14KLA-starred questions










	STARRED
	QUESTIONS
	AND
	ANSWERS

You are here: Business >14^th KLA >19^th Session>starred Questions and Answers

Answer Provided

Answer Not Yet Provided

FOURTEENTH KLA - 19^th SESSION
STARRED QUESTIONS AND ANSWERS
(To read Questions please enable Unicode-Malayalam in your system)
(To read answers Please CLICK on the Title of the Questions)

Questions and Answers

വനമേഖലയില്‍ നടപ്പാക്കുന്ന മണ്ണ്, ജലസംരക്ഷണ പ്രവൃത്തികള്‍

*361.

ശ്രീ.ആര്‍. രാമചന്ദ്രന്‍
ശ്രീമതി ഇ.എസ്.ബിജിമോള്‍
,, ഗീതാ ഗോപി
ശ്രീ.എല്‍ദോ എബ്രഹാം : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	വനമേഖലയില്‍ നടപ്പാക്കുന്ന മണ്ണ്, ജലസംരക്ഷണ പ്രവൃത്തികളെക്കുറിച്ചുള്ള വിശദാംശങ്ങള്‍ ലഭ്യമാക്കുമോ;

(ബി)	വനത്തിന് പുറത്തും വനാതിര്‍ത്തിയിലുമുള്ള നദികള്‍, കുളങ്ങള്‍ എന്നിവ സംരക്ഷിക്കുന്നതിന് സ്വീകരിക്കുന്ന നടപടികള്‍ വിശദമാക്കുമോ;

(സി)	വനമേഖലയിലുള്ള സ്വാഭാവികമായ ജലസ്രോതസ്സുകളുടെ സംരക്ഷണത്തിനായി നടത്തുന്ന പ്രവൃത്തികള്‍ വിശദമാക്കുമോ;

(ഡി)	പ്രസ്തുത മേഖലയിലെ മനുഷ്യനിര്‍മ്മിതമായ ജലസ്രോതസ്സുകള്‍ പരിപാലിക്കുന്നതിനും സംരക്ഷിക്കുന്നതിനും നടപടി സ്വീകരിക്കുന്നുണ്ടോ;

(ഇ)	വനമേഖലയിലെ ജലസ്രോതസ്സുകളില്‍ പ്ലാസ്റ്റിക് നിര്‍മ്മാര്‍ജ്ജനത്തിനും ജലാശയം വൃത്തിയാക്കുന്നതിനും പൊതുജന സഹായം തേടുന്നുണ്ടോ; വ്യക്തമാക്കുമോ?

ഡാമുകളുടെ ബലക്ഷയ പരിശോധന

*362.

ഡോ.എം. കെ. മുനീര്‍
ശ്രീ.എം.ഉമ്മര്‍
,, എം. സി. കമറുദ്ദീന്‍
,, സി.മമ്മൂട്ടി : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	ഡാമുകളുടെ ബലക്ഷയം സംബന്ധിച്ച പരിശോധനയുമായി ബന്ധപ്പെട്ട് കേന്ദ്ര ജലകമ്മീഷന്റെ നിര്‍ദ്ദേശങ്ങള്‍ എന്തെല്ലാമെന്ന് വിശദമാക്കാമോ;

(ബി)	മേജര്‍ ഡാമുകളുടെ ബലക്ഷയ പരിശോധന നിലവിലുള്ള നിബന്ധനപ്രകാരം പത്ത് വര്‍ഷം കൂടുമ്പോള്‍ നടത്താറുണ്ടോ; വിശദമാക്കാമോ;

(സി)	സംസ്ഥാനത്ത് ഏതെല്ലാം ഡ‍ാമുകളാണ് ബലക്ഷയം നേരിടുന്നത്; വിശദാംശം ലഭ്യമാക്കാമോ;

(ഡി)	ഏതെല്ലാം ഡ‍ാമുകളാണ് ഇനിയും പരിശോധനയ്ക്ക് വിധേയമാക്കേണ്ടതെന്നറിയിക്കാമോ?

തൊഴിലാളി ക്ഷേമം ഉറപ്പാക്കാന്‍ നടപടി

*363.

ശ്രീ.കെ. ദാസന്‍
,, എസ്.ശർമ്മ
,, എം. നൗഷാദ്
,, വി. ജോയി : താഴെ കാണുന്ന ചോദ്യങ്ങള്‍ക്ക് തൊഴിലും എക്സൈസും വകുപ്പുമന്ത്രി സദയം മറുപടി നല്‍കുമോ:

(എ)	കേന്ദ്രസര്‍ക്കാര്‍ അനുവര്‍ത്തിക്കുന്നതായി ആക്ഷേപമുള്ള തൊഴിലാളി വിരുദ്ധ നടപടികളുടെ തുടര്‍ച്ചയായി ഇ.പി.എഫ്. പെന്‍ഷന്‍ അട്ടിമറിക്കാന്‍ നടത്തുന്ന നീക്കം തൊഴിലാളികളില്‍ സൃഷ്ടിച്ച ആശങ്ക കേന്ദ്രസര്‍ക്കാരിനെ അറിയിക്കുമോ;

(ബി)	വേജ് കോഡിന്മേലുള്ള സര്‍ക്കാര്‍ നിലപാട് കേന്ദ്രസര്‍ക്കാരിനെ അറിയിച്ചിരുന്നോ;

(സി)	കേന്ദ്രസര്‍ക്കാരിന്റെ നയങ്ങളും നടപടികളും മൂലം തൊഴിലില്ലായ്മ വര്‍ദ്ധിക്കുകയും തൊഴിലാളികളുടെ അവകാശങ്ങള്‍ കവര്‍ന്നെടുക്കാന്‍ വഴിയൊരുക്കുകയും ചെയ്യുമ്പോള്‍ തൊഴിലും തൊഴിലവകാശങ്ങളും സംരക്ഷിക്കുന്നതിനും തൊഴിലാളി ക്ഷേമം ഉറപ്പാക്കുന്നതിനും സംസ്ഥാന സര്‍ക്കാര്‍ നടത്തുന്ന പ്രവര്‍ത്തനങ്ങള്‍ അറിയിക്കാമോ?

മൃഗശാലകളിലെ നവീകരണ പ്രവര്‍ത്തനങ്ങള്‍

*364.

ശ്രീ.പി.കെ.അബ്ദു റബ്ബ്
,, അബ്ദുല്‍ ഹമീദ് പി.
,, ടി. വി. ഇബ്രാഹിം : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	മൃഗശാലകളില്‍ ഓരോ ജീവി വര്‍ഗ്ഗത്തിനും അവയുടെ സ്വാഭാവികമായ പ്രകൃതിദത്ത ആവാസവ്യവസ്ഥ അനുഭവപ്പെടുന്ന വിധത്തിലുള്ള നവീകരണ പ്രവര്‍ത്തനങ്ങള്‍ നടപ്പിലാക്കുമോ;

(ബി)	ഈ മേഖലയില്‍ കൂടുതല്‍ പഠനവും ഗവേഷണവും നടത്തുവാന്‍ തയ്യാറാകുമോ;

(സി)	മൃഗങ്ങള്‍ക്കുള്ള പ്രയാസങ്ങള്‍ ലഘൂകരിക്കുന്ന വിധത്തിലും സന്ദര്‍ശകര്‍ക്ക് കൂടുതല്‍ ആസ്വാദ്യകരമാവുന്ന വിധത്തിലും മൃഗശാലകളെ മാറ്റുന്നതിന് എന്തെല്ലാം നടപടികള്‍ സ്വീകരിക്കുമെന്ന് വ്യക്തമാക്കാമോ?

ശുദ്ധജല ഉപഭോഗ നിയന്ത്രണം

*365.

ശ്രീ.കെ.എന്‍.എ ഖാദര്‍
,, എന്‍ .എ.നെല്ലിക്കുന്ന്
,, ടി.എ.അഹമ്മദ് കബീര്‍
,, വി.കെ.ഇബ്രാഹിം കുഞ്ഞ് : താഴെ കാണുന്ന ചോദ്യത്തിന് ജലവിഭവ വകുപ്പ് മന്ത്രി സദയം മറുപടി നല്‍കുമോ:

വരുന്ന വേനല്‍ക്കാലം കണക്കിലെടുത്ത് ശുദ്ധജല ഉപഭോഗം നിയന്ത്രിക്കുന്നതിനായി എന്തെങ്കിലും നിര്‍ദ്ദേശങ്ങള്‍ പുറപ്പെടുവിച്ചിട്ടുണ്ടോ; വ്യക്തമാക്കുമോ?

തോട്ടം മേഖലയ്ക്കായി പുനരുദ്ധാരണ പാക്കേജ്

*366.

ശ്രീ.വി.ടി.ബല്‍റാം
,, അന്‍വര്‍ സാദത്ത്
,, എം. വിന്‍സെന്റ്
,, അനില്‍ അക്കര : താഴെ കാണുന്ന ചോദ്യങ്ങള്‍ക്ക് തൊഴിലും എക്സൈസും വകുപ്പുമന്ത്രി സദയം മറുപടി നല്‍കുമോ:

(എ)	തോട്ടം മേഖലയ്ക്കായി പുനരുദ്ധാരണ പാക്കേജ് നടപ്പിലാക്കുമെന്ന പ്രഖ്യാപനത്തിന്റെ അടിസ്ഥാനത്തില്‍ ഇതിനകം സ്വീകരിച്ച നടപടികള്‍ എന്തൊക്കെയാണ്;

(ബി)	പൂട്ടിക്കിടക്കുന്ന തോട്ടങ്ങള്‍ തുറന്ന് പ്രവര്‍ത്തിപ്പിക്കാത്തത് മൂലം അവിടെ പണിയെടുത്തിരുന്ന നൂറുകണക്കിന് തൊഴിലാളികളുടെ ജീവിതം പ്രതിസന്ധിയിലായ സാഹചര്യത്തില്‍ അവര്‍ക്കായി എന്തൊക്കെ സഹായമാണ് സര്‍ക്കാര്‍ നല്‍കുന്നത്;

(സി)	തോട്ടം മേഖലയുടെ സമഗ്ര പുരോഗതി ലക്ഷ്യമാക്കി രൂപീകരിച്ച കരട് പ്ലാന്റേഷന്‍‍ നയം പ്രസ്തുത മേഖലയിലെ ഏതൊക്കെ പ്രശ്നങ്ങള്‍ക്ക് പരിഹാരമാകുമെന്നാണ് കരുതുന്നത്;

(ഡി)	തോട്ടം മേഖലയില്‍ ഇ.എസ്.ഐ. പദ്ധതി നടപ്പിലാക്കിയിട്ടുണ്ടോ; ഇല്ലെങ്കില്‍ നടപ്പിലാക്കുമോ;

(ഇ)	പ്രസ്തുത മേഖലയില്‍ വിനോദസഞ്ചാര സാധ്യത പ്രയോജനപ്പെടുത്തുന്നതിനായി പദ്ധതി ആവിഷ്ക്കരിക്കുവാന്‍ ഉദ്ദേശിക്കുന്നുണ്ടോ; വിശദാംശം നല്‍കുമോ?

ലഹരി വിരുദ്ധ പ്രവര്‍ത്തനങ്ങള്‍

*367.

ശ്രീ.കെ. ആന്‍സലന്‍
,, എ. പ്രദീപ്കുമാര്‍
ശ്രീമതി യു. പ്രതിഭ
ശ്രീ.കാരാട്ട് റസാഖ് : താഴെ കാണുന്ന ചോദ്യങ്ങള്‍ക്ക് തൊഴിലും എക്സൈസും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് എക്സൈസ് കേസുകളിൽ ഉണ്ടാകുന്ന വലിയ വര്‍ദ്ധന ആശങ്കാജനകമായ സാഹചര്യം വെളിപ്പെടുത്തുന്നതിന്റെ പശ്ചാത്തലത്തിൽ മൂന്ന് മാസം നീണ്ടുനിൽക്കുന്ന തീവ്രയത്ന ബോധവൽക്കരണ പരിപാടികള്‍ സംഘടിപ്പിച്ചുവരുന്നുണ്ടോയെന്ന് അറിയിക്കുമോ;

(ബി)	വിമാനത്താവളങ്ങള്‍ വഴിയും ട്രെയിൻ വഴി ഇതര സംസ്ഥാന തൊഴിലാളികളെ ഉപയോഗിച്ചുകൊണ്ടും വര്‍ദ്ധിച്ചുവരുന്ന ലഹരി കടത്ത് ഫലപ്രദമായി തടയാൻ മറ്റ് ഏജൻസികളുമായി ചേര്‍ന്നുകൊണ്ട് എൻഫോഴ്സ്മെന്റ് ശക്തമാക്കാൻ നടപടി സ്വീകരിച്ചിട്ടുണ്ടോയെന്ന് വ്യക്തമാക്കുമോ;

(സി)	ലഹരി വിരുദ്ധ പ്രവര്‍ത്തനത്തിന്റെ വിജയത്തിന് അനിവാര്യമായ ജനകീയ പങ്കാളിത്തം ഉറപ്പാക്കുന്നതിന് കുടുംബശ്രീ പ്രസ്ഥാനത്തെക്കൂടി പങ്കാളിയാക്കുന്നതിനും ആധുനിക സാങ്കേതികവിദ്യയുടെ പ്രയോഗം സാധ്യമാക്കുന്നതിനും നടപടിയെടുത്തിട്ടുണ്ടോയെന്ന് അറിയിക്കുമോ?

പട്ടിക, പിന്നാക്ക വിഭാഗക്കാരുടെ വായ്പ എഴുതിത്തള്ളിയ നടപടി

*368.

ശ്രീ.എന്‍. ഷംസുദ്ദീന്‍
,, കെ.എം.ഷാജി
,, കെ.എന്‍.എ ഖാദര്‍
,, എന്‍ .എ.നെല്ലിക്കുന്ന് : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	പട്ടികജാതി/പട്ടികവര്‍ഗ്ഗ, പിന്നാക്ക സമുദായങ്ങളില്‍പ്പെട്ടവര്‍ കോ-ഓപ്പറേറ്റീവ് സൊസൈറ്റികളിൽ നിന്നും മറ്റ് ധനകാര്യ സ്ഥാപനങ്ങളിൽ നിന്നും എടുത്തിട്ടുള്ള വായ്പകള്‍ എഴുതിത്തള്ളുന്നതിന് ഈ സര്‍ക്കാര്‍ നടപടികള്‍ എടുത്തിരുന്നോ; വിശദാംശങ്ങള്‍ നൽകാമോ;

(ബി)	ഇപ്രകാരം എഴുതിത്തള്ളുന്നതിന് ആധാരമാക്കുന്ന വ്യവസ്ഥകള്‍ വിവരിക്കാമോ;

(സി)	ഈ സര്‍ക്കാരിന്റെ കാലത്ത് ഇപ്രകാരം എഴുതിത്തള്ളപ്പെട്ട ആകെ വായ്പകളുടെ മൂല്യം എത്രയാണ്; വ്യക്തമാക്കുമോ?

സിനിമാ മേഖലയില്‍ സര്‍ക്കാരിന്റെ ഇടപെടല്‍

*369.

ശ്രീ.വി.കെ.ഇബ്രാഹിം കുഞ്ഞ്
,, മഞ്ഞളാംകുഴി അലി
,, പി.കെ.ബഷീര്‍
,, എം.ഉമ്മര്‍ : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്തെ സിനിമാ മേഖലയില്‍ ലഹരി മരുന്നിന്റെ ഉപയോഗം വര്‍ദ്ധിച്ചുവരുന്നതായുളള റിപ്പോര്‍ട്ടുകള്‍ ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് തടയുന്നതിനായി സര്‍ക്കാര്‍ എന്ത് നടപടി സ്വീകരിച്ചിട്ടുണ്ട്;വിശദമാക്കുമോ;

(ബി)	സിനിമാ മേഖലയിലെ തെറ്റായ പ്രവണതകളും ചൂഷണങ്ങളും സംഘടനകള്‍ തമ്മിലുളള പ്രശ്നങ്ങളും നിയന്ത്രിക്കാന്‍ സര്‍ക്കാരിന് കഴിയാത്ത സാഹചര്യം നിലവിലുണ്ടോ; ഇല്ലെങ്കില്‍ ഏതെല്ലാം തരത്തിലുളള നിയന്ത്രണങ്ങളാണ് സര്‍ക്കാര്‍ ഏര്‍പ്പെടുത്താന്‍ ഉദ്ദേശിക്കുന്നത്; വിശദമാക്കുമോ?

കിണര്‍ റീചാര്‍ജിംഗ് പദ്ധതി

*370.

ശ്രീ.ഷാഫി പറമ്പില്‍
,, വി.പി.സജീന്ദ്രന്‍
,, വി.ടി.ബല്‍റാം
,, അനില്‍ അക്കര : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	കേരള ഗ്രാമീണ ശുദ്ധജല വിതരണ ശുചിത്വ ഏജന്‍സിയുടെ ഭാഗമായി പ്രവര്‍ത്തിക്കുന്ന മഴകേന്ദ്രം കിണര്‍ റീചാര്‍ജിംഗ് പദ്ധതി പ്രാവര്‍ത്തികമാക്കുന്നുണ്ടോ;

(ബി)	ഇതിന്റെ കീഴില്‍ പഞ്ചായത്തുകളെ തെരഞ്ഞെടുക്കുന്നതിനുള്ള മാനദണ്ഡം എന്താണ്;

(സി)	മഹാത്മാഗാന്ധി ദേശീയ തൊഴിലുറപ്പ് പദ്ധതിയില്‍ ഉള്‍പ്പെടുത്തി ഗ്രാമീണ മേഖലയിലെ കിണറുകള്‍ റീചാര്‍ജ് ചെയ്യുന്ന പ്രവൃത്തികള്‍ നടപ്പിലാക്കുന്നുണ്ടോ; ഇത് വിജയപ്രദമാണോ;

(ഡി)	കിണര്‍ റീചാര്‍ജിംഗ് സാര്‍വ്വത്രികമായി നടപ്പിലാക്കുന്നതിനും അതിനെക്കുറിച്ച് പൊതുജനങ്ങള്‍ക്ക് അവബോധം നല്‍കുന്നതിനും നടപടി സ്വീകരിക്കുമോ; വിശദമാക്കാമോ?

ഐ.ടി.ഐ.കളെ അന്താരാഷ്ട്ര നിലവാരത്തിലേക്ക് ഉയര്‍ത്തുവാന്‍ നടപടി

*371.

ശ്രീ.എ. പ്രദീപ്കുമാര്‍
ശ്രീമതി യു. പ്രതിഭ
ശ്രീ.ആന്റണി ജോണ്‍
പ്രൊഫ.കെ.യു. അരുണന്‍ : താഴെ കാണുന്ന ചോദ്യങ്ങള്‍ക്ക് തൊഴിലും എക്സൈസും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്തെ ഐ.ടി.ഐ.കളുടെ നിലവാരം അന്താരാഷ്ട്രതലത്തിലേയ്ക്ക് ഉയര്‍ത്തുന്നതിന് എന്തെല്ലാം നടപടികളാണ് സ്വീകരിച്ചുവരുന്നതെന്ന് വ്യക്തമാക്കാമോ;

(ബി)	ഇതിന്റെ ഭാഗമായി ഗുണമേന്മയും ഫലപ്രാപ്തിയുമുളള പ്രവര്‍ത്തനങ്ങള്‍ കാഴ്ചവച്ച സര്‍ക്കാര്‍ ഐ.ടി.ഐ.കള്‍ക്ക് ഐ.എസ്.ഒ. സര്‍ട്ടിഫിക്കേഷന്‍ ലഭ്യമാക്കിയിട്ടുണ്ടോ; വിശദാംശം നല്‍കുമോ;

(സി)	എത്ര ഐ.ടി.ഐ.കളില്‍ വെര്‍ച്ച്വല്‍ ക്ലാസ് റൂം പദ്ധതി നടപ്പിലാക്കിയിട്ടുണ്ട്;

(ഡി)	ഐ.ടി.ഐ.കളിലെ വിദ്യാര്‍ത്ഥികള്‍ക്ക് ആധുനിക സാങ്കേതികവിദ്യയില്‍ പരിശീലനം ലഭ്യമാക്കുന്നതിനും അതുവഴി തൊഴില്‍ സാധ്യത വര്‍ദ്ധിപ്പിക്കുന്നതിനുമായി പ്രമുഖ വ്യവസായ സ്ഥാപനങ്ങളുമായി ധാരണാപത്രത്തില്‍ ഏര്‍പ്പെട്ടിട്ടുണ്ടോ; വിശദാംശം നല്‍കുമോ?

പട്ടികവര്‍ഗ്ഗ വിദ്യാര്‍ത്ഥികളുടെ ഉന്നമനത്തിനായുള്ള പദ്ധതികള്‍

*372.

ശ്രീ.കെ. രാജന്‍
ശ്രീമതി ഇ.എസ്.ബിജിമോള്‍
ശ്രീ.ഇ.ടി. ടൈസണ്‍ മാസ്റ്റര്‍
,, വി.ആര്‍. സുനില്‍ കുമാര്‍ : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	പട്ടികവര്‍ഗ്ഗ വിഭാഗത്തിലെ വിദ്യാര്‍ത്ഥികളുടെ ഉന്നമനത്തിനായി സംസ്ഥാന സര്‍ക്കാര്‍ നടപ്പിലാക്കിവരുന്ന പദ്ധതികളും നല്കുന്ന സഹായങ്ങളും വിവരിക്കുമോ;

(ബി)	ഇപ്രകാരം നടപ്പിലാക്കിയ വിവിധ ഉന്നമന പദ്ധതികളിലൂടെ ഉന്നത ജോലികള്‍ കെെവരിക്കുന്നതിന് പട്ടികവര്‍ഗ്ഗ വിഭാഗങ്ങളില്‍പെട്ടവര്‍ക്ക് സാധിക്കുന്നുണ്ടോ; വ്യക്തമാക്കുമോ;

(സി)	പട്ടിക വിഭാഗത്തിലെ വിദ്യാര്‍ത്ഥികള്‍ക്കുണ്ടാകുന്ന ഭാഷാപ്രശ്നം, മറ്റു വിദ്യാര്‍ത്ഥികളുമായി ഇടപഴകുമ്പോഴുണ്ടാകുന്ന ധാരണപ്പിശകുകള്‍ മുതലായവ പരിഹരിക്കുന്നതിന് സ്വീകരിക്കുന്ന നടപടികള്‍ വിശദമാക്കുമോ;

(ഡി)	വിദൂരവും വനത്തിനകത്ത് സ്ഥിതിചെയ്യുന്നതുമായ പട്ടികവര്‍ഗ്ഗ ഗോത്രവിഭാഗങ്ങളുടെ പ്രാഥമിക വിദ്യാഭ്യാസം ഉറപ്പുവരുത്തുന്നതിന് നടപ്പാക്കുന്ന പദ്ധതികള്‍ വിവരിക്കുമോ;

(ഇ)	ഗോത്രബന്ധു, ഗോത്ര സാരഥി, പഠനമുറി പോലുളള പദ്ധതികള്‍ പട്ടികവര്‍ഗ്ഗ വിഭാഗക്കാരുടെ വിദ്യാഭ്യാസ പുരോഗതിയില്‍ നല്കിയ സംഭാവനകള്‍ വിശദമാക്കുമോ?

ക്ഷീരോല്പാദന രംഗത്തെ ആധുനിക സംവിധാനങ്ങള്‍

*373.

ശ്രീ.വി. അബ്ദുറഹിമാന്‍
,, ജെയിംസ് മാത്യു
,, എം. രാജഗോപാലന്‍
,, കെ.യു. ജനീഷ് കുമാര്‍ : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	വരള്‍ച്ചകൊണ്ട് പാലുല്പാദനത്തില്‍ കുറവ് വന്നിട്ടുളള സാഹചര്യത്തില്‍ ഉപഭോക്താക്കള്‍ക്ക് ഗുണമേന്മ ഉറപ്പാക്കിക്കൊണ്ട് പാല്‍ ലഭ്യത ഉറപ്പു വരുത്തുന്നതിന് സ്വീകരിച്ചിട്ടുളള നടപടികള്‍ എന്തെല്ലാമാണെന്ന് അറിയിക്കാമോ;

(ബി)	സംസ്ഥാനത്തിന് പുറമെ നിന്ന് കൊണ്ടുവരുന്ന പാലിന്റെ ഗുണമേന്മ ഉറപ്പാക്കുന്നതിന് ക്ഷീര വകുപ്പ് അതിര്‍ത്തികളില്‍ കാര്യക്ഷമമായ ആധുനിക പരിശോധനാ സംവിധാനം ഏര്‍പ്പെടുത്തിയിട്ടുണ്ടോ;

(സി)	കൂടുതല്‍ ക്ഷീര കര്‍ഷകരെ സഹകരണ മേഖലയിലേക്ക് ആകര്‍ഷിക്കുന്നതിന് ആധുനിക സംവിധാനങ്ങള്‍ ഏര്‍പ്പെടുത്തി ഗുണനിലവാരം ഉറപ്പാക്കിക്കൊണ്ട് ക്ഷീരസംഘങ്ങളുടെ പ്രവര്‍ത്തനം ശക്തീകരിക്കുന്നതിന് നല്‍കുന്ന സഹായം എന്തെല്ലാമാണെന്ന് അറിയിക്കാമോ;

(ഡി)	തല്പരരായ കര്‍ഷകര്‍ക്ക് ശാസ്ത്രീയ മൃഗപരിപാലനം സംബന്ധിച്ച് അറിവു പകര്‍ന്നു നല്‍കുന്നതിനും ഡയറി യൂണിറ്റുകള്‍ ആരംഭിക്കുന്നതിനു വേണ്ട സഹായം നല്‍കുന്നതിനും പദ്ധതിയുണ്ടോ?

പട്ടികജാതിയില്‍പ്പെട്ടവര്‍ക്കുള്ള വീട് നിര്‍മ്മാണം

*374.

പ്രൊഫ.കെ.യു. അരുണന്‍
ശ്രീ.ബി.സത്യന്‍
ശ്രീമതിവീണാ ജോര്‍ജ്ജ്
ശ്രീ.കെ.കുഞ്ഞിരാമന്‍ : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	ഈ സര്‍ക്കാര്‍ അധികാരത്തിലെത്തിയതിനുശേഷം പട്ടികജാതികളില്‍പെട്ടവര്‍ക്ക് ലൈഫ് പദ്ധതി പ്രകാരമുള്‍പ്പെടെ ആകെ എത്ര വീടുകള്‍ അനുവദിച്ചിട്ടുണ്ടെന്നും അവയില്‍ എത്രയെണ്ണം പൂര്‍ത്തിയായിട്ടുണ്ടെന്നും ഉള്ള വിവരം ലഭ്യമാണോ;

(ബി)	വീട് അനുവദിച്ചിട്ട് പണി ആരംഭിക്കാന്‍ കഴിയാതിരുന്നവരുടെയും പണി പാതി വഴിയിലായവരുടെയും വീടുകളുടെ പണി പൂര്‍ത്തിയാക്കുന്നതിന് നല്‍കിയിട്ടുള്ള സഹായങ്ങള്‍ എന്തെല്ലാമാണ്;

(സി)	പട്ടികജാതിയില്‍പ്പെട്ട ഭൂരഹിതര്‍ക്ക് വീട് നിര്‍മ്മിക്കുന്നതിന് ഭൂമി വാങ്ങി ന്ല‍കാന്‍ പദ്ധതിയുണ്ടോ; എത്ര പേര്‍ക്ക് ഈ പദ്ധതിപ്രകാരം സ്ഥലം ലഭ്യമാക്കാന്‍ നടപടിയെടുത്തു വരുന്നെന്ന് അറിയിക്കാമോ;

(ഡി)	പ്രളയബാധിതരായ പട്ടികജാതിക്കാരെ മുന്‍ഗണനാടിസ്ഥാനത്തില്‍ പുനരധിവസിപ്പിക്കാന്‍ സാധ്യമായിട്ടുണ്ടോ; വ്യക്തമാക്കുമോ?

നവജീവന്‍ പദ്ധതി

*375.

ശ്രീ.എം. നൗഷാദ്
,, എ. എന്‍. ഷംസീര്‍
,, പി.കെ. ശശി
,, കെ.വി.അബ്ദുള്‍ ഖാദര്‍ : താഴെ കാണുന്ന ചോദ്യങ്ങള്‍ക്ക് തൊഴിലും എക്സൈസും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്തെ എംപ്ലോയ്‌മെന്റ് എക്സ്ചേഞ്ചുകളില്‍ പേര് രജിസ്റ്റര്‍ ചെയ്തിട്ടും തൊഴില്‍ ലഭിക്കാത്ത മുതിര്‍ന്ന പൗരന്മാര്‍ക്ക് അനുയോജ്യമായ സ്വയംതൊഴില്‍ സംരംഭങ്ങള്‍ ആരംഭിക്കുന്നതിനുള്ള സഹായം ലഭ്യമാക്കുന്നതിനായി നവജീവന്‍ എന്ന പേരില്‍ നൂതന പദ്ധതി ആവിഷ്ക്കരിച്ചിട്ടുണ്ടോ;

(ബി)	ഏത് പ്രായപരിധിയിലുള്ള വയോജനങ്ങളെയാണ് ഈ പദ്ധതിയില്‍ ഉള്‍പ്പെടുത്തിയിരിക്കുന്നതെന്നും ഏതെല്ലാം സ്വയംതൊഴില്‍ സംരംഭങ്ങള്‍ക്കാണ് പദ്ധതി പ്രകാരം ധനസഹായം നല്‍കുന്നതെന്നും അറിയിക്കാമോ;

(സി)	പദ്ധതി പ്രകാരം മുതിര്‍ന്ന പൗരന്മാര്‍ക്ക് പലിശരഹിത വായ്പ നല്‍കുന്നതിനുള്ള വ്യവസ്ഥകള്‍ എന്തെല്ലാമാണെന്ന് വിശദമാക്കാമോ?

പാല്‍ ക്ഷാമം പരിഹരിക്കുന്നതിന് നടപടി

*376.

ശ്രീ.റോജി എം. ജോണ്‍
,, എല്‍ദോസ് പി. കുന്നപ്പിള്ളില്‍
,, അനില്‍ അക്കര
,, എ.പി. അനില്‍ കുമാര്‍ : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് വേനല്‍ കടുത്തതോടുകൂടി ഉണ്ടായിട്ടുള്ള പാല്‍ ക്ഷാമം പരിഹരിക്കുന്നതിന് മഹാരാഷ്ട്രയില്‍ നിന്നും കട്ടി കൂടിയ പാല്‍ വാങ്ങുന്നതിന് കരാര്‍ ആയിട്ടുണ്ടോ;

(ബി)	എത്ര ലിറ്റര്‍ പാലാണ് ഇപ്രകാരം ദിനം പ്രതി വാങ്ങുന്നത് എന്നും ലിറ്ററിന് എന്ത് വിലയാണെന്നും അറിയിക്കാമോ;

(സി)	പ്രസ്തുത പാല്‍ സംസ്ക്കരിക്കുന്നതിലൂടെ എത്ര ലിറ്റര്‍ പാല്‍ അധികമായി ലഭിക്കുമെന്ന് അറിയിക്കാമോ;

(ഡി)	വേനല്‍ കടുത്തതോടുകൂടി കര്‍ഷകര്‍ക്കുണ്ടായ ഉല്പാദന കുറവും നഷ്ടവും നികത്തുന്നതിന് പാലിന്റെ വില ലിറ്ററിന് മൂന്ന് രൂപ നിരക്കില്‍ അധികമായി നല്‍കുവാന്‍ ഉദ്ദേശിക്കുന്നുണ്ടോ?

പട്ടിക ഗോത്രവര്‍ഗ്ഗക്കാര്‍ക്കുള്ള സ്വയംതൊഴില്‍ പദ്ധതി

*377.

ശ്രീ.ഒ. ആര്‍. കേളു
,, കെ.വി.വിജയദാസ്
,, ആന്റണി ജോണ്‍
,, സി.കെ. ഹരീന്ദ്രന്‍ : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	പട്ടികജാതി - പട്ടികഗോത്രവര്‍ഗ്ഗക്കാരില്‍ സംരംഭകത്വം വളര്‍ത്തുകയെന്ന ലക്ഷ്യത്തോടെ സ്റ്റാര്‍ട്ടപ് മിഷനുമായി ചേര്‍ന്ന് സ്റ്റാര്‍ട്ടപ് ഡ്രീംസ് എന്ന പദ്ധതി ആരംഭിച്ചിട്ടുണ്ടോ; വിശദാംശം ലഭ്യമാക്കാമോ;

(ബി)	പട്ടിക ഗോത്രവര്‍ഗ്ഗങ്ങളില്‍പ്പെട്ടവരുടെ തൊഴിലില്ലായ്മ കുറയ്ക്കുക എന്ന ലക്ഷ്യത്തോടെ അവരെ സ്വയം തൊഴില്‍ പദ്ധതികള്‍ കണ്ടെത്തുന്നതിന് സഹായിക്കാനും നൈപുണി വികസനത്തിനും പദ്ധതി ആവിഷ്കരിച്ചിട്ടുണ്ടോ;

(സി)	അഭ്യസ്തവിദ്യരായ ഗോത്രവര്‍ഗ്ഗ യുവാക്കളില്‍ ആത്മവിശ്വാസം വളര്‍ത്തിയെടുക്കുന്നതിനും സംരംഭങ്ങള്‍ക്കാവശ്യമായ മാര്‍ഗനിര്‍ദ്ദേശങ്ങള്‍ നല്‍കുന്നതിനും സൗകര്യം ഏര്‍പ്പെടുത്തിയിട്ടുണ്ടോ എന്ന് വ്യക്തമാക്കാമോ?

പട്ടികജാതി വിദ്യാര്‍ത്ഥികള്‍ക്കായുള്ള പഠനസഹായങ്ങള്‍

*378.

ശ്രീ.മോന്‍സ്‌ ജോസഫ്
,, പി.ജെ.ജോസഫ് : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	പട്ടികജാതി വിദ്യാര്‍ത്ഥികളുടെ ലംപ്സം ഗ്രാന്റും സ്റ്റൈപന്റും ഇതുവരെ വിതരണം ചെയ്യാത്ത സാഹചര്യത്തെക്കുറിച്ച് വിശദീകരണം നല്‍കുമോ;

(ബി)	പ്രസ്തുത ഫണ്ട് വിതരണം ചെയ്യാത്തതിന്റെ കാരണം വ്യക്തമാക്കാമോ; ഈ ഫണ്ട് വക മാറ്റി ചെലവാക്കിയിട്ടുണ്ടോ എന്നറിയിക്കാമോ;

(സി)	പട്ടികജാതി വിദ്യാര്‍ത്ഥികള്‍ക്ക് തദ്ദേശസ്വയംഭരണ സ്ഥാപനങ്ങള്‍ വഴി നല്‍കുന്ന പഠനമുറി നിര്‍മ്മാണം സംബന്ധിച്ച ഫണ്ട് ഇതുവരെയും അനുവദിക്കാത്ത സാഹചര്യത്തെക്കുറിച്ച് വ്യക്തമാക്കാമോ;

(ഡി)	ഈ സാമ്പത്തിക വര്‍ഷം പട്ടികജാതി വിദ്യാര്‍ത്ഥികള്‍ക്ക് എന്തെല്ലാം ധനസഹായങ്ങളാണ് ഇനിയും വിതരണം ചെയ്യാനുള്ളതെന്ന് വ്യക്തമാക്കാമോ?

വനാവകാശനിയമപ്രകാരമുളള അവകാശങ്ങള്‍

*379.

ശ്രീ.രാജു എബ്രഹാം
,, സി.കൃഷ്ണന്‍
,, ഒ. ആര്‍. കേളു
,, ഡി.കെ. മുരളി : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)

സംസ്ഥാനത്ത് ഗോത്രവര്‍ഗ്ഗക്കാരില്‍ ഏറെപ്പേര്‍ വനത്തിനുളളിലോ വനത്തിനോട് ചേര്‍ന്നുളള പ്രദേശങ്ങളിലോ വസിക്കുന്നതിനാല്‍ അത്തരം പ്രദേശങ്ങളില്‍ വേണ്ട അടിസ്ഥാന സൗകര്യം ഏര്‍പ്പെടുത്തുന്നതിന് വനം വകുപ്പിന്റെ നിലപാട് വിഘാതമാകാതിരിക്കാന്‍ ശ്രദ്ധ പുലര്‍ത്താറുണ്ടോ; വനാവകാശനിയമപ്രകാരമുളള അവകാശങ്ങള്‍ ഗോത്രവര്‍ഗ്ഗക്കാര്‍ക്ക് ലഭ്യമാക്കാന്‍ പ്രതിബന്ധമുണ്ടാകുന്നുണ്ടോയെന്ന് അറിയിക്കുമോ;

(ബി)	വനാശ്രിത സമൂഹത്തിന്റെ ജീവിത നിലവാരം മെച്ചപ്പെടുത്തുന്നതിനും വനത്തിന്റെ അമൂല്യത സന്ദര്‍ശകര്‍ക്ക് പകര്‍ന്നു നല്‍കിക്കൊണ്ട് വനസംരക്ഷണം പ്രോത്സാഹിപ്പിക്കുന്നതിനും ഇക്കോടൂറിസം പദ്ധതികള്‍ക്കുളള പ്രാധാന്യം കണക്കിലെടുത്ത് പരിസ്ഥിതി വിനോദസഞ്ചാരം വ്യാപകമാക്കാന്‍ ഉദ്ദേശിക്കുന്നുണ്ടോ;

(സി)

സംരക്ഷിതവനമായി പ്രഖ്യാപിച്ചിട്ടുളള വനങ്ങള്‍ക്കുളളിലെ ഗോത്രവര്‍ഗ്ഗക്കാരെ നിര്‍ബന്ധിതമായല്ലാതെ വനത്തിന് പുറത്തേക്ക് മാറ്റി താമസിപ്പിക്കാന്‍ ആവിഷ്കരിച്ചിട്ടുളള പദ്ധതിയെക്കുറിച്ച് അറിയിക്കാമോ; വനത്തിനുളളില്‍ കഴിയാന്‍ നിര്‍ബന്ധിതരാകുന്നവരുടെ ജീവനും കൃഷിയ്ക്കും വന്യമൃഗങ്ങളില്‍ നിന്നുളള ഭീഷണി തടയുന്നതിന് പരിപാടിയുണ്ടോയെന്ന് വ്യക്തമാക്കുമോ?

അന്തര്‍ സംസ്ഥാന നദീജല ഹബ്ബ്

*380.

ശ്രീ.കെ.വി.വിജയദാസ്
,, മുരളി പെരുനെല്ലി
,, പി.കെ. ശശി
,, ബി.ഡി. ദേവസ്സി : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	പറമ്പിക്കുളം-ആളിയാര്‍ പദ്ധതിയില്‍ നിന്നും സംസ്ഥാനത്തിന് അര്‍ഹമായ ജലം വിട്ടുകിട്ടാത്തത് പാലക്കാട്, തൃശൂര്‍ ജില്ലകളിലെ കൃഷിയെ സാരമായി ബാധിക്കുന്നതും സംസ്ഥാനത്തിന് ലഭ്യമായ കാവേരി ജലം വേണ്ടവിധം വിനിയോഗിക്കാന്‍ പദ്ധതികളില്ലെന്ന പ്രശ്നവും പരിഹരിക്കാന്‍ നടപടി സ്വീകരിച്ചിട്ടുണ്ടോ;

(ബി)	പാലക്കാട് സ്ഥാപിക്കാനുദ്ദേശിക്കുന്ന അന്തര്‍ സംസ്ഥാന നദീജല ഹബ്ബ് യാഥാര്‍ത്ഥ്യമായിട്ടുണ്ടോ; ഹബ്ബിന്റെ പ്രവര്‍ത്തന ലക്ഷ്യം അറിയിക്കാമോ;

(സി)	സംസ്ഥാനത്ത് പുതുതായി ആവിഷ്ക്കരിച്ച ബൃഹദ്പദ്ധതിയായ അട്ടപ്പാടി ജലസേചന പദ്ധതി പാലക്കാട് ജില്ലയിലെ ജലസേചന സൗകര്യത്തിന്റെ അപര്യാപ്തത പരിഹരിക്കുകയെന്ന ലക്ഷ്യത്തോടെ സമയബന്ധിതമായി പൂര്‍ത്തിയാക്കാന്‍ വേണ്ട നടപടി ആരംഭിച്ചിട്ടുണ്ടോ എന്നറിയിക്കാമോ?

ജലസംരക്ഷണ പ്രവര്‍ത്തനങ്ങൾ

*381.

ശ്രീ.പി.ടി.എ. റഹീം
,, എം. സ്വരാജ്
ശ്രീമതിപി. അയിഷാ പോറ്റി
ശ്രീ.പി. ഉണ്ണി : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	ജലസംരക്ഷണത്തിന് വേണ്ടത്ര പ്രാധാന്യം നല്‍കാതിരുന്നതിനാല്‍ ആവശ്യത്തിന് മഴ ലഭിക്കുന്നിടമായിട്ടും സംസ്ഥാനം ജലക്ഷാമത്തിനും കുടിവെള്ള ക്ഷാമത്തിനും അടിക്കടി ഇടയാകുന്നത് പരിഹരിക്കുകയെന്ന ലക്ഷ്യത്തോടെ ഹരിതകേരളം മിഷൻ വഴി നടത്തുന്ന ജലസംരക്ഷണ പ്രവര്‍ത്തനത്തിന്റെ പുരോഗതി അറിയിക്കാമോ;

(ബി)	തോടുകളുടെയും നദികളുടെയും സംരക്ഷണത്തിനും ജലവിതരണ കനാലുകളുടെ മികച്ച പരിപാലനത്തിനും ജനകീയ പങ്കാളിത്തത്തോടെ പ്രവര്‍ത്തനം നടത്തിവരുന്നുണ്ടോ;

(സി)	റെഗുലേറ്ററുകള്‍ സ്ഥാപിച്ചുകൊണ്ട് നദികളെത്തന്നെ ജലസംഭരണിയാക്കുന്നതിന് പദ്ധതി ആവിഷ്കരിച്ചിട്ടുണ്ടോ എന്നറിയിക്കാമോ?

ആദിവാസി വിദ്യാലയങ്ങളിലെ പാഠ്യപദ്ധതി

*382.

ശ്രീ.ഇ.കെ.വിജയന്‍
,, ചിറ്റയം ഗോപകുമാര്‍
ശ്രീമതി ഗീതാ ഗോപി
ശ്രീ.മുഹമ്മദ് മുഹസിന്‍ പി. : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	ആദിവാസി വിദ്യാലയങ്ങള്‍ ഗോത്ര സൗഹൃദമായി നടത്തേണ്ടത് എന്തൊക്കെ കാരണങ്ങളാലാണെന്ന് വിശദമാക്കാമോ;

(ബി)	ഗോത്രബന്ധു പദ്ധതിയ്ക്ക് കീഴില്‍ നടപ്പിലാക്കുന്ന പാഠ്യപദ്ധതി വിശദീകരിക്കാമോ;

(സി)	വനത്തിനകത്തെ വിദൂര ഊരുകളിലുള്ള പട്ടികവര്‍ഗ്ഗ വിദ്യാര്‍ത്ഥികള്‍ക്ക് സ്കൂള്‍ സൗകര്യം ഉറപ്പാക്കുന്നതിന് സ്വീകരിച്ച നടപടികള്‍ വിശദമാക്കാമോ?

ഗോസമൃദ്ധി ഇന്‍ഷുറന്‍സ് പദ്ധതി

*383.

ശ്രീ.കാരാട്ട് റസാഖ്
,, കെ.കുഞ്ഞിരാമന്‍
,, സി.കെ. ഹരീന്ദ്രന്‍
,, കെ.ഡി. പ്രസേനന്‍ : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	കന്നുകാലികളുടെ ജീവഹാനിമൂലവും അവയുടെ ഉല്പാദന-പ്രത്യുല്പാദന ശേഷി നഷ്ടപ്പെടുന്നത് മൂലവും ക്ഷീര കര്‍ഷകര്‍ക്കുണ്ടാകുന്ന നഷ്ടം പരിഹരിക്കുന്നതിന് ഗോസമൃദ്ധി എന്ന പേരില്‍ കന്നുകാലി ഇന്‍ഷുറന്‍സ് പദ്ധതി ആവിഷ്ക്കരിച്ചിട്ടുണ്ടോ;

(ബി)	പ്രസ്തുത പദ്ധതിയ്ക്കായുള്ള കേന്ദ്ര-സംസ്ഥാന വിഹിതം എത്രയാണെന്നും ഇന്‍ഷുറന്‍സ് പ്രീമിയത്തിന്റെ എത്ര ശതമാനമാണ് ഗുണഭോക്താവ് അടയ്ക്കേണ്ടതെന്നും വ്യക്തമാക്കാമോ;

(സി)	പ്രസ്തുത പദ്ധതിയുടെ നിര്‍വ്വഹണം കാര്യക്ഷമമായും സുതാര്യമായും നടപ്പിലാക്കുവാനും ക്ഷീരകര്‍ഷകര്‍ക്ക് നഷ്ടപരിഹാരം കാലതാമസം കൂടാതെ ലഭ്യമാക്കുവാന്‍ മൃഗസംരക്ഷണ വകുപ്പ് ആപ്ലിക്കേഷന്‍ സോഫ്റ്റ് വെയര്‍ വികസിപ്പിച്ചിട്ടുണ്ടോ; വിശദാംശം നല്‍കാമോ;

(ഡി)	കൂടുതല്‍ കന്നുകാലികളെ ഈ പദ്ധതിയില്‍ ഉള്‍പ്പെടുത്തി ക്ഷീരകര്‍ഷകരെ സഹായിക്കുവാന്‍ നടപടി സ്വീകരിക്കാമോ?

പട്ടികവര്‍ഗ്ഗ വിദ്യാര്‍ത്ഥികളുടെ വിദ്യാഭ്യാസ നിലവാരം

*384.

ശ്രീ.വി.പി.സജീന്ദ്രന്‍
,, കെ.എസ്.ശബരീനാഥന്‍
,, അന്‍വര്‍ സാദത്ത്
,, എ.പി. അനില്‍ കുമാര്‍ : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	പട്ടികവര്‍ഗ്ഗ വിഭാഗത്തില്‍പ്പെട്ട വിദ്യാര്‍ത്ഥികളുടെ വിദ്യാഭ്യാസ നിലവാരം മെച്ചപ്പെടുത്തുന്നതിന് ഈ സര്‍ക്കാര്‍ ആവിഷ്കരിച്ച പദ്ധതികള്‍ മൂലം പ്രസ്തുത മേഖലയില്‍ ഉണ്ടായ മാറ്റം സംബന്ധിച്ച് എന്തെങ്കിലും അവലോകനം/പരിശോധന ഇതിനകം നടത്തിയിട്ടുണ്ടോ; വിശദമാക്കുമോ;

(ബി)	ഗോത്ര ബന്ധു പദ്ധതിപ്രകാരം മെന്റര്‍ ടീച്ചര്‍മാരായി എത്രപേര്‍ക്ക് നിയമനം നല്‍കി; ഈ പദ്ധതി ആദിവാസി വിഭാഗത്തില്‍പ്പെട്ട വിദ്യാര്‍ത്ഥികളുടെ കൊഴിഞ്ഞുപോക്ക് കുറയ്ക്കുന്നതിന് സഹായകമായിട്ടുണ്ടോ;

(സി)	അട്ടപ്പാടിയിലെ പട്ടികവര്‍ഗ്ഗ വിദ്യാര്‍ത്ഥികള്‍ക്ക് സൈനിക സ്ക്കൂള്‍ പ്രവേശന പരീക്ഷയ്ക്ക് പരിശീലനം നല്‍കുന്നുണ്ടോ; 2019 ല്‍ എത്ര കുട്ടികള്‍ക്ക് ഇതിലൂടെ സൈനിക സ്ക്കൂള്‍ പ്രവേശനം ലഭിച്ചു;

(ഡി)	വകുപ്പിന് കീഴിലുള്ള മോഡല്‍ റസി‍ഡന്‍ഷ്യല്‍ സ്ക്കൂളുകള്‍ അന്താരാഷ്ട്ര നിലവാരത്തിലാക്കുന്നതിനുള്ള പദ്ധതിയുടെ ഭാഗമായി നടപ്പിലാക്കിയ പരിഷ്കാരങ്ങള്‍ എന്തൊക്കെയാണെന്ന് അറിയിക്കാമോ?

ജല അതോറിറ്റി നേരിടുന്ന സാമ്പത്തിക പ്രതിസന്ധി

*385.

ശ്രീ.കെ.സി.ജോസഫ്
,, അനൂപ് ജേക്കബ്
,, വി.എസ്.ശിവകുമാര്‍
,, എല്‍ദോസ് പി. കുന്നപ്പിള്ളില്‍ : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	കേരള ജല അതോറിറ്റി രൂക്ഷമായ സാമ്പത്തിക പ്രതിസന്ധി നേരിടുന്നുണ്ടോ; എങ്കില്‍ അതിന്റെ പ്രധാന കാരണം എന്താണ്;

(ബി)	നിലവില്‍ ലക്ഷക്കണക്കിന് രൂപയുടെ വെള്ളക്കരം കുടിശ്ശികയായി പൊതുമേഖലാ സ്ഥാപനങ്ങളില്‍ നിന്നും സര്‍ക്കാര്‍ സ്ഥാപനങ്ങളില്‍ നിന്നും ജല അതോറിറ്റിക്ക് ലഭിക്കുവാനുണ്ടോ; ഇത് ഈടാക്കുന്നതിന് എന്ത് നടപടിയാണ് സ്വീകരിച്ചിട്ടുള്ളത്; വിശദമാക്കുമോ;

(സി)	സാമ്പത്തിക പ്രതിസന്ധി മറികടക്കുവാന്‍ വെള്ളക്കരം വര്‍ദ്ധനവിനായി ജല അതോറിറ്റി നല്‍കിയ ശിപാർശ സര്‍ക്കാര്‍ നിരസിച്ചിട്ടുണ്ടോ; എങ്കിൽ അതിന്റെ കാരണമെന്താണ്;

(ഡി)	ജല അതോറിറ്റിയുടെ ശിപാർശ തള്ളിയ സാഹചര്യത്തില്‍ സാമ്പത്തിക പ്രതിസന്ധിക്ക് പരിഹാരമായി സര്‍ക്കാര്‍ പ്രത്യേക ഗ്രാന്റ് അനുവദിക്കുന്നതിന് നടപടി സ്വീകരിക്കുമോ; വ്യക്തമാക്കുമോ?

സാംസ്കാരിക രംഗത്ത് ഉണര്‍വ് സൃഷ്ടിക്കുന്നതിന് നടപടി

*386.

ശ്രീ.എം. മുകേഷ്
,, കെ.വി.അബ്ദുള്‍ ഖാദര്‍
,, ജോണ്‍ ഫെര്‍ണാണ്ടസ്
,, ആര്‍. രാജേഷ് : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	സാംസ്കാരിക രംഗത്ത് ഉണര്‍വ് സൃഷ്ടിക്കുന്നതിനും നവോത്ഥാനമൂല്യഘോഷണത്തിനും ഈ സര്‍ക്കാര്‍ സ്വീകരിച്ചിട്ടുള്ള നടപടികള്‍ അറിയിക്കാമോ; നാട്ടരങ്ങ് എന്ന പദ്ധതി പ്രാവര്‍ത്തികമായിട്ടുണ്ടോ; സാംസ്കാരിക സ്ഥാപനങ്ങളുടെ പ്രവര്‍ത്തനം ഫലപ്രദമായി നടത്തുന്നതിന് വേണ്ട ഫണ്ട് അനുവദിച്ചിട്ടുണ്ടോ;

(ബി)	ഒരു ലക്ഷത്തിലധികം പേര്‍ക്ക് കലാപരിശീലനം നല്‍കുകയെന്ന ലക്ഷ്യത്തോടെ കലാദ്ധ്യാപനത്തിനും പരിപോഷണത്തിനും ഉള്ള പദ്ധതിയെക്കുറിച്ച് അറിയിക്കാമോ;

(സി)	ഗ്രാമീണ കലാകാരന്മാര്‍ക്കും കരകൗശലക്കാര്‍ക്കും ഉപജീവനം സാധ്യമാക്കുന്നതിന് റൂറല്‍ ആര്‍ട്ട് ഹബ്ബ് പ്രാവര്‍ത്തികമായിട്ടുണ്ടോ; കലാ-സാഹിത്യ പ്രവര്‍ത്തകരെ വാര്‍ദ്ധക്യത്തില്‍ സംരക്ഷിക്കാന്‍ പദ്ധതിയുണ്ടോയെന്ന് അറിയിക്കുമോ?

ക്ഷീരകര്‍ഷകര്‍ നേരിടുന്ന പ്രശ്നങ്ങള്‍

*387.

ശ്രീ.ജി.എസ്.ജയലാല്‍
,, കെ. രാജന്‍
,, മുല്ലക്കര രത്നാകരന്‍
,, വി.ആര്‍. സുനില്‍ കുമാര്‍ : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	കാലിത്തീറ്റ നിര്‍മ്മാണത്തിനാവശ്യമായ അസംസ്കൃത സാധനങ്ങളുടെ ലഭ്യതക്കുറവ് പരിഹരിക്കുന്നതിന് സ്വീകരിക്കുന്ന നടപടികള്‍ വിശദമാക്കാമോ;

(ബി)	ക്ഷീരകര്‍ഷകര്‍ നേരിടുന്ന മുഖ്യ പ്രശ്നമായ കറവക്കാരുടെ ക്ഷാമം പരിഹരിക്കുന്നതിന് സ്വീകരിക്കുന്ന നടപടികള്‍ വ്യക്തമാക്കാമോ;

(സി)	മറ്റ് സംസ്ഥാനങ്ങളില്‍ നിന്നും കുറഞ്ഞ വിലയ്ക്ക് പാല്‍ കേരളത്തിലെത്തുന്നത് മൂലം ഇവിടുത്തെ ക്ഷീരകര്‍ഷകര്‍ നേരിടുന്ന കടുത്ത മത്സരത്തില്‍ നിന്നും അവരെ പരിരക്ഷിക്കുന്നതിന് എന്തൊക്കെ സഹായങ്ങളാണ് സര്‍ക്കാരിന്റെ ഭാഗത്ത് നിന്ന് ചെയ്യുന്നതെന്നറിയിക്കുമോ;

(ഡി)	പാലുല്പാദന ചെലവ് കൂടുന്നത് മൂലം ക്ഷീരവൃത്തിയില്‍ നിന്നുള്ള ആദായം കുറയുന്നത് പരിഹരിക്കുന്നതിന് സ്വീകരിക്കുന്ന നടപടികള്‍ എന്തെല്ലാമെന്ന് വിശദമാക്കുമോ?

വന സംരക്ഷണം

*388.

ശ്രീ.സണ്ണി ജോസഫ്
,, പി.ടി. തോമസ്
,, എം. വിന്‍സെന്റ്
,, കെ.എസ്.ശബരീനാഥന്‍ : താഴെ കാണുന്ന ചോദ്യങ്ങള്‍ക്ക് വനവും മൃഗസംരക്ഷണവും മൃഗശാലകളും വകുപ്പുമന്ത്രി സദയം മറുപടി നല്‍കുമോ:

(എ)	സംസ്ഥാനത്ത് ശോഷണം സംഭവിച്ച വനങ്ങളെ പുനരുജ്ജീവിപ്പിക്കുന്നതിനും ജെെവവെെവിധ്യം സംരക്ഷിക്കുന്നതിനും എന്തൊക്കെ പ്രവര്‍ത്തനങ്ങളാണ് ഈ സര്‍ക്കാരിന്റെ കാലത്ത് നടപ്പിലാക്കുന്നത്;

(ബി)	സംസ്ഥാനത്തിന്റെ പല മേഖലയിലും വനം കയ്യേറ്റം ഉണ്ടാകുന്ന സാഹചര്യത്തില്‍ വനമേഖലയെ വേര്‍തിരിക്കുന്നതിനും സംരക്ഷിക്കുന്നതിനും സ്വീകരിച്ച നടപടികള്‍ എന്തെല്ലാമെന്ന് അറിയിക്കുമോ;

(സി)	മനുഷ്യ-മൃഗ സംഘര്‍ഷങ്ങള്‍ കൂടിവരുന്ന സാഹചര്യത്തില്‍ അതിനെ പ്രതിരോധിക്കുവാന്‍ ആവിഷ്ക്കരിച്ച പദ്ധതികള്‍ എന്തൊക്കെയാണ്; അത് ഫലപ്രദമാണോയെന്ന് വ്യക്തമാക്കുമോ;

(ഡി)	2019-20 ല്‍ ഇക്കാര്യത്തിനായി അനുവദിച്ച തുക എത്രയാണ്; അതില്‍ എന്ത് തുക ഇതിനകം ചെലവഴിച്ചുവെന്ന് അറിയിക്കാമോ?

കിണറുകളിലെ ജലഗുണനിലവാര പരിശോധന

*389.

ശ്രീ.പി.ജെ.ജോസഫ്
,, മോന്‍സ്‌ ജോസഫ്
,, സി.എഫ്.തോമസ് : താഴെ കാണുന്ന ചോദ്യങ്ങള്‍ക്ക് ജലവിഭവ വകുപ്പ് മന്ത്രി സദയം മറുപടി നല്‍കുമോ:

(എ)	സംസ്ഥാനത്തെ കിണറുകളിലെ ജലഗുണനിലവാരം പരിശോധിക്കുന്നതിനുളള പദ്ധതി ആവിഷ്ക്കരിച്ചിട്ടുണ്ടോ എന്ന് വ്യക്തമാക്കാമോ;

(ബി)	കിണറുകളിലെ ജലശുദ്ധീകരണം നടത്തുന്നതിന് സര്‍ക്കാര്‍ ഏതെല്ലാം ഏജന്‍സികള്‍ വഴിയാണ് പദ്ധതികള്‍ നടത്തുവാന്‍ ഉദ്ദേശിക്കുന്നത് എന്നറിയിക്കാമോ;

(സി)	ഈ പദ്ധതിക്ക് പൈലറ്റ് പ്രോജക്ട് നടപ്പാക്കിയിട്ടുണ്ടോ; വിശദാംശങ്ങള്‍ അറിയിക്കാമോ?

മോഡല്‍ റസിഡന്‍ഷ്യല്‍ സ്കൂളുകളിലെ പഠനാന്തരീക്ഷം

*390.

ശ്രീ.കെ. ബാബു
,, സി. കെ. ശശീന്ദ്രന്‍
,, പി.വി. അന്‍വര്‍
,, പുരുഷന്‍ കടലുണ്ടി : താഴെ കാണുന്ന ചോദ്യങ്ങള്‍ക്ക് പട്ടികജാതി പട്ടികവര്‍ഗ്ഗ പിന്നോക്കസമുദായക്ഷേമവും നിയമവും സാംസ്കാരികവും പാര്‍ലമെന്ററികാര്യവും വകുപ്പുമന്ത്രി സദയം മറുപടി നല്‍കുമോ:

(എ)	ഗോത്രവര്‍ഗ്ഗക്കാര്‍ക്കായി മോഡല്‍ റസിഡന്‍ഷ്യല്‍ സ്കൂളുകളും ഗോത്രവര്‍ഗ്ഗ മേഖലകളില്‍ പ്രീമെട്രിക്, പോസ്റ്റ് മെട്രിക് ഹോസ്റ്റലുകളും നിര്‍മ്മിക്കുന്നതിനുള്ള കേന്ദ്രാവിഷ്കൃത പദ്ധതിക്ക് കേന്ദ്രഫണ്ട് ലഭ്യമാകുന്നുണ്ടോ;

(ബി)	ഇവയുടെ നിര്‍മ്മാണത്തിനും പരിപാലനത്തിനുമായി സംസ്ഥാന സര്‍ക്കാര്‍ ചെയ്തുവരുന്ന കാര്യങ്ങള്‍ വിശദമാക്കാമോ;

(സി)	മോഡല്‍ റസിഡന്‍ഷ്യല്‍ സ്കൂളുകളിലെ പഠനാന്തരീക്ഷവും അദ്ധ്യാപനവും മികച്ചതാക്കുന്നതിന് സ്വീകരിച്ചുവരുന്ന നടപടികള്‍ അറിയിക്കാമോ;

(ഡി)	പട്ടികവര്‍ഗ്ഗ വികസന വകുപ്പിന്റെ കീഴില്‍ പുതിയ പോസ്റ്റ് മെട്രിക് ഹോസ്റ്റലുകള്‍ നിര്‍മ്മിക്കാന്‍ പദ്ധതിയുണ്ടോ;

(ഇ)	നിലവിലുള്ളവയുടെ അടിസ്ഥാന സൗകര്യം വര്‍ദ്ധിപ്പിക്കുന്നതിനും അന്തേവാസികളുടെ വ്യക്തിത്വ വികാസത്തിനും ചെയ്തുവരുന്ന കാര്യങ്ങള്‍ അറിയിക്കാമോ?

Website maintained by Information System Section, Kerala Legislative Assembly, Thiruvananthapuram.