സംസ്ഥാനത്ത് പട്ടികജാതി നഗറുകളുടെ സമഗ്ര വികസനത്തിനായി എന്തെല്ലാം പദ്ധതികളാണ് നടപ്പിലാക്കി വരുന്നത്; വിശദമാക്കാമോ;

പതിനഞ്ചില്‍ താഴെ മാത്രം കുടുംബങ്ങള്‍ താമസിക്കുന്ന നഗറുകളുടെ അടിസ്ഥാനസൗകര്യ വികസനം അംബേദ്കര്‍ ഗ്രാമവികസന പദ്ധതിയില്‍ ഉള്‍പ്പെടുത്താൻ നടപടി സ്വീകരിക്കുമോ;

എന്തെല്ലാം അടിസ്ഥാന സൗകര്യ വികസന പദ്ധതികളാണ് പ്രസ്തുത പദ്ധതിയില്‍ ഉള്‍പ്പെടുത്തിയിട്ടുള്ളതെന്ന് വിശദമാക്കാമോ?

സുവർണ്ണ ജൂബിലി ആഘോഷിക്കുന്ന പട്ടികവർഗ്ഗ വികസന വകുപ്പിന്റെ പ്രവർത്തനം പട്ടികവർഗ്ഗ വിഭാഗത്തിന്റെ സർവതോന്മുഖമായ വികസനത്തിന് സഹായകരമായിട്ടുണ്ടെന്ന് വിലയിരുത്തിയിട്ടുണ്ടോ; വിശദമാക്കാമോ;

ആധുനിക കാലത്തിന്റെയും പുത്തൻ സാങ്കേതികവിദ്യയുടെയും വെല്ലുവിളികളെ ഏറ്റെടുത്തുകൊണ്ട് കരുത്തുറ്റ സമൂഹമായി പട്ടികവർഗ്ഗ യുവജനതയെ മാറ്റുന്നതിന് വകുപ്പിന്റെ ചിട്ടയായ പ്രവര്‍ത്തനങ്ങൾക്ക് കഴിഞ്ഞിട്ടുണ്ടോ; വിശദമാക്കാമോ;

വിവിധ പദ്ധതികളുടെ ഗുണഭോക്താക്കൾക്ക് മെച്ചപ്പെട്ട സേവനം സമയബന്ധിതമായി ലഭിക്കുന്നതിന് പട്ടികവർഗ്ഗ വികസന വകുപ്പിന്റെ ആധുനികവൽക്കരണം സഹായകമായിട്ടുണ്ടോ; വിശദമാക്കാമോ;

പട്ടികവർഗ്ഗ വികസന വകുപ്പിന്റെ ഭാവി ലക്ഷ്യങ്ങൾ എന്തെല്ലാമാണെന്ന് വിശദമാക്കാമോ?

സംസ്ഥാനത്ത് എല്ലാ ഗ്രാമീണ വീടുകളിലും കുടിവെളളമെത്തിക്കാനുളള ജൽ ജീവൻ പദ്ധതിയിൽ ഇതിനോടകം എത്ര ശതമാനത്തോളം പണി പൂർത്തിയാക്കാൻ കഴിഞ്ഞുവെന്ന് വ്യക്തമാക്കാമോ;

കേന്ദ്രം അനുവദിച്ച തുക സംസ്ഥാനത്തിന്റെ സാമ്പത്തിക പ്രതിസന്ധിമൂലം ഉപയോഗപ്പെടുത്താൻ കഴിയാത്ത അവസ്ഥ ഉണ്ടായിട്ടുണ്ടോയെന്ന് വിശദമാക്കാമോ;

പ്രസ്തുത പദ്ധതിയുടെ കരാറുകാർക്ക് കുടിശിക നൽകാനുള്ളത് പദ്ധതിയുടെ പ്രവർത്തനത്തെ പ്രതികൂലമായി ബാധിച്ചിട്ടുണ്ടോ; കരാറുകാർക്ക് നൽകാനുള്ള കുടിശികത്തുക കണക്കാക്കിയിട്ടുണ്ടോയെന്നും ഇത് എന്നത്തേക്ക് നൽകാൻ കഴിയുമെന്നും വ്യക്തമാക്കാമോ?

ഇടമലക്കുടിയിൽ തിരുവോണനാളിൽ പനി ബാധിച്ച് അവശനിലയിലായ വീട്ടമ്മയെ കിലോമീറ്ററുകൾ ചുമന്ന് ആശുപത്രിയിലെത്തിച്ച സംഭവം ശ്രദ്ധയിൽപ്പെട്ടിട്ടുണ്ടോ;

ഇടമലക്കുടിയിലെ കൂടലാര്‍കുടി സ്വദേശികളായ ദമ്പതിമാരുടെ മകന്‍ പനി ബാധിച്ച് ചികിത്സ കിട്ടാതെ മരിച്ച സംഭവം ശ്രദ്ധയിൽപ്പെട്ടിട്ടുണ്ടോ; ഇടമലക്കുടിയിൽ ദിവസങ്ങൾക്കുള്ളിൽ തന്നെ പ്രസ്തുത സംഭവങ്ങള്‍ ആവർത്തിച്ചുണ്ടായത് എന്തുകൊണ്ടാണെന്ന് പരിശോധിച്ചിട്ടുണ്ടോ; എങ്കിൽ വിശദമാക്കാമോ;

ഇത്തരം സംഭവങ്ങൾ ആവർത്തിക്കാതിരിക്കാൻ അടിയന്തര നടപടി സ്വീകരിക്കുമോയെന്ന് വ്യക്തമാക്കാമോ?

സംസ്ഥാനത്ത് പട്ടികവർഗ്ഗക്കാർക്ക് ഭൂമി നൽകുന്നതിനായി എന്തൊക്കെ പദ്ധതികളാണ് നടപ്പിലാക്കി വരുന്നതെന്ന് വ്യക്തമാക്കാമോ;

കഴിഞ്ഞ ഒൻപത് വർഷങ്ങൾക്കിടയിൽ എത്ര പട്ടികവർഗ്ഗ കുടുംബങ്ങൾക്ക് എത്ര ഏക്കർ ഭൂമി വിതരണം ചെയ്തിട്ടുണ്ടെന്ന കണക്ക് ലഭ്യമാണോ; എങ്കിൽ വ്യക്തമാക്കാമോ;

ഈ കാലയളവിൽ എത്ര പട്ടികവർഗ്ഗ കുടുംബങ്ങൾക്ക് എത്ര ഏക്കർ ഭൂമിക്ക് വനാവകാശ പട്ടയം ലഭിച്ചിട്ടുണ്ടെന്ന കണക്ക് ലഭ്യമാണെങ്കിൽ നൽകാമോ?

സംസ്ഥാനത്ത് ജല്‍ ജീവന്‍ മിഷന്‍ നടപ്പാക്കുന്നതിന്റെ നിലവിലെ പുരോഗതി അറിയിക്കാമോ;

പ്രസ്തുത പദ്ധതി നടപ്പാക്കുന്നതില്‍ ഏറ്റവും പുറകിലാണ് സംസ്ഥാനത്തിന്റെ സ്ഥാനം എന്നത് വസ്തുതയാണോ; വ്യക്തമാക്കാമോ;

പദ്ധതി പൂർത്തിയാക്കുന്നതില്‍ കാലതാമസം നേരിടുന്നതിനുള്ള കാരണം എന്താണെന്ന് പരിശോധിച്ചിട്ടുണ്ടോ; വിശദമാക്കാമോ;

പ്രസ്തുത പദ്ധതി എന്നേക്ക് പൂർത്തിയാക്കാൻ സാധിക്കുമെന്ന് വ്യക്തമാക്കാമോ?

സംസ്ഥാനത്ത് ന്യൂനപക്ഷങ്ങളുടെ ക്ഷേമത്തിനും വികസനത്തിനുമായി സംസ്ഥാന ന്യൂനപക്ഷ വികസന ധനകാര്യ കോർപ്പറേഷൻ നടത്തിവരുന്ന പ്രവർത്തനങ്ങൾ വിലയിരുത്തിയിട്ടുണ്ടോ; എങ്കിൽ വിശദമാക്കാമോ;

ന്യൂനപക്ഷ വികസന ധനകാര്യ കോർപ്പറേഷന്റെ പ്രവർത്തനങ്ങൾ വ്യാപിപ്പിക്കുവാൻ പുതുതായി മേഖലാ ഓഫീസുകളും ജില്ലാ ഓഫീസുകളും ആരംഭിക്കുവാൻ ഉദ്ദേശിക്കുന്നുണ്ടോ;

പ്രസ്തുത കമ്മീഷൻ നടത്തിവരുന്ന വായ്പാ പദ്ധതികൾ സംബന്ധിച്ചു വിശദമാക്കാമോ;

ഈ സർക്കാർ അധികാരത്തിൽ വന്നതിനുശേഷം എത്ര രൂപയുടെ ഏതെല്ലാം വായ്പാപദ്ധതികളാണ് നടപ്പാക്കിയതെന്ന് അറിയിക്കാമോ;

ന്യൂനപക്ഷ വികസന ധനകാര്യ കോർപ്പറേഷൻ നടത്തിവരുന്ന വായ്പാ പദ്ധതികൾ കാലാനുസൃതമായി പരിഷ്കരിക്കുന്നതിനും സുതാര്യമാക്കുന്നതിനും നടപടി സ്വീകരിക്കുമോ?

ആദിവാസി മേഖലയിൽ താമസിക്കുന്നവരുടെ അടിയന്തര ആരോഗ്യപ്രശ്നങ്ങൾ പരിഹരിക്കുന്നതിന് പട്ടിക വര്‍ഗ്ഗ വികസന വകുപ്പ് മുഖേന ഒരുക്കിയിട്ടുള്ള സംവിധാനങ്ങൾ എന്തൊക്കെയാണെന്ന് വിശദമാക്കാമോ;

ഇടുക്കി ഇടമലക്കുടിയില്‍ പനിപിടിച്ച് അവശനായതിനെ തുടര്‍ന്ന് 10 കിലോമീറ്റര്‍ ചുമന്ന് ആശുപത്രിയിലെത്തിച്ച കുഞ്ഞ് മരിച്ച സംഭവം ശ്രദ്ധയിൽപ്പെട്ടിട്ടുണ്ടോ; വ്യക്തമാക്കാമോ;

ഇടമലക്കുടി അടക്കമുള്ള ആദിവാസി മേഖലകളിൽ താമസിക്കുന്നവരുടെ അടിയന്തര ആരോഗ്യപ്രശ്നങ്ങൾ പരിഹരിക്കുന്നതിന് യുദ്ധകാലാടിസ്ഥാനത്തിൽ സംവിധാനങ്ങൾ ഏര്‍പ്പെടുത്തുന്നത് പരിഗണനയിലുണ്ടോ; വിശദമാക്കാമോ?

സംസ്ഥാനത്ത് നഗരങ്ങളിലെയും വെള്ളക്കെട്ടുകളാല്‍ ചുറ്റപ്പെട്ട ജനസാന്ദ്രതയുള്ള ചതുപ്പ് പ്രദേശങ്ങളിലേയും ജലാശയങ്ങളില്‍ കക്കൂസ് മാലിന്യം വന്‍ തോതില്‍ കലരുന്നതിനാൽ കോളിഫോം ബാക്ടീരിയയുടെ അളവ് ജലത്തിൽ ക്രമാതീതമായി അധികരിച്ച് വിവിധ പകര്‍ച്ചവ്യാധികള്‍ക്ക് കാരണമാകുന്നതായി ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് സംബന്ധിച്ച് സർക്കാർ വിലയിരുത്തിയിട്ടുണ്ടോ; വിശദമാക്കാമോ;

കക്കൂസ് മാലിന്യം, വ്യവസായശാലകളില്‍ നിന്നും ഒഴുക്കിവിടുന്ന രാസമാലിന്യങ്ങള്‍, കാര്‍ഷികമേഖലയില്‍ നിന്നും എത്തിപ്പെടുന്ന കീടനാശിനികള്‍ മുതലായവ പൊതു ജലസ്രോതസുകളെ മലിനമാക്കുന്നത് ഫലപ്രദമായി തടയുന്നതിന് നിലവിലെ നിയമങ്ങള്‍ പര്യാപ്തമാണോയെന്ന് പരിശോധിക്കുമോ; വ്യക്തമാക്കാമോ;

പുതുതായി സ്വീവേജ് ആന്റ് സെപ്റ്റേജ് മാനേജ്മെന്റ് പദ്ധതികള്‍ ആവിഷ്കരിച്ച് ഘട്ടംഘട്ടമായി നടപ്പിലാക്കാന്‍ ആലോചിക്കുന്നുണ്ടോ; വിശദാംശം ലഭ്യമാക്കാമോ;

ചെറുതും വലുതുമായ ജലാശയങ്ങള്‍ മാലിന്യമുക്തമാക്കുന്നതിനായി പ്രത്യേക ജനകീയ പദ്ധതികള്‍ക്ക് രൂപം നല്‍കുമോ; വിശദമാക്കാമോ?

കഴിഞ്ഞ ഒൻപത് വർഷത്തിനിടെ പട്ടികജാതി, പട്ടികവർഗ്ഗ വിഭാഗങ്ങളിലെ വിദ്യാർത്ഥികൾക്ക് വിദേശപഠനത്തിനായി അനുവദിച്ച തുകയുടെ വിശദാംശം ലഭ്യമാണോ; എങ്കിൽ നൽകാമോ;

പ്രസ്തുത വിഭാഗത്തിൽപ്പെട്ടവരുടെ വിദേശ പഠനത്തിനുള്ള സഹായം ഏത് സർക്കാർ ഏജൻസി മുഖേനയാണ് നൽകുന്നതെന്ന് വ്യക്തമാക്കാമോ;

പ്രസ്തുത ഏജൻസി വന്നതിനു ശേഷം എത്ര വിദ്യാർത്ഥികൾക്ക് എത്ര കോടി രൂപ വിദേശ പഠനസഹായമായി നൽകിയിട്ടുണ്ടെന്ന വിവരം ലഭ്യമാണോ; എങ്കിൽ വ്യക്തമാക്കാമോ?

സംസ്ഥാനത്ത് ന്യൂനപക്ഷ ഗവേഷണ വിദ്യാര്‍ത്ഥികള്‍ക്കുള്ള മൗലാന ആസാദ് നാഷണല്‍ ഫെലോഷിപ്പ് 2022-2023 സാമ്പത്തിക വര്‍ഷം മുതല്‍ കേന്ദ്ര സര്‍ക്കാര്‍ നിര്‍ത്തലാക്കിയ സാഹചര്യത്തില്‍ ന്യൂനപക്ഷ ഗവേഷണ വിദ്യാര്‍ത്ഥികള്‍ക്കായി സര്‍ക്കാര്‍ എന്തെങ്കിലും പുതിയ പദ്ധതി ആവിഷ്കരിച്ചിട്ടുണ്ടോ; എങ്കില്‍ അതിനായി എത്ര തുക വകയിരുത്തിയിട്ടുണ്ട്; വ്യക്തമാക്കാമോ;

2024-25 വര്‍ഷം ന്യൂനപക്ഷ ക്ഷേമ വകുപ്പ് വിവിധ സ്കോളര്‍ഷിപ്പുകള്‍ക്കായി എത്ര തുക അനുവദിച്ചിട്ടുണ്ട്; എത്ര കുട്ടികള്‍ക്ക് സ്കോളര്‍ഷിപ്പ് ലഭ്യമായിട്ടുണ്ട്; വ്യക്തമാക്കാമോ?

മനുഷ്യ-വന്യജീവി സംഘർഷം തടയുന്നതിന് സംസ്ഥാനത്തിന് കൂടുതല്‍ അധികാരം ലഭ്യമാക്കണമെന്നാവശ്യപ്പെട്ട് സംസ്ഥാന സര്‍ക്കാര്‍ കേന്ദ്ര വനം-പരിസ്ഥിതി വകുപ്പ് മന്ത്രിക്ക് കത്ത് അയച്ചിട്ടുണ്ടോ; എങ്കില്‍ മറുപടി ലഭ്യമായിട്ടുണ്ടോ; വ്യക്തമാക്കാമോ;

പ്രസ്തുത കത്തിലെ പ്രധാന ആവശ്യങ്ങള്‍ എന്തൊക്കെയാണെന്ന് വിശദമാക്കാമോ;

വന്യജീവി ആക്രമണങ്ങൾക്കെതിരെയുള്ള പ്രതിരോധ പ്രവര്‍ത്തനങ്ങള്‍ക്ക് സംസ്ഥാനം സമര്‍പ്പിച്ച 620 കോടിയുടെ പദ്ധതി നടപ്പിലാക്കുന്നതിനായി പ്രത്യേക സാമ്പത്തിക സഹായം അനുവദിക്കണമെന്ന ആവശ്യം കേന്ദ്രം അംഗീകരിച്ചിട്ടുണ്ടോയെന്ന് വ്യക്തമാക്കാമോ?

സംസ്ഥാനത്ത് ജല്‍ ജീവൻ മിഷൻ പൂർത്തിയാക്കുന്നതില്‍ കാലതാമസം നേരിടുന്നുവെന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ;

പദ്ധതി പൂർത്തീകരണത്തിനുള്ള തുക എതുരീതിയില്‍ കണ്ടെത്താനാണ് സംസ്ഥാന സർക്കാർ ഉദ്ദേശിക്കുന്നതെന്ന് വിശദമാക്കാമോ;

ജല്‍ ജീവൻ മിഷന്റെ പ്രവൃത്തി ഏറ്റെടുത്ത കരാറുകാർക്ക് നൽകാനുള്ള തുക കുടിശികയായിട്ടുണ്ടോ; വിശദമാക്കാമോ?

സംസ്ഥാനത്ത് വനം കയ്യേറ്റം തടയുന്നതിനായി ജണ്ട കെട്ടി അതിരുകൾ വേർതിരിക്കുന്ന പ്രവൃത്തിയുടെ നിലവിലെ പുരോഗതി വ്യക്തമാക്കാമോ;

ഈ സർക്കാർ അധികാരത്തിൽ വന്നതിനുശേഷം എത്ര ജണ്ടകളുടെ നിർമ്മാണം പൂർത്തിയായിട്ടുണ്ട്; വിശദവിവരങ്ങള്‍ നല്‍കാമോ;

വനാതിർത്തി ഡിജിറ്റൈസ് ചെയ്യുന്ന പ്രവൃത്തി പൂർത്തിയായിട്ടുണ്ടോ; ഇല്ലെങ്കിൽ എപ്പോള്‍ പൂർത്തിയാക്കാനാണ് ഉദ്ദേശിക്കുന്നതെന്ന് വിശദമാക്കാമോ?

സംസ്ഥാനത്ത് ഗ്രാമീണ ഭവനങ്ങളിൽ ശുദ്ധജലം എത്തിക്കുന്നതിനു വേണ്ടി നടപ്പിലാക്കുന്ന ജൽ ജീവൻ മിഷന്റെ പൂർത്തീകരണത്തിന് സത്വര നടപടികള്‍ സ്വീകരിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ജൽ ജീവൻ മിഷനുമായി ബന്ധപ്പെട്ട് പൈപ്പുകൾ സ്ഥാപിക്കാൻ സ്ഥലം ഏറ്റെടുക്കൽ തുടങ്ങിയ വിഷയങ്ങളിലുള്ള തർക്കങ്ങൾ പരിഹരിക്കുന്നതിനും പദ്ധതി സമയബന്ധിതമായി പൂർത്തീകരിക്കുന്നതിനും നാളിതുവരെ സ്വീകരിച്ച നടപടികൾ വിശദമാക്കാമോ;

പ്രസ്തുത പദ്ധതിയുമായി ബന്ധപ്പെട്ട് പുതിയ കണക്ഷനുകൾ നൽകുമ്പോൾ ആവശ്യമായി വരുന്ന അധിക ജല സ്രോതസ്സുകൾ കണ്ടെത്തുന്നതിനായി സ്വീകരിച്ച നടപടികൾ വ്യക്തമാക്കാമോ;

പദ്ധതിയുടെ ഭാഗമായി പുതിയ പൈപ്പുകൾ സ്ഥാപിക്കുന്ന പ്രവർത്തനങ്ങൾ വേഗത്തിലാക്കുന്നതിന് തദ്ദേശ സ്വയംഭരണം, പൊതുമരാമത്ത്, ജലവിഭവം, റവന്യൂ എന്നീ വകുപ്പുകളുടെ ഏകോപനം ഉറപ്പാക്കിയിട്ടുണ്ടോ; വിശദമാക്കാമോ?

പട്ടയ ഉടമകൾക്ക് രാജകീയ മരങ്ങൾ വെട്ടാൻ അനുമതി നൽകിയ ഉത്തരവ് റദ്ദാക്കിയതിനു ശേഷം, അടിമാലി, നേര്യമംഗലം, മുളളരിങ്ങാട്, തൊടുപുഴ റേഞ്ചുകളിൽ നിന്ന് ഏകദേശം 30 ലക്ഷം രൂപ വിലമതിക്കുന്ന മരങ്ങൾ വെട്ടിമാറ്റിയതായ സംഭവം ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് സംബന്ധിച്ച് അന്വേഷണം നടത്തിയിട്ടുണ്ടോ; വിശദാംശം നല്‍കാമോ;

ഈ സംഭവത്തിൽ കുറ്റക്കാരായവരെ കണ്ടെത്തിയിട്ടുണ്ടോ; എങ്കിൽ അവർക്കെതിരെ എന്ത് നടപടി സ്വീകരിച്ചുവെന്ന് വ്യക്തമാക്കാമോ;

ഇത് മൂലം സർക്കാരിനുണ്ടായ നഷ്ടം കണക്കാക്കിയിട്ടുണ്ടോ; വിശദാംശം ലഭ്യമാക്കാമോ?

സംസ്ഥാനത്ത് പ്രളയം ഉണ്ടാകുന്നത് തടയുന്നതിനായി റൂം ഫോർ റിവർ പദ്ധതി നടപ്പിലാക്കിയിട്ടുണ്ടോ;

ഇതിനായി പ്രത്യേക സമിതികൾ രൂപീകരിച്ചിട്ടുണ്ടോ; വിശദമാക്കുമോ;

ഈ പദ്ധതിക്കാവശ്യമായ തുക എപ്രകാരം സ്വരൂപിക്കാനാണ് ആലോചിക്കുന്നതെന്ന് വ്യക്തമാക്കാമോ?

സംസ്ഥാനത്ത് ജനവാസ മേഖലകളില്‍ മനുഷ്യജീവനും സ്വത്തിനും അപകടമുണ്ടാക്കുന്ന കാട്ടുപന്നികളെ ഉപാധികളോടെ ഇല്ലായ്മ ചെയ്യുന്നതിന് പഞ്ചായത്തുകളെ അധികാരപ്പെടുത്തിയതിന്റെ കാലാവധി ദീര്‍ഘിപ്പിച്ച് നല്‍കിയിട്ടുണ്ടോ; വിശദമാക്കാമോ; ഇല്ലെങ്കില്‍ കാലാവധി ദീര്‍ഘിപ്പിച്ച് നല്‍കുവാന്‍ നടപടി സ്വീകരിക്കുമോ;

കാട്ടുപന്നികളെ ഇല്ലായ്മ ചെയ്യുന്നതിന് പഞ്ചായത്തുകളെ അധികാരപ്പെടുത്തിയതിന് ശേഷം 2025 ജൂലെെ വരെ കാട്ടുപന്നികളെ ഇല്ലായ്മ ചെയ്തിട്ടുണ്ടോ; വിശദവിവരം നൽകാമോ;

സംസ്ഥാനത്ത് നാടന്‍ കുരങ്ങുകളെ നിയന്ത്രിക്കുന്നതിന് സര്‍ക്കാര്‍ സ്വീകരിച്ചിട്ടുുള്ള നടപടികള്‍ എന്തെല്ലാമാണെന്ന് വ്യക്തമാക്കാമോ?

സംസ്ഥാനത്ത് പല സ്ഥലങ്ങളിലും കടുവ നാട്ടിലറിങ്ങി മനുഷ്യ ജീവനുകൾ ഉള്‍പ്പെടെ അപഹരിക്കുന്ന അതീവ ഗുരുതര സാഹചര്യം ശ്രദ്ധയിൽപ്പെട്ടിട്ടുണ്ടോ; എങ്കിൽ ഇത് ഗൗരവത്തോടെ കാണുന്നുണ്ടോ; വ്യക്തമാക്കാമോ;

മലപ്പുറം കാളികാവ് അടയ്‌ക്കാക്കുണ്ടിൽ റബ്ബർ ടാപ്പിംഗ് തൊഴിലാളിയെ കടുവ ആക്രമിച്ചു കൊലപ്പെടുത്തിയ സംഭവം ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

സംസ്ഥാനത്ത് കടുവയുടെ ആക്രമണം തടയുന്നതിന് സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ?

സംസ്ഥാനത്ത് വന്യജീവി ആക്രമണത്തിൽ മരണമടയുന്നവരുടെ ആശ്രിതർക്ക് നിലവിൽ എത്ര രൂപയാണ് നഷ്ടപരിഹാരമായി നൽകുന്നതെന്ന് വ്യക്തമാക്കാമോ;

വന്യജീവി ആക്രമണത്തിൽ മരണമടയുന്നവരുടെ ആശ്രിതർക്ക് നൽകുന്ന നഷ്ടപരിഹാര തുക ഇരട്ടിയാക്കാൻ നടപടി സ്വീകരിക്കുമോ; വിശദമാക്കാമോ?

കേന്ദ്ര സർക്കാർ നിർത്തലാക്കിയ പ്രീ മെട്രിക്ക് സ്കോളർഷിപ്പിന് പകരമായി സംസ്ഥാന സർക്കാർ പുതിയ സ്കോളർഷിപ്പ് ഏർപ്പെടുത്തിയിട്ടുണ്ടോ; എങ്കില്‍ വിശദമാക്കാമോ;

2024-25 വർഷം എത്ര കുട്ടികള്‍ക്കായി എത്ര തുക അനുവദിച്ചിട്ടുണ്ട്; ഈ സാമ്പത്തിക വർഷം എത്ര തുക അനുവദിച്ചിട്ടുണ്ട്; വ്യക്തമാക്കാമോ;

2025-26 സാമ്പത്തിക വർഷം ന്യൂനപക്ഷ വിഭാഗത്തിലെ വിദ്യാർത്ഥികള്‍ക്കായി നടപ്പാക്കുന്ന സ്കോളർഷിപ്പ് പദ്ധതികള്‍ ഏതൊക്കെയെന്നും ഇതിനായി എത്ര തുക വകയിരുത്തിയിട്ടുണ്ടെന്നും വിശദമാക്കാമോ?

കുറഞ്ഞ വിലയിൽ ശുദ്ധമായ കുപ്പിവെള്ളം ജനങ്ങൾക്ക് എത്തിക്കുക എന്ന ലക്ഷ്യത്തോടെ ജലവിഭവ വകുപ്പിന് കീഴില്‍ ആരംഭിച്ച ഹില്ലി അക്വാ കുപ്പിവെള്ളത്തിന്റെ 2024-25 സാമ്പത്തിക വർഷത്തെ വിറ്റുവരവ് എത്രയാണെന്ന് വിശദമാക്കാമോ;

ഹില്ലി അക്വാ കുപ്പിവെള്ളം കയറ്റുമതി ചെയ്യുന്നുണ്ടോ; ഉണ്ടെങ്കിൽ എത്ര ലിറ്റർ കുപ്പിവെള്ളം കയറ്റി അയച്ചിട്ടുണ്ടെന്ന വിവരം വ്യക്തമാക്കാമോ;

ഹില്ലി അക്വാ കുപ്പിവെള്ളത്തിന് സംസ്ഥാനത്ത് എത്ര വിതരണക്കാരുണ്ടെന്ന വിവരം ലഭ്യമാണോ; താലൂക്ക് അടിസ്ഥാനത്തിൽ ഇത് വിതരണം ചെയ്യുന്നതിനാവശ്യമായ നടപടി സ്വീകരിക്കാമോ?

സംസ്ഥാനത്ത് മത ന്യൂനപക്ഷ വിഭാഗങ്ങളിലെ വിധവകൾക്കും വിവാഹമോചിതർക്കും വേണ്ടി പുതിയ സ്വയംതൊഴിൽ പദ്ധതികൾ ആരംഭിച്ചിട്ടുണ്ടോ; എങ്കിൽ വിശദാംശം ലഭ്യമാക്കാമോ;

പ്രസ്തുത സ്വയം തൊഴിൽ പദ്ധതികൾക്കായി എത്ര തുക നീക്കി വച്ചിട്ടുണ്ട്; വിശദാംശം നല്‍കാമോ;

ഈ പദ്ധതിയുടെ പ്രയോജനം കൂടുതൽ പേർക്ക് ലഭ്യമാക്കുന്നതിനായി എന്തൊക്കെ നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

സംസ്ഥാനത്ത് പട്ടികജാതി, പട്ടികവര്‍ഗ്ഗ വിഭാഗങ്ങളിലെ വിദ്യാര്‍ത്ഥികള്‍ക്ക് നല്‍കിവരുന്ന ഗ്രാന്റുകൾ എന്തെല്ലാമാണെന്ന് വ്യക്തമാക്കാമോ;

പ്രസ്തുത ഗ്രാന്റുകളിൽ കുടിശിക നല്‍കാനുണ്ടോ; വിശദാംശം ലഭ്യമാക്കാമോ;

പ്രസ്തുത ഗ്രാന്റുകൾ കൃത്യമായി ലഭ്യമാകുന്നുണ്ടെന്ന് ഉറപ്പുവരുത്താന്‍ എന്തെങ്കിലും സംവിധാനങ്ങളുണ്ടോ; ഇല്ലെങ്കില്‍ അത്തരം സംവിധാനങ്ങള്‍ ഏര്‍പ്പെടുത്തുന്നതിനുവേണ്ട നടപടികള്‍ സ്വീകരിക്കാമോ?

ഈ സര്‍ക്കാരിന്റെ കാലത്ത് പട്ടികജാതി, പട്ടികവർഗ്ഗ, മറ്റു പിന്നാക്ക വിഭാഗങ്ങളിലെ എത്ര വിദ്യാർത്ഥികൾക്ക് പൈലറ്റ്‍മാരാകുന്നതിനുള്ള ഏവിയേഷൻ കോഴ്‍സ് പഠിക്കുന്നതിന് ധനസഹായം നൽകിയിട്ടുണ്ടെന്നും ഇതിനായി എത്ര തുക നൽകിയിട്ടുണ്ടെന്നുമുള്ള കണക്ക് ലഭ്യമാണോ; എങ്കിൽ വിശദമാക്കാമോ;

2016 മുതൽ 2021 വരെ പട്ടികജാതി, പട്ടികവർഗ്ഗ വിഭാഗത്തിൽപ്പെട്ട എത്ര വിദ്യാർത്ഥികൾക്ക് പ്രസ്തുത ഏവിയേഷൻ കോഴ്‍സ് പഠിക്കുവാൻ തുക അനുവദിച്ചിട്ടുണ്ടെന്നും എത്ര തുകയാണ് അനുവദിച്ചതെന്നുമുള്ള കണക്ക് ലഭ്യമെങ്കിൽ നൽകാമോ;

2011-2016 സ‍ര്‍ക്കാരിന്റെ കാലയളവിൽ പട്ടികജാതി, പട്ടികവർഗ്ഗ വിഭാഗത്തിൽപ്പെട്ട എത്ര പേർക്ക് എത്ര തുക പ്രസ്തുത ഏവിയേഷൻ കോഴ്‍സ് പഠിക്കാന്‍ ധനസഹായം അനുവദിച്ചിട്ടുണ്ടെന്ന് വ്യക്തമാക്കാമോ?

2024-25 സാമ്പത്തിക വർഷത്തിൽ ഭൂജലവകുപ്പ് നടപ്പിലാക്കിയ പ്രധാന പ്രവർത്തനങ്ങൾ വിശദമാക്കാമോ;

2025-26 സാമ്പത്തിക വർഷത്തിൽ ഭൂജലവകുപ്പ് ലക്ഷ്യമിടുന്ന പ്രധാന പ്രവർത്തനങ്ങൾ വിശദമാക്കാമോ;

സംസ്ഥാനത്ത് ഭൂജലം സംരക്ഷിക്കുന്നതിനും അതിന്റെ ചൂഷണം തടയുന്നതിനും നടപടികൾ സ്വീകരിച്ചിട്ടുണ്ടോ; വ്യക്തമാക്കാമോ?

സംസ്ഥാനത്ത് വന്യജീവി ആക്രമണത്തില്‍ പരിക്കേല്‍ക്കുന്നവര്‍ക്ക് സർക്കാർ ചികിത്സാ ചെലവ് അനുവദിക്കുന്നുണ്ടോ; എങ്കിൽ എന്തൊക്കെ വ്യവസ്ഥകൾക്ക് വിധേയമായാണ് ചികിത്സാ ചെലവ് അനുവദിക്കുന്നതെന്ന് വ്യക്തമാക്കാമോ;

വന്യജീവി ആക്രമണത്തില്‍ പരിക്കേല്‍ക്കുന്നവരുടെ ചികിത്സാ ചെലവ് പൂർണ്ണമായും ഏറ്റെടുക്കാൻ നടപടികൾ സ്വീകരിക്കുമോ; വിശദമാക്കാമോ?

സംസ്ഥാനത്ത് ഒരു പഞ്ചായത്ത് ഒരു കളിക്കളം പദ്ധതിയുടെ ഉദ്ദേശ്യലക്ഷ്യങ്ങള്‍ വിശദമാക്കാമോ;

പ്രസ്തുത പദ്ധതിയിൽ എന്തെല്ലാം പ്രവൃത്തികളാണ് ഉൾപ്പെടുത്തിയിട്ടുള്ളതെന്ന് വ്യക്തമാക്കാമോ;

പ്രസ്തുത പദ്ധതിയുടെ നിലവിലെ പുരോഗതി സംബന്ധിച്ച വിശദവിവരം അറിയിക്കാമോ?

പട്ടികവര്‍ഗ്ഗ വികസന വകുപ്പിന്റെ സുവര്‍ണ്ണ ജൂബിലിയോട് അനുബന്ധിച്ച് എന്തൊക്കെ പ്രത്യേക പദ്ധതികള്‍ ആവിഷ്കകരിക്കാനാണ് ഉദ്ദേശിക്കുന്നതെന്ന് വ്യക്തമാക്കാമോ;

പട്ടികവര്‍ഗ്ഗ വിഭാഗത്തിലെ വിദ്യാര്‍ത്ഥികളുടെ പഠന നിലവാരം കൂടുതല്‍ മെച്ചപ്പെടുത്താന്‍ സ്‍മാര്‍ട്ട് പഠനമുറി എന്ന പദ്ധതി നടപ്പിലാക്കുന്നതിന് ഉദ്ദേശിക്കുന്നുണ്ടോ; വ്യക്തമാക്കാമോ;

നവകേരളത്തിന്റെ വികസന വഴികളില്‍ പട്ടികവര്‍ഗ്ഗ വിഭാഗക്കാര്‍ പിന്തള്ളപ്പെട്ട് പോകാതിരിക്കാന്‍ എന്തൊക്കെ പുതിയ പദ്ധതികളാണ് ആരംഭിച്ചിട്ടുള്ളതെന്ന് വ്യക്തമാക്കാമോ?

സംസ്ഥാനത്ത് കാട്ടുതീ നിവാരണത്തിനായി ഫയര്‍ മാനേജ്‍മെന്റ് പ്ലാന്‍ തയ്യാറാക്കിയിട്ടുണ്ടോയെന്ന് അറിയിക്കാമോ;

കാട്ടുതീ തടയാനുള്ള പ്രവര്‍ത്തനങ്ങള്‍ കാര്യക്ഷമമാക്കുന്നതിന് ഏതെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കാമോ;

കാട്ടുതീ നിരീക്ഷണ/പ്രതിരോധ പ്രവര്‍ത്തനം നടത്തുന്നതിന് ഏതെല്ലാം തലത്തിലുള്ള ഉദ്യോഗസ്ഥരെയാണ് നിയോഗിച്ചിരിക്കുന്നതെന്ന് വ്യക്തമാക്കാമോ;

കാട്ടുതീ നിവാരണവുമായി ബന്ധപ്പെട്ട് ജൈവകവചം എന്ന പദ്ധതിക്ക് രൂപം നല്‍കിയിട്ടുണ്ടോ; വിശദമാക്കാമോ?