

സംസ്ഥാനത്ത് ഭക്ഷ്യ സിവില്‍ സപ്ലൈസ് വകുപ്പ് ആരംഭിച്ച ഓപ്പറേഷന്‍ യെല്ലോ പദ്ധതിയനുസരിച്ച് അനര്‍ഹമായി മുന്‍ഗണനാ റേഷന്‍കാര്‍ഡുകള്‍ കൈവശം വെച്ചവരെ കണ്ടെത്തിയിട്ടുണ്ടോ; ഇവരില്‍ നിന്നും പിഴ ഈടാക്കിയിട്ടുണ്ടോ; വിശദാംശം അറിയിക്കുമോ?

മാവേലിക്കര താലൂക്ക് സപ്ലെെ ഓഫീസിനുകീഴില്‍ എത്ര മുന്‍ഗണനാ എ.എ.വൈ. കാര്‍ഡുകള്‍ ഉണ്ടെന്ന് അറിയിക്കുമോ;

മുന്‍ഗണനാ വിഭാഗത്തിലേക്ക് മാറ്റണമെന്നാവശ്യപ്പെട്ട് എത്ര അപേക്ഷകള്‍ മാവേലിക്കര സപ്ലെെ ഓഫീസില്‍ ലഭിച്ചിട്ടുണ്ടെന്നും എത്ര അപേക്ഷകളിന്മേല്‍ തീരുമാനമെടുത്തിട്ടുണ്ടെന്നും അറിയിക്കുമോ?

മലപ്പുറം ജില്ലയില്‍ അര്‍ഹരായ എത്ര പേരെയാണ് പുതുതായി മുന്‍ഗണനാലിസ്റ്റില്‍ ഉള്‍പ്പെടുത്തിയതെന്ന് വിശദമാക്കാമോ?

സംസ്ഥാനത്തിന് അനുവദിക്കപ്പെട്ടിട്ടുള്ള അന്ത്യോദയ - അന്നയോജന (എ.എ.വൈ.) കാർഡുകളുടെ ആകെ എണ്ണം എത്രയാണെന്ന് വ്യക്തമാക്കാമോ;

നിലവിൽ എത്ര പേർക്ക് എ.എ.വൈ. കാർഡുണ്ടെന്നും എ.എ.വൈ. കാർഡുകളുടെ നിലവിലുള്ള ഒഴിവുകള്‍ ഉടന്‍ നികത്താന്‍ ഉദ്ദേശിക്കുന്നുണ്ടോയെന്നും വിശദമാക്കാമോ;

ഈ സർക്കാർ അധികാരത്തിൽ വന്നശേഷം എ.എ.വൈ. കാർഡുകളുടെ ഒഴിവ് നികത്താത്തത് കൊണ്ട് എത്ര അളവ് അരി, ഗോതമ്പ് എന്നിവ ലാപ്സായിട്ടുണ്ടെന്ന് വ്യക്തമാക്കാമോ;

അവസാനമായി എ.എ.വൈ. കാർഡുകൾ അനുവദിച്ചത് എന്നാണെന്നും ഏതൊക്കെ താലൂക്കുകളിൽ നിന്നാണ് എ.എ.വൈ. കാർഡിനായി അപേക്ഷ ലഭിച്ചിട്ടുള്ളതെന്നും ഓരോ താലൂക്കിൽ നിന്നും ലഭിച്ച അപേക്ഷകളുടെ എണ്ണം എത്രയെന്നും വിശദമാക്കാമോ?

ഈ സര്‍ക്കാരിന്റെ കാലയളവിൽ പട്ടാമ്പി മണ്ഡലത്തില്‍ എത്ര എ.പി.എല്‍. റേഷന്‍ കാര്‍ഡുകള്‍ മുന്‍ഗണന വിഭാഗത്തിലേക്ക് മാറ്റി നൽകിയിട്ടുണ്ടെന്ന് അറിയിക്കാമോ;

മുന്‍ഗണന വിഭാഗത്തില്‍ ഉള്‍പ്പെടുത്തുന്നതിനായി മണ്ഡലത്തില്‍ നിന്ന് ലഭിച്ച എല്ലാ അപേക്ഷകളും തീര്‍പ്പാക്കിയിട്ടുണ്ടോ; വിശദമാക്കാമോ?

സംസ്ഥാനത്തെ മുന്‍ഗണനാ വിഭാഗം റേഷന്‍ കാര്‍ഡുകളുടെ എണ്ണം വര്‍ദ്ധിപ്പിക്കാന്‍ കഴിയാത്ത സാഹചര്യം നിലവിലുണ്ടോയെന്ന് വ്യക്തമാക്കുമോ;

അഗതി-അനാഥ-വൃദ്ധ മന്ദിരങ്ങളിലെ അന്തേവാസികള്‍ക്കുള്ള റേഷന്‍ വിതരണ പദ്ധതിക്കായി നിലവില്‍ കേന്ദ്രത്തില്‍ നിന്ന് ഭക്ഷ്യധാന്യ വിഹിതം ലഭിക്കുന്നുണ്ടോയെന്ന് വ്യക്തമാക്കുമോ?

അടുത്ത കാലത്ത് റേഷൻ കടകൾ നിശ്ചിത സമയക്രമം പാലിച്ച് തുറന്ന് പ്രവര്‍ത്തിക്കുന്നില്ല എന്നത് ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ അത് എന്തുകൊണ്ടാണെന്നും നിശ്ചിത സമയക്രമം പാലിച്ച് തുറന്ന് പ്രവര്‍ത്തിക്കുന്നതിന് വേണ്ട നടപടി സ്വീകരിക്കുമോയെന്നും അറിയിക്കാമോ;

റേഷൻ കടകൾ വഴി വിതരണം ചെയ്യുന്ന അരിയുടെ അളവ് വർദ്ധിപ്പിക്കുവാൻ നടപടി സ്വീകരിക്കുമോ?

കേന്ദ്ര സര്‍ക്കാര്‍ പി.എം.ജി.കെ.എ.വൈ. നിര്‍ത്തലാക്കിയതോടെ റേഷന്‍ വ്യാപാരികള്‍ പ്രതിസന്ധി നേരിടുന്ന വിഷയം ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ആയത് പരിഹരിക്കുന്നതിന് സ്വീകരിക്കാന്‍ ഉദ്ദേശിക്കുന്ന നടപടികള്‍ വ്യക്തമാക്കാമോ?

ചിറയിന്‍കീഴ് മണ്ഡലത്തിലെ ഏതെല്ലാം റേഷന്‍കടകളാണ് കെ-സ്റ്റോര്‍ പദ്ധതിയില്‍ ഉള്‍പ്പെട്ടിട്ടുള്ളത് എന്ന് വ്യക്തമാക്കാമോ?

സംസ്ഥാനത്തെ മുൻഗണനേതര വിഭാഗത്തില്‍പ്പെട്ട നീല, വെള്ള കാര്‍ഡുടമകള്‍ക്ക് പരിമിതമായ തോതിലാണ് റേഷന്‍ ലഭിക്കുന്നത് എന്ന വസ്തുത സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത്തരം കാര്‍ഡുടമകള്‍ക്ക് അരി വിഹിതം വര്‍ദ്ധിപ്പിക്കുന്നതിനുള്ള നടപടി സ്വീകരിക്കുമോ; വിശദാംശം വ്യക്തമാക്കുമോ?

കൊല്ലം താലൂക്ക് സപ്ലൈ ഓഫീസിന് കീഴിലുള്ള പരവൂർ, ചാത്തന്നൂർ എന്നീ ഫർക്കകളിൽ പുതിയ റേഷൻ ഡിപ്പോകൾ ആരംഭിക്കുന്നതിനുള്ള നടപടികൾ ആരംഭിച്ചിട്ടുണ്ടോയെന്ന് വ്യക്തമാക്കാമോ;

പുതിയ കുടുംബങ്ങളുടെ എണ്ണം വളരെയേറെ വർദ്ധിച്ചിട്ടുള്ള സാഹചര്യത്തിൽ പ്രസ്തുത ഫർക്കകളിൽ പുതിയ റേഷൻ ഡിപ്പോകൾ ആരംഭിക്കുന്നതിന് തയ്യാറാകുമോ; വിശദാംശം അറിയിക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം പാറശാല മണ്ഡലത്തില്‍ പുതിയ റേഷന്‍ കടകള്‍ അനുവദിക്കുന്നതിനും നിലവിലുള്ളവ മാറ്റി സ്ഥാപിക്കുന്നതിനുമായി എത്ര അപേക്ഷകള്‍ ലഭിച്ചിട്ടുണ്ടെന്നുള്ള വിവരം വിശദമാക്കുമോ;

ഏതൊക്കെ പ്രദേശങ്ങളില്‍ നിന്നാണ് അപേക്ഷകള്‍ ലഭ്യമായിട്ടുള്ളതെന്നും പ്രസ്തുത അപേക്ഷകളിന്മേല്‍ എന്തൊക്കെ നടപടികള്‍ സ്വീകരിച്ചുവെന്നും വ്യക്തമാക്കാമോ;

പാറശാല മണ്ഡലത്തിലെ എത്ര റേഷന്‍ കടകളെയാണ് സ്മാര്‍ട്ട് റേഷന്‍ കടകളാക്കാന്‍ തെര‍ഞ്ഞെടുത്തിട്ടുള്ളതെന്ന് വ്യക്തമാക്കുമോ;

മണ്ഡലത്തിലെ എല്ലാ റേഷന്‍ കടകളെയും സ്മാര്‍ട്ട് റേഷന്‍ കടകളാക്കി മാറ്റുന്നതിന് നടപടി സ്വീകരിക്കുമോ; വിശദമാക്കുമോ?

റേഷന്‍ കടയില്‍ പോയി ഭക്ഷ്യധാന്യങ്ങള്‍ വാങ്ങാന്‍ കഴിയാത്തവര്‍ക്ക് സന്നദ്ധ സേവകരായ ഓട്ടോറിക്ഷ തൊഴിലാളികളുടെ പങ്കാളിത്തത്തോടെ സാധനങ്ങള്‍ വീടുകളില്‍ എത്തിച്ച് നല്‍കാന്‍ പദ്ധതി ആവിഷ്കരിച്ചിട്ടുണ്ടോ;

ഭക്ഷ്യസുരക്ഷയിലൂടെ വിശപ്പുരഹിത കേരളം എന്ന ലക്ഷ്യം നേടുന്നതിന് ഭക്ഷ്യപൊതുവിതരണ വകുപ്പ് മുഖേന നടത്തുന്ന പ്രവര്‍ത്തനങ്ങള്‍ എന്തെല്ലാമാണ്;

പട്ടികഗോത്രങ്ങളില്‍പ്പെട്ടവര്‍ക്ക് വീടുകളില്‍ റേഷന്‍ സാധനങ്ങള്‍ എത്തിച്ച് നല്‍കുന്ന പദ്ധതി കാര്യക്ഷമമായി നടക്കുന്നുണ്ടോ എന്ന് വ്യക്തമാക്കുമോ?

കടകളിലെത്തി റേഷന്‍ വാങ്ങാന്‍ ബുദ്ധിമുട്ടുള്ളവര്‍ക്ക് വീട്ടുപടിക്കല്‍ റേഷന്‍ സാധനങ്ങള്‍ എത്തിക്കുന്നതിനായി പ്രത്യേക പദ്ധതിക്ക് തുടക്കം കുറിച്ചിട്ടുണ്ടോ; ഇതിനായി ഗുണഭോക്താക്കള്‍ അധിക തുക നല്‍കേണ്ടതുണ്ടോ; വിശദാംശം ലഭ്യമാക്കുമോ;

ഇ-പോസ് മെഷീനുകള്‍ വീടുകളില്‍ എത്തിക്കുന്നതിനുള്ള അസൗകര്യം പരിഗണിച്ച് സ്വീകരിക്കുന്ന നടപടികള്‍ വിശദമാക്കാമോ; പ്രസ്തുത പദ്ധതിയുടെ സുതാര്യത നിലനിര്‍ത്തുന്നതിനായി നിരീക്ഷണ സംവിധാനം ഏര്‍പ്പെടുത്തിയിട്ടുണ്ടോ; വിശദാംശം ലഭ്യമാക്കുമോ?

പട്ടിക വിഭാഗങ്ങളില്‍പ്പെട്ടവരും മത്സ്യത്തൊഴിലാളികളും തിങ്ങിപ്പാര്‍ക്കുന്ന സ്ഥലങ്ങളില്‍ നടപ്പിലാക്കിയ സഞ്ചരിക്കുന്ന റേഷന്‍ കടകള്‍ മുഖേന റേഷന്‍ സാധനങ്ങള്‍ വാതില്‍പടി വിതരണം നടത്തിയതിന്റെ വിശദാംശം നല്‍കാമോ?

കൊണ്ടോട്ടി താലൂക്ക് സപ്ലൈ ഓഫീസിന് കീഴിൽ എത്ര റേഷൻ ഗുണഭോക്താക്കളും എത്ര റേഷൻ കടകളുമുണ്ടെന്ന് വ്യക്തമാക്കുമോ;

ഈ റേഷൻ കടകളിലേക്ക് ആവശ്യമായ ഭക്ഷ്യ വസ്തുക്കൾ ലഭ്യമാക്കുന്നത് ഏതെല്ലാം ഗോഡൗണുകളിൽ നിന്നാണെന്ന് വ്യക്തമാക്കുമോ;

കൊണ്ടോട്ടി താലൂക്കിൽ നാഷണൽ ഫുഡ് സേഫ്റ്റി ആക്ട് പ്രകാരം നിഷ്‌കർഷിച്ചിട്ടുള്ള ഓഫീസും ഭക്ഷ്യ സംഭരണ ഗോഡൗണും നിർമ്മിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളത് എന്ന് വിശദമാക്കുമോ; ഇതിനായി ഫണ്ട് അനുവദിച്ചിട്ടുണ്ടോ എന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം എത്ര മാവേലി സ്റ്റോറുകളാണ് സൂപ്പര്‍ മാര്‍ക്കറ്റുകളായി ഉയര്‍ത്തിയിട്ടുള്ളത്; ജില്ല തിരിച്ച് അറിയിക്കാമോ;

മാവേലി സ്റ്റോറുകള്‍ സൂപ്പര്‍ മാര്‍ക്കറ്റുകളായി ഉയര്‍ത്തുന്നതിന് എന്തെല്ലാം മാനദണ്ഡങ്ങളാണ് പരിഗണിക്കുന്നതെന്ന് വിശദമാക്കാമോ?

കാസർഗോഡ് ജില്ലയിൽ പുതിയ മാവേലി സൂപ്പർ സ്റ്റോറുകൾ അനുവദിക്കുന്നതിന് നടപടി സ്വീകരിച്ചിട്ടുണ്ടോ;

എങ്കിൽ എവിടെയൊക്കെയാണ് അനുവദിക്കുന്നതെന്നും ആയതിന്റെ നടപടികൾ ഏത് ഘട്ടത്തിലാണെന്നും വിശദമാക്കാമോ?

പാലക്കാട് ജില്ലയിൽ രണ്ടാംവിള നെല്ല് സംഭരണത്തിന്റെ ഭാഗമായി എന്തെല്ലാം ഒരുക്കങ്ങളാണ് നടത്തിയിട്ടുള്ളതെന്ന് വിശദമാക്കുമോ;

പ്രസ്തുത ജില്ലയിലെ കര്‍ഷകര്‍ക്ക് നെല്ല് നല്‍കിയ ഇനത്തിലെ തുക സമയബന്ധിതമായി നല്‍കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ?

സംസ്ഥാനത്തെ എന്‍.എഫ്.എസ്.എ. ഗോഡൗണുകളിലെ ഭക്ഷ്യധാന്യങ്ങളുടെ സ്റ്റോക്കിലുള്ള കൃത്യത ഉറപ്പ് വരുത്തുന്നതിനായി എന്തെല്ലാം സംവിധാനങ്ങളാണ് ഏര്‍പ്പെടുത്തിയിട്ടുള്ളത് എന്ന വിവരം വ്യക്തമാക്കാമോ?

പാചക വാതക സിലിണ്ടർ വീടുകളിൽ എത്തിയ്ക്കുന്നതിന് ഡെലിവറി ചാർജ് നിശ്ചയിക്കുന്നതിന്റെ മാനദണ്ഡങ്ങള്‍ വിശദമാക്കുമോ;

ഡെലിവറി ചാർജ് നിര്‍ണ്ണയിക്കുന്നതിന്റെ ദൂരം കണക്കാക്കുന്നത് ഗ്യാസ് ഏജൻസിയിൽ നിന്നാണോ അതോ ഗോഡൗണിൽ നിന്നാണോ എന്ന് വ്യക്തമാക്കുമോ;

ഡെലിവറി ചാർജ്ജിനത്തിൽ ഏജൻസികൾ അധിക തുക ഈടാക്കുന്നതിനെതിരെ പൊതുജനങ്ങൾ ആർക്കാണ് പരാതി നൽകേണ്ടതെന്ന് അറിയിക്കുമോ?