2016 മുതൽ 2022 വരെയുള്ള കാലയളവിൽ പെരുമ്പാവൂർ മണ്ഡലത്തിൽ കായിക വകുപ്പ് നടപ്പിലാക്കിയ പദ്ധതികളുടെ വിശദവിവരം ലഭ്യമാക്കാമോ;

ഈ സാമ്പത്തിക വർഷം വകുപ്പ് നടപ്പിലാക്കാൻ ഉദ്ദേശിക്കുന്ന പദ്ധതികൾ വിശദമാക്കാമോ?

കാഞ്ഞങ്ങാട് മണ്ഡലത്തിൽ കായിക വകുപ്പ് മുഖേന നടപ്പിലാക്കിയതും നടപ്പിലാക്കിക്കൊണ്ടിരിക്കുന്നതുമായ പദ്ധതികൾ ഏതെല്ലാമാണെന്ന് വിശദമാക്കാമോ;

പ്രസ്തുത മണ്ഡലത്തിൽ നടപ്പിലാക്കുന്നതിന് ശിപാര്‍ശ ചെയ്യപ്പെട്ടതും നടപ്പിലാക്കുന്നതിന് പ്രാഥമിക നടപടികൾ സ്വീകരിച്ചതുമായ പദ്ധതികൾ ഏതെല്ലാമാണെന്നും ആയത് നടപ്പിലാക്കുന്നതിനുള്ള കാലതാമസത്തിന്റെ കാരണങ്ങൾ എന്തെല്ലാമാണെന്നും വിശദമാക്കാമോ?

ഒരു പഞ്ചായത്തില്‍ ഒരു കളിസ്ഥലം പദ്ധതിയുടെ ഭാഗമായി കണ്ണൂര്‍ ജില്ലയിലെ കുഞ്ഞിമംഗലം ഗ്രാമപഞ്ചായത്തില്‍ കളിസ്ഥലം നിര്‍മ്മിക്കുന്നതിന് എസ്റ്റിമേറ്റ് തയ്യാറാക്കി ഭരണാനുമതി നല്‍കുന്നതിന് നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

കായിക വകുപ്പ് മാവേലിക്കര മണ്ഡലത്തില്‍ നടപ്പിലാക്കുന്ന വിവിധ പദ്ധതികളുടെ വിശദവിവരം ലഭ്യമാക്കുമോ?

ഒരു പഞ്ചായത്തില്‍ ഒരു കളിസ്ഥലം പദ്ധതി പ്രകാരം തിരുവമ്പാടി മണ്ഡലത്തില്‍ തെരഞ്ഞെടുത്ത പദ്ധതികള്‍ ഏതൊക്കെയാണെന്ന് വിശദമാക്കാമോ;

ഇതിനായുള്ള വിശദപദ്ധതിരേഖ തയ്യാറാക്കുന്നതിന് ആരെയാണ് ചുമതലപ്പെടുത്തിയതെന്നും പദ്ധതിക്ക് എപ്പോള്‍ ഭരണാനുമതി നല്‍കാന്‍ കഴിയുമെന്നും വ്യക്തമാക്കുമോ?

തിരുര്‍ മണ്ഡലത്തിലെ മലയാള സര്‍വ്വകലാശാലയില്‍ ടെന്നീസ് കോര്‍ട്ട് നിര്‍മ്മിക്കുന്നത് സംബന്ധിച്ച് 16.12.2021-ന് കായിക വകുപ്പ് ഡയറക്ടറോട് ആവശ്യപ്പെട്ട റിപ്പോര്‍ട്ട് ലഭ്യമായിട്ടുണ്ടോ; വിശദവിവരം ലഭ്യമാക്കുമോ;

പ്രസ്തുത വിഷയത്തില്‍ എന്ത് നടപടി സ്വീകരിച്ചുവെന്ന് വ്യക്തമാക്കുമോ?

കുറ്റ്യാടി മണ്ഡലത്തിൽ ഉൾപ്പെടുന്ന മണിയൂര്‍ ഗ്രാമ പഞ്ചായത്തിലെ കളിക്കളം പദ്ധതിയുടെ നിലവിലെ അവസ്ഥ അറിയിക്കാമോ;

പ്രസ്തുത പദ്ധതിയുടെ എസ്റ്റിമേറ്റിന് സാങ്കേതിക അനുമതി ലഭ്യമായിട്ടുണ്ടോ എന്നും പ്രവൃത്തി എന്ന് പൂര്‍ത്തിയാക്കാനാണ് ഉദ്ദേശിക്കുന്നതെന്നും വ്യക്തമാക്കാമോ?

കായിക വകുപ്പ് വിദ്യാലയങ്ങളിൽ നടപ്പിലാക്കുന്ന വിവിധ പദ്ധതികളുടെ വിശദവിവരം ലഭ്യമാക്കുമോ;

പ്രസ്തുത പദ്ധതികളുടെ ഭാഗമായി കാസർഗോഡ് ജില്ലയിലെ സ്കൂളുകളിൽ നടപ്പിലാക്കുന്ന പ്രവൃത്തികൾ വിശദമാക്കുമോ?

ഒരു പഞ്ചായത്തിൽ ഒരു കളിസ്ഥലം പദ്ധതി പ്രകാരം പരമാവധി ഒരു ലക്ഷം രൂപ ഉപയോഗിച്ച് നടപ്പിലാക്കുന്ന പ്രവൃത്തിയിൽ എം.എൽ.എ.മാര്‍ അനുവദിക്കുന്ന അന്‍പത് ശതമാനം തുകയ്ക്ക് ടര്‍ഫ് പോലുള്ള പ്രവൃത്തികള്‍ക്ക് പ്രത്യേക അനുമതി ആവശ്യമുണ്ടോ;

സംസ്ഥാനത്തെ എല്ലാ മണ്ഡലങ്ങളിലും നടത്തിവരുന്ന ഇത്തരം പ്രവൃത്തികൾ നടപ്പിലാക്കി വരുന്നതിന് കായിക വകുപ്പും ധനകാര്യ വകുപ്പുമായി എന്തെങ്കിലും ധാരണ ഉത്തരവ് ഇറങ്ങിയിട്ടുണ്ടോ; ഇല്ലെങ്കിൽ അതിനാവശ്യമായ നടപടി സ്വീകരിക്കുമോ; വിശദവിവരങ്ങള്‍ ലഭ്യമാക്കാമോ?

2024-ലെ ഒളിമ്പിക്സ് ലക്ഷ്യമാക്കി ആസൂത്രണം ചെയ്തിട്ടുള്ള പദ്ധതികള്‍ വ്യക്തമാക്കാമോ;

കളരിപ്പയറ്റ് ഉള്‍പ്പെടെയുള്ള ആയോധനകലകളെ പ്രോത്സാഹിപ്പിക്കാന്‍ നടപടികള്‍ സ്വീകരിച്ചിട്ടുണ്ടോ; വ്യക്തമാക്കാമോ?

ദേശീയ സൈക്കിൾ പോളോ ജൂനിയർ ചാമ്പ്യൻഷിപ്പിനായി നാഗ്പൂരിൽ എത്തിയ കേരള ടീം അംഗം നിദ ഫാത്തിമ ദുരൂഹ സാഹചര്യത്തിൽ മരിച്ച സംഭവത്തിൽ കുടുംബാംഗങ്ങൾക്ക് നീതി ഉറപ്പാക്കുന്നതിന് എന്തൊക്കെ നടപടി സ്വീകരിച്ചിട്ടുണ്ടെന്ന് വ്യക്തമാക്കുമോ;

കോടതി വിധിയുടെ അടിസ്ഥാനത്തിൽ കേരള ടീമിനെ പ്രതിനിധീകരിക്കുവാൻ എത്തിച്ചേർന്ന നിദ ഫാത്തിമ ഉൾപ്പെടെയുള്ള കായികതാരങ്ങൾക്ക് താമസസൗകര്യവും ഭക്ഷണവും ഏർപ്പെടുത്തി നൽകുന്നതിൽ വീഴ്ച സംഭവിച്ചതിന്റെ കാരണം വ്യക്തമാക്കുമോ; ഇക്കാര്യത്തിൽ കുറ്റക്കാരായവർക്കെതിരെ എന്തെങ്കിലും നടപടി സ്വീകരിച്ചിട്ടുണ്ടോ; വിശദാംശം നൽകുമോ;

നിദ ഫാത്തിമയുടെ കുടുംബത്തിന് സർക്കാർ സഹായം അനുവദിക്കുമോ; വിശദാംശം നൽകുമോ?

പൂഞ്ഞാര്‍ മണ്ഡലത്തിലെ പൂഞ്ഞാര്‍ ഐ.എച്ച്.ആര്‍.ഡി. എഞ്ചിനീയറിംഗ് കോളേജില്‍ നിലവിലുള്ള കളിസ്ഥലം വിപുലീകരിച്ച് ഒരു സ്റ്റാൻഡേര്‍ഡ് ട്രാക്ക് ആന്റ് ഫീല്‍ഡ് നിമ്മിക്കുന്നതിനായി സമര്‍പ്പിച്ച അപേക്ഷയിന്മേൽ സ്വീകരിച്ചുവരുന്ന നടപടികളുടെ വിശദാംശം വ്യക്തമാക്കുമോ;

ഖേലോ ഇന്ത്യ പദ്ധതിയിലോ വിദ്യാഭ്യാസ സ്ഥാപനങ്ങളുടെ കളിസ്ഥലം നവീകരിക്കുന്ന പദ്ധതിയിലോ ഉള്‍പ്പെടുത്തി പ്രസ്തുത പ്രവൃത്തി നടപ്പിലാക്കുന്നതിനാവശ്യമായ നടപടി സ്വീകരിക്കുമോ എന്ന് വ്യക്തമാക്കുമോ?

ഒരു പഞ്ചായത്തില്‍ ഒരു കളിക്കളം പദ്ധതി പ്രകാരം മണലൂര്‍ മണ്ഡലത്തിലെ ഏതെല്ലാം പഞ്ചായത്തുകളില്‍ കളിക്കളം നിര്‍മ്മിക്കാന്‍ അനുമതി നല്‍കിയിട്ടുണ്ട്; അറിയിക്കുമോ;

പ്രസ്തുത കളിക്കളങ്ങളുടെ നിര്‍മ്മാണം നിലവില്‍ ഏത് ഘട്ടത്തിലാണ്; വിശദാംശം നല്‍കാമോ?

കാലിക്കറ്റ് സര്‍വകലാശാല ആസ്ഥാനമാക്കി ആരംഭിക്കുന്ന സംസ്ഥാനത്തെ ആദ്യ അന്താരാഷ്ട്ര സ്പോര്‍ട്സ് ഇന്‍സ്റ്റിറ്റ്യൂട്ട് പ്രവര്‍ത്തനം ആരംഭിച്ചിട്ടുണ്ടോ;

സ്പോര്‍ട്സ് കേരള ഫൗണ്ടേഷന്‍ ഉദ്യോഗസ്ഥര്‍ നടത്തിയ സ്ഥലപരിശോധനയുടെ ഭാഗമായി നാളിതുവരെ സ്വീകരിച്ചിട്ടുള്ള നടപടികള്‍ എന്തെല്ലാമാണെന്ന് വ്യക്തമാക്കാമോ;

പ്രസ്തുത പദ്ധതിക്ക് ഭരണാനുമതി നല്‍കുന്നതിനാവശ്യമായ നടപടിക്രമങ്ങള്‍ സംബന്ധിച്ച വിശദാംശം ലഭ്യമാക്കാമോ?

കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന ഇന്ത്യ- ശ്രീലങ്ക ഏകദിന ക്രിക്കറ്റ് മത്സരത്തിൽ ആറായിരത്തിൽ പരം കാണികൾ മാത്രമേ ഉണ്ടായിരുന്നുള്ളു എന്നത് കേരളത്തിന്റെ കായിക വികസനത്തെ പ്രതികൂലമായി ബാധിക്കുമെന്ന് കരുതുന്നുണ്ടോ;

വിനോദ നികുതി അഞ്ച് ശതമാനത്തില്‍ നിന്നും പന്ത്രണ്ട് ശതമാനമായി ഉയർന്നത് ടിക്കറ്റ് വില്പനയെ ബാധിച്ചിരുന്നോ;

സാധാരണക്കാരായവർ ഉൾപ്പെടെ എല്ലാ കായിക പ്രേമികൾക്കും കൂടുതൽ അന്താരാഷ്ട്ര മത്സരങ്ങൾ കാണുന്നതിനായി എന്തെല്ലാം സഹായങ്ങളാണ് ഏർപ്പെടുത്താൻ ഉദ്ദേശിക്കുന്നതെന്ന് വിശദമാക്കുമോ?

കോഴിക്കോട് വച്ച് നടന്ന സംസ്ഥാന സിവില്‍ സര്‍വീസ് കായിക മേളയില്‍ ഫോറസ്റ്റ് ഉദ്യോഗസ്ഥര്‍ ഏത് ഉത്തരവിന്റെ അടിസ്ഥാനത്തിലാണ് പങ്കെടുത്തതെന്ന് വിശദമാക്കാമോ; പ്രസ്തുത ഉത്തരവിന്റെ പകര്‍പ്പ് ലഭ്യമാക്കാമോ;

പ്രസ്തുത ഉദ്യോഗസ്ഥര്‍ പങ്കെടുത്തതിനെതിരെ ആരൊക്കെയാണ് ബന്ധപ്പെട്ട അധികാരികള്‍ക്ക് പരാതി നല്‍കിയിട്ടുള്ളത്; ആയതിന്മേല്‍ എന്തൊക്കെ നടപടി സ്വീകരിച്ചുവെന്ന് വിശദമാക്കാമോ;

ഫോറസ്റ്റ് ഉദ്യോഗസ്ഥരെ കൂടാതെ മറ്റ് യൂണിഫോം വിഭാഗത്തില്‍പ്പെട്ട ഉദ്യോഗസ്ഥര്‍ പ്രസ്തുത കായിക മേളയിൽ പങ്കെടുത്തിട്ടുണ്ടോ; വിശദമാക്കാമോ;

യൂണിഫോം വിഭാഗത്തില്‍പ്പെട്ട ഉദ്യോഗസ്ഥര്‍ക്ക് ദേശീയ സിവില്‍ സര്‍വീസ് കായിക മേളയില്‍ പങ്കെടുക്കുവാന്‍ സാധിക്കുമോ; ഇല്ലെങ്കില്‍ കാരണം വ്യക്തമാക്കാമോ?

സംസ്ഥാനത്ത് സിവില്‍ സര്‍വീസ് കായിക മേളയിലെ വിജയികള്‍ക്ക് മെറിറ്റ് സര്‍ട്ടിഫിക്കറ്റ് നല്‍കുന്ന കാര്യത്തില്‍ അകാരണമായ കാലതാമസം നേരിടുന്നത് പരിശോധിച്ചിട്ടുണ്ടോ; വിശദമാക്കുമോ;

സ്പോര്‍ട്സ് കൗണ്‍സിലിന് മുഴുവന്‍ സമയ സെക്രട്ടറിമാര്‍ ഇല്ലാത്തതാണ് ഇത്തരത്തില്‍ കാലതാമസം നേരിടുന്നതിന് കാരണം എന്ന് കരുതുന്നുണ്ടോ; എങ്കില്‍ നിലവില്‍ ഏതെല്ലാം ജില്ലകളിലെ സ്പോര്‍ട്സ് കൗണ്‍സിലിലാണ് ഇന്‍-ചാര്‍ജ് സെക്രട്ടറിമാര്‍ സേവനം ചെയ്തു വരുന്നത്; കണക്കുകള്‍ വിശദമാക്കാമോ;

ഇത്തരത്തില്‍ ചാര്‍ജ് വഹിക്കുന്ന സെക്രട്ടറിമാര്‍ നല്‍കുന്ന സര്‍ട്ടിഫിക്കറ്റില്‍ സെക്രട്ടറി ഇന്‍-ചാര്‍ജ് എന്ന് രേഖപ്പെടുത്തണമെന്ന് നിര്‍ദ്ദേശമുണ്ടോ; വിശദമാക്കാമോ;

സിവില്‍ സര്‍വീസ് മേളകളില്‍ പങ്കെടുത്ത് വിജയികളായവര്‍ക്ക് മെറിറ്റ് സര്‍ട്ടിഫിക്കറ്റ് അടിയന്തരമായി വിതരണം ചെയ്യുന്നതിന് നടപടി സ്വീകരിക്കുമോയെന്ന് അറിയിക്കുമോ?

ദേശീയ തലത്തില്‍ ജൂനിയര്‍, സീനിയര്‍, യൂത്ത് തല മല്‍സരങ്ങള്‍ക്ക് പങ്കെടുക്കുന്ന കായികതാരങ്ങള്‍ക്ക് സ്പോര്‍ട്സ് കൗണ്‍സിലുകള്‍ മുഖേന പരിശീലനം നല്‍കുന്നുണ്ടോ; ഇല്ലെങ്കില്‍ ആയതിനുള്ള നടപടി സ്വീകരിക്കുമോ;

സാമ്പത്തികമായി പിന്നാക്കം നില്‍ക്കുന്ന കായിക താരങ്ങള്‍ക്ക് ദേശീയ തലത്തിലെ മല്‍സരങ്ങള്‍ക്ക് സജ്ജമാകാനുള്ള സഹായങ്ങള്‍ നല്‍കുന്നതിന് കായിക വകുപ്പ് നടപടി സ്വീകരിക്കുമോ; വ്യക്തമാക്കാമോ?

ദേശീയ ജൂനിയർ സൈക്കിൾ പോളോ മത്സരത്തിനായി നാഗ്പൂരിൽ പോയ കേരള ടീം അംഗം നിദ ഫാത്തിമയുടെ മരണം സംബന്ധിച്ചുള്ള അന്വേഷണത്തിന് വകുപ്പ് സ്വീകരിച്ചിട്ടുള്ള നടപടി വിശദമാക്കാമോ;

ദേശീയ സൈക്കിൾ പോളോ ഫെഡറേഷന്റെ അംഗീകാരമുള്ളവർക്ക് മാത്രമേ മത്സരത്തിൽ പങ്കെടുക്കുവാൻ സാധിക്കൂ എന്ന് അറിഞ്ഞിട്ടും രണ്ട് ടീമുകളെ മത്സരത്തിന് അയച്ചത് സ്പോർട്സ് കൗൺസിലിന്റെ ഭാഗത്തുനിന്നുണ്ടായ ഉത്തരവാദിത്ത കുറവാണോ എന്ന കാര്യം പരിശോധിക്കുമോ; വ്യക്തമാക്കുമോ?

സംസ്ഥാനത്ത് സ്പോർട്സ് കൗൺസിലിന്റെ കീഴിൽ എത്ര സ്പോർട്സ് ഹോസ്റ്റലുകൾ ഉണ്ടെന്നും അവിടെ എത്ര കായികതാരങ്ങൾ ഉണ്ടെന്നും പ്രസ്തുത കായികതാരങ്ങളുടെ ഭക്ഷണ അലവൻസ് ഏത് മാസം വരെ വിതരണം ചെയ്തിട്ടുണ്ടെന്നും ഈ കായികതാരങ്ങൾക്കുള്ള സ്പോർട്സ് കിറ്റുകൾ വിതരണം ചെയ്തിട്ടുണ്ടോയെന്നുമുള്ള വിശദാംശം ലഭ്യമാക്കുമോ;

സംസ്ഥാനത്ത് സ്പോർട്സ് കൗൺസിലിന്റെ കീഴിൽ അല്ലാതെ എയിഡഡ്/ സ്വകാര്യ മേഖലയിൽ എത്ര സ്പോർട്സ് ഹോസ്റ്റലുകൾ ഉണ്ടെന്നും അവിടെ എത്ര കായികതാരങ്ങൾ ഉണ്ടെന്നും പ്രസ്തുത കായികതാരങ്ങളുടെ ഭക്ഷണ അലവൻസ് ഏത് മാസംവരെ വിതരണം ചെയ്തിട്ടുണ്ടെന്നും ഈ കായികതാരങ്ങൾക്കുള്ള സ്പോർട്സ് കിറ്റുകൾ വിതരണം ചെയ്തിട്ടുണ്ടോയെന്നുമുള്ള വിശദാംശം ലഭ്യമാക്കുമോ?

സംസ്ഥാനത്തെ സ്പോർട്സ് ഹോസ്റ്റലുകളിലേക്കുള്ള ഭക്ഷണ അലവൻസ് മുടങ്ങിയത് ശ്രദ്ധയിൽപ്പെട്ടിട്ടുണ്ടോ;

സംസ്ഥാന സർക്കാർ സ്പോർട്സ് കൗൺസിലിലേക്ക് നൽകുന്ന ഗ്രാൻഡ് മുടങ്ങിയിട്ടുണ്ടോ; വ്യക്തമാക്കുമോ;

സംസ്ഥാനത്തെ സ്പോർട്സ് ഹോസ്റ്റലുകളിലേക്കുള്ള ( സർക്കാർ, എയ്ഡഡ്, അൺഎയ്ഡഡ് സ്കൂളുകൾ അടക്കം) ഭക്ഷണ അലവൻസ് എത്ര മാസമായി മുടങ്ങിയിട്ടുണ്ട് എന്ന് വ്യക്തമാക്കുമോ;

സ്പോർട്സ് ഹോസ്റ്റലുകളിലെ കായികതാരങ്ങൾക്ക് നൽകിവരുന്ന ജേഴ്സി, ട്രാക്ക് സ്യൂട്ട്, ഷൂസ് എന്നിവ അടങ്ങുന്ന കിറ്റ് എത്ര വർഷമായി വിതരണം ചെയ്യുന്നില്ല എന്ന വിവരം അറിയിക്കുമോ;

സർക്കാർ നൽകിവരുന്ന ഗ്രാൻഡ് മുടങ്ങുന്നതിന് കാരണം സാമ്പത്തിക പ്രതിസന്ധി ആണോ എന്ന് വ്യക്തമാക്കുമോ?

സർക്കാർ നൽകുന്ന ഭക്ഷണ അലവൻസ് മുടങ്ങിയത് കാരണം സംസ്ഥാനത്തെ സ്പോർട്സ് ഹോസ്റ്റലുകളുടെ പ്രവർത്തനം പ്രതിസന്ധിയിൽ ആയതായി ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് ഗൗരവത്തോടെ കാണുന്നുണ്ടോ; വിശദാംശം നൽകുമോ;

സ്പോർട്സ് ഹോസ്റ്റലുകളിൽ താമസിക്കുന്ന കുട്ടികൾക്ക് ഭക്ഷണ അലവൻസും സ്പോർട്സ് കിറ്റുകളും നൽകുന്നതിനുള്ള തുക മുടങ്ങിയിട്ടുണ്ടോ; എങ്കിൽ കാരണം വ്യക്തമാക്കുമോ;

സ്പോർട്സ് കൗൺസിലിന്റെ നിയന്ത്രണത്തിലുള്ള ഹോസ്റ്റലുകളിലും സ്വകാര്യ ഹോസ്റ്റലുകളിലും ഭക്ഷണ അലവൻസ് എത്ര മാസമായി കുടിശികയാണ്; വിശദമാക്കുമോ;

കായികതാരങ്ങൾക്ക് അടിയന്തരമായി അലവൻസുകൾ അനുവദിച്ചു നൽകുമോ; വിശദാംശം ലഭ്യമാക്കുമോ?

ആറ്റിങ്ങല്‍ മണ്ഡലത്തിലെ നഗരൂരില്‍ സ്പോര്‍ട്സ് ഹബ് സ്ഥാപിക്കുന്നതുമായി ബന്ധപ്പെട്ട അപേക്ഷ വകുപ്പില്‍ ലഭ്യമായിട്ടുണ്ടോ; എങ്കിൽ അതിന്മേൽ സ്വീകരിച്ച നടപടികള്‍ വിശദമാക്കുമോ?

അഴിക്കോട് വന്‍കുളത്ത് വയലില്‍ സ്ഥാപിക്കുന്ന ആധുനിക ജിം പദ്ധതിക്ക് ഭരണാനുമതി നല്‍കിയിട്ടുണ്ടോ; ഇല്ലെങ്കില്‍ ആയത് എത്രയും വേഗം നല്‍കുന്നത് പരിഗണിക്കുമോ; വ്യക്തമാക്കുമോ;

പ്രസ്തുത പദ്ധതിക്ക് ഭരണാനുമതി നല്‍കുന്നതിന് തടസ്സങ്ങള്‍ ഉണ്ടെങ്കില്‍ വിശദാംശം നല്‍കാമോ?

കോഴിക്കോട് നടന്ന സംസ്ഥാന സിവിൽ സർവീസ് കായിക മേളയിൽ യൂണിഫോം വിഭാഗത്തിൽപ്പെട്ട ഉദ്യോഗസ്ഥർ ഏത് സർക്കാർ ഉത്തരവിന്റെ അടിസ്ഥാനത്തിലാണ് പങ്കെടുത്തതെന്ന് വിശദമാക്കാമോ;

പ്രസ്തുത സർക്കാർ ഉത്തരവിന്റെ പകർപ്പ് ലഭ്യമാക്കാമോ;

പ്രസ്തുത ഉദ്യോഗസ്ഥർ പങ്കെടുത്തതിനെതിരെ ആരൊക്കെയാണ് ബന്ധപ്പെട്ട അധികാരികൾക്ക് പരാതി നൽകിയിട്ടുള്ളതെന്നും അതിന്മേൽ എന്തൊക്കെ നടപടി സ്വീകരിച്ചുവെന്നും വ്യക്തമാക്കാമോ;

യൂണിഫോം വിഭാഗത്തിൽപ്പെട്ട ഉദ്യോഗസ്ഥർക്ക് ദേശീയ സിവിൽ സർവീസ് കായികമേളയിൽ പങ്കെടുക്കാൻ സാധിക്കുമോയെന്നും ഇല്ലെങ്കിൽ അതിനുള്ള കാരണവും വ്യക്തമാക്കാമോ?

തരൂര്‍ മണ്ഡലത്തിലെ കോട്ടായി ജി.എച്ച്.എസ്.എസ്. ഗ്രൗണ്ടിൽ വ്യായാമ ഉപകരണങ്ങള്‍ സ്ഥാപിക്കുന്നതിന് നൽകിയ നിവേദനം പരിഗണിച്ച് ആയത് അനുവദിക്കുമോയെന്ന് വ്യക്തമാക്കാമോ?

കായികതാരങ്ങള്‍ക്ക് സ്വന്തം ജില്ലയില്‍ പരിശീലനം നടത്തുന്നത്തിന് മതിയായ സൗകര്യങ്ങള്‍ എല്ലാ ജില്ലയിലും ലഭ്യമല്ല എന്നത് ശ്രദ്ധയില്‍പ്പെട്ടിട്ടുണ്ടോ; എങ്കിൽ ഇത് പരിഹരിക്കുന്നതിന് ആവശ്യമായ നടപടികള്‍ സ്വീകരിക്കുമോ;

അത്‍ലറ്റിക്സ് മല്‍സരയിനങ്ങളില്‍ പങ്കെടുക്കുന്ന കായികതാരങ്ങള്‍ക്ക് അതതു ജില്ലകളില്‍ പരിശീലനത്തിന് ഉതകുന്ന സ്റ്റേഡിയങ്ങള്‍ എല്ലാ ജില്ലകളിലും സ്ഥാപിച്ചിട്ടുണ്ടോയെന്ന് വിശദമാക്കാമോ;

400 മീറ്റര്‍, പോള്‍വോള്‍ട്ട്, ട്രിപ്പിള്‍ജംപ് തുടങ്ങിയ അത്‍ലറ്റിക്സ് ഇനങ്ങളില്‍ പരിശീലനം നല്‍കുന്നതിന് ആലപ്പുഴ ജില്ലയില്‍ സ്റ്റേഡിയം ലഭ്യമല്ലെന്ന പരാതി പരിഹരിക്കാന്‍ നടപടി സ്വീകരിക്കുമോ?

തിരൂരങ്ങാടി മണ്ഡലത്തിൽപ്പെട്ട തിരൂരങ്ങാടി ഗവൺമെന്റ് ഹയർ സെക്കന്ററി സ്കൂളിന്റെ ഗ്രൗണ്ട് നവീകരണ പദ്ധതിയുടെ പ്രവൃത്തി ആരംഭിച്ചിട്ടുണ്ടോ എന്ന് വിശദമാക്കാമോ;

ഈ പദ്ധതിയുമായി ബന്ധപ്പെട്ട് ഇനി പൂർത്തീകരിക്കാനുള്ള നടപടികൾ എന്തെല്ലാമാണെന്ന് വിശദമാക്കാമോ;

പ്രസ്തുത പ്രവൃത്തിയുമായി ബന്ധപ്പെട്ട ഫയൽ ഇപ്പോൾ ഏത് ഓഫീസിലാണെന്നും ഫയൽ നമ്പർ ഏതാണെന്നും പ്രവൃത്തി എന്നത്തേക്ക് പൂർത്തീകരിക്കാൻ സാധിക്കുമെന്നും വിശദമാക്കാമോ?

സന്തോഷ് ട്രോഫി മത്സരങ്ങൾക്ക് ശേഷം മഞ്ചേരി പയ്യനാട് സ്റ്റേഡിയം മൈതാനം കള പിടിച്ചു കൊണ്ടിരിക്കുന്നു എന്ന വസ്തുത ശ്രദ്ധയിൽ വന്നിട്ടുണ്ടോ; എങ്കിൽ മൈതാനം സംരക്ഷിക്കുന്നതിനുള്ള നടപടികൾ സ്വീകരിക്കുമോ;

പ്രസ്തുത സ്റ്റേഡിയത്തില്‍ നിലവിലുള്ള ഗാലറി വിപലീകരിക്കുന്നതിനും, പുതിയ ഗ്യാലറി നിർമ്മിക്കുന്നതിനും വേണ്ട നടപടികൾ സ്വീകരിക്കുമോ;

ഇവിടെ സിന്തറ്റിക് ട്രാക്ക്, പ്രാക്ടീസ് ഗ്രൗണ്ട് നിർമ്മാണം എന്നിവയടക്കമുള്ള രണ്ടാം ഘട്ട പ്രവർത്തനങ്ങൾ ആരംഭിക്കുന്നതിനുള്ള നടപടികൾ സ്വീകരിക്കുമോ;

മഞ്ചേരി മെഡിക്കൽ കോളേജിൽ വിദ്യാർത്ഥികൾക്ക് സ്പോർട്സ് ഗ്രൗണ്ട് നിർമ്മിക്കുന്നതിനുള്ള നടപടികൾ കായിക വകുപ്പ് സ്വീകരിക്കുമോ?

2021 ബജറ്റിൽ തുക അനുവദിച്ച ആനാവൂര്‍ ഗവ. ഹയര്‍ സെക്കന്‍ഡറി സ്കൂള്‍ സ്റ്റേഡിയം നവീകരണ പദ്ധതിയുടെ രണ്ടാംഘട്ട പ്രവര്‍ത്തനങ്ങളുടെ നിലവിലെ സ്ഥിതി വ്യക്തമാക്കാമോ;

ഈ പദ്ധതിയുടെ ഡി.പി.ആര്‍. തയ്യാറാക്കിയിട്ടുണ്ടോ; എന്തൊക്കെ ഘടകങ്ങളും സൗകര്യങ്ങളുമാണ് പദ്ധതിയില്‍ ഉള്‍പ്പെടുത്തിയിട്ടുള്ളതെന്നും പ്രസ്തുത നിര്‍മ്മാണ പ്രവൃത്തിയുടെ ചുമതല ഏത് ഏജന്‍സിയിലാണ് നിക്ഷിപ്തമായിരിക്കുന്നതെന്നും വിശദമാക്കാമോ;

ടെണ്ടര്‍ നടപടികള്‍ പൂര്‍ത്തിയാക്കി ഈ പ്രവൃത്തി എന്നത്തേയ്ക്ക് ആരംഭിക്കാന്‍ കഴിയുമെന്ന് അറിയിക്കാമോ;

പ്രസ്തുത സ്റ്റേഡിയം നവീകരണവുമായി ബന്ധപ്പെട്ട് ഒരു കോടി രൂപ അടങ്കലില്‍ നടന്നുവരുന്ന ഒന്നാം ഘട്ട പ്രവര്‍ത്തനങ്ങളുടെ പുരോഗതി അറിയിക്കാമോ; എന്തൊക്കെ ഘടകങ്ങളും സൗകര്യങ്ങളുമാണ് ഈ പദ്ധതിയില്‍ ഉള്‍പ്പെടുത്തിയിട്ടുള്ളത് എന്ന് വിശദമാക്കാമോ?

ഒരു പഞ്ചായത്തില്‍ ഒരു കളിക്കളം പദ്ധതിയുടെ ഭാഗമായി കാട്ടാക്കട മണ്ഡലത്തില്‍ അനുവദിയ്ക്കപ്പെട്ട മാറനല്ലൂര്‍ പഞ്ചായത്തിലെ കൂവളശേരി സ്റ്റേഡിയം നിര്‍മ്മാണ പ്രവൃത്തിയുടെ നിലവിലെ സ്ഥിതിയും പദ്ധതിയുടെ തുടര്‍നടപടികള്‍ എന്തൊക്കെയെന്നും വിശദമാക്കാമോ?

പയ്യന്നൂര്‍ മള്‍ട്ടി പര്‍പ്പസ് സ്റ്റേഡിയം നിര്‍മ്മാണം നിര്‍ത്തിവെച്ചത് ഏത് സാഹചര്യത്തിലാണെന്നും പ്രസ്തുത പദ്ധതി പുനരാരംഭിക്കുന്നതിന് വകുപ്പ് സ്വീകരിച്ച നടപടികള്‍ എന്തെല്ലാമാണെന്നും വിശദമാക്കാമോ;

സാങ്കേതിക പ്രശ്നങ്ങള്‍ പരിഹരിച്ച് സമയബന്ധിതമായി പദ്ധതി നിര്‍വ്വഹണം നടത്തുന്നതില്‍ സ്പെഷ്യല്‍ പര്‍പ്പസ് വെഹിക്കിള്‍ ആയ കിറ്റ്കോയുടെ ഭാഗത്ത് നിന്നുണ്ടാകുന്ന കാലതാമസം ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ;

കിഫ്ബി പദ്ധതിയില്‍ ഉള്‍പ്പെടുത്തിയ സ്റ്റേഡിയങ്ങളുടെ നിര്‍മ്മാണ പ്രവൃത്തികള്‍ വേഗത്തിലാക്കുന്നതിന് നിശ്ചിത ഇടവേളകളില്‍ എം.എല്‍.എ.മാരെയും ബന്ധപ്പെട്ട ഉദ്യോഗസ്ഥരെയും ഉള്‍പ്പെടെ പങ്കെടുപ്പിച്ചുകൊണ്ട് അവലോകന യോഗങ്ങള്‍ ചേരുന്നതിനാവശ്യമായ നടപടികള്‍ പരിഗണനയിലുണ്ടോ; വിശദമാക്കുമോ?

ഒരു പഞ്ചായത്തിൽ ഒരു കളിക്കളം എന്ന പദ്ധതിയിലൂടെ സംസ്ഥാനത്ത് എത്ര കളിസ്ഥലങ്ങൾക്ക് അംഗീകാരം നൽകിയിട്ടുണ്ട്; ഇതിനു വേണ്ടി എത്ര തുകയാണ് നീക്കിവെച്ചിട്ടുള്ളത്;

പ്രസ്തുത പദ്ധതി വഴി നവീകരണം ലക്ഷ്യമിടുന്ന കളിസ്ഥലങ്ങളില്‍ അടിസ്ഥാന സൗകര്യങ്ങള്‍ ഉള്‍പ്പെടെയുള്ളവയുടെ വികസനത്തിനായി എന്തെല്ലാം നടപടികളാണ് സ്വീകരിക്കുന്നതെന്ന് വിശദമാക്കുമോ;

മലപ്പുറം മണ്ഡലത്തിൽ ഒരു പഞ്ചായത്തിൽ ഒരു കളിക്കളം പദ്ധതി നടപ്പാക്കുന്ന ഇരുമ്പുഴി ഗവ. ഹയർ സെക്കണ്ടറി സ്കൂൾ ഗ്രൗണ്ടിന്റെ നവീകരണ പ്രവൃത്തികൾ ആരംഭിച്ചിട്ടുണ്ടോ; എങ്കിൽ ആയതിന്റെ പുരോഗതി വിശദീകരിക്കാമോ?

കിഫ്ബി ഫണ്ടില്‍ നിന്നും 5 കോടി രൂപ അനുവദിച്ചതിന്റെ അടിസ്ഥാനത്തില്‍ ആറ്റിങ്ങല്‍ ശ്രീപാദം സ്റ്റേഡിയത്തില്‍ സ്വീകരിച്ച നടപടികള്‍ വിശദമാക്കാമോ?

തിരൂരങ്ങാടി മണ്ഡലത്തിലെ നന്നമ്പ്ര പഞ്ചായത്ത് സ്റ്റേഡിയത്തിന്റെ നവീകരണ പ്രവർത്തനങ്ങളുടെ പുരോഗതി വിശദമാക്കാമോ;

ഈ പ്രവൃത്തി എന്നത്തേയ്ക്ക് ആരംഭിക്കാൻ കഴിയുമെന്നും പ്രസ്തുത പ്രവൃത്തിയുമായി ബന്ധപ്പെട്ട് ഇനി പൂർത്തീകരിക്കാനുള്ള നടപടികൾ എന്തെല്ലാമാണെന്നും വിശദമാക്കാമോ?

ഒരു പഞ്ചായത്തില്‍ ഒരു കളിക്കളം എന്ന പദ്ധതിയുടെ ഭാഗമായി ബാലുശ്ശേരി മണ്ഡലത്തില്‍ നിര്‍ദ്ദേശിക്കപ്പെട്ട കായണ്ണ ഗ്രാമപഞ്ചായത്ത് സ്റ്റേഡിയം നവീകരിക്കുന്നതിന് സര്‍ക്കാര്‍ ഫണ്ട് അനുവദിച്ചിട്ടുണ്ടോ; പ്രസ്തുത സ്റ്റേഡിയത്തിനായി എം.എല്‍.എ. ആസ്തി വികസന ഫണ്ടില്‍ നിന്നും നാൽപ്പത് ലക്ഷം രൂപ അനുവദിച്ചിട്ടും പ്രവൃത്തി ആരംഭിക്കുന്നതിനുളള കാലതാമസം എന്താണെന്നറിയിക്കാമോ;

പ്രസ്തുത സ്റ്റേഡിയത്തില്‍ എന്തൊക്കെ പ്രവൃത്തികളാണ് ഈ പദ്ധതിയിലൂടെ നടപ്പിലാക്കാന്‍ ഉദ്ദേശിക്കുന്നതെന്ന് വിശദമാക്കാമോ?

കോതമംഗലം മണ്ഡലത്തിലെ പല്ലാരിമംഗലം സ്റ്റേഡിയം നിര്‍മ്മാണത്തിന്റെ നിലവിലെ സ്ഥിതി വ്യക്തമാക്കാമോ;

ഇതുമായി ബന്ധപ്പെട്ട് എന്തെല്ലാം പ്രവര്‍ത്തികളാണ് നടപ്പിലാക്കുന്നത് എന്ന് വിശദമാക്കാമോ;

ഇതില്‍ ഏതെല്ലാം പ്രവൃത്തികള്‍ പൂര്‍ത്തീകരിച്ചുവെന്നും പൂര്‍ത്തീകരിക്കാത്ത പ്രവൃത്തികള്‍ എന്നത്തേക്ക് പൂര്‍ത്തീകരിക്കുവാന്‍ സാധിക്കുമെന്നും വ്യക്തമാക്കാമോ;

പ്രസ്തുത നിര്‍മ്മാണ പ്രവൃത്തികള്‍ വെെകുന്നതിന്റെ കാരണം വിശദമാക്കാമോ;

പല്ലാരിമംഗലം സ്റ്റേഡിയം നിര്‍മ്മാണം വേഗത്തില്‍ പൂര്‍ത്തീകരിക്കുന്നതിന് നടപടി സ്വീകരിക്കുമോ; വിശദമാക്കാമോ?

ഒരു പഞ്ചായത്തിൽ ഒരു കളിസ്ഥലം പദ്ധതിയനുസരിച്ച് 2022-23 വര്‍ഷം സംസ്ഥാനത്ത് ഏതെല്ലാം മണ്ഡലത്തിലെ കളിസ്ഥലങ്ങള്‍ക്കാണ് ആസ്തി വികസ ഫണ്ടിലെ തുകയ്ക്ക് ആനുപാതികമായി സര്‍ക്കാര്‍ ഫണ്ട് അനുവദിച്ചുകൊണ്ട് കളിസ്ഥലം നിര്‍മ്മിക്കാന്‍ അനുമതിയായിട്ടുള്ളതെന്ന് വിശദമാക്കാമോ;

വാമനപുരം മണ്ഡലത്തില്‍ നിന്ന് ഇതിനായി നല്‍കിയ പ്രൊപ്പോസലിന്മേല്‍ സ്വീകരിച്ച നടപടികളുടെ പുരോഗതി അറിയിക്കാമോ;

വരും വര്‍ഷങ്ങളില്‍ പ്രസ്തുത പദ്ധതി ഇതുപോലെ തുടരാന്‍ തീരുമാനിച്ചിട്ടുണ്ടോ; വിശദമാക്കാമോ?

അമ്പലപ്പുഴ മണ്ഡലത്തിൽ ഒരു പഞ്ചായത്തിൽ ഒരു കളിക്കളം പദ്ധതിയിൽ ഉള്‍പ്പെടുത്തി വികസിപ്പിക്കുന്നതിനായി ഫണ്ട് അനുവദിച്ചിട്ടുള്ള കളിക്കളങ്ങളുടെ വിശദാംശവും ഉത്തരവിന്റെ പകര്‍പ്പും ലഭ്യമാക്കാമോ;

ഈ കളിക്കളങ്ങളുടെ നിര്‍മ്മാണ നിര്‍വഹണ ചുമതലകള്‍ നൽകിയിട്ടുള്ളത് ഏത് ഏജൻസിക്കാണ്; വ്യക്തമാക്കുമോ;

കളിക്കളങ്ങളുടെ നിര്‍മ്മാണം എന്നത്തേക്ക് ആരംഭിക്കാൻ കഴിയുമെന്നും നിര്‍മ്മാണവുമായി ബന്ധപ്പെട്ട് ഇതുവരെ പൂര്‍ത്തീകരിച്ചിട്ടുള്ള പ്രവര്‍ത്തനങ്ങളും വിശദമാക്കുമോ?

ഒരു പഞ്ചായത്തില്‍ ഒരു കളിസ്ഥലം പദ്ധതിയുടെ ഭാഗമായി കോട്ടക്കല്‍ മണ്ഡലത്തില്‍ അനുവദിച്ച ഇരിമ്പിളിയം സ്റ്റേഡിയത്തിന്റെ നിലവിലെ സ്ഥിതിയും ആയത് സംബന്ധിച്ച് വകുപ്പുതലത്തിൽ സ്വീകരിച്ചിട്ടുള്ള നടപടികളും വിശദമാക്കുമോ;

പ്രസ്തുത പ്രവൃത്തിയുടെ എസ്റ്റിമേറ്റിന് അംഗീകാരം ലഭിച്ചിട്ടുണ്ടോയെന്നും എന്നത്തേക്ക് പൂര്‍ത്തിയാക്കാന്‍ കഴിയുമെന്നും അറിയിക്കാമോ?

മട്ടന്നൂര്‍ മണ്ഡലത്തിലെ മാലൂര്‍ ജി.എച്ച്.എസ്.എസ്., പടിയൂര്‍ ജി.എച്ച്.എസ്.എസ്., ചിറ്റാരിപ്പറമ്പ് ജി.എച്ച്.എസ്.എസ്. എന്നീ സ്കൂള്‍ ഗ്രൗണ്ടുകളുടേയും കീഴല്ലൂര്‍, മാലൂര്‍ എന്നീ പഞ്ചായത്ത് സ്റ്റേഡിയങ്ങളുടേയും നവീകരണത്തിനായി സര്‍ക്കാര്‍ തുക അനുവദിച്ചിട്ടുണ്ടോ; പ്രസ്തുത പദ്ധതികളുടെ നിലവിലെ സ്ഥിതി വ്യക്തമാക്കാമോ;

ഒരു പഞ്ചായത്തില്‍ ഒരു കളിസ്ഥലം എന്ന പദ്ധതിയുടെ ഭാഗമായി സംസ്ഥാനത്ത് എത്ര പഞ്ചായത്തുകളില്‍ കളിസ്ഥലങ്ങള്‍ അനുവദിച്ചിട്ടുണ്ട് എന്ന് വ്യക്തമാക്കാമോ;

പ്രസ്തുത പദ്ധതി എല്ലാ പഞ്ചായത്തുകളിലും നടപ്പിലാക്കുന്നതിന് ഈ സാമ്പത്തിക വര്‍ഷത്തില്‍ തന്നെ നടപടി സ്വീകരിക്കുമോ?

നാദാപുരം മണ്ഡലത്തിലെ വളയം ഗ്രാമപഞ്ചായത്തില്‍ കളിസ്ഥലം നിര്‍മ്മിക്കാന്‍ കായിക വകുപ്പിൽ നിന്ന് ഭരണാനുമതി ലഭിച്ച പദ്ധതിയുടെ നിര്‍മ്മാണ പുരോഗതി വിശദമാക്കുമോ;

പ്രസ്തുത പദ്ധതി എന്ന് പൂര്‍ത്തികരിക്കാന്‍ സാധിക്കുമെന്ന് അറിയിക്കുമോ?

സംസ്ഥാനത്ത് പ്രൈമറിതലം മുതലുള്ള എല്ലാ വിദ്യാലയങ്ങളിലും കായിക അദ്ധ്യാപക തസ്തിക സൃഷ്ടിക്കാന്‍ ആലോചനയുണ്ടോ;

ഓരോ ജില്ലയിലും നിലവില്‍ കായിക അദ്ധ്യാപകരുടെ എത്ര ഒഴിവുകള്‍ ഉണ്ടെന്ന് അറിയിക്കുമോ;

പ്രസ്തുത അദ്ധ്യാപകരുടെ ഒഴിവുകള്‍ നികത്താന്‍ നടപടി സ്വീകരിക്കുമോ?

കായികരംഗത്ത് മികച്ച പ്രകടനം കാഴ്ചവെച്ച കായിക താരങ്ങള്‍ക്ക് ജോലി നല്‍കുന്നതിനായി ഈ സര്‍ക്കാര്‍ അധികാരത്തില്‍ വന്നതിന് ശേഷം നാളിതുവരെ സ്വീകരിച്ച നടപടികള്‍ വിശദമാക്കാമോ; ഈ കാലയളവില്‍ എത്രപേര്‍ക്ക് ജോലി നല്‍കിയിട്ടുണ്ട്; വിശദമാക്കാമോ?

വഖഫ് ബോര്‍ഡിന്റെ ഉടമസ്ഥതയില്‍ ഉള്ള സ്ഥലത്ത് പ്രവര്‍ത്തിക്കുന്ന സ്കൂളിന് പുതിയ കെട്ടിടം നിര്‍മ്മിക്കുന്നതിനായി വകുപ്പില്‍ നിന്ന് പെര്‍മിസീവ് സാംങ്ഷന്‍ നല്‍കാന്‍ സാധിക്കുമോയെന്നും എങ്കിൽ ആയതിന്റെ നടപടിക്രമങ്ങള്‍ എന്തെല്ലാമാണെന്നും വിശദമാക്കാമോ?

മദ്രസ്സ അദ്ധ്യാപകരുടെ ക്ഷേമത്തിന് വേണ്ടി വഖഫ് ബോര്‍ഡ് വഴി നടപ്പിലാക്കുന്ന വിവിധ പദ്ധതികള്‍ ഏതെല്ലാമെന്നും പ്രസ്തുത പദ്ധതികളുടെ ആനുകൂല്യം ലഭിക്കാന്‍ വേണ്ട മാനദണ്ഡങ്ങള്‍ എന്തെല്ലാമെന്നും വിശദമാക്കാമോ?

2023 ലെ ഹജ്ജിനുള്ള ഒരുക്കങ്ങൾ ആരംഭിച്ചിട്ടുണ്ടോ; എങ്കിൽ എന്തൊക്കെ സംവിധാനങ്ങളാണ് നടപ്പിലാക്കുന്നതെന്ന് വ്യക്തമാക്കാമോ?

നിര്‍ദ്ദിഷ്ട അങ്കമാലി-എരുമേലി ശബരി റെയില്‍വേ പദ്ധതിയുടെ നിലവിലെ സ്ഥിതി വിശദമാക്കാമോ;

പ്രസ്തുത പദ്ധതിക്ക് എത്ര തുകയാണ് ചെലവ് പ്രതീക്ഷിക്കുന്നതന്നും ഇതില്‍ പകുതി ചെലവ് സംസ്ഥാന സര്‍ക്കാര്‍ വഹിക്കുവാന്‍ തീരുമാനമെടുത്തിട്ടുണ്ടോയെന്നും വിശദമാക്കാമോ;

പ്രസ്തുത പാതയില്‍ വന്ദേ ഭാരത് ട്രെയിന്‍ ഉള്‍പ്പെടെ ഓടിക്കാന്‍ കഴിയും വിധം വെെദ്യുതീകരണ സംവിധാനത്തില്‍ മാറ്റം വരുത്തി എസ്റ്റിമേറ്റ് തയ്യാറാക്കിയിട്ടുണ്ടോ; എത്ര തുകയുടെ എസ്റ്റിമേറ്റാണ് തയ്യാറാക്കിയിട്ടുള്ളത്; വിശദമാക്കുമോ;

പ്രസ്തുത പദ്ധതിയുടെ നിര്‍മ്മാണം വേഗത്തില്‍ ആരംഭിക്കുന്നതിനു വേണ്ട നടപടി സ്വീകരിക്കുമോയെന്ന് വിശദമാക്കാമോ?

തിരൂര്‍ റെയില്‍വേ സ്റ്റേഷനില്‍ എത്തുന്ന യാത്രക്കാര്‍ അനുഭവിക്കുന്ന ബുദ്ധിമുട്ടുകള്‍ റയില്‍വെ വകുപ്പിന്റെ ശ്രദ്ധയില്‍പ്പെടുത്തി പരിഹരിക്കുന്നതിന് നടപടികള്‍ സ്വീകരിക്കുമോ; ഇത് സംബന്ധിച്ച് ബന്ധപ്പെട്ട റെയില്‍വെ ഉദ്യോഗസ്ഥര്‍ക്ക് നിര്‍ദ്ദേശം നല്‍കിയതിനെ തുടര്‍ന്ന് എന്തെങ്കിലും നടപടികള്‍ സ്വീകരിച്ചിട്ടുണ്ടോ എന്ന് വ്യക്തമാക്കുമോ?