സംസ്ഥാനത്ത് കാര്‍ഷികരംഗത്തേക്ക് കൂടുതൽ യുവാക്കൾ വരുന്നതിനു വിമുഖത കാട്ടുന്നു എന്നത് ശ്രദ്ധയില്‍പ്പെട്ടിട്ടുണ്ടോ; എങ്കിൽ ഇതിന്റെ കാരണം പരിശോധിച്ചിട്ടുണ്ടോയെന്ന് അറിയിക്കാമോ;

കാര്‍ഷികരംഗത്തേക്ക് വരുന്ന യുവാക്കളെ പരിശീലിപ്പിക്കാനും അവരുടെ കഴിവിനനുസൃതമായി പ്രോത്സാഹിപ്പിക്കാനും സ്വീകരിച്ച നടപടി വിശദമാക്കാമോ?

പാലക്കാട് ജില്ലയിലെ ഏതൊക്കെ പഞ്ചായത്തുകളിലാണ് സ്മാര്‍ട്ട് കൃഷിഭവന്‍ പദ്ധതി നടപ്പിലാക്കാന്‍ ഉദ്ദേശിച്ചിട്ടുള്ളതെന്ന് വ്യക്തമാക്കാമോ;

പ്രസ്തുത പദ്ധതിയുടെ നിലവിലെ സ്ഥിതി വിശദീകരിക്കാമോ?

അപൂർവ്വയിനം നാടൻ വിത്തുകളു​ടെയും ജൈവ സർട്ടിഫിക്കേഷൻ നേടിയ പച്ചക്കറികളുടെയും സംരക്ഷണത്തിനായി സ്വീകരിച്ച നടപടി വിശദമാക്കുമോ;

പരമ്പരാഗത വിത്തുകളും കാർഷികോല്പന്നങ്ങളും സംരക്ഷിക്കുന്നതിനായി അന്താരാഷ്ട്ര നിലവാരമുളള വിത്ത് ബാങ്ക് രൂപീകരിക്കേണ്ടതിന്റെ ആവശ്യകത പരിശോധിച്ചിട്ടുണ്ടോ; വ്യക്തമാക്കുമോ;

എങ്കിൽ ഇതിനായുള്ള നടപടിയുടെ നിലവിലെ പുരോഗതി വിശദമാക്കുമോ?

അടിക്കടിയുണ്ടാകുന്ന കാലാവസ്ഥാ വ്യതിയാനങ്ങൾ മൂലം സ൦സ്ഥാനത്ത് കാർഷിക മേഖലയിൽ ഉണ്ടാകുന്ന പ്രശ്നങ്ങൾ ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

കാലാവസ്ഥാ വ്യതിയാനം സംസ്ഥാനത്തെ കാർഷിക മേഖലയെ എങ്ങനെയെല്ലാം ബാധിക്കുമെന്ന് പഠനവിധേയമാക്കിയിട്ടുണ്ടോ; വിശദമാക്കുമോ;

കാലാവസ്ഥാ വ്യതിയാനത്തിനനുസൃതമായി സംസ്ഥാനത്ത് കാർഷിക കലണ്ടറിൽ മാറ്റം കൊണ്ടുവരുന്നതിന് ഉദ്ദേശിക്കുന്നുണ്ടോ; വിശദമാക്കുമോ;

കാലാവസ്ഥാ വ്യതിയാനത്തെ ചെറുക്കുന്ന തരത്തിലുള്ള നൂതന കൃഷിമുറകൾ പ്രചരിപ്പിക്കുന്നതിനും വ്യാപകമാക്കുന്നതിനും നടപടി സ്വീകരിച്ചിട്ടുണ്ടോ; വിശദമാക്കുമോ?

ഈ സർക്കാർ അധികാരത്തില്‍ വന്നശേഷം കാർഷികമേഖലയുടെ സമഗ്രവികസനം ലക്ഷ്യമിട്ട് കൃഷി വകുപ്പ് മുഖേന കാഞ്ഞിരപ്പള്ളി നിയോജകമണ്ഡലത്തില്‍ അനുവദിച്ച പദ്ധതികളും പ്രത്യേക കർമ്മപരിപാടികളും സംബന്ധിച്ച വിശദാംശം അറിയിക്കാമോ?

സംസ്ഥാന സർക്കാരിന്റെ ആഭിമുഖ്യത്തിൽ സംഭരിക്കപ്പെടുന്ന വിളകൾ ഏതെല്ലാമാണെന്ന് വിശദമാക്കാമോ;

സംസ്ഥാന സർക്കാർ സംഭരിക്കുന്ന നെല്ല്, നാളികേരം, റബർ എന്നിവയ്ക്ക് നിലവിൽ നൽകുന്ന വില എത്രയാണെന്ന് അറിയിക്കാമോ;

സംസ്ഥാന സർക്കാർ സംഭരിച്ചിട്ടുള്ള നെല്ല്, നാളികേരം, റബർ എന്നിവയുടെ വില കർഷകർക്ക് നൽകാൻ ബാക്കിയുണ്ടെങ്കിൽ ഓരോ കർഷകർക്കും എത്ര തുക നൽകാനുണ്ടെന്ന് ജില്ലതിരിച്ച്, സംഭരണ കേന്ദ്രങ്ങൾ തിരിച്ച് അറിയിക്കാമോ;

സംഭരിക്കുന്ന നെല്ല്, നാളികേരം, റബ്ബർ തുടങ്ങിയ വിളകൾക്ക് കേന്ദ്രസർക്കാർ അനുവദിക്കുന്ന തുകയുടെയും സംസ്ഥാന സർക്കാർ അനുവദിക്കുന്ന തുകയുടെയും വിശദവിവരങ്ങൾ ലഭ്യമാക്കാമോ;

സംസ്ഥാന സർക്കാർ സംഭരിച്ചിട്ടുള്ള നെല്ല്, നാളികേരം തുടങ്ങിയ വിളകൾക്ക് കേന്ദ്രസർക്കാർ അനുവദിക്കേണ്ടിയിരുന്ന തുക എത്രയാണെന്നും അതിൽ ഇനി അനുവദിക്കാനുള്ളത് എത്ര തുകയാണെന്നും അറിയിക്കാമോ;

സംസ്ഥാന സർക്കാർ സംഭരിക്കുന്ന മറ്റ് വിളകൾക്ക് നിലവിൽ നൽകുന്ന വില എത്രയാണെന്ന് അറിയിക്കാമോ;

സംഭരിക്കുന്ന മറ്റ് വിളകൾക്ക് കേന്ദ്രസർക്കാർ അനുവദിക്കുന്ന തുകയുടെയും സംസ്ഥാന സർക്കാർ അനുവദിക്കുന്ന തുകയുടെയും വിശദവിവരങ്ങൾ ലഭ്യമാക്കാമോ?

കേരളത്തിലെ കാര്‍ഷികോല്പന്നങ്ങൾക്ക് വിപണി കണ്ടെത്തുന്നതിന് സ്വീകരിച്ച നടപടി വിശദമാക്കാമോ;

അതിനായി ശാസ്ത്ര, സാങ്കേതികവിദ്യ ഉപയോഗപ്പെടുത്തി നടത്തിയ ഇടപെടൽ വിശദമാക്കാമോ;

കാര്‍ഷികോല്പന്നങ്ങളുടെ സംസ്കരണത്തില്‍ നിന്നുള്ള വരുമാനം, അനുബന്ധ വരുമാനങ്ങള്‍ എന്നിവ കർഷകർക്ക് ലഭ്യമാകാൻ നടത്തിയ ഇടപെടൽ വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം സംസ്ഥാനത്ത് എവിടെയെല്ലാമാണ് അഗ്രോപാര്‍ക്കുകള്‍ സ്ഥാപിച്ചിട്ടുള്ളതെന്നും അവ ഏതെല്ലാമെന്നും വ്യക്തമാക്കാമോ;

കോട്ടയം ജില്ലയില്‍ അഗ്രോപാര്‍ക്കുകള്‍ സ്ഥാപിക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

സംസ്ഥാനത്ത് ഏതൊക്കെ കാര്‍ഷികോല്പന്നങ്ങള്‍ക്കാണ് വിലയിടിവ് നേരിടുന്നതെന്ന് വ്യക്തമാക്കുമോ;

ഇവയില്‍ സംസ്ഥാനത്തിന്റെ സാമ്പത്തിക മേഖലയ്ക്ക് കൂടുതല്‍ ആഘാതം ചെലുത്തുന്നവ ഏതൊക്കെയെന്ന് അറിയിക്കുമോ;

വിലയിടിവ് തടയുന്നതിന് എന്തൊക്കെ സംവിധാനങ്ങള്‍ നിലവിലുണ്ട്; പ്രസ്തുത സംവിധാനങ്ങൾ കാര്യക്ഷമമാണോ; എങ്കില്‍ വിശദമാക്കാമോ?

സംസ്ഥാനത്തെ കാര്‍ഷികമേഖല ശാക്തീകരിക്കുന്നതിന് പ്രത്യേകിച്ച് ഭക്ഷ്യധാന്യങ്ങളുടെ ഉല്പാദനവും ഉല്പാദനക്ഷമതയും വര്‍ദ്ധിപ്പിക്കുന്നതിനായി 2016 മേയ് മാസം മുതല്‍ സ്വീകരിച്ചിട്ടുള്ള നടപടി വിശദമാക്കാമോ;

വിഷരഹിത ഭക്ഷണം ഉറപ്പുവരുത്തുന്നതിന് എന്തെല്ലാം പദ്ധതികള്‍ 2016 മേയ് മാസം മുതല്‍ നടപ്പിലാക്കിയിട്ടുണ്ട്; വിശദമാക്കുമോ?

കൈപ്പമംഗലം നിയോജകമണ്ഡലത്തിൽ സംസ്ഥാനാടിസ്ഥാനത്തിൽ പ്രവർത്തിക്കുന്ന കൈപ്പമംഗലം ലൈവ്സ്റ്റോക്ക്‌ ഡെവലപ്മെന്റ് പ്രൊഡ്യൂസർ കമ്പനിയെ ജൈവവളങ്ങളുടെ വിതരണം നടത്തുന്ന സ്കീമുകളിൽ, സർക്കാർ ഏജൻസിയായി ഉൾപ്പെടുത്തുന്നതിനാവശ്യമായ എന്തു നടപടിയാണ് സ്വീകരിച്ചിരിക്കുന്നതെന്ന് അറിയിക്കാമോ?

കാട്ടാക്കട മണ്ഡലത്തിലെ 6 പഞ്ചായത്തുകളിലായി എത്ര കൃഷിയിടങ്ങളുണ്ടെന്നും ഏതൊക്കെ കൃഷിയിനങ്ങളാണുള്ളതെന്നും പഞ്ചായത്ത് തിരിച്ച് വ്യക്തമാക്കാമോ; കഴിഞ്ഞ 10 വര്‍ഷത്തിനുള്ളില്‍ തരിശുഭൂമി കണ്ടെത്തി കൃഷി യോഗ്യമാക്കുന്നതിന് സാധിച്ചിട്ടുണ്ടോ; അവയുടെ വിസ്തൃതി പഞ്ചായത്ത് തിരിച്ച് വിശദമാക്കാമോ?

തിരൂരങ്ങാടി നിയോജക മണ്ഡലത്തിൽപ്പെട്ട നന്നമ്പ്ര പഞ്ചായത്തിലെ കാർഷിക ജലസേചന പദ്ധതിയായ മോര്യ കാപ്പ് നവീകരണത്തിന്റെ നിലവിലെ സ്ഥിതി വിശദമാക്കാമോ;

പദ്ധതിയുടെ നവീകരണവുമായി ബന്ധപ്പെട്ട് കൃഷിവകുപ്പ് തയ്യാറാക്കിയ പ്രൊപ്പോസൽ അടങ്ങിയ ഫയലിന്റെ നിലവിലെ സ്ഥിതി, പ്രവർത്തി ആരംഭിക്കുന്നതിന് ഇനിയും ആവശ്യമായ അനുമതി എന്നിവ സംബന്ധിച്ച വിശദാംശം ലഭ്യമാക്കാമോ;

ടി പദ്ധതിയുടെ നിർമ്മാണവുമായി ബന്ധപ്പെട്ട് നിലവിൽ പൂര്‍ത്തികരിച്ച നടപടികളുടെ വിശദാംശങ്ങള്‍ ഫയൽ നമ്പറുകൾ സഹിതം വ്യക്തമാക്കാമോ?

2016 മുതല്‍ നാളിതുവരെ പേരാമ്പ്ര മണ്ഡലത്തിലെ കാര്‍ഷിക മേഖലയില്‍ അനുവദിച്ചിട്ടുള്ള പദ്ധതികളുടെയും ഓരോന്നിനും അനുവദിച്ചിട്ടുള്ള തുകയുടെയും വിശദാംശം ലഭ്യമാക്കാമോ; അനുവദിക്കപ്പെട്ട പ്രവൃത്തികളുടെ പുരോഗതി വിശദമാക്കാമോ;

മണ്ഡലത്തില്‍ കൂത്താളി കൃഷി ഫാമില്‍ ഒരു കോക്കനട്ട് പാര്‍ക്ക് കിഫ്ബിയില്‍ ഉള്‍പ്പെടുത്തി പ്രഖ്യാപിച്ചിട്ടുണ്ടോ; എങ്കില്‍ പ്രസ്തുത പ്രവൃത്തി നടപ്പാക്കുന്നതിന് ചുമതലപ്പെട്ട ഏജന്‍സി ഏതാണെന്നും പദ്ധതിയുടെ നിലവിലെ പുരോഗതി എന്താണെന്നും വിശദമാക്കാമോ?

കൃഷിക്കാരുടെ വരുമാനം വര്‍ദ്ധിപ്പിക്കുന്നതിനായി ഇതിനോടകം എന്തൊക്കെ നടപടികളാണ് സ്വീകരിച്ചു വരുന്നതെന്ന് വിശദമാക്കാമോ;

ഇതുമായി ബന്ധപ്പെട്ട് ഏതെല്ലാം പദ്ധതികള്‍ക്കാണ് രൂപം നല്‍കിയിട്ടുള്ളതെന്ന് വ്യക്തമാക്കാമോ;

ഇത്തരം കാര്യങ്ങള്‍ മോണിറ്ററിംഗ് ചെയ്യുന്നതിന് എന്തൊക്കെ സംവിധാനങ്ങളാണ് ഒരുക്കിയിട്ടുള്ളതെന്ന് വിശദമാക്കാമോ?

കായംകുളം മണ്ഡലത്തില്‍ 2016 മുതല്‍ നാളിതുവരെ കൃഷിവകുപ്പ് നടപ്പാക്കിയ പദ്ധതികള്‍ ഏതൊക്കെ; ഇതിനായി എത്ര തുക ചെലവഴിച്ചിട്ടുണ്ട്; പഞ്ചായത്ത് തിരിച്ചുള്ള വിശദാംശം ലഭ്യമാക്കാമോ?

നെല്ലിന്റെയും നാളികേരത്തിന്റെയും ഉല്പാദനക്ഷമത വർദ്ധിപ്പിക്കുന്നതിന് എന്തെല്ലാം നടപടികളാണ് സ്വീകരിച്ചു വരുന്നത്;

ഇതിലേയ്ക്കായി എന്തെല്ലാം കർമ്മപദ്ധതികൾക്കാണ് സർക്കാർ രൂപം നൽകിയിട്ടുള്ളത്;

കഴിഞ്ഞവർഷത്തേക്കാൾ ഉല്പാദനം ഉയർന്നിട്ടുണ്ടോ എന്ന് പരിശോധിച്ചിട്ടുണ്ടോ; എങ്കിൽ എത്രകണ്ട് ഉല്പാദനം വർദ്ധിച്ചു എന്ന് വിശദമാക്കാമോ?

സ്റ്റേറ്റ് ഹോർട്ടികോർപ്പ് മിഷനും പട്ടികവർഗ്ഗ വകുപ്പും സംയുക്തമായി വാമനപുരം മണ്ഡലത്തിലെ നന്ദിയോട് ഗ്രാമ പഞ്ചായത്തിൽ നടപ്പാക്കുന്ന കൂൺഗ്രാമം പദ്ധതി ആരംഭിച്ചിട്ടുണ്ടോ; വിശദമാക്കാമോ;

പ്രസ്തുത പദ്ധതിക്കുവേണ്ടി എത്ര തുകയാണ് വകയിരുത്തിയിട്ടുള്ളതെന്നും പട്ടികവർഗ്ഗ വികസനവകുപ്പ് മുഖാന്തിരമുള്ള ഫണ്ട് ലഭ്യമാക്കിയിട്ടുണ്ടോ എന്നും വിശദമാക്കാമോ?

ഈ സർക്കാരിന്റെ കാലയളവില്‍ കൃഷി വകുപ്പ് കൊണ്ടോട്ടി മണ്ഡലത്തിൽ നടപ്പാക്കിയ വിവിധ പദ്ധതികൾ ഏതെല്ലാമാണെന്ന് വിശദമാക്കുമോ;

കേരഗ്രാമം പദ്ധതി കൊണ്ടോട്ടി മണ്ഡലത്തിലെ ഏതെല്ലാം പഞ്ചായത്തിൽ നടപ്പിലാക്കിയെന്നും ഇതുമൂലം എന്തെല്ലാം സഹായങ്ങളാണ് കേരകർഷകർക്ക് ലഭ്യമായതെന്നും വിശദമാക്കുമോ?

നെന്മാറ നിയോജകമണ്ഡലത്തിൽ കൂൺഗ്രാമം പദ്ധതി തുടങ്ങുന്നതുമായി ബന്ധപ്പെട്ട് എന്തു നടപടിയാണ് പൂർത്തീകരിച്ചിട്ടുള്ളതെന്ന് വിശദമാക്കാമോ;

ഈ പദ്ധതി എന്ന് തുടങ്ങാൻ കഴിയുമെന്നും അതിലൂടെ എന്തെല്ലാം നേട്ടങ്ങളാണ് സർക്കാർ ലക്ഷ്യമിടുന്നതെന്നും വിശദമാക്കുമോ?

പുതുതായി കാര്‍ഷികരംഗത്ത് കടന്നുവരുന്ന വ്യക്തികള്‍ക്ക് എന്തൊക്കെ സൗകര്യങ്ങളും ആനുകൂല്യങ്ങളുമാണ് നല്‍കി വരുന്നതെന്ന് വിശദമാക്കാമോ;

ഇവര്‍ക്ക് കാര്‍ഷികരംഗത്ത് മികവ് പുലര്‍ത്തുന്നതിനായി വകുപ്പ് എന്തെല്ലാം സഹായങ്ങളാണ് നല്‍കിവരുന്നത്?

തരിശുരഹിത കേരളം പദ്ധതിയുടെ പ്രവർത്തനങ്ങൾ നിലവിൽ ഏതു ഘട്ടത്തിലാണ്; വിശദാംശം നൽകാമോ;

തരിശുരഹിത പഞ്ചായത്താക്കി ഉയർത്തുന്നതിന് മണലൂർ മണ്ഡലത്തിലെ ഏതെല്ലാം പഞ്ചായത്തുകളെ തിരഞ്ഞെടുത്തിട്ടുണ്ടെന്നും എന്തെല്ലാം പ്രവൃത്തികളാണ് ഇതുമായി ബന്ധപ്പെട്ട് ആസൂത്രണം ചെയ്തിട്ടുള്ളതെന്നും വ്യക്തമാക്കാമോ; ഈ പ്രവൃത്തികൾ നിലവിൽ ഏതു ഘട്ടത്തിലാണെന്ന് വിശദമാക്കാമോ?

ആര്‍. ഐ. ഡി. എഫ്. പദ്ധതി മുഖേന കാര്‍ഷിക മേഖലയില്‍ ഏതെല്ലാം തരത്തിലുള്ള പ്രവര്‍ത്തനങ്ങളാണ് നടപ്പാക്കുന്നതെന്ന് വ്യക്തമാക്കാമോ;

ഈ സര്‍ക്കാര്‍ അധികാരത്തില്‍ വന്നശേഷം കോതമംഗലം മണ്ഡലത്തില്‍ പ്രസ്തുത പദ്ധതിയില്‍ ഉള്‍പ്പെടുത്തി കാര്‍ഷിക മേഖലയില്‍ എന്തെല്ലാം പ്രവൃത്തികള്‍ നടപ്പിലാക്കിയിട്ടുണ്ടെന്നും പ്രസ്തുത പ്രവൃത്തികള്‍ക്ക് ചെലവായ തുക, അവയുടെ നിലവിലെ പുരോഗതി എന്നിവയും വ്യക്തമാക്കാമോ;

കോതമംഗലം മണ്ഡലത്തില്‍ ആര്‍.ഐ.ഡി.എഫ്. പദ്ധതിയില്‍ പുതുതായി ഉള്‍പ്പെടുത്തുന്നതിന് എത്ര അപേക്ഷകള്‍ ലഭിച്ചിട്ടുണ്ടെന്നും അവയുടെ നിലവിലെ സ്ഥിതിയെന്തെന്നും വ്യക്തമാക്കാമോ?

അയല്‍ക്കൂട്ട ക്ലസ്റ്ററുകളുടെ അടിസ്ഥാനത്തില്‍ സംയോജിത ബഹുവിള പുരയിടകൃഷിയെ പ്രോത്സാഹിപ്പിക്കാൻ സ്വീകരിച്ച നടപടി വിശദമാക്കുമോ;

ഇതിനായി വിത്ത്, വളം തുടങ്ങിയവയുടെ വിതരണം സർക്കാർ നടത്തുന്നുണ്ടോ; വ്യക്തമാക്കുമോ;

സംയോജിത ബഹുവിള പുരയിടകൃഷിയുടെ ഭാഗമായി ചെറുകിട യന്ത്രവല്ക്കരണം, സസ്യസംരക്ഷണ പ്രവര്‍ത്തനങ്ങള്‍ എന്നിവ സംയോജിതമായി നടത്താൻ സർക്കാർ നടത്തിയ ഇടപെടൽ വിശദമാക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം പൂഞ്ഞാര്‍ മണ്ഡലത്തില്‍ ആര്‍. ഐ. ഡി. എഫ്. പദ്ധതിയില്‍ ഉള്‍പ്പെടുത്തി എന്തെല്ലാം പ്രവൃത്തികൾ നടപ്പിലാക്കിയിട്ടുണ്ട്; പ്രസ്തുത പ്രവൃത്തികൾക്കായി ആകെ എത്ര തുക ചെലവാക്കിയിട്ടുണ്ട്; അവയുടെ പുരോഗതി അറിയിക്കാമോ;

ആര്‍. ഐ. ഡി. എഫ്. പദ്ധതിയിലുള്‍പ്പെടുത്തുന്നതിനായി പൂഞ്ഞാര്‍ മണ്ഡലത്തില്‍ നിന്ന് പുതിയതായി എത്ര അപേക്ഷകള്‍ ലഭിച്ചിട്ടുണ്ടെന്നും അതിന്റെ നിലവിലെ സ്ഥിതി എന്തെന്നും അറിയിക്കാമോ?

ഈ സർക്കാർ അധികാരത്തിൽ വന്നശേഷം കൃഷിവകുപ്പ് കുന്നത്തുനാട് മണ്ഡലത്തിൽ നടപ്പാക്കിയ വിവിധ പദ്ധതികൾ എന്തെല്ലാമെന്ന് വിശദമാക്കാമോ;

ഓരോ പ്രവൃത്തിക്കും അനുവദിച്ച തുക എത്ര വീതമെന്ന് വ്യക്തമാക്കാമോ;

പ്രവൃത്തികളുടെ നിലവിലെ സ്ഥിതി വിശദമാക്കാമോ?

ഈ സർക്കാർ അധികാരത്തിൽ വന്നശേഷം കല്ല്യാശ്ശേരി മണ്ഡലത്തിൽ കൃഷിവകുപ്പ് മുഖേന നടപ്പാക്കിയ വിവിധ പദ്ധതികളുടെ വിശദാംശം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം അരൂര്‍ മണ്ഡലത്തിലെ കൃഷിഭവനുകള്‍ വഴി കൃഷിവകുപ്പ് നടപ്പാക്കിയ വിവിധ പദ്ധതികള്‍ എന്തെല്ലാമാണെന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം കേരഗ്രാമം പദ്ധതിയില്‍ ഉള്‍പ്പെടുത്തി ഒറ്റപ്പാലം മണ്ഡലത്തില്‍ അനുവദിച്ചിട്ടുള്ള ഫണ്ട് എത്രയാണെന്ന് പഞ്ചായത്ത്/മുനിസിപ്പാലിറ്റി തിരിച്ച് വ്യക്തമാക്കാമോ;

പ്രസ്തുത പദ്ധതികളുടെ നിലവിലെ സ്ഥിതി വിശദമാക്കാമോ?

കോഴിക്കോട് ജില്ലയില്‍ ഏതൊക്കെ ബ്ലോക്കുകളിലാണ് കൂണ്‍ ഗ്രാമം പദ്ധതി നടപ്പാക്കിയിട്ടുള്ളതെന്നും പദ്ധതിയില്‍ സര്‍ക്കാര്‍ എന്തൊക്കെ സഹായങ്ങളാണ് കൂണ്‍ കര്‍ഷകര്‍ക്ക് നല്‍കുന്നതെന്നും വിശദമാക്കാമോ;

കൃഷിവകുപ്പിന്റെ സഹായത്തോടെ പ്രവര്‍ത്തിക്കുന്ന കൂണ്‍ കൃഷിയുടെ ഉല്പാദനവും വിതരണവും നടത്തുന്ന സൊസെെറ്റികളോ കമ്പനികളോ നിലവിലുണ്ടോ; എങ്കില്‍ അത് ഏതൊക്കെ ജില്ലകള്‍ കേന്ദ്രീകരിച്ചാണ് പ്രവര്‍ത്തിച്ചു വരുന്നതെന്നും സര്‍ക്കാര്‍ എന്തൊക്കെ സഹായങ്ങളാണ് നല്‍കിവരുന്നതെന്നും വിശദമാക്കാമോ?

കുട്ടനാട്, അപ്പര്‍ കുട്ടനാട് മേഖലയിലെ നെല്‍ക്കൃഷി പ്രോത്സാഹനത്തിനായി സംസ്ഥാന സര്‍ക്കാര്‍ 2025–26 സാമ്പത്തിക വര്‍ഷത്തില്‍ വകയിരുത്തിയ മൊത്തം തുക എത്രയാണ്;

2025–26 സാമ്പത്തിക വര്‍ഷത്തില്‍ വകയിരുത്തിയ തുകയില്‍ ഇതുവരെ യഥാര്‍ത്ഥമായി ചെലവഴിച്ചതും വിതരണം ചെയ്തതും നെല്ലു സംഭരണത്തിനായി പ്രത്യേകിച്ച് മാറ്റിവച്ചതും ചെലവഴിച്ചതും എത്ര തുകയാണെന്ന് വിശദമാക്കാമോ;

2021-ല്‍ നിലവിലെ സര്‍ക്കാര്‍ അധികാരത്തില്‍ വന്നതിനുശേഷം ഇതുവരെ കുട്ടനാട് മേഖലയിലെ കര്‍ഷകര്‍ക്ക് ലഭിക്കാനുള്ള കുടിശിക എത്രയാണെന്ന് വിശദമാക്കാമോ;

കുടിശിക തീര്‍ക്കുന്നതിനായി സ്വീകരിച്ച നടപടിക്രമം എന്തൊക്കെയാണെന്നും കുടിശിക പൂര്‍ണമായി വിതരണം ചെയ്യാന്‍ ലക്ഷ്യമിടുന്ന സമയപരിധി എത്രയാണെന്നും വ്യക്തമാക്കാമോ; 2025–2026 സാമ്പത്തിക വര്‍ഷം കുട്ടനാട് മേഖലയിലെ എത്ര ഹെക്ടര്‍ ഭൂമിയില്‍ നെല്‍ക്കൃഷി നടത്തുന്നുണ്ടെന്നും ഇതിന് സര്‍ക്കാര്‍ നല്‍കുന്ന പ്രോത്സാഹന നടപടികൾ എന്തൊക്കെയാണെന്നും വിശദീകരിക്കാമോ;

നെല്ലു സംഭരണ വിതരണ നടപടികളില്‍ വന്ന താമസത്തിന് പ്രധാന കാരണങ്ങള്‍ എന്തൊക്കെയാണെന്നും ഭാവിയില്‍ കര്‍ഷകര്‍ക്ക് സമയബന്ധിതമായി തുക ലഭ്യമാക്കാന്‍ സര്‍ക്കാര്‍ സ്വീകരിക്കുന്ന നടപടി എന്തൊക്കെയാണെന്നും വിശദീകരിക്കാമോ?

പച്ചക്കറികളിലെ വിഷാംശം ശാസ്ത്രീയമായി നിരീക്ഷിക്കുന്നതിന് സ്വീകരിച്ച നടപടി വിശദമാക്കുമോ;

ഉത്തമ കാര്‍ഷിക പ്രയോഗങ്ങള്‍ പ്രചരിപ്പിക്കുന്നതിനും ഉറവിട ട്രെയിസിംഗ് പ്ലാറ്റ്ഫോമുകള്‍ സൃഷ്ടിക്കുന്നതിനും സ്വീകരിച്ച നടപടി വിശദമാക്കുമോ;

പച്ചക്കറിയിൽ വിഷാംശം, മായം എന്നിവ തടയാൻ എന്തെല്ലാം സംവിധാനങ്ങള്‍ നിലവിലുണ്ട്; വിശദമാക്കുമോ?

സംസ്ഥാനത്ത് നെല്ല് അടക്കമുള്ള എല്ലാ വിളകളുടെയും വിത്തുകള്‍, നടീല്‍ വസ്തുക്കള്‍ എന്നിവയുടെ ലഭ്യത ഉറപ്പുവരുത്താൻ സർക്കാർ നടത്തുന്ന ഇടപെടലുകള്‍ വിശദമാക്കാമോ;

ഉയര്‍ന്ന ഉല്പാദനക്ഷമതയും രോഗപ്രതിരോധശേഷിയുമുള്ള വിത്തിനങ്ങള്‍ ലഭ്യമാക്കാൻ സ്വീകരിച്ച നടപടി വിശദമാക്കാമോ;

ഉപ്പുരസം കൂടുതലുള്ള ഭൂമിയില്‍ കൃഷി ചെയ്യാവുന്ന നെല്ലിനങ്ങള്‍ ലഭ്യമാക്കാൻ സ്വീകരിച്ച നടപടി വിശദമാക്കാമോ?

കേരളത്തിലെ മുഴുവന്‍ നെല്‍ കൃഷിഭൂമിയുടെയും ആധുനിക ഡാറ്റാ ബെയ്സ് സൃഷ്ടിക്കാൻ സർക്കാർ സ്വീകരിച്ച നടപടികൾ വിശദമാക്കാമോ;

നെല്‍ക്കൃഷി ചെയ്യുന്ന ഓരോ വയലും ജി. പി. എസ്. മായി ബന്ധപ്പെടുത്താൻ സർക്കാർ നടപടി സ്വീകരിച്ചിട്ടുണ്ടോ; വിശദമാക്കാമോ;

തരിശുഭൂമി നിര്‍മ്മാര്‍ജന പരിപാടിയുടെ നിലവിലെ സ്ഥിതി വിശദമാക്കാമോ?

കൈപ്പാട് കൃഷി വിപുലപ്പെടുത്തുന്നതിനായി നാളിതുവരെയായി സ്വീകരിച്ച നടപടി എന്തെല്ലാമാണെന്ന് വിശദമാക്കാമോ;

സംസ്ഥാനത്ത് ഏതൊക്കെ ജില്ലയിലാണ് കൈപ്പാട് കൃഷിക്ക് അനുയോജ്യമായ പ്രദേശങ്ങള്‍ കണ്ടെത്തിയിട്ടുള്ളത്; വിശദമാക്കാമോ?

2021 വര്‍ഷം മുതല്‍ ഇതുവരെ കുറ്റ്യാടി മണ്ഡലത്തിലെ നാളികേര ഉല്പാദനം സംബന്ധിച്ച വിവരങ്ങള്‍ പഞ്ചായത്ത് തിരിച്ചും വര്‍ഷം തിരിച്ചും വ്യക്തമാക്കാമോ;

നാളികേര ഉല്പാദനം വര്‍ദ്ധിപ്പിക്കുന്നതിന്റെ ഭാഗമായി കുറ്റ്യാടി മണ്ഡലത്തില്‍ കൃഷിവകുപ്പ് സ്വീകരിച്ച നടപടികള്‍ എന്തൊക്കെയാണെന്ന് വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം ആലപ്പുഴ മണ്ഡലത്തില്‍ നടപ്പാക്കിയിട്ടുള്ള കേരഗ്രാമം പദ്ധതികളുടേയും കൃഷിസമൃദ്ധി പദ്ധതികളുടേയും വിശദാംശവും അവയുടെ നിലവിലെ സ്ഥിതിയും ചെലവഴിച്ച തുകയും സംബന്ധിച്ച വിവരങ്ങള്‍ നല്‍കാമോ;

കേരഗ്രാമം പദ്ധതിയിലൂടെ എന്തൊക്കെ ആനുകൂല്യങ്ങളും സഹായങ്ങളുമാണ് കേര കര്‍ഷകര്‍ക്ക് ലഭ്യമാകുന്നതെന്ന് വ്യക്തമാക്കാമോ?

സംസ്ഥാനത്ത് ഇതുവരെ കേരഗ്രാമങ്ങള്‍ എത്രയെണ്ണം യാഥാര്‍ത്ഥ്യമായിട്ടുണ്ടെന്ന് വ്യക്തമാക്കാമോ?

മലപ്പുറം മണ്ഡലത്തിലെ ഏതെല്ലാം തദ്ദേശ സ്വയംഭരണ സ്ഥാപനങ്ങളിൽ കേരഗ്രാമം പദ്ധതി നാളിതുവരെ നടപ്പാക്കിയിട്ടുണ്ടെന്നും അവയുടെ പുരോഗതിയും വെളിപ്പെടുത്തുമോ;

നാളികേരത്തിന്റെ ഉല്പാദനവും ഉല്പാദനക്ഷമതയും വര്‍ദ്ധിപ്പിക്കുന്നതിനും സമഗ്ര നാളികേരകൃഷി വികസനത്തിനുമായി കേരഗ്രാമം പദ്ധതി സഹായിച്ചിട്ടുണ്ടോയെന്ന് വിലയിരുത്തിയിട്ടുണ്ടോ; എങ്കിൽ വിശദാംശം നൽകുമോ;

ഈ സാമ്പത്തികവർഷം മലപ്പുറം മണ്ഡലത്തിലെ ശേഷിക്കുന്ന തദ്ദേശ സ്വയംഭരണ സ്ഥാപനങ്ങളിൽകൂടി പദ്ധതി നടപ്പാക്കുമോ; വ്യക്തമാക്കുമോ?

കുണ്ടറ മണ്ഡലത്തില്‍ നടപ്പാക്കിവരുന്ന കേരഗ്രാമം പദ്ധതിയുടെ വിശദാംശങ്ങള്‍ പഞ്ചായത്ത് തിരിച്ച് നല്‍കാമോ?

സംസ്ഥാനത്ത് തെങ്ങ് കൃഷി കുറഞ്ഞുവരുന്നതായി കണ്ടെത്തിയിട്ടുണ്ടോ;

തെങ്ങ് കൃഷി ​പ്രോത്സാഹിപ്പിക്കുന്നതിന് എന്തെങ്കിലും പദ്ധതി തയ്യാറാക്കിയിട്ടുണ്ടോ; എങ്കിൽ വിശദമാക്കുമോ;

പുതുതായി തെങ്ങു കൃഷി ആരംഭിക്കുന്ന കർഷകരുടെ തെങ്ങിന്‍ തൈകൾ അഞ്ചുവർഷം തികയുന്നതിന് മുൻപ് രോഗങ്ങളാൽ നശിച്ചുപോകുന്നത് ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

ഈ സാഹചര്യത്തിൽ തെങ്ങു കൃഷി ചെയ്യാൻ തയ്യാറുളള കർഷകർക്ക് തുടക്കം മുതൽ 8 വർഷം വരെയെങ്കിലും തൈകളുടെ പരിചരണം, വളം ചെയ്യൽ, മരുന്നു പ്രയോഗം എന്നിവയുമായി ബന്ധപ്പെട്ട് കൃഷിഭവനുകൾ മുഖേന ഒരു സമഗ്ര പദ്ധതി തയ്യാറാക്കി നടപ്പിലാക്കുമോ; വിശദാംശം നൽകുമോ?

നിലവിലെ സര്‍ക്കാര്‍ വിവിധ ഘട്ടങ്ങളിലായി പ്രഖ്യാപിച്ചിട്ടുള്ള റബ്ബര്‍ സംഭരണ നടപടിയുടെ വിശദാംശം ലഭ്യമാക്കാമോ;

സംഭരണ പദ്ധതികളുടെ പ്രഖ്യാപിത ലക്ഷ്യം കൈവരിക്കാനായോ; ഇത് സംബന്ധിച്ച കണക്കുകൾ ലഭ്യമാക്കാമോ;

സര്‍ക്കാരിന്റെ നിലവിലുള്ള സംഭരണ നടപടികളിലൂടെ റബ്ബര്‍ വില എത്രത്തോളം പിടിച്ചുനിര്‍ത്താന്‍ കഴിയുമെന്ന് വ്യക്തമാക്കാമോ;

റബ്ബര്‍ സംഭരണ പദ്ധതികള്‍ക്കായി നിലവിലെ സര്‍ക്കാര്‍ നാളിതുവരെ എത്ര തുക ചെലവഴിച്ചിട്ടുണ്ടെന്ന് വ്യക്തമാക്കാമോ?

ഈ സർക്കാർ അധികാരത്തിൽ വന്നശേഷം നാളിതുവരെ കേരള കർഷക കടാശ്വാസ കമ്മീഷൻ ശിപാർശ ചെയ്ത കടശ്വാസ തുക എത്രയാണ്; ഇതിൽ എത്ര കോടി രൂപ വിതരണം ചെയ്തിട്ടുണ്ടെന്ന് വിശദമാക്കാമോ;

2025 ഓഗസ്റ്റ് 31 വരെ കടാശ്വാസ കമ്മീഷൻ ശിപാർശ ചെയ്ത എത്ര കോടി രൂപയുടെ കടാശ്വാസം നിലവിൽ കുടിശിക ആയിട്ടുണ്ട്; ഇതനുസരിച്ച് കടാശ്വാസം ലഭിക്കാനുള്ള കർഷകരുടെ എണ്ണം ജില്ല തിരിച്ച് ലഭ്യമാക്കാമോ?

സംസ്ഥാനത്ത് കൃഷി പ്രധാന തൊഴിലായി സ്വീകരിച്ചിട്ടുള്ള എത്രപേരുണ്ട്; ഓരോ വിളയും കൃഷി ചെയ്യുന്നവരുടെ എണ്ണം എത്ര; ജില്ല തിരിച്ചുള്ള വിവരം ലഭ്യമാക്കാമോ;

കഴിഞ്ഞ പത്തു വർഷത്തിനുള്ളിൽ കർഷകരുടെ എണ്ണത്തിൽ ഗണ്യമായ കുറവ് വന്നിട്ടുണ്ടോ; എങ്കിൽ അതിനുള്ള കാരണങ്ങൾ എന്തെല്ലാമാണെന്ന് പരിശോധിച്ചിട്ടുണ്ടോ; കൃഷി ആദായകരമല്ലാതാകുന്നതിന്റെ കാരണങ്ങൾ എന്തെല്ലാമാണെന്ന് പരിശോധിച്ചിട്ടുണ്ടോ; വ്യക്തമാക്കാമോ;

മങ്കട നിയോജകമണ്ഡലത്തിൽ കൃഷി പ്രധാന തൊഴിലായി സ്വീകരിച്ചിട്ടുള്ള എത്രപേരുണ്ടെന്നും ഓരോ വിളയും കൃഷി ചെയ്യുന്നവരുടെ എണ്ണം എത്രയെന്നും എന്തെല്ലാം തരത്തിലുള്ള പ്രതിസന്ധികളാണ് കർഷകർ നേരിടുന്നതെന്നും ഇത് പരിഹരിക്കാൻ എന്തു നടപടി സ്വീകരിച്ചിട്ടുണ്ടെന്നും അറിയിക്കാമോ;

മങ്കട നിയോജകമണ്ഡലത്തിൽ കൃഷിനാശം നേരിട്ട കർഷകർ എത്രയെന്നും അവര്‍ക്കായി എത്ര രൂപയുടെ നഷ്ടപരിഹാരം വിതരണം ചെയ്യാൻ ബാക്കിയുണ്ടെന്നുമുള്ള വിശദാംശം ലഭ്യമാക്കുമോ; നഷ്ടപരിഹാരം അടിയന്തരമായി വിതരണം ചെയ്യുന്നതിന് നടപടി സ്വീകരിക്കുമോ?

2025-26 സാമ്പത്തിക വർഷത്തില്‍ തിരുവനന്തപുരം ജില്ലയിലെ കർഷകർക്കായി കൃഷിവകുപ്പ് പുതിയതായി നടപ്പാക്കുന്ന പദ്ധതികള്‍ ഏതൊക്കെയാണെന്ന് വിശദമാക്കാമോ;

ഓരോ പദ്ധതിയിലും തിരുവനന്തപുരം ജില്ലയിലെ ബ്ലോക്ക് തലത്തില്‍ അനുവദിച്ച പദ്ധതികളും അതിനനുവദിച്ച ഫണ്ടും എത്രയെന്ന് വിശദമാക്കാമോ?

കാസർഗോഡ് ജില്ലയിലെ അടയ്ക്കാകൃഷിക്ക് മഹാളി രോഗം ഉൾപ്പെടെയുള്ള വിവിധ രോഗം ബാധിച്ചതിനാൽ അടയ്ക്കാ കർഷകർക്ക് പ്രയാസം നേരിടുന്നത് ശ്രദ്ധയിൽപ്പെട്ടിട്ടുണ്ടോ; എങ്കില്‍ എന്തു പരിഹാരനടപടിയാണ് സ്വീകരിച്ചിട്ടുള്ളത് എന്ന് വ്യക്തമാക്കാമോ;

അടയ്ക്കാകർഷകർക്ക് പ്രത്യേക പാക്കേജ് അനുവദിച്ച് അവരെ സഹായിക്കുന്നതിന് നടപടി സ്വീകരിക്കുമോ; വിശദമാക്കാമോ?

ഈ സർക്കാർ അധികാരത്തിൽ വരുമ്പോൾ കർഷകത്തൊഴിലാളി ക്ഷേമനിധി ബോർഡിൽ അംഗത്വമുള്ള എത്ര കർഷകർ ഉണ്ടായിരുന്നു; തുടർന്നുള്ള ഓരോ വർഷങ്ങളിലും ബോർഡിൽ അംഗത്വമുള്ള കർഷകത്തൊഴിലാളികളുടെ എണ്ണം വ്യക്തമാക്കുമോ;

നിലവിൽ ബോർഡിൽ അംഗത്വമുള്ള കർഷകർക്ക് ക്ഷേമനിധി ആനുകൂല്യമായി എത്ര കോടി രൂപ നൽകാൻ ഉണ്ടെന്നും എത്ര മാസത്തെ ആനുകൂല്യമാണ് മുടങ്ങിയിട്ടുള്ളതെന്നും വ്യക്തമാക്കാമോ;

ക്ഷേമനിധി ആനുകൂല്യങ്ങൾ മുടങ്ങുന്നതുകൊണ്ടും കൂടുതൽ കർഷകർ ക്ഷേമനിധിയിൽ ചേരാൻ മടിക്കുന്നത് കൊണ്ടുമാണോ കർഷകത്തൊഴിലാളി ക്ഷേമനിധിയിൽ അംഗത്വം എടുക്കുന്നവരുടെ എണ്ണം കുറയുന്നത് എന്ന കാര്യം പരിശോധിച്ചിട്ടുണ്ടോ; എങ്കിൽ വ്യക്തമാക്കുമോ?

പാട്ടത്തിനെടുത്ത ഭൂമിയിൽ കൃഷിചെയ്യുന്ന കർഷകർക്കായി സർക്കാർ എന്തൊക്കെ പദ്ധതികളാണ് നടപ്പാക്കാൻ ഉദ്ദേശിക്കുന്നതെന്ന് വിശദമാക്കുമോ;

ലൈസൻസ് ലഭിച്ചാൽ കർഷകർക്ക് ഭൂവുടമയുടെ രേഖകളില്ലാതെ ലഭിക്കുന്ന ആനുകൂല്യങ്ങൾ എന്തൊക്കെയാണെന്ന് വിശദമാക്കാമോ;

പാട്ടക്കർഷകർക്ക് നൽകുന്ന ലൈസൻസിന്റെ കാലാവധി എത്രയാണെന്ന് വ്യക്തമാക്കാമോ;

ഭൂവുടമകൾക്ക് ഭൂമി തിരികെ ലഭിക്കുമോയെന്ന ആശങ്ക ഒഴിവാക്കാൻ സർക്കാർ എന്തൊക്കെ പദ്ധതികളാണ് ആവിഷ്‌കരിച്ചിരിക്കുന്നതെന്ന് വിശദമാക്കാമോ?

സംസ്ഥാനത്ത് കൃഷിക്കാരുടെ വരുമാനത്തില്‍ അൻപത് ശതമാനം വര്‍ദ്ധനവ് സൃഷ്ടിക്കാൻ സാധിച്ചിട്ടുണ്ടോ; വിശദമാക്കാമോ;

ഇപ്രകാരം വരുമാനം വർദ്ധിപ്പിക്കാൻ സ്വീകരിച്ച നടപടി വിശദമാക്കാമോ;

കേരളത്തിലെ പ്രധാനപ്പെട്ട കൃഷികളുടെ തറവില കാലോചിതമായി പരിഷ്കരിക്കാൻ സാധിച്ചിട്ടുണ്ടോ; വിശദമാക്കാമോ?

സംസ്ഥാനത്തെ അടയ്ക്കാ കർഷകരുടെ എണ്ണം ജില്ല തിരിച്ച് വ്യക്തമാക്കാമോ;

ഏറ്റവും കൂടുതൽ അടയ്ക്കാ കർഷകർ ഉളള നിയോജകമണ്ഡലം ഏതാണെന്ന് വ്യക്തമാക്കാമോ;

സംസ്ഥാനത്ത് എവിടെയാണ് ഏറ്റവും ഗുണനിലവാരമുളള അടയ്ക്ക ഉല്പാദിപ്പിക്കുന്നതെന്ന് വ്യക്തമാക്കാമോ; ഈ അടയ്ക്കയുടെ പ്രത്യേകത എന്താണെന്ന് വിശദമാക്കാമോ;

വിദേശ രാജ്യങ്ങളിലേക്ക് സംസ്ഥാനത്തുനിന്ന് അടയ്ക്ക കയറ്റുമതി ചെയ്യാറുണ്ടോയെന്നും എങ്കിൽ ഏതു മണ്ഡലത്തിൽ നിന്നുളള അടയ്ക്കയാണ് കൂടുതലായി കയറ്റുമതി ചെയ്യു​ന്നതെന്നും വ്യക്തമാക്കാമോ;

കാസർഗോ‍ഡ് ജില്ലയിലെ അടയ്ക്കാ കർഷകർ നേരിടുന്ന പ്രശ്നങ്ങൾ എന്തെല്ലാമാണെന്ന് സർക്കാരിന്റെ ശ്രദ്ധയിൽപ്പെട്ടിട്ടുണ്ടോ; അതിന് എന്തു പരിഹാര നടപടിയാണ് സ്വീകരിച്ചിട്ടുളളതെന്ന് വിശദമാക്കാമോ?

സംസ്ഥാനത്ത് കാലാവസ്ഥാ വ്യതിയാനം മൂലം ഉണ്ടാകുന്ന കൃഷിനാശത്തിന് നഷ്ടപരിഹാരം നല്‍കുന്നതിനായി കേന്ദ്ര സഹായം ലഭ്യമാകുന്നുണ്ടോ; വ്യക്തമാക്കാമോ;

കാലാവസ്ഥാ വ്യതിയാനം മൂലം കൃഷി നശിച്ച എല്ലാ കര്‍ഷകര്‍ക്കും നഷ്ടപരിഹാരം ലഭിക്കുന്നതിന് പ്രത്യേക പാക്കേജ് അനുവദിക്കാന്‍ ഉദ്ദേശിക്കുന്നുണ്ടോ; വിശദമാക്കാമോ;

കൃഷിയും വിളവെടുപ്പും കാലാവസ്ഥാ വ്യതിയാനത്തിനനുസൃതമായി ക്രമീകരിച്ച് കാലാവസ്ഥാ വ്യതിയാനത്തെ അതിജീവിക്കുന്നതിനുള്ള സാധ്യതകളെ സംബന്ധിച്ച് പ്രത്യേക പഠനം നടത്തുന്നതിന് ഉദ്ദേശിക്കുന്നുണ്ടോ; വിശദാംശം ലഭ്യമാക്കാമോ?

പെരിന്തല്‍മണ്ണ താലൂക്ക് പരിധിയില്‍ കഴിഞ്ഞ രണ്ടു വര്‍ഷങ്ങളിലുണ്ടായ പ്രകൃതിക്ഷോഭത്തില്‍ കൃഷിനാശം സംഭവിച്ച കര്‍ഷകര്‍ക്കുള്ള നഷ്ടപരിഹാരത്തുക വിതരണം ചെയ്തിട്ടുണ്ടോയെന്ന് വിശദമാക്കുമോ;

നഷ്ടപരിഹാരത്തുക ലഭിക്കാത്ത കര്‍ഷകര്‍ക്ക് എപ്പോള്‍ വിതരണം ചെയ്യാനാകുമെന്ന് വ്യക്തമാക്കുമോ?

505 ഹെക്ടർ വിസ്തൃതിയുള്ള മുണ്ടേരി സീഡ് ഫാമിന്റെ എത്ര സ്ഥലമാണ് നിലവില്‍ കൃഷി ചെയ്യുവാനായി ഉപയോഗപ്പെടുത്തുന്നതെന്ന് അറിയിക്കാമോ; ഫാമിന്റെ അവശേഷിക്കുന്ന പ്രദേശത്തേക്കുകൂടി കൃഷി വ്യാപിപ്പിക്കുവാൻ ആവശ്യമായ നടപടി സ്വീകരിക്കുമോ;

ചാലിയാർ പുഴയുടെ ഓരത്ത് പശ്ചിമഘട്ട മലനിരകളാൽ ചുറ്റപ്പെട്ട മനോഹരമായ കാർഷിക ഭൂപ്രകൃതിയും ഫാം ഹൗസുകളുടെ ലഭ്യതയുമുള്ള മുണ്ടേരി സീഡ് ഫാമിനെ ഫാം ടൂറിസം പദ്ധതിയിൽ ഉൾപ്പെടുത്തി വരുമാനം വർദ്ധിപ്പിക്കുവാനുള്ള നടപടി സ്വീകരിക്കുമോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം ആലപ്പുഴ മണ്ഡലത്തില്‍ എത്ര കൃഷിഭവനുകളെയാണ് സ്മാര്‍ട്ട് ആക്കുവാനുള്ള നടപടി സ്വീകരിച്ചിട്ടുള്ളതെന്ന് വ്യക്തമാക്കാമോ;

സ്മാര്‍ട്ട് കൃഷിഭവന്‍ പദ്ധതി പ്രകാരം എത്ര തുകയാണ് ഇവയ്ക്ക് ചെലവഴിക്കുന്നതെന്നും നിലവിലെ സ്ഥിതി സംബന്ധിച്ച വിശദവിവരവും ലഭ്യമാക്കാമോ;

മാരാരിക്കുളം വടക്ക് പഞ്ചായത്തിലെ കൃഷിഭവന്‍ സ്മാര്‍ട്ട് ആക്കുന്നതിന് നിലവില്‍ എന്തു നടപടിയാണ് സ്വീകരിച്ചു വരുന്നതെന്ന് വ്യക്തമാക്കാമോ?

സംസ്ഥാനത്ത്‌ തരിശ് ഭൂമിയിലെ കൃഷി പ്രോത്സാഹിപ്പിക്കുന്നതിന് ഏതൊക്കെ പദ്ധതികളാണ് നടപ്പാക്കി വരുന്നത്; വിശദമാക്കാമോ;

ഈയിനത്തിൽ 2024-25 വർഷത്തിൽ എത്ര രൂപ ചിലവഴിച്ചു; ജില്ലതിരിച്ചുള്ള കണക്ക് വ്യക്തമാക്കാമോ;

തരിശ് ഭൂമിയില്‍ കൃഷി ഏറ്റെടുത്ത് നടപ്പിലാക്കിയ ഏതൊക്കെ കർഷകർക്ക്/കർഷക കൂട്ടായ്മകൾക്ക് ധനസഹായം ഇനി നൽകുവാനുണ്ട്; ജില്ലതിരിച്ചുള്ള കണക്ക് ലഭ്യമാക്കാമോ;

സഹായം ലഭിച്ചിട്ടില്ലെന്നുള്ള പരാതി രേഖാമൂലം ആരെങ്കിലും നൽകിയിട്ടുണ്ടോ; എങ്കിൽ അതിൽ എന്തു നടപടി സ്വീകരിച്ചു എന്ന് വ്യക്തമാക്കാമോ;

പരാതിക്കാർക്ക് ധനസഹായം അനുവദിക്കുവാൻ ആവശ്യമായ നടപടി സ്വീകരിക്കുമോ; വിശദമാക്കാമോ?

2021 മുതല്‍ നാളിതുവരെയായി കുറ്റ്യാടി മണ്ഡലത്തിലെ തരിശുനിലങ്ങള്‍ കൃഷിയോഗ്യമാക്കുന്നതിന് സ്വീകരിച്ച നടപടി വിശദമാക്കാമോ;

ഇത്തരത്തില്‍ എത്ര വിസ്തൃതിയിലുള്ള തരിശുനിലങ്ങള്‍ കൃഷിയിടങ്ങളാക്കി മാറ്റിയിട്ടുണ്ടെന്നും അതുവഴി ഉണ്ടായ കാര്‍ഷികോല്പാദനം സംബന്ധിച്ച വിവരങ്ങള്‍ കൃഷിയുടെ ഇനം സഹിതം വിശദമാക്കാമോ?

തൃശ്ശൂർ ജില്ലയിൽ വിള ഇൻഷുറൻസ് പദ്ധതി പ്രകാരം ഇൻഷ്വർ ചെയ്തവരിൽ വിളനാശം സംഭവിച്ച മുഴുവൻ കർഷകർക്കും ഇൻഷുറൻസ് ആനുകൂല്യം നല്‍കാനായിട്ടുണ്ടോ; വിശദാംശം നല്‍കാമോ;

തൃശ്ശൂർ ജില്ലയില്‍ വിള ഇൻഷുറൻസ് ഇനത്തില്‍ കുടിശികയുണ്ടെങ്കില്‍ അതിന്റെ വിശദാംശം അറിയിക്കാമോ; പ്രസ്തുത കുടിശിക എന്നത്തേക്ക് വിതരണം ചെയ്യാനാകുമെന്ന് വ്യക്തമാക്കാമോ;

മണലൂർ നിയോജക മണ്ഡലത്തില്‍ വിള ഇൻഷുറൻസ് പദ്ധതിയില്‍ എത്ര പേർ രജിസ്റ്റർ ചെയ്തിട്ടുണ്ടെന്നും നാശനഷ്ടം സംഭവിച്ച എത്ര കർഷകർക്ക് ഇതുവരെ ഇൻഷുറൻസ് ആനുകൂല്യം വിതരണം ചെയ്തെന്നും അറിയിക്കാമോ; കുടിശികയുണ്ടെങ്കില്‍ അതിന്റെ വിശദാംശം നല്‍കാമോ;

വിള ഇൻഷുറൻസ് പദ്ധതി പ്രകാരം മണലൂർ മണ്ഡലത്തില്‍ ഈ സർക്കാറിന്റെ കാലത്ത് നാളിതുവരെ എത്ര രൂപ വിതരണം ചെയ്തെന്ന് അറിയിക്കാമോ?

സംസ്ഥാന സർക്കാരിന്റെ വിള ഇൻഷുറൻസ് പദ്ധതിയുടെ പുരോഗതി വിലയിരുത്തിയിട്ടുണ്ടോ; വിശദമാക്കുമോ;

വിള ഇൻഷുറൻസ് പദ്ധതി പ്രകാരമുള്ള ആനുകൂല്യങ്ങൾക്കായി അപേക്ഷ സമർപ്പിച്ചതിൽ ഇനി എത്ര തുക വിതരണം ചെയ്യാൻ അവശേഷിക്കുന്നുണ്ട്; വിശദമാക്കുമോ;

വിളനാശത്തിനായി പ്രഖ്യാപിച്ച നഷ്ടപരിഹാരത്തുക അടിയന്തരമായി വിതരണം ചെയ്യുന്നതിന് വേണ്ട നടപടി സ്വീകരിക്കാമോ?

സംസ്ഥാനത്ത് കാർഷികോല്പാദനം വർദ്ധിപ്പിക്കുക എന്ന ലക്ഷ്യത്തോടെ അമിതമായ തോതിൽ കീടനാശിനികൾ ഉപയോഗിച്ചുവരുന്നതായി ശ്രദ്ധയിൽപ്പെട്ടിട്ടുണ്ടോ; എങ്കിൽ ഇക്കാര്യം സർക്കാർ പരിശോധിച്ചിട്ടുണ്ടോ; വിശദമാക്കാമോ;

കീടനാശിനികളുടെ വില്പനയും ഉപയോഗവും നിയന്ത്രിക്കുന്നതിനും ഗുണനിലവാരം ഉറപ്പുവരുത്തുന്നതിനും എന്തെങ്കിലും മാർഗനിർദേശങ്ങൾ പുറപ്പെടുവിച്ചിട്ടുണ്ടോ; വിശദമാക്കാമോ;

സംസ്ഥാനത്തെ കൃഷിമേഖലയെ കീടനാശിനി വിമുക്തമാക്കാൻ ഉദ്ദേശിക്കുന്നുണ്ടോ; എങ്കിൽ വിശദാംശം നൽകാമോ?

സംസ്ഥാനത്ത് ഉപയോഗിച്ചുകൊണ്ടിരിക്കുന്ന വളങ്ങള്‍ക്ക് ക്ഷാമം അനുഭവപ്പെടുന്നുണ്ടോ; വിശദമാക്കാമോ;

ഓരോ കാര്‍ഷിക സീസണിലും സംസ്ഥാനത്തിന് ആവശ്യമായി വരുന്ന വളത്തിന്റെ അളവ് വ്യക്തമാക്കുമോ; നിലവില്‍ വളത്തിന്റെ ലഭ്യതയിൽ സംസ്ഥാനത്തിന്റെ ആവശ്യം നിറവേറ്റപ്പെടുന്നുണ്ടോയെന്ന് അറിയിക്കാമോ;

കര്‍ഷകര്‍ക്ക് വളം ലഭ്യമാകുന്നതില്‍ ദൗര്‍ലഭ്യം നേരിടുന്നതിനുള്ള കാരണങ്ങള്‍ എന്തെല്ലാമാണെന്ന് വ്യക്തമാക്കാമോ;

ഇവ പരിഹരിക്കുന്നതില്‍ സര്‍ക്കാര്‍ സംവിധാനങ്ങളിൽ വീഴ്ച ഉണ്ടായിട്ടുണ്ടോ; വിവരിക്കാമോ?

കര്‍ഷകരുടെ മൂല്യവര്‍ദ്ധിത ഉല്പന്നങ്ങളുടെ വിപണനത്തിനായുള്ള കേരളഗ്രോ ബ്രാന്‍ഡ് ഷോപ്പ് എത്ര ജില്ലകളില്‍ ആരംഭിച്ചിട്ടുണ്ട്; വ്യക്തമാക്കാമോ?

സംസ്ഥാന ഹോള്‍ട്ടികള്‍ച്ചര്‍ മിഷന്‍ മുഖേന നടപ്പാക്കുന്ന കൂണ്‍ഗ്രാമം പദ്ധതി നടപ്പിലാക്കുന്നതിനായി പുതുതായി ഏതൊക്കെ നിയോജകമണ്ഡലങ്ങളെയും കൃഷി ഭവനുകളെയുമാണ് ഉള്‍പ്പെടുത്താന്‍ ഉദ്ദേശിക്കുന്നത്; വ്യക്തമാക്കാമോ;

പദ്ധതിയുടെ ഉദ്ദേശ്യലക്ഷ്യങ്ങള്‍ എന്തെല്ലാമാണെന്നും പ്രസ്തുത പദ്ധതിയിലൂടെ കര്‍ഷകര്‍ക്ക് എന്തൊക്കെ സഹായങ്ങളാണ് നല്‍കുന്നതെന്നും വിശദമാക്കാമോ?

സംസ്ഥാനത്ത് കര്‍ഷകരില്‍ നിന്ന് ഉല്പന്നങ്ങള്‍ സംഭരിച്ച് വിതരണം ചെയ്യുന്നതിനായി ഹോര്‍ട്ടികോര്‍പ്പ് ഫാം ക്ലബ്ബുകള്‍ രൂപീകരിക്കാന്‍ ഉദ്ദേശിക്കുന്നുണ്ടോ; വിശദമാക്കാമോ;

സംഭരിക്കുന്ന ഉല്പന്നങ്ങള്‍ വിതരണം ചെയ്യാന്‍ എന്തെല്ലാം പുതിയ സംവിധാനങ്ങളാണ് നടപ്പില്‍ വരുത്താൻ ഉദ്ദേശിക്കുന്നതെന്ന് അറിയിക്കാമോ;

ഫലവൃക്ഷ തൈകളുടെ വിതരണ മേഖലയില്‍ ഹോര്‍ട്ടികോര്‍പ്പ് ഇടപെടല്‍ നടത്തുവാന്‍ ഉദ്ദേശിക്കുന്നുണ്ടോ; എങ്കില്‍ എപ്രകാരമെന്ന് അറിയിക്കാമോ?

സംസ്ഥാനത്തു നിന്നും കാര്‍ഷികോല്പന്നങ്ങളും മൂല്യവര്‍ദ്ധിതോല്പന്നങ്ങളും ഏതെല്ലാം രാജ്യങ്ങളിലേക്കാണ് കയറ്റുമതി ചെയ്യുന്നതെന്ന് വ്യക്തമാക്കാമോ;

ഇന്ത്യന്‍ ഉല്പന്നങ്ങള്‍ക്ക് അമേരിക്ക ഇറക്കുമതി തീരുവ ഏകപക്ഷീയമായി വര്‍ദ്ധിപ്പിച്ച സാഹചര്യത്തില്‍ സംസ്ഥാനത്തെ കാര്‍ഷികോല്പന്ന കയറ്റുമതിയേയും കാര്‍ഷിക മേഖലയേയും ഏതെല്ലാം തരത്തില്‍ ബാധിക്കുമെന്ന് വിലയിരുത്തിയിട്ടുണ്ടോ; വിശദമാക്കാമോ;

നിലവില്‍ ഉണ്ടാകാനിടയുള്ള പ്രതിസന്ധിയെ അതിജീവിക്കുന്നതിന് എന്തെല്ലാം പദ്ധതികളാണ് ആസൂത്രണം ചെയ്യുന്നതെന്ന് വ്യക്തമാക്കാമോ;

ഇതിനായി കേന്ദ്ര സര്‍ക്കാറില്‍ നിന്നും ധനസഹായാഭ്യര്‍ത്ഥന നടത്തിയിട്ടുണ്ടോ; എങ്കില്‍ അതിനോട് കേന്ദ്ര സര്‍ക്കാറിന്റെ സമീപനം എന്താണെന്ന് അറിയിക്കാമോ?

കര്‍ഷകര്‍ക്ക് ആവശ്യമായ കൃഷി ഉപകരണങ്ങളും അനുബന്ധ സാധനങ്ങളും ലഭിക്കുന്നതിനുള്ള സര്‍ക്കാര്‍ സ്ഥാപനങ്ങള്‍ എവിടെയെല്ലാം പ്രവര്‍ത്തിക്കുന്നുവെന്ന് വിശദമാക്കാമോ;

നിലവില്‍ ലഭിക്കുന്ന ഉപകരണങ്ങള്‍ക്ക് സര്‍ക്കാര്‍ സബ്സിഡി അനുവദിച്ചിട്ടുണ്ടോയെന്ന് അറിയിക്കാമോ;

എങ്കില്‍ ഓരോ ഉപകരണത്തിന്റെയും നിലവിലുള്ള വിലയെത്രയെന്ന് വിശദമാക്കാമോ?

നിലമ്പൂർ നിയോജകമണ്ഡലത്തിലെ പുഞ്ചക്കൊല്ലി അളക്കൽ പ്രദേശത്തെ പ്ലാന്റേഷൻ കോർപ്പറേഷൻ ഓഫ് കേരളയുടെ കീഴിൽവരുന്ന തോട്ടത്തിലേക്കുള്ള പാലം 2019ലെ പ്രളയത്തിൽ തകർന്നത് മൂലം പ്രസ്തുത തോട്ടത്തിലെ തൊഴിലാളികൾക്ക് തോട്ടത്തിലേക്ക് ജോലിക്കായി വരുന്നതിനും തോട്ടത്തിലെ ഉല്പന്നങ്ങൾ വിപണനത്തിനായി പുറത്തു കൊണ്ടുപോകുന്നതിനും ബുദ്ധിമുട്ടുകൾ നേരിടുന്നതായി ശ്രദ്ധയിൽപ്പെട്ടിട്ടുണ്ടോ; അത് പരിഹരിക്കുന്നതിനുള്ള നടപടി സ്വീകരിക്കുമോ?

കൂത്തുപറമ്പ് മണ്ഡലത്തില്‍ നവോദയ കുന്നില്‍ കൃഷിവകുപ്പിന് കീഴിലുള്ള ബയോ റിസോഴ്സ് കം അഗ്രോ സര്‍വ്വീസ് സെന്ററിന്റെ പ്രവര്‍ത്തന പുരോഗതി വിശദീകരിക്കാമോ;

പ്രസ്തുത സ്ഥാപനം കാര്യക്ഷമമായി പ്രവര്‍ത്തിക്കുന്നതിന് വേണ്ടി എന്തൊക്കെ നടപടികളാണ് സ്വീകരിച്ചു വരുന്നതെന്ന് വിശദമാക്കുമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ആലത്തൂര്‍ മണ്ഡലത്തില്‍ നബാര്‍ഡിന്റെ സഹായത്തോടെ അനുവദിച്ച പദ്ധതികള്‍ ഏതൊക്കെയാണെന്ന് വിവരിക്കാമോ; ഈ പ്രവൃത്തികളിൽ ഏതൊക്കെ പുരോഗമിച്ചുവരുന്നെന്നും ഏതൊക്കെ മുടങ്ങിപ്പോയിയെന്നും പട്ടിക രൂപത്തിൽ ലഭ്യമാക്കാമോ;

മുടങ്ങിപ്പോയ പദ്ധതികളിൽ എന്ത് തുടര്‍നടപടി സ്വീകരിക്കുമെന്ന് വിശദീകരിക്കാമോ?

നെന്മാറ നിയോജകമണ്ഡലത്തിൽ കാർഷിക കോളേജ് ആരംഭിക്കുന്നതിനായി എന്തെല്ലാം സാധ്യതാപഠനങ്ങളാണ് കൃഷി വകുപ്പ് നടത്തിയിട്ടുള്ളതെന്ന് വിശദമാക്കുമോ;

കാർഷിക കോളേജിന് ആവശ്യമായ സ്ഥലവും മറ്റു സൗകര്യങ്ങളും കണ്ടെത്തിയിട്ടുണ്ടോ; എങ്കിൽ വിശദാംശം നൽകുമോ?

കാസര്‍ഗോഡ് ജില്ലയിലെ ഏതൊക്കെ കൃഷിഭവനുകളെയാണ് സ്മാര്‍ട്ട് കൃഷിഭവന്‍ പദ്ധതിയില്‍ ഉള്‍പ്പെടുത്തിയിട്ടുള്ളത് എന്ന് വ്യക്തമാക്കാമോ;

ഏത് മാനദണ്ഡത്തിന്റെ അടിസ്ഥാനത്തിലാണ് ഈ പദ്ധതിയിലേക്ക് കൃഷിഭവനുകളെ തിരഞ്ഞെടുക്കുന്നതെന്ന് വ്യക്തമാക്കാമോ;

2025-2026 വര്‍ഷത്തില്‍ ഈ പദ്ധതിക്കായി എത്ര തുക അനുവദിച്ചിട്ടുണ്ടെന്ന് വ്യക്തമാക്കാമോ?

സംസ്ഥാനത്ത് ഈ സര്‍ക്കാരിന്റെ കാലയളവില്‍ എത്ര കൃഷിഭവനുകള്‍ സ്മാര്‍ട്ടാക്കിയിട്ടുണ്ടെന്ന് ജില്ല തിരിച്ച് കണക്ക് ലഭ്യമാക്കുമോ;

മലപ്പുറം ജില്ലയില്‍ സ്മാര്‍ട്ടാക്കിയ കൃഷിഭവനുകളുടെ എണ്ണം താലൂക്ക് തിരിച്ച് ലഭ്യമാക്കുമോ?

തിരുവനന്തപുരം ജില്ലയിലെ എത്ര കൃഷിഭവനുകളാണ് സ്മാര്‍ട്ട് കൃഷിഭവനുകളായിട്ടുള്ളത്; അത് എവിടെയെല്ലാമെന്നും ഏതൊക്കെയാണെന്നും വിശദമാക്കാമോ?

പാറശ്ശാല മണ്ഡലത്തിലെ വിവിധ കൃഷിഭവനുകള്‍ മുഖേന 2016 മേയ് മുതല്‍ 2025 വരെ പ്രകൃതിക്ഷോഭവുമായി ബന്ധപ്പെട്ട് കൃഷി നശിച്ച എത്ര കര്‍ഷകര്‍ക്ക് സാമ്പത്തികസഹായം നല്‍കിയിട്ടുണ്ടെന്ന് കൃഷിഭവന്‍ തിരിച്ച് വിശദമാക്കാമോ;

ഈ സര്‍ക്കാര്‍ അധികാരത്തില്‍ വന്നശേഷം തിരുവനന്തപുരം ജില്ലയില്‍ എത്ര കൃഷിഭവനുകള്‍ ഹെെടെക്ക് ആയി ഉയര്‍ത്തുന്നതിന് ഫണ്ട് അനുവദിച്ചിട്ടുണ്ട്; വിശദാംശങ്ങള്‍ ലഭ്യമാക്കാമോ;

പാറശ്ശാല മണ്ഡലത്തിലെ കൃഷിഭവനുകള്‍ ഹെെടെക് ആയി ഉയര്‍ത്തുന്നതിന് നടപടി സ്വീകരിച്ചിട്ടുണ്ടോ; വ്യക്തമാക്കാമോ?

കോട്ടക്കല്‍ മണ്ഡലത്തിലെ കൃഷിഭവനുകളുടെ അടിസ്ഥാനസൗകര്യ വികസനത്തിനായി നടപ്പാക്കി വരുന്ന പദ്ധതികള്‍ ഏതൊക്കെയാണെന്നും ഇതിനായി എത്ര തുക വകയിരുത്തിയിട്ടുണ്ടെന്നും അറിയിക്കാമോ;

മണ്ഡലത്തിലെ കൃഷിഭവനുകളെ സ്മാര്‍ട്ട് കൃഷിഭവനാക്കി മാറ്റുന്നതിന് എന്തെല്ലാം പ്രവൃത്തികളാണ് വിഭാവനം ചെയ്തിട്ടുള്ളതെന്ന് വിശദമാക്കാമോ; മണ്ഡലത്തില്‍നിന്നും ഏതെല്ലാം കൃഷിഭവനുകളെയാണ് സ്മാര്‍ട്ട് കൃഷിഭവന്‍ പദ്ധതിയില്‍ ഉള്‍പ്പെടുത്തിയിട്ടുള്ളതെന്നറിയിക്കുമോ;

കോട്ടക്കല്‍ മണ്ഡലത്തിലെ ഇരിമ്പിളിയം കൃഷിഭവന് പുതിയ കെട്ടിടം നിര്‍മ്മിക്കുന്നത് സംബന്ധിച്ച പ്രൊപ്പോസലിൽ സ്വീകരിച്ച നടപടി വിശദമാക്കുമോ;

ആർ.ഐ.ഡി.എഫ്. ട്രാഞ്ചെ 28 പദ്ധതി പ്രകാരമുള്ള സ്മാര്‍ട്ട് കൃഷിഭവനുകളുടെ പട്ടികയില്‍ ഇരിമ്പിളിയം കൃഷിഭവനെ ഉള്‍പ്പെടുത്തിയതിന്റെ അടിസ്ഥാനത്തില്‍ പ്രസ്തുത കൃഷിഭവനെ സ്മാര്‍ട്ട് കൃഷിഭവനായി ഉയര്‍ത്തുന്നതിനുള്ള നടപടി സ്വീകരിക്കുമോ?

ഗ്രാമപഞ്ചായത്ത് കൃഷിഭവനുകളിലെ സ്റ്റാഫ് പാറ്റേണിനെക്കുറിച്ച് വിശദമാക്കാമോ; പാലാ നിയോജകമണ്ഡലത്തിലെ കൃഷിഭവനുകളില്‍ സ്റ്റാഫ് പാറ്റേണ്‍ പ്രകാരമല്ലാതെ പ്രവര്‍ത്തിക്കുന്ന കൃഷിഭവനുകള്‍ ഏതൊക്കെയാണെന്ന് അറിയിക്കാമോ; സ്റ്റാഫ് പാറ്റേണ്‍ കുറവ് വന്നത് ഏത് തീയതി മുതലാണെന്നും സ്റ്റാഫ് പാറ്റേണ്‍ പുനസ്ഥാപിക്കുന്നതിനുള്ള തടസ്സങ്ങള്‍ എന്തൊക്കെയാണെന്നും ഇത് സംബന്ധിച്ച നടപടിക്രമം എന്താണെന്നും വിശദമാക്കാമോ;ആയതിനു നടപടി സ്വീകരിക്കേണ്ടത് ഏത് തസ്തികയിലുള്ള ഉദ്യോഗസ്ഥനാണെന്നു കൂടി അറിയിക്കാമോ;

പാലാ നിയോജകമണ്ഡലത്തിലെ ഏതെങ്കിലും കൃഷി ഭവനുകളില്‍ കൃഷി അസിസ്റ്റന്റ് തസ്തിക റദ്ദാക്കുകയോ പുനക്രമീകരിക്കുകയോ ചെയ്തിട്ടുണ്ടോ; എങ്കില്‍ പ്രസ്തുത ഉത്തരവുകളുടെ പകര്‍പ്പ് ലഭ്യമാക്കുമോ;

കോട്ടയം ജില്ലയിലെ കൃഷിഭവനുകളില്‍ അനുവദിച്ചിട്ടുള്ള അസിസ്റ്റന്റ് കൃഷി ഓഫീസര്‍, കൃഷി അസിസ്റ്റന്റ് ഗ്രേഡ് 1, ഗ്രേഡ് 2 എന്നീ തസ്തികകളുടെ എണ്ണം എത്ര വീതമെന്ന് വിശദമാക്കാമോ;

കരൂര്‍ കൃഷിഭവനില്‍ 3 കൃഷി അസിസ്റ്റന്റ് തസ്തിക മുമ്പ് നിലവിലുണ്ടായിരുന്നോയെന്നും ഒരു തസ്തിക ഒഴിച്ചിട്ടിരിക്കുന്നതിന്റെ കാരണം എന്താണെന്നും വിശദമാക്കാമോ?

തൃശ്ശൂർ ജില്ലയിലെ പരിയാരം ഗ്രാമപഞ്ചായത്തിലെ വെജിറ്റബിൾ ആൻഡ് ബനാന പാക്ക് ഹൗസ് ഉദ്ഘാടനം കഴിഞ്ഞിട്ടും തുറന്ന് പ്രവര്‍ത്തിക്കാത്തത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ കാരണം വ്യക്തമാക്കുമോ;

ഈ പ്രവൃത്തിയുടെ ഉദ്ദേശ്യലക്ഷ്യങ്ങള്‍ വിശദീകരിക്കുമോ;

ഈ പ്രവൃത്തിക്കായി ചെലവഴിച്ച തുകയുടെ വിശദാംശം നല്‍കുമോ;

ഈ പ്രവൃത്തിക്കായി സ്ഥാപിച്ച ആധുനിക ഉപകരണങ്ങളുടെയും മെഷിനറികളുടെയും വിശദവിവരം ലഭ്യമാക്കുമോ;

പ്രവര്‍ത്തിക്കാത്തതുമൂലം ഇതിനുള്ളില്‍ സ്ഥാപിച്ചിട്ടുള്ള ആധുനിക ഉപകരണങ്ങളും മെഷീനറികളും ജനറേറ്ററും ഉപയോഗമില്ലാതെ നശിക്കുകയാണെന്നുള്ള വസ്തുത ശ്രദ്ധയില്‍പ്പെട്ടിട്ടുണ്ടോ; വിശദമാക്കുമോ;

വെജിറ്റബിൾ ആൻഡ് ബനാന പാക്ക് ഹൗസിന്റെ പ്രവര്‍ത്തനം എന്ന് ആരംഭിക്കാനാകുമെന്ന് അറിയിക്കുമോ?

സംസ്ഥാനത്ത് ഏതെല്ലാം പ്രദേശങ്ങളിലാണ് കൈപ്പാട് കൃഷി രീതി പിന്തുടര്‍ന്നു വരുന്നത്; ആകെ എത്ര ഏക്കർ സ്ഥലത്താണ് ഈ കൃഷിരീതി നിലവിലുള്ളത്;

വടകര നിയോജക മണ്ഡലത്തിലെ ഏറാമല പഞ്ചായത്തിൽ 17 ഏക്കര്‍ സ്ഥലത്ത് കൈപ്പാട് കൃഷി നടപ്പാക്കിയിട്ടുള്ളത് ശ്രദ്ധയിൽപ്പെട്ടിട്ടുണ്ടോ ;

ഈ കൃഷിരീതിയുടെ ഗുണദോഷങ്ങള്‍ സംബന്ധിച്ച് സര്‍ക്കാര്‍ ആധികാരിക പഠനം നടത്തിയിട്ടുണ്ടോ; വിശദമാക്കുമോ;

ഈ കൃഷി രീതി കൊണ്ടുള്ള ഗുണങ്ങൾ എന്തെല്ലാമാണ്; വിശദമാക്കുമോ;

കൈപ്പാട് കൃഷി പ്രോത്സാഹിപ്പിക്കുന്നതിന് സർക്കാർ എന്തെല്ലാം നടപടികളാണ് സ്വീകരിക്കുക; വിശദമാക്കുമോ;

ഈ കൃഷിരീതി പ്രോത്സാഹിപ്പിക്കുന്നതിനായി ധനസഹായം ഉള്‍പ്പെടെയുള്ള ആനുകൂല്യങ്ങള്‍ ലഭ്യമാക്കുന്ന കാര്യം സർക്കാർ പരിഗണിക്കുമോ; വിശദമാക്കുമോ?

ഈ സർക്കാർ അധികാരത്തില്‍ വന്നശേഷം കൂണ്‍കൃഷി വ്യാപനത്തിന് സ്വീകരിച്ച നടപടി എന്തൊക്കെയാണെന്ന് വിശദമാക്കാമോ;

കൂണ്‍കൃഷി ചെയ്യുന്നതിന് കർഷക ക്ഷേമനിധി ബോർഡില്‍ രജിസ്റ്റർ ചെയ്തവരുടെ എണ്ണം വർദ്ധിച്ചിട്ടുണ്ടോ; വിശദാംശം അറിയിക്കാമോ;

കൂണ്‍കൃഷി പ്രോത്സാഹിപ്പിക്കുന്നതിന് സര്‍ക്കാര്‍ എന്തു നടപടി സ്വീകരിച്ചിട്ടുണ്ടെന്ന് വിശദമാക്കാമോ;

കൂണ്‍കൃഷി വ്യാപനത്തിന് കര്‍ഷകര്‍ക്ക് സാമ്പത്തികസഹായം നല്‍കുന്നുണ്ടോ; വിശദാംശം നല്‍കാമോ?

ഈ സർക്കാർ അധികാരത്തില്‍ വന്നശേഷം കോങ്ങാട് മണ്ഡലത്തില്‍ കൃഷിവകുപ്പ് അനുവദിച്ചിട്ടുള്ള പദ്ധതികളുടെ വിശദവിവരം നല്‍കാമോ;

നിലവില്‍ നടത്തിവരുന്നതും ഇനി നടപ്പാക്കാനുള്ളതുമായ പദ്ധതികളുടെ വിശദാംശം നല്‍കാമോ?

നിലവിലെ സർക്കാരിന്റെ കാലയളവിൽ കൃഷി വകുപ്പിന്റെ കീഴിലുള്ള വിവിധ സ്ഥാപനങ്ങളും ഏജൻസികളും നാളിതുവരെ നൽകിയിട്ടുള്ള പരസ്യങ്ങളുടെ വിശദാംശങ്ങൾ, പരസ്യം നൽകിയ സ്ഥാപനം, പരസ്യത്തിനായി ചെലവഴിച്ച തുക, ഏത് ഏജൻസി മുഖേനയാണ് പരസ്യം നൽകിയത്, പ്രസ്തുത ഏജൻസിയെ തെരഞ്ഞെടുത്ത നടപടിക്രമം, ഏത് പദ്ധതിയുടെ ഭാഗമായാണ് പരസ്യം നൽകിയത് എന്നിവ സംബന്ധിച്ച വിശദാംശം ലഭ്യമാക്കാമോ;

പ്രസ്‌തുത കാലയളവിൽ പരസ്യ ഇനത്തിൽ ആകെ ചെലവഴിച്ച തുക വ്യക്തമാക്കാമോ?

കഴിഞ്ഞ 5 വർഷത്തെ കാലപരിധിയിലെ കാലവസ്ഥാവ്യതിയാനങ്ങളെ അടിസ്ഥാനമാക്കി സോയില്‍ സർവേ വകുപ്പ് കർഷകർക്ക് എന്തെല്ലാം നിർദേശങ്ങള്‍ നല്‍കിയിട്ടുണ്ടെന്ന് വിശദമാക്കാമോ; ഇതിന്റെ ഫലമായി കർഷകർക്ക് ഉണ്ടായ നേട്ടങ്ങള്‍ എന്തൊക്കെയാണെന്ന് വിശദമാക്കാമോ?

പൂഞ്ഞാർ മണ്ഡലത്തില്‍ സോയില്‍ കണ്‍സര്‍വേഷന്‍ വകുപ്പ് മുഖേന ഏതൊക്കെ പദ്ധതികളാണ് നടപ്പാക്കിവരുന്നതെന്ന് അറിയിക്കാമോ;

പ്രസ്തുത പദ്ധതികളുടെ നിലവിലെ സ്ഥിതി സംബന്ധിച്ച വിശദാംശം വ്യക്തമാക്കാമോ?

കോട്ടക്കല്‍ നഗരസഭയില്‍ ഈസ്റ്റ് വില്ലൂര്‍ ഭാഗത്ത് ഇരണിയല്‍ തോടിനോട് ചേര്‍ന്നുള്ള ട്രാക്ടര്‍ പാത്ത് വേയ്ക്ക് സംരക്ഷണ ഭിത്തി നിര്‍മ്മിക്കുന്നതിനുള്ള പ്രൊപ്പോസല്‍ ലഭ്യമായിട്ടുണ്ടോ; ആയതിന്മേല്‍ സ്വീകരിച്ച നടപടികളുടെ വിശദാംശം ലഭ്യമാക്കുമോ;

ഈ പ്രവൃത്തി സോയില്‍ കണ്‍സര്‍വേഷന്‍ വകുപ്പിന്റെ പ്ലാന്‍ ഫണ്ടില്‍ ഉള്‍പ്പെടുത്തി മതിയായ തുക വകയിരുത്തി സംരക്ഷണ ഭിത്തി നിര്‍മ്മിക്കുന്നതിന് ആവശ്യമായ നടപടി സ്വീകരിക്കുമോയെന്ന് വ്യക്തമാക്കാമോ?

കേരള കാർഷിക സർവകലാശാലയ്ക്ക് കീഴിലെ കോഴ്സുകളുടെ ഫീസ് വർദ്ധിപ്പിക്കുകയുണ്ടായോ; എങ്കിൽ ഫീസ് വർദ്ധിപ്പിക്കാൻ ഇടയായ സാഹചര്യം വിശദമാക്കുമോ;

ഏതെല്ലാം കോഴ്സുകളുടെ ഫീസാണ് വർദ്ധിപ്പിച്ചിട്ടുള്ളത്; വർദ്ധനയ്ക്കുശേഷം ഓരോ കോഴ്സിനും നൽകേണ്ട ഫീസിന്റെ വിശദാംശം ലഭ്യമാക്കുമോ;

ഫീസ് വർദ്ധിപ്പിച്ചതോടെ സ്വകാര്യ എൻജിനീയറിങ് കോളേജുകളിലെ ബി.ടെക് കോഴ്സുകളുടേതിന് സമാനമായതോ അതിൽ കൂടുതലോ ഫീസ് നൽകേണ്ട സാഹചര്യമുണ്ടായത് സർക്കാരിന്റെ ശ്രദ്ധയിൽപ്പെട്ടിട്ടുണ്ടോ;

സർക്കാർ കോളേജുകളിൽ പ്രൊഫഷണൽ കോഴ്സുകൾ പഠിക്കാൻ ആഗ്രഹിക്കുന്ന സാധാരണക്കാർക്ക് താങ്ങാൻ കഴിയാത്ത ഈ ഫീസ് വർദ്ധന ലഘൂകരിക്കുന്ന കാര്യം സർക്കാർ പരിഗണിക്കുമോ; വ്യക്തമാക്കുമോ?