വൈപ്പിന്‍ കരയിലെ ശുദ്ധജലക്ഷാമത്തിന് കാരണമാവുന്ന ചൊവ്വര ജലശൂദ്ധീകരണ ശാലയിലെ അടിക്കടി ഉണ്ടാവുന്ന വൈദ്യുതി തടസ്സം ഒഴിവാക്കുന്നതിനായി കെ. എസ്. ഇ. ബി. യുടെ പുതിയ ഫീഡര്‍ ലൈന്‍ സ്ഥാപിക്കുന്ന പ്രവൃത്തിക്ക് 06.08.2024-ന് ഭരണാനുമതി ലഭ്യമായിട്ടുള്ളതും കെ. എസ്. ഇ. ബി. ക്ക് കെട്ടിവെക്കേണ്ടതുമായ 4,41,28,000/- രൂപ ജലവിഭവ വകുപ്പ് കെട്ടിവച്ചിട്ടുണ്ടോ; ഉണ്ടെങ്കില്‍ ഇതു സംബന്ധിച്ച വിശദാംശം ലഭ്യമാക്കാമോ;

ടി തുക നാളിതുവരെ കെട്ടിവെച്ചിട്ടില്ലെങ്കില്‍ ദ്വീപ് മണ്ഡലമെന്ന പരിഗണനയും കുടിവെള്ളത്തിനായി മറ്റു ശുദ്ധജലസ്രോതസ്സുകളൊന്നും ഇല്ല എന്ന വസ്തുതയും കണക്കിലെടുത്ത് ടി തുക പ്രത്യേക പരിഗണന നല്‍കി കെട്ടിവെക്കാന്‍ നടപടി സ്വീകരിക്കുമോ; വ്യക്തമാക്കുമോ?

സംസ്ഥാനത്തെ വിവിധ നദികളിലെ ജലം കാര്യക്ഷമമായി ഉപയോഗിക്കുന്നതിനെ സംബന്ധിച്ച് പഠനം നടത്താൻ ആലോചനയുണ്ടോ; വ്യക്തമാക്കാമോ;

കാർഷിക മേഖലയിൽ കൂടുതൽ ജലസേചന സൗകര്യം ഒരുക്കുന്നതിനും വെളളപ്പൊക്കം നിയന്ത്രിക്കുന്നതിനും പദ്ധതികൾ ആവിഷ്കരിക്കുമോ;

പൂർത്തിയാക്കാത്ത ജലസേചന പദ്ധതികൾ സമയബന്ധിതമായി പൂർത്തിയാക്കുന്നതിനും ജലസേചന പദ്ധതികളുടെ കനാലുകൾ അറ്റകുറ്റപ്പണികൾ നടത്തി നവീകരിക്കുന്നതിനും എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വിശദമാക്കുമോ?

2021-26 കാലയളവിലെ ബജറ്റുകളിൽ ഇറിഗേഷൻ വകുപ്പിലെ വിവിധ പദ്ധതികൾക്കായി വകയിരുത്തിയ തുക എത്രയാണെന്നും അതിൽ എത്ര തുക നാളിതുവരെ ചെലവഴിച്ചിട്ടുണ്ടെന്നുമുള്ള വിശദാംശം ലഭ്യമാക്കാമോ;

സാമ്പത്തിക പ്രതിസന്ധി മൂലം വകയിരുത്തിയിരുന്ന തുകയിൽ എത്ര ശതമാനം തുക വെട്ടിക്കുറച്ചുവെന്ന് വ്യക്തമാക്കുമോ; ഏറനാട് മണ്ഡലത്തിൽ പ്രസ്തുത കാലയളവിൽ ഒരോ പദ്ധതിക്കും ചെലവഴിച്ച തുക എത്രയെന്നും പ്രസ്തുത പദ്ധതികളേതൊക്കെയെന്നും അറിയിക്കാമോ?

ജലവിഭവ വകുപ്പിന്റെ ആഭിമുഖ്യത്തിലുള്ള ഇറിഗേഷന്‍ ടൂറിസം പദ്ധതിയുടെ വിശദാംശം അറിയിക്കുമോ;

ഇറിഗേഷന്‍ ടൂറിസം പദ്ധതിയുടെ നടത്തിപ്പിനും മേല്‍നോട്ടത്തിനുമായി ഏത് ഏജന്‍സിയെയാണ് ചുമതലപ്പെടുത്തിയിരിക്കുന്നത്; പദ്ധതിയുടെ നടത്തിപ്പ് സംബന്ധിച്ച മാനദണ്ഡങ്ങള്‍ അറിയിക്കുമോ;

ഇറിഗേഷന്‍ ടൂറിസം പദ്ധതിയില്‍ ഉള്‍പ്പെടുത്തുന്നതിന് ചങ്ങനാശ്ശേരി നിയോജക മണ്ഡലത്തില്‍ നിന്ന് പ്രപ്പോസലുകള്‍ സമര്‍പ്പിച്ചിട്ടുണ്ടോയെന്ന് വ്യക്തമാക്കുമോ; വിശദവിവരം നല്‍കുമോ?

കോട്ടക്കല്‍ കൃഷിഭവന്‍ പരിധിയില്‍ നെല്‍കൃഷിയും പച്ചക്കറി കൃഷിയും വിപുലപ്പെടുത്തുന്നതിനായി കൃഷിഭവന്റെ പരിധിയിലുള്ള ജലസ്രോതസുകള്‍ പുനരുജ്ജീവിപ്പിച്ച് പുതിയ കൈത്തോടുകളും നീര്‍ച്ചാലുകളും ചിറകളും നിര്‍മ്മിക്കുകയും നിലവിലുള്ളവ നവീകരിക്കുകയും ചെയ്യുന്നതുള്‍പ്പടെയുള്ള ഒരു സമഗ്ര ജലസേചന പദ്ധതി ആവിഷ്കരിക്കുന്നത് സംബന്ധിച്ച്‌ 22.03.2025 ൽ ചേർന്ന യോഗത്തിന്റെ അടിസ്ഥാനത്തിൽ സ്വീകരിച്ച നടപടികളുടെ വിശദാംശം ലഭ്യമാക്കാമോ;

പ്രസ്തുത പദ്ധതി സംബന്ധിച്ച് കോട്ടക്കൽ എം.എൽ.എ.നൽകിയ പ്രൊപ്പോസലിന്മേൽ ചീഫ് എഞ്ചിനീയറുടെ (ജലസേചനവും ഭരണവും) ഓഫീസില്‍ സ്വീകരിച്ച നടപടികളുടെ വിശദാംശം ലഭ്യമാക്കാമോ;

കോട്ടക്കൽ നഗരസഭയിലെ നീർത്തടങ്ങളുടെ സമഗ്ര പുരോഗതിയ്ക്കായി തയ്യാറാക്കിയ ഹരിത കേരളം മാസ്റ്റർ പ്ലാൻ പ്രകാരം നടപ്പിലാക്കിയ പ്രവൃത്തികളുടെ വിശദാംശം ലഭ്യമാക്കുമോ?

ഈ സർക്കാരിന്റെ കാലയളവിൽ ജലവിഭവ വകുപ്പ് വഴി എസ്. ഡി. ആർ. എഫ്. പദ്ധതിയിലും പ്ലാൻ ഫണ്ടിലും ഉൾപ്പെടുത്തി മലപ്പുറം നിയോജക മണ്ഡലത്തിൽ ഭരണാനുമതി നൽകിയ മുഴുവൻ പ്രവൃത്തികളുടെയും വിശദാംശം ലഭ്യമാക്കാമോ;

മലപ്പുറം നിയോജക മണ്ഡലത്തിലെ കടലുണ്ടിപ്പുഴയിലെ ആനക്കയം വില്ലേജ് (സര്‍വ്വേ നമ്പര്‍141/8 പാണക്കാട് വില്ലേജ് ) ,താമരക്കുഴി , നൂറാടി , കോരംകുണ്ട് , കോല്‍മണ്ണ (സര്‍വ്വേ നമ്പര്‍141/8 പാണക്കാട് വില്ലേജ് ), പാണക്കാട് ആറുവെട്ടിക്കടവ് എന്നീ ഭാഗങ്ങളില്‍ പാർശ്വഭിത്തി നിർമ്മിക്കുന്നതിന് അടങ്കല്‍ തയ്യാറാക്കി മുൻഗണന നിശ്ചയിച്ച് സര്‍ക്കാരില്‍ സമര്‍പ്പിച്ചിട്ടുണ്ടോ ഇല്ലെങ്കില്‍ അതിനുള്ള നിര്‍ദേശം നല്‍കുമോ ;

പ്രസ്തുത പ്രൊപ്പോസലുകൾക്ക് ഫണ്ട് അനുവദിക്കുകയോ ഭരണാനുമതി നല്‍കുകയോ ചെയ്യുന്നതിനുള്ള കാലതാമസം എന്താണ്; കാരണം വ്യക്തമാക്കാമോ;

അപകടം കണക്കിലെടുത്ത് മൺസൂൺ വരുന്നതിനു മുമ്പു തന്നെ ഫണ്ട് അനുവദിക്കുവാൻ നടപടി സ്വീകരിക്കുമോ ?

ഭൂമി ഏറ്റെടുക്കല്‍ വൈകിയതിനാല്‍ മലപ്പുറം ജില്ലയില്‍ ജല ജീവന്‍ മിഷന്റെ എത്ര പദ്ധതികള്‍ മുടങ്ങി കിടക്കുന്നുവെന്ന് വ്യക്തമാക്കാമോ;

വള്ളികുന്ന് നിയോജക മണ്ഡലത്തിലെ മൂന്നിയൂര്‍, ചേലേമ്പ്ര, വള്ളിക്കുന്ന്, തേഞ്ഞിപ്പലം, പഞ്ചായത്തുകള്‍ക്കുള്ള വേണ്ടിയുള്ള സമഗ്ര കുടിവെള്ള പദ്ധതിയുടെ ഇലക്ട്രോ മെക്കാനിക്കല്‍ പ്രവൃത്തിയുമായി ബന്ധപ്പെട്ട ടെണ്ടര്‍ നടപടി സംബന്ധിച്ച് ബഹു: ഹൈകോടതിയില്‍ കേസ് തീര്‍പ്പാക്കുന്നത് വൈകുന്നത് പദ്ധതിയുടെ പൂര്‍ത്തീകരണത്തെ ബാധിക്കുന്നത് സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടോ? ഈ വിഷയത്തില്‍ തുടര്‍ന്ന് സ്വീകരിക്കാന്‍ ഉദ്ദേശിക്കുന്ന നടപടികള്‍ എന്തെല്ലാമാണെന്ന് വ്യക്തമാക്കാമോ?

കാട്ടാക്കട നിയോജക മണ്ഡലത്തില്‍ ഭൂജലവകുപ്പ് കഴിഞ്ഞ പത്തു വര്‍ഷത്തിനുള്ളില്‍ സ്ഥാപിച്ച മിനി കുടിവെള്ള പദ്ധതികളുടെ സ്ഥലവും, നിലവിലെ സ്ഥിതിയും, ആവശ്യമായി വന്ന തുകയും വ്യക്തമാക്കാമോ; പ്രസ്തുത കുടിവെള്ള പദ്ധതികളുടെ തുടര്‍പ്രവര്‍ത്തന ചെലവുകള്‍ എങ്ങനെയാണ് വിഭാവനം ചെയ്തിരിക്കുന്നത്; വിശദാംശം- ലഭ്യമാക്കാമോ?

നബാര്‍ഡ് ഫണ്ട് വഴി നടപ്പിലാക്കിയ പള്ളിച്ചല്‍ വിളവൂര്‍ക്കല്‍, ബാലരാമപുരം പഞ്ചായത്തുകള്‍ക്കായുള്ള കുടിവെള്ള പദ്ധതിയുടെ പൂര്‍ണ്ണമായ വിവരം ലഭ്യമാക്കാമോ; ഭരണാനുമതി ലഭ്യമായ തീയതി, തുക, പ്രവ്യത്തി ആരംഭിച്ച തീയതി, പ്രസ്തുത പദ്ധതിയുടെ ഗുണഭോക്താക്കളെ സംബന്ധിച്ച വിവരങ്ങള്‍ ആയതിന്റെ നേട്ടങ്ങള്‍, നിലവിലെ സ്ഥിതി എന്നിവ സംബന്ധിച്ച പൂര്‍ണ്ണവിവരങ്ങള്‍ ലഭ്യമാക്കാമോ;

കാട്ടാക്കട നിയോജക മണ്ഡലത്തിലെ വിളപ്പില്‍ കുടിവെള്ള പദ്ധതിയുടെ പൂര്‍ണ്ണ വിവരങ്ങള്‍ ലഭ്യമാക്കാമോ; അനുമതി ലഭ്യമായ തീയതി, അനുവദിച്ച തുക, ആരംഭിച്ച തീയതി, പൂര്‍ത്തിയാക്കിയ തീയതി, പദ്ധതിയുടെ ഗുണഭോക്താക്കളെ സംബന്ധിച്ച വിവരങ്ങള്‍, ആയതിന്റെ നേട്ടങ്ങള്‍, നിലവിലെ സ്ഥിതി എന്നിവ വിശദമാക്കാമോ?

പുതുക്കാട് മണ്ഡലത്തില്‍ മറ്റത്തൂര്‍ ഗ്രാമപഞ്ചായത്തിലെ ഇഞ്ചക്കുണ്ട് മേഖലയിലെ കര്‍ഷകര്‍ക്ക് ഏറെ പ്രയോജനകരമായ ഉപ്പുഴി ലിഫ്റ്റ് ഇറിഗേഷന്‍ പദ്ധതി പൂര്‍ത്തീകരിക്കുന്നതിനായി, രണ്ടാം ഘട്ടമായി നിര്‍മ്മിക്കേണ്ട അടിസ്ഥാന സൗകര്യങ്ങളുടെ പ്രൊപ്പോസലിന് അനുമതിയും ഫണ്ടും ലഭ്യമാക്കാന്‍ ആവശ്യമായ നടപടി സ്വീകരിക്കുമോ?

വൈപ്പിന്‍ മണ്ഡലത്തിലെ പള്ളിപ്പുറം ഗ്രാമപഞ്ചായത്തില്‍ മുനമ്പം ഭാഗത്ത് ഡീസാലിനേഷന്‍ പ്ലാന്റ് സ്ഥാപിക്കുന്ന പദ്ധതിയുടെ നിലവിലെ സ്ഥിതി വിശദമാക്കാമോ;

പ്രസ്തുത പദ്ധതിക്ക് എപ്പോഴത്തേക്ക് ഭരണാനുമതി ലഭ്യമാക്കാന്‍ സാധിക്കുമെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം അരുവിക്കര മണ്ഡലത്തിലെ എട്ടു പഞ്ചായത്തുകളിലായി ജൽജീവന്‍ പദ്ധതി പ്രകാരം അനുവദിച്ച പദ്ധതികള്‍, അവയുടെ ഭരണാനുമതി തീയതി, അനുവദിച്ച തുക, നിലവിലെ പ്രവര്‍ത്തന പുരോഗതി എന്നിവ സംബന്ധിച്ച വിവരങ്ങള്‍ തരംതിരിച്ച് അറിയിക്കുമോ?

കുറ്റ്യാടി ഇറിഗേഷന്‍ പദ്ധതിയുടെ ഭാഗമായുള്ള ഉള്ളിയേരി ടൗണിലെ ഇറിഗേഷന്‍ ഭൂമിയില്‍ നടപ്പിലാക്കി വരുന്ന നഗര സൗന്ദര്യവല്‍ക്കരണ പ്രവൃത്തിയുടെ വിശദാംശം ലഭ്യമാക്കാമോ;

പ്രസ്തുത പ്രവൃത്തിയ്ക്ക് എത്ര കോടി രൂപയാണ് ബജറ്റില്‍ അനുവദിച്ചിട്ടുള്ളത്; ആയതിന് ധനാനുമതി ലഭിച്ചിട്ടുണ്ടോ; ധനാനുമതി ലഭിച്ച പ്രവൃത്തികള്‍ എപ്പോള്‍ പൂര്‍ത്തീകരിക്കാന്‍ കഴിയും; അറിയിക്കാമോ?

ഈ സര്‍ക്കാര്‍ അധികാരമേറ്റ ശേഷം കോഴിക്കോട് സൗത്ത് മണ്ഡലത്തില്‍ ഇറിഗേഷന്‍ വകുപ്പ് (മേജര്‍/മൈനര്‍) മുഖേന നടപ്പിലാക്കിയതും നടപ്പിലാക്കുന്നതുമായ പദ്ധതികള്‍ ഏതെല്ലാമാണ്; വ്യക്തമാക്കുമോ;

ഓരോ പദ്ധതിയുടെയും നിലവിലെ സ്ഥിതിയും ചെലവഴിച്ച തുകയും വിശദമാക്കാമോ?

2020-21 മുതൽ മാവേലിക്കര മണ്ഡലത്തില്‍ ബജറ്റിലും എം.എല്‍.എ. ഫണ്ടിലും ഉള്‍പ്പെടുത്തി മൈനര്‍ ഇറിഗേഷന്‍ മുഖേന നടപ്പിലാക്കുവാന്‍ തുക അനുവദിച്ച പ്രവൃത്തികളുടെ പേരും അവയുടെ തല്‍സ്ഥിതിയും വിശദമാക്കാമോ;

ഇവയില്‍ ടെന്‍ഡര്‍ ചെയ്തവയും ചെയ്യാനുള്ളവയും ഏതൊക്കെയെന്നും ടെന്‍ഡര്‍ ചെയ്യാനുള്ള കാലതാമസം ഉണ്ടെങ്കില്‍ കാരണം എന്തെന്നും വിശദമാക്കാമോ?

കാട്ടാക്കട നിയോജക മണ്ഡലത്തിലെ 6 പഞ്ചായത്തുകളിലായി നടപ്പിലാക്കിയ ജല്‍ജീവന്‍ മിഷന്റെ പ്രവൃത്തികള്‍ പഞ്ചായത്ത് തിരിച്ച് ലഭ്യമാക്കാമോ; ഓരോ പഞ്ചായത്തിലും പദ്ധതിക്കായി അനുവദിച്ച തുക, നൽകിയ കണക്ഷനുകൾ, ലഭിച്ച അപേക്ഷകൾ, ഇനി നൽകാനുള്ളവ എന്നിവ പഞ്ചായത്ത് തിരിച്ച് വിശദമാക്കാമോ; കൂടാതെ ജലമെത്തിക്കുന്നതിനായി മണ്ഡലത്തില്‍ സ്ഥാപിച്ചതും സ്ഥാപിക്കുന്നതുമായ പമ്പ് ഹൗസുകള്‍, ഇതിനായുള്ള തുക എന്നിവ വിശദമാക്കാമോ?

2016-21, 2021-26 കാലയളവിൽ കോവളം മണ്ഡലത്തില്‍ മൈനർ, മേജർ ഇറിഗേഷൻ വകുപ്പുകളിൽ ഭരണാനുമതി ലഭിച്ച പ്രവൃത്തികളുടെയും പദ്ധതികളുടെയും വിവരങ്ങള്‍ ലഭ്യമാക്കാമാേ;

പ്രസ്തുത പദ്ധതികളുടെ പേര്, അനുവദിച്ച തുക, നിലവിലെ സ്ഥിതി എന്നിവ വർഷം തിരിച്ച് വിശദമാക്കാമാേ?

കൈപ്പമംഗലം നിയോജകമണ്ഡലത്തിലെ നാട്ടിക ഫർക്ക കുടിവെള്ള പദ്ധതിയിൽ പൈപ്പ് മാറ്റിവയ്ക്കൽ പദ്ധതിയുമായി ബന്ധപ്പെട്ട് നീക്കം ചെയ്യുന്ന മണ്ണ് റോഡരികിൽ കൂട്ടിയിടുന്നത് മൂലം കടുത്ത ഗതാഗത തടസ്സവും പൊടിപടലങ്ങളും ഉണ്ടാകുന്നതായ പ്രശ്നം പരിഹരിക്കുന്നതിന് എന്തെല്ലാം നടപടികളാണ് വകുപ്പ് സ്വീകരിച്ചിട്ടുള്ളത്;

കൈപ്പമംഗലം നിയോജക മണ്ഡലത്തിൽ എടത്തിരുത്തി ഗ്രാമപഞ്ചായത്തിൽ രാമങ്കുളം കുടിവെള്ള പദ്ധതി പൂർണ രൂപത്തിൽ സജ്ജമാക്കുന്നതിന് എന്തെല്ലാം നടപടികളാണ് വകുപ്പ് സ്വീകരിച്ചിരിക്കുന്നത്; വിശദമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം കേരള വാട്ടര്‍ അതോറിറ്റി, ഇറിഗേഷന്‍, ഭൂജല വകുപ്പുകള്‍ മുഖാന്തരം കടുത്തുരുത്തി നിയോജക മണ്ഡലത്തില്‍ നടപ്പിലാക്കിയ പ്രവൃത്തികളുടെ വിശദാംശം ലഭ്യമാക്കുമോ;

ഓരോ പ്രവൃത്തിയുടെയും നിലവിലെ സ്ഥിതി, അനുവദിച്ച തുക എന്നിവ വ്യക്തമാക്കാമോ; ഉത്തരവുകളുടെ പകർപ്പ് ലഭ്യമാക്കാമോ;

കടുത്തുരുത്തി മണ്ഡലത്തിലെ ജൽ ജീവൻ മിഷന്‍ പദ്ധതി പ്രവൃത്തികളുടെ പുരോഗതി സംബന്ധിച്ച വിശദാംശം ലഭ്യമാക്കുമോ;

ജൽ ജീവൻ മിഷന്‍ പദ്ധതി എതെല്ലാം പഞ്ചായത്തുകളിലാണ് നടപ്പിലാക്കിയത്; വിശദമാക്കുമോ; 2021 മുതല്‍ 2026 വരെയുള്ള പദ്ധതികളും ചെലവഴിച്ച തുകയും സംബന്ധിച്ച വിശദാംശം ലഭ്യമാക്കാമോ?

നീരൊഴുക്കിന് തടസ്സമാവുന്ന രീതിയില്‍ തോടുകളിലും കായലുകളിലും വളര്‍ന്നുനില്‍ക്കുന്ന കണ്ടല്‍ക്കാടുകള്‍, ജനവാസകേന്ദ്രങ്ങളില്‍ വെള്ളം കയറുന്നതിനും തോടുകളും കായലുകളും വൃത്തിയാക്കി, പാര്‍ശ്വഭിത്തി കെട്ടി സംരക്ഷിക്കുന്നതിനും തടസ്സമാകുന്നതിനാല്‍ പ്രസ്തുത കണ്ടലുകള്‍ നീക്കംചെയ്യുന്നതിന് സ്വീകരിക്കാവുന്ന നടപടി എന്തെന്ന് വ്യക്തമാക്കാമോ;

വൈപ്പിന്‍ മണ്ഡലത്തിലെ എളങ്കുന്നപ്പുഴ ഗ്രാമപഞ്ചായത്തില്‍ ജനവാസകേന്ദ്രങ്ങളില്‍ ഓരുവെള്ളം കയറുന്നതിന് കാരണമാവുന്ന ആര്‍.എം.പി. തോട് നവീകരണത്തിനായി നവകേരള സദസ്സില്‍ 2.29 കോടിക്കും ബഡ്ജറ്റില്‍ 2 കോടി രൂപയ്ക്കും ഭരണാനുമതി ലഭിച്ചിട്ടുള്ള പ്രവൃത്തി നടപ്പിലാക്കുന്നതിനും കടലിലേയ്ക്കുള്ള നീരൊഴുക്കിന് തടസ്സമായും തോടുകള്‍ തന്നെ ഇല്ലാതാക്കുന്ന രീതിയിലും വളര്‍ന്നുവരുന്ന കണ്ടല്‍ക്കാടുകള്‍ നീക്കംചെയ്ത് തോടിന്റെ സംരക്ഷണത്തിനായുള്ള പാര്‍ശ്വഭിത്തിയുടേയും നടപ്പാതയുടേയും നിര്‍മ്മാണത്തിന് പ്രത്യേകാനുമതിയോ നിയമത്തില്‍ ഇളവോ ലഭ്യമാക്കാന്‍ നടപടി സ്വീകരിക്കുമോ?

കിള്ളിയാറിന്റെ നവീകരണവുമായി ബന്ധപ്പെട്ട് കഴിഞ്ഞ 5 വര്‍ഷക്കാലത്തിനുള്ളില്‍ സ്വീകരിച്ച നടപടികളുടെ വിശദാംശങ്ങള്‍ ചെലവഴിച്ച തുക ഉള്‍പ്പെടെ ലഭ്യമാക്കാമോ;

തീര സംരക്ഷണവുമായി ബന്ധപ്പെട്ട് കിള്ളിയാറില്‍ ഇനി അവശേഷിക്കുന്ന പ്രവൃത്തികള്‍ സംബന്ധിച്ച വിവരം എസ്റ്റിമേറ്റ് തുക സഹിതം വിശദമാക്കാമോ?

2022-23 സാമ്പത്തിക വര്‍ഷത്തെ ബഡ്ജറ്റിൽ പ്രഖ്യാപിച്ച ചാലക്കുടി പുഴയിലെ വൈന്തല പ്രോജക്ട് കടവ് മുതൽ സമ്പാളൂർ ഞറളക്കടവ് വരെയുള്ള ഭാഗത്തെ പുഴയോര സംരക്ഷണം എന്ന പ്രവൃത്തിയുടെ വിശദാംശങ്ങളും നിലവിലെ പുരോഗതിയും വ്യക്തമാക്കാമോ;

ഈ പ്രദേശത്തെ പറമ്പുകളുടെ വശങ്ങൾ പുഴയിലേക്ക് ഇടിഞ്ഞ് വീഴുന്ന സാഹചര്യം ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ;

പ്രസ്തുത പ്രവൃത്തിയുടെ മെല്ലെപ്പോക്ക് ശ്രദ്ധയിൽപ്പെട്ടിട്ടുണ്ടോ; ആയത് ഗൗരവമായി കണ്ട് പരിഹാരം കണ്ടെത്തുന്നതിനാവശ്യമായ നടപടി സ്വീകരിക്കുമോ; വ്യക്തമാക്കാമോ;

പ്രസ്തുത പ്രവൃത്തി എന്ന് പൂര്‍ത്തീകരിക്കുമെന്ന് വ്യക്തമാക്കുമോ?

നവീകരണവും പുനരുദ്ധാരണവും ആവശ്യമായ ഏതെല്ലാം ഡാമുകള്‍ നിലവിലുണ്ട്; വ്യക്തമാക്കുമോ;

പ്രസ്തുത ജോലികള്‍ക്ക് ചെലവഴിക്കേണ്ടിവരുന്ന തുക എത്രയെന്ന് കണക്കാക്കിയിട്ടുണ്ടോ; എങ്കില്‍ ആയതിന്റെ വിശദാംശം നല്‍കുമോ;

ഡാമുകളുടെ നവീകരണ/പുനരുദ്ധാരണ ജോലികള്‍ക്ക് സര്‍ക്കാരിതര ഏജന്‍സികളുടെ സാമ്പത്തിക സഹായം തേടിയിട്ടുണ്ടോ; വിശദാംശം നല്‍കുമോ;

ഇതിനായി എത്ര തുകയുടെ പദ്ധതിയ്ക്കാണ് അംഗീകാരം നല്‍കിയിരിക്കുന്നത്; നവീകരണ/പുനരുദ്ധാരണ ജോലികള്‍ എന്നു മുതല്‍ ആരംഭിക്കാന്‍ സാധിക്കും; വിശദാംശം നല്‍കുമോ?

ഷൊര്‍ണ്ണൂര്‍ മണ്ഡലത്തിലെ ഭാരതപ്പുഴയ്ക്ക് കുറുകെ നിര്‍മ്മിക്കുന്ന മാന്നനൂര്‍ ഉരുക്ക് തടയണയുടെ നിലവിലെ സ്ഥിതി എന്താണ്;

പ്രസ്തുത പദ്ധതി പൂര്‍ത്തീകരണം വൈകിയിട്ടുണ്ടെങ്കില്‍ അതിന്റെ കാരണങ്ങള്‍ എന്തൊക്കെയാണ്;

കൃത്യമായ സമയപരിധിയോടെ പദ്ധതി പൂര്‍ത്തീകരിക്കുന്നതിന് സ്വീകരിക്കുന്ന നടപടികള്‍ എന്തൊക്കെയാണെന്ന് വിശദമാക്കാമോ?

ഉദുമ മണ്ഡലത്തിലെ ബേഡഡുക്ക അമ്പിലാടി മാട്ട റോഡില്‍ കരിച്ചേരി പുഴയ്ക്ക് കുറുകെ ചെക്ക് ഡാം- കം- ബ്രിഡ്ജ് നിര്‍മ്മിക്കുന്നതിനുള്ള ഡിസൈന്‍ തയ്യാറായിട്ടുണ്ടോ എന്ന് വ്യക്തമാക്കാമോ;

പ്രസ്തുത ചെക്ക് ഡാം- കം -ബ്രിഡ്ജ് പദ്ധതിക്കായി 2026-27 ബജറ്റില്‍ തുക വകയിരുത്തിയത് പ്രകാരം ഭരണാനുമതി നല്‍കുന്നതിനുള്ള നടപടികള്‍ ഏത് ഘട്ടത്തിലാണെന്ന് വ്യക്തമാക്കാമോ?

കൊണ്ടോട്ടി മണ്ഡലത്തിൽ ചാലിയാർ പുഴ ഒഴുകുന്ന ചീക്കോട് , വാഴക്കാട്, വാഴയൂർ പഞ്ചായത്തുകളിലെ തീരഭാഗങ്ങൾ പലയിടങ്ങളിലും മണ്ണിടിഞ്ഞ് ജനങ്ങളുടെ ജീവനും, സ്വത്തിനും ഭീഷണിയാകുന്ന കാര്യം ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ഈ മൂന്നു പഞ്ചായത്തുകളിലെ ചാലിയാർ തീരത്ത് പാർശ്വഭിത്തി കെട്ടി സംരക്ഷിക്കുന്നതിന് ഇതിനകം നൽകിയ പ്രൊപ്പോസലുകളുടെ വിശദാംശങ്ങളും അതിന്മേൽ സ്വീകരിച്ച നടപടികളും വ്യക്തമാക്കുമോ?

വൈപ്പിന്‍കരയിലെ തീരശോഷണവും കടലാക്രമണവുമായി ബന്ധപ്പെട്ട് ശാസ്ത്രീയ പഠനം നടത്തി എൻ.സി.സി.ആർ. ഷോര്‍ലൈന്‍ മാനേജ്മെന്റ് പ്ലാനും അന്തിമ റിപ്പോര്‍ട്ടും സമര്‍പ്പിച്ചിട്ടുള്ള സാഹചര്യത്തില്‍ സ്വീകരിച്ചിട്ടുള്ള തുടര്‍നടപടികള്‍ എന്തെല്ലാമെന്ന് വിശദമാക്കാമോ;

പ്രസ്തുത പദ്ധതി നടപ്പിലാക്കുന്നതിനായി മിഷന്‍ ഡയറക്ടറേറ്റ് വഴി ഏഷ്യന്‍ ഡവലപ്മന്റ് ബാങ്കിന്റെ ധനസഹായം ലഭ്യമാക്കുന്നതിനായി സ്വീകരിച്ചിട്ടുള്ള നടപടിയുടെ നിലവിലെ സ്ഥിതി വ്യക്തമാക്കാമോ;

ഇതു സംബന്ധിച്ച ജലവിഭവ വകുപ്പിൽ തുടരുന്ന ഫയലി(ഐ.ആർ.1/132/2024)ന്റെ പുരോഗതി വിശദമാക്കാമോ?

മങ്കട ഗ്രാമപഞ്ചായത്തിലെ വലിയ തോടിന് സംരക്ഷണ ഭിത്തിയില്ലാത്തതിനാൽ വശങ്ങള്‍ പതിവായി ഇടിഞ്ഞ് താഴുന്നത് ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ;

പ്രസ്തുത തോടിലെ കൂട്ടപ്പാലയിലും കുളന്തോട്-കൂട്ടപ്പാല കൈതോട്ടിലും വശങ്ങളുടെ സംരക്ഷണത്തിന് കരിങ്കല്‍ ഭിത്തി കെട്ടുന്നതിനുള്ള പ്രവൃത്തി 2025-26 ലെ മുന്‍ഗണനാ ലിസ്റ്റില്‍ ഉള്‍പ്പെടുത്തിയിട്ടുണ്ടോ; എങ്കില്‍ എത്ര രൂപയുടെ എസ്റ്റിമേറ്റാണ് കണക്കാക്കിയിട്ടുള്ളതെന്ന വിശദാംശങ്ങൾ ലഭ്യമാക്കാമോ;

കര്‍ഷകര്‍ക്കും പൊതുജനങ്ങള്‍ക്കും വളരെ പ്രയോജനകരമായ പ്രസ്തുത പ്രവൃത്തിയ്ക്ക് അടിയന്തരമായി ഭരണാനുമതി നല്‍കുന്നതിനുള്ള നടപടി സ്വീകരിക്കുമോ?

വരന്തരപ്പിള്ളി ഗ്രാമപഞ്ചായത്തിലെ ആദിവാസി ഉന്നതികളിലും മലയോര ഗ്രാമങ്ങളിലും കുടിവെള്ള ലഭ്യത ഉറപ്പു വരുത്തുന്നതിനായി കുറുമാലിപ്പുഴയില്‍ എല്ലാ വര്‍ഷവും നിര്‍മ്മിക്കാറുള്ള താല്‍ക്കാലിക ബണ്ടുകള്‍ ഇനിയും നിര്‍മ്മിക്കാത്തത് ശ്രദ്ധയില്‍പ്പെട്ടിട്ടുണ്ടോ;

അടിയന്തിരമായി താല്‍ക്കാലിക ബണ്ടുകള്‍ നിര്‍മ്മിച്ച് മേഖലയിലെ ജനങ്ങള്‍ക്ക് കുടിവെള്ള ലഭ്യത ഉറപ്പുവരുത്തുന്നതിനാവശ്യമായ സത്വര നടപടികള്‍ സ്വീകരിക്കുമോ;

തുടര്‍ വര്‍ഷങ്ങളില്‍ പ്ലാസ്റ്റിക് ചാക്കുകള്‍ക്കു പകരം മറ്റ് സംവിധാനങ്ങള്‍ ഉപയോഗപ്പെടുത്തി താല്‍ക്കാലിക ബണ്ട് നിര്‍മ്മിക്കുന്നതിന് കൂടുതല്‍ തുക അനുവദിക്കുമോ?

കുമ്പള പുഴയ്ക്ക് കുറുകെ കഞ്ചികട്ടയിൽ നിർമ്മിക്കുന്ന റെഗുലേറ്റർ- കം -ബ്രിഡ്ജിന്റെ നിർമ്മാണ പ്രവൃത്തി എപ്പോൾ ആരംഭിക്കുമെന്ന് വിശദമാക്കുമോ?

ഷിറിയ പുഴയ്ക്ക് കുറുകെ നിര്‍മ്മിക്കുന്ന ബംബ്രാണ റെഗുലേറ്റർ -കം- ബ്രിഡ്ജ് പ്രവൃത്തിയുടെ പൂർത്തീകരണം വൈകുന്നത് എന്തുകൊണ്ടാണെന്ന് വിശദമാക്കുമോ;

പ്രസ്തുത പ്രവൃത്തിയുടെ നിലവിലെ സ്ഥിതി എന്താണെന്നും എപ്പോൾ പൂർത്തീകരിക്കാൻ കഴിയുമെന്നും വിശദമാക്കുമോ?

ഗുരുവായൂര്‍ മണ്ഡലത്തിലെ ചക്കംകണ്ടം സ്ലോയിസ്- കം- ബ്ലിഡ്ജ് നിര്‍മ്മാണത്തിന്റെ നിലവിലെ സ്ഥിതി വ്യക്തമാക്കാമോ;

നിലവിലെ സ്ലോയിസ്- കം- ബ്ലിഡ്ജ് അപകടാവസ്ഥയിലാണെന്നും ഇതിലൂടെയുള്ള വാഹന ഗതാഗതം നിര്‍ത്തിവെച്ചിട്ടുള്ളതായും ശ്രദ്ധയില്‍പ്പെട്ടിട്ടുണ്ടോ; വ്യക്തമാക്കാമോ?

പെരിഞ്ചേരി കടവ് റെഗുലേറ്റര്‍ -കം- ബ്രിഡ്ജ് പ്രവൃത്തിയുടെ നിലവിലെ സ്ഥിതി എന്താണെന്ന് വിശദമാക്കാമോ; പ്രസ്തുത പ്രവൃത്തി എന്ന് പൂര്‍ത്തിയാക്കാന്‍ സാധിക്കുമെന്ന് അറിയിക്കുമോ;

പെരിഞ്ചേരി കടവ് റെഗുലേറ്റര്‍- കം -ബ്രിഡ്ജ് പ്രവൃത്തിക്കായി അനുവദിച്ച തുക എത്രയെന്നും പ്രസ്തുത പ്രവൃത്തിയുടെ ഭാഗമായി എന്തൊക്കെ ഘടകങ്ങളാണ് ഉള്‍പ്പെടുത്തിയിട്ടുള്ളതെന്നും വിശദമാക്കാമോ; ഈ പ്രവൃത്തി നടപ്പിലാക്കുന്നതിലൂടെ ഉണ്ടാകുന്ന പ്രയോജനങ്ങള്‍ എന്തെല്ലാമെന്ന് വ്യക്തമാക്കാമോ;

പ്രസ്തുത പ്രവൃത്തിയുടെ കരാര്‍ കാലാവധി സംബന്ധിച്ച വിവരങ്ങള്‍ ലഭ്യമാക്കുമോ; എത്ര തുകയ്ക്കാണ് ഈ പ്രവൃത്തി ഏറ്റെടുത്തിട്ടുള്ളത് എന്ന് വിശദമാക്കുമോ?

കണ്ണൂര്‍ ജില്ലയിലെ അഴീക്കോട് മണ്ഡലത്തിലെ കാട്ടാമ്പള്ളി റെഗുലേറ്റര്‍ -കം -ബ്രിഡ്ജ് നവീകരണം പ്രവൃത്തിയില്‍ (റീ-ബില്‍ഡ് കേരള പദ്ധതിയിൽ ഉള്‍പ്പെടുത്തിയത്) ഉള്‍പ്പെടുന്ന അനുബന്ധ പ്രവൃത്തികൾ എന്തെല്ലാമാണെന്ന് വിശദമാക്കാമോ;

പ്രസ്തുത പ്രവൃത്തി ആരംഭിച്ചിട്ടുണ്ടോ; വിശദാംശം നല്‍കാമോ; ആയതിന്റെ എസ്റ്റിമേറ്റ് സമര്‍പ്പിച്ചിട്ടുണ്ടോ; ഉണ്ടെങ്കില്‍ പകർപ്പ് ലഭ്യമാക്കാമോ;

പ്രസ്തുത പ്രവൃത്തി ആരംഭിക്കുന്നതിന് എന്തെങ്കിലും തടസ്സങ്ങള്‍ നിലനില്‍ക്കുന്നുണ്ടോ; വിശദമാക്കാമോ;

പ്രസ്തുത പ്രവൃത്തി അടിയന്തരമായി ആരംഭിക്കുന്നതിനുള്ള നടപടികള്‍ സ്വീകരിക്കുമോ?

കുറ്റ്യാടി ഇറിഗേഷൻ പദ്ധതിയുടെ ഭാഗമായി നാദാപുരം നിയോജക മണ്ഡലത്തില്‍ റവന്യൂ-ഇറിഗേഷന്‍ വകുപ്പുകള്‍ നടത്തിയ സംയുക്ത സര്‍വ്വേ പൂര്‍ത്തീകരിച്ച് റിപ്പോര്‍ട്ട്‌ തയ്യാറാക്കിയിട്ടുണ്ടോ;

തൂണേരി-വേറ്റുമ്മല്‍-കായപ്പനച്ചി–ടെയില്‍ ഏന്‍ഡ്–കനാല്‍ പദ്ധതിക്ക് ഏറ്റെടുത്ത ഭൂമി അനധികൃതമായി കൈയ്യേറിയതായി ശ്രദ്ധയിൽപ്പെട്ടിട്ടുണ്ടോ;

ഉണ്ടെങ്കിൽ നാളിതുവരെ എന്തൊക്കെ നടപടികൾ സ്വീകരിച്ചിട്ടുണ്ടെന്ന് അറിയിക്കാമോ;

പദ്ധതി പൂർത്തീകരണത്തിന് ബജറ്റിൽ അനുവദിച്ച തുക വിനിയോഗിക്കുന്നതിന് സ്വീകരിച്ച നടപടി വിശദമാക്കാമോ?

മട്ടന്നൂര്‍ നിയോജക മണ്ഡലത്തില്‍ ഈ സര്‍ക്കാര്‍ അധികാരത്തില്‍ വന്നതിനുശേഷം ജലവിഭവ വകുപ്പ് മുഖേന ഭരണാനുമതി ലഭിച്ച പ്രവൃത്തികളുടെ വിശദാംശം ലഭ്യമാക്കാമോ?

കൊണ്ടോട്ടിയിലെ മൈനർ ഇറിഗേഷന്റെ സെക്ഷൻ ഓഫീസ് വളരെ അസൗകര്യം ഉള്ള വാടക കെട്ടിടത്തിൽ പ്രവർത്തിക്കുന്നതുകൊണ്ട് അത് മാറ്റി സ്ഥാപിക്കുന്നതിന് ഇതുവരെ സ്വീകരിച്ച നടപടികൾ എന്താണെന്ന് വ്യക്തമാക്കുമോ;

പ്രസ്തുത ഓഫീസ് കൊണ്ടോട്ടിയിലെ പി.ഡബ്ല്യു.ഡി. റോഡ് സെക്ഷൻ കോമ്പൗണ്ടിലുള്ള പഴയ കെട്ടിടത്തിലേക്ക് താൽക്കാലികമായി മാറ്റുന്നതിന് അപേക്ഷിച്ചിട്ടുള്ള ശിപാർശയിന്മേലും വാട്ടർ അതോറിറ്റിയുടെ കൊണ്ടോട്ടി ഓഫീസിലെ ഒഴിവുള്ള ഭാഗത്തേക്ക് മാറ്റുന്നതിന് അപേക്ഷിച്ചിട്ടുള്ള ശിപാർശയിന്മേലും ഇതുവരെ സ്വീകരിച്ച നടപടികൾ ഏത് ഘട്ടത്തിലാണെന്ന് വ്യക്തമാക്കുമോ?

തരൂര്‍ മണ്ഡലത്തില്‍ ഇറിഗേഷന്‍ കനാൽ സെക്ഷന്‍ മുഖേന എത്ര രൂപയുടെ പദ്ധതികളാണ് 2021 മുതല്‍ 2025 വരെ നടപ്പിലാക്കിയിട്ടുളളതെന്ന് (മംഗലം ഡാം-മലമ്പുഴ കനാൽ സെക്ഷനുകളില്‍) വ്യക്തമാക്കാമോ;

തരൂര്‍ മണ്ഡലത്തില്‍ 2016 മുതല്‍ 2020 വരെ എത്ര രൂപ കനാൽ വിഭാഗം പദ്ധതികള്‍ക്കായി വിനിയോഗിച്ചിട്ടുണ്ട്; വിശദമാക്കാമോ?

കാസര്‍ഗോഡ് ജില്ലയിലെ ഇടയിലക്കാട്, മാടക്കാല്‍ ബണ്ടുകളിലായി സ്വാഭാവിക ഒഴുക്ക് തടയുന്നത് മുലം ഉള്ള പരിസ്ഥിതി പ്രശ്നം പരിഹരിക്കാന്‍ ബണ്ടിനു പകരം പാലം എന്ന പദ്ധതിയുടെ നടപടി നിലവില്‍ ഏതുഘട്ടത്തിലാണെന്ന് വ്യക്തമാക്കാമോ?

കുറ്റ്യാടി നിയോജകമണ്ഡലത്തിലെ മാമ്പള്ളി തോട്, തിരുവള്ളൂര്‍ മഹാശിവക്ഷേത്രക്കുളം എന്നിവയുടെ പുനരുദ്ധാരണ പ്രവൃത്തികളുടെ പുരോഗതി വ്യക്തമാക്കാമോ;

പ്രസ്തുത പ്രവൃത്തികള്‍ എന്ന് പൂര്‍ത്തിയാക്കാനാകുമെന്ന് അറിയിക്കുമോ?

മങ്കട മണ്ഡലത്തിലെ ചെറുപുഴയ്ക്ക് കുറുകെയുള്ള ഉടുമ്പനാശ്ശേരി വി.സി.ബി. (വെന്റഡ് ക്രോസ് ബാർ) കം ബ്രിഡ്ജ് നിര്‍മ്മാണത്തിന്റെ ഡി.പി.ആര്‍.(ഡീറ്റൈൽഡ് പ്രോജക്ട് റിപ്പോർട്ട്)-ലെ അപാകത പരിഹരിച്ച് സമര്‍പ്പിക്കാൻ സൂപ്രണ്ടിംഗ് എഞ്ചിനീയര്‍ നിര്‍ദേശിച്ചതിനെ തുടർന്ന് എക്സിക്യൂട്ടീവ് എഞ്ചിനീയര്‍ അപ്രകാരം സമര്‍പ്പിച്ചിട്ടുണ്ടോ; ഇല്ലെങ്കില്‍ അടിയന്തരമായി സമര്‍പ്പിക്കുന്നതിന് നിര്‍ദേശിക്കുമോ; പ്രവൃത്തിയുടെ നിലവിലെ സ്ഥിതി അറിയിക്കുമോ;

ഡി.പി.ആര്‍. അംഗീകരിച്ച് പ്രസ്തുത പദ്ധതി ആരംഭിക്കുന്നതില്‍ അസാധാരണമായ കാലതാമസം ഉണ്ടായിട്ടുള്ളത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ബജറ്റ് പദ്ധതികള്‍ പോലും സമയബന്ധിതമായി നടപ്പിലാക്കുന്നതില്‍ ജലവിഭവ വകുപ്പ് കാണിക്കുന്ന ഗുരുതരമായ അലംഭാവം ആവര്‍ത്തിക്കാതിരിക്കാൻ നടപടി സ്വീകരിക്കുമോ;

ഉടുമ്പനാശ്ശേരി വി.സി.ബി. കം ബ്രിഡ്ജ് നിര്‍മ്മാണം എന്ന പ്രവൃത്തി എത്രയും വേഗം ആരംഭിക്കുന്നതിന് കര്‍ശന നിര്‍ദേശം നല്‍കുമോ?

സംസ്ഥാനത്തെ നദികള്‍ക്ക് ജലം നല്‍കുന്ന പശ്ചിമഘട്ട മലനിരകളിലെ ചെറുതും വലുതുമായി നിലനിന്നിരുന്ന നീരുറവകള്‍ ഓരോന്നായി അപ്രത്യക്ഷമാകുന്ന ഗുരുതര സ്ഥിതിവിശേഷം ശ്രദ്ധയില്‍പ്പെട്ടിട്ടുണ്ടോ;

കൊടുംവേനലില്‍ പോലും ജലസമ്പുഷ്ടമായിരുന്ന പ്രസ്തുത നീരുറവകള്‍ അപ്രത്യക്ഷമാകുന്നതിനുളള കാരണങ്ങളെക്കുറിച്ച് പഠനം നടത്തിയിട്ടുണ്ടോ;

നീരുറവകളെ പുനരുജ്ജീവിപ്പിക്കുന്നതുൾപ്പടെയുള്ള പരിഹാര നടപടികള്‍ സ്വീകരിക്കുമോ?

കേരളത്തില്‍ എത്ര കുഴല്‍ കിണറുകള്‍ ഉണ്ടെന്ന കണക്ക് ലഭ്യമാണോ; എങ്കില്‍ അവയുടെ എണ്ണം ജില്ല തിരിച്ച് വിശദമാക്കാമോ;

കുഴല്‍ കിണറുകള്‍ നിര്‍മ്മിക്കുന്നതിന് അനുമതി ലഭിക്കുന്നതിന് സ്വീകരിക്കേണ്ട നടപടികള്‍ വിശദമാക്കാമോ?

കുഴല്‍ കിണറുകൾ കുഴിക്കുന്ന യൂണിറ്റുകൾക്കും കമ്പനികൾക്കും രജിസ്ട്രേഷൻ നിർബന്ധമാക്കിയിട്ടുണ്ടോ; ഇതിലൂടെ അശാസ്ത്രീയമായ നിർമ്മാണ രീതികൾ പിന്തുടരുന്നവരെ നിയന്ത്രിക്കാൻ നടപടികള്‍ സ്വീകരിക്കുമോ;

സർക്കാർ അംഗീകാരമുള്ളതും രജിസ്റ്റർ ചെയ്തതുമായ കമ്പനികളുടെ (Rig owners) യന്ത്രങ്ങൾ മാത്രമേ കുഴൽക്കിണർ കുഴിക്കാൻ ഉപയോഗിക്കാവൂ എന്ന നിബന്ധന പരിശോധന വിധേയമാക്കാറുണ്ടോ ഇത് ഉറപ്പു വരുത്തുവാന്‍ നിലവില്‍ സ്വീകരിച്ചു വരുന്ന നടപടികള്‍ എന്തെല്ലാമാണെന്ന് വ്യക്തമാക്കാമോ;

സംസ്ഥാനത്തെ ഭൂഗർഭജല സ്രോതസ്സുകൾ ഡിജിറ്റലായി മാപ്പ് ചെയ്യാനും ഓരോ പ്രദേശത്തെയും ജലലഭ്യതയ്ക്കനുസരിച്ച് മാത്രം പുതിയ കിണറുകൾക്ക് അനുമതി നൽകാനും നടപടി സ്വീകരിക്കുമോ?

അരൂര്‍ മണ്ഡലത്തിലെ അഞ്ചുതുരുത്ത് പാലം, കോപ്പായി വല്യാറ പാലം എന്നിവയുടെ നിര്‍മ്മാണവുമായി ബന്ധപ്പെട്ട് പൊതുമരാമത്ത് പാലം വിഭാഗം ജലവിഭവ വകുപ്പിന്റെ നോ ഒബ്ജക്ഷൻ സർട്ടിഫിക്കറ്റ് ലഭിക്കുന്നതുമായി ബന്ധപ്പെട്ട് ജലവിഭവ വകുപ്പിന് നല്‍കിയ അപേക്ഷയില്‍ സ്വീകരിച്ച നടപടി വിശദമാക്കാമോ;

നിലവില്‍ പാലം നിര്‍മ്മാണത്തിന് ആവശ്യമായ ക്ലിയറന്‍സ് നല്‍കുന്നതുമായി ബന്ധപ്പെട്ട് ജലവിഭവ വകുപ്പില്‍ കാലതാമസം ഉണ്ടാകുന്നതിന്റെ കാരണം വിശദമാക്കാമോ?

സംസ്ഥാനത്ത് കഴിഞ്ഞ സർക്കാരിന്റെ കാലം മുതൽ നാളിതുവരെ ജലവിഭവ വകുപ്പിന്റെ പദ്ധതികളിൽ ക്രമക്കേട് നടന്നതായി കണ്ടെത്തിയിട്ടുണ്ടോ; എങ്കിൽ എത്ര കോടി രൂപയുടെ ക്രമക്കേട് നടന്നതായാണ് കണ്ടെത്തിയിട്ടുള്ളതെന്ന് വ്യക്തമാക്കുമോ;

ഏതൊക്കെ പദ്ധതികളിൽ എന്തെല്ലാം ക്രമക്കേട് നടന്നതായാണ് കണ്ടെത്തിയതെന്ന് വ്യക്തമാക്കുമോ?

മുൻ സർക്കാരിന്റെ കാലം മുതൽ നാളിതുവരെ ജലവിഭവ വകുപ്പിന്റെ കീഴിലുള്ള വിവിധ സ്ഥാപനങ്ങളിൽ കരാർ/ദിവസ വേതനാടിസ്ഥാനത്തിൽ എത്ര താൽക്കാലിക നിയമനങ്ങൾ നടത്തിയിട്ടുണ്ട്; വിശദാംശം സ്ഥാപനം തിരിച്ചു വ്യക്തമാക്കാമോ;

ഇതിൽ എത്ര നിയമനങ്ങളാണ് എംപ്ലോയ്‌മെന്റ് എക്സ്ചേഞ്ച് മുഖേന നടപ്പാക്കിയതെന്നും മറ്റു നിയമനങ്ങൾ നടത്തിയ ഏജൻസി ഏതാണെന്നും വ്യക്തമാക്കാമോ;

മേല്പറഞ്ഞ സ്ഥാപനങ്ങളിൽ പ്രസ്തുത കാലയളവിൽ എത്ര താൽക്കാലിക ജീവനക്കാരെ സ്ഥിരപ്പെടുത്തിയിട്ടുണ്ടെന്ന വിശദാംശം സ്ഥാപനം തിരിച്ചു ലഭ്യമാക്കാമോ?

സംസ്ഥാനത്തിന്റെ ഭാവി കുടിവെളള ആവശ്യകത കണക്കിലെടുത്ത് ദീർഘകാല ജലസുരക്ഷ ഉറപ്പാക്കുന്നതിനായി സർക്കാർ ആസൂത്രണം ചെയ്തിരിക്കുന്ന പുതിയ പദ്ധതികൾ എന്തെല്ലാമാണ്; വിശദമാക്കാമോ;

വേഗത്തിൽ വികസിച്ചുകൊണ്ടിരിക്കുന്ന നഗര പ്രദേശങ്ങളിൽ ഭാവിയിൽ ഉണ്ടാകാവുന്ന കുടിവെള്ള ക്ഷാമം ഒഴിവാക്കുന്നതിനായി പ്രത്യേക നഗര ജലസുരക്ഷാ പദ്ധതികൾ തയ്യാറാക്കിയിട്ടുണ്ടോ; വ്യക്തമാക്കാമോ;

നിലവിലെ വികസന പ്രവർത്തനങ്ങൾ ഭാവി തലമുറയുടെ ജലാവകാശത്തെ ബാധിക്കാതിരിക്കുവാൻ സ്വീകരിച്ച നയപരമായ സമീപനങ്ങൾ എന്തെല്ലാമാണ്; വിശദമാക്കാമോ?

ചാലക്കുടി നിയോജക മണ്ഡലത്തിലെ ജൽ ജീവന്‍ പദ്ധതിയുടെ പുരോഗതി വെളിപ്പെടുത്തുമോ;

ചാലക്കുടി മണ്ഡലത്തില്‍ നാളിതുവരെ ജൽ ജീവന്‍ പദ്ധതിയുടെ എത്ര ശതമാനം പൂര്‍ത്തീകരിക്കുവാന്‍ കഴിഞ്ഞിട്ടുണ്ട്; വിശദമാക്കുമോ?

ജലവിഭവ വകുപ്പ് മുഖേന ഈ സർക്കാർ അധികാരത്തിൽ വന്നശേഷം ഒറ്റപ്പാലം നഗരസഭയിൽ നടപ്പിലാക്കിയതും നടപ്പിലാക്കിക്കൊണ്ടിരിക്കുന്നതുമായ പ്രവൃത്തികൾ ഏതെല്ലാമെന്ന് വിശദമാക്കാമോ; അതിനായി അനുവദിച്ച തുകകൾ എത്രയെന്നും വിശദമാക്കാമോ?

അരൂര്‍ മണ്ഡലത്തില്‍ കോടംതുരുത്ത് പഞ്ചായത്തില്‍ ജലവിഭവ വകുപ്പ് നിര്‍വ്വഹണ ഏജന്‍സിയായി ബഡ്ജറ്റില്‍ 3 കോടി രൂപ അനുവദിച്ച നീണ്ടകര-കരുമാഞ്ചേരി പാലത്തിന്റെ നിര്‍മ്മാണം ഏത് ഘട്ടത്തിലാണെന്ന് വിശദമാക്കാമോ;

പ്രസ്തുത പാലത്തിന്റെ നിര്‍മ്മാണവുമായി ബന്ധപ്പെട്ട് സോയില്‍ ടെസ്റ്റ് നടത്തുന്നതിനായി ഫണ്ട് അനുവദിക്കുന്നതുമായി ബന്ധപ്പെട്ട് സമര്‍പ്പിച്ച അപേക്ഷയില്‍ സ്വീകരിച്ച നടപടി വിശദമാക്കാമോ?

കായംകുളം നഗരസഭയിൽ അമ‍ൃത് 2.0 പദ്ധതിയിൽ ഉൾപ്പെടുത്തി നിർമ്മിക്കുന്ന 15 ലക്ഷം ലിറ്റർ സംഭരണ ശേഷിയുളള ഓവർഹെഡ് ടാങ്കിന്റെ നിർമ്മാണ പ്രവർത്തനങ്ങൾ അനുമതി ലഭിച്ച് മാസങ്ങൾ കഴിഞ്ഞിട്ടും ആരംഭിക്കാൻ കഴിയാത്തത് ശ്രദ്ധയിൽപ്പെട്ടിട്ടുണ്ടോ; എങ്കിൽ ഇതിന്റെ കാരണങ്ങൾ വിശദമാക്കാമോ; സമയബന്ധിതമായി നിർമ്മാണ പ്രവർത്തനങ്ങൾ പൂർത്തീകരിക്കുന്നതിന് ആവശ്യമായ നടപടികൾ സ്വീകരിക്കുമോ?

ഈ സര്‍ക്കാര്‍ അധികാരത്തിൽ വന്നതിനു ശേഷം നാളിതുവരെ കല്ല്യാശ്ശേരി നിയോജക മണ്ഡലത്തില്‍ ജലവിഭവ വകുപ്പിന്റെ നേതൃത്വത്തില്‍ നടപ്പിലാക്കുന്ന പ്രവൃത്തികള്‍ വിശദമാക്കാമോ;

പ്രസ്തുത പദ്ധതികളില്‍ പൂര്‍ത്തിയായവ, പുരോഗമിക്കുന്നവ, ആരംഭിക്കുന്നവ, തുക സംബന്ധിച്ച വിശദാംശങ്ങള്‍ എന്നിങ്ങനെ പ്രത്യേകം തരം തിരിച്ച് വിവരങ്ങള്‍ അറിയിക്കാമോ?

പാലാ നിയോജക മണ്ഡലത്തിലെ പതിമൂന്നു് പഞ്ചായത്തുകളിലെ ജനങ്ങള്‍ക്ക് ഉപകാരപ്രദമായ രാമപുരം കുടിവെള്ള പദ്ധതിയുടെ നിലവിലെ സ്ഥിതി വ്യക്തമാക്കാമോ; പ്രസ്തുത പദ്ധതി നടപ്പിലാക്കുന്നതിനു് നിലവില്‍ തടസ്സങ്ങള്‍ ഉണ്ടോ; വിശദമാക്കാമോ?

പുതുപ്പള്ളി നിയോജകമണ്ഡലത്തിൽ ജൽ ജീവൻ മിഷൻ പദ്ധതിയുടെ പൈപ്പ് ലൈൻ സ്ഥാപിക്കുന്നതിനായി പൊതുമരാമത്ത് വകുപ്പിൽ നിന്നും വിവിധ പഞ്ചായത്തുകളിൽ നിന്നും ഏറ്റെടുത്ത ഏതൊക്കെ റോഡുകൾ പണിതീർത്ത് ഇനി തിരികെ നൽകാനുണ്ട് എന്നുള്ള വിവരങ്ങൾ അറിയിക്കാമോ; ഇപ്രകാരമുള്ള ഓരോ റോഡുകളും ഏറ്റെടുത്ത തീയതിയും ആയതിൽ ഇതുവരെ ചെയ്ത പ്രവൃത്തികളും വിശദമാക്കാമോ;

ഇപ്രകാരം വാട്ടർ അതോറിറ്റി ഏറ്റെടുത്ത റോഡുകളുടെ നിലവിലെ സ്ഥിതി എന്താണെന്നു വ്യക്തമാക്കാമോ; പ്രവൃത്തികൾ പൂർത്തീകരിച്ചിട്ടില്ലെങ്കിൽ അതിനുള്ള കാരണം വ്യക്തമാക്കാമോ; കൂടാതെ, പ്രവൃത്തികൾ എന്നത്തേക്ക് പൂർത്തീകരിക്കാനാവുമെന്ന് വ്യക്തമാക്കാമോ;

മൂന്നു വർഷത്തിലധികമായി വാട്ടർ അതോറിറ്റി ഏറ്റെടുത്ത് കൈവശം വച്ചിരിക്കുന്ന റോഡുകളുടെ ശോചനീയാവസ്ഥ കാരണം അപകടങ്ങൾ പതിവാകുന്നത് ശ്രദ്ധയിൽപ്പെട്ടിട്ടുണ്ടോ; ആയത് അടിയന്തരമായി പ്രവൃത്തികൾ പൂർത്തീകരിച്ച് തിരികെ പൊതുമരാമത്ത് വകുപ്പിന് കൈമാറുന്നതിനും കൈവശം സൂക്ഷിക്കുന്ന കാലയളവിൽ വാട്ടർ അതോറിറ്റിയുടെ തന്നെ ഫണ്ട് ഉപയോഗപ്പെടുത്തി അറ്റകുറ്റപ്പണികൾ ചെയ്യുന്നതിനും നടപടികൾ സ്വീകരിക്കുമോ?

വാമനപുരം മണ്ഡലത്തിലെ വിവിധ പ‍ഞ്ചായത്തുകളില്‍ സമ്പൂര്‍ണ കുടിവെള്ള ലഭ്യതയ്ക്കായി എന്തെല്ലാം പദ്ധതികള്‍ ജെ.ജെ.എം. (ജൽ ജീവൻ മിഷൻ) മുഖേന ആവിഷ്കരിച്ച് നടപ്പിലാക്കിയിട്ടുണ്ടെന്ന് പ‍ഞ്ചായത്ത് തിരിച്ച് വിവരം നല്‍കാമോ;

ഓരോ പദ്ധതിക്കുമായി അനുവദിച്ച തുകയും പദ്ധതിയുടെ തല്‍സ്ഥിതിയും വ്യക്തമാക്കാമോ;

വിവിധ പദ്ധതികള്‍ പ്രകാരം ഇതേവരെ നല്‍കിയ കുടിവെള്ള കണക്ഷനുകളുടെ എണ്ണവും നല്‍കാന്‍ അവശേഷിക്കുന്ന കുടിവെള്ള കണക്ഷനുകളുടെ എണ്ണവും പഞ്ചായത്ത് തിരിച്ച് വിശദമാക്കാമോ?

ജലസമൃദ്ധി നിലനിര്‍ത്തുവാന്‍ നടപ്പാക്കിയ പുതിയ കിണര്‍ നിര്‍മ്മാണ പദ്ധതികള്‍ എന്തെല്ലാം; വ്യക്തമാക്കാമോ;

ജല ശുദ്ധീകരണ പ്ലാന്റുകള്‍ വര്‍ദ്ധിപ്പിക്കുന്നതിലൂടെ കുടിവെള്ളത്തിന്റെ നിലവാരം ഉറപ്പാക്കുന്നതിന് സ്വീകരിച്ച നടപടികള്‍ വിശദമാക്കാമോ;

ജലസംരക്ഷണത്തിനും മഴവെള്ള ശേഖരണത്തിനുമായി ആരംഭിച്ച പ്രധാനപ്പെട്ട പദ്ധതികളുടെ പുരോഗതി വ്യക്തമാക്കാമോ?

കൊല്ലം നഗരത്തിലെ കുടിവെള്ള പ്രശ്നത്തിന് പരിഹാരമായി നടപ്പിലാക്കി വരുന്ന ഞാങ്കടവ് കുടിവെള്ള പദ്ധതിയുടെ പ്രവര്‍ത്തനങ്ങള്‍ എപ്രകാരമാണ് പുരോഗമിക്കുന്നത്; പദ്ധതി എപ്പോള്‍ പൂര്‍ത്തീകരിക്കാനാണ് ഉദ്ദേശിക്കുന്നത്; വിശദാംശം ലഭ്യമാക്കുമോ?

കടുത്ത വരള്‍ച്ചയെ തുടര്‍ന്ന് സംസ്ഥാനത്ത് അനുഭവപ്പെടുന്ന കുടിവെള്ളക്ഷാമം പരിഹരിക്കാന്‍ എന്തൊക്കെ നടപടി സ്വീകരിച്ചുവെന്ന് അറിയിക്കാമോ; ഇതിനായി എത്ര തുക അധികമായി ചെലവഴിച്ചു;

കുടിവെള്ളക്ഷാമത്തിന്റെ മറവില്‍ സ്വകാര്യ ടാങ്കര്‍ ലോറി ഉടമകള്‍ ജനങ്ങളെ ചൂഷണം ചെയ്യുന്നത് ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇക്കാര്യത്തില്‍ എന്തുനടപടി സ്വീകരിച്ചുവെന്നറിയിക്കുമോ;

ടാങ്കർ ലോറികൾ വഴി വിതരണം ചെയ്യുന്ന ജലം ശുദ്ധജല സ്രോതസ്സുകളിൽ നിന്നാണെന്ന് ഉറപ്പുവരുത്താൻ നിലവിൽ എന്ത് സംവിധാനമാണുള്ളത്; വ്യക്തമാക്കാമോ?

സംസ്ഥാനത്ത് മാരകമായ ജലജന്യ രോഗങ്ങളുടെ ഭീഷണി നിലനില്‍ക്കുന്ന സാഹചര്യത്തിൽ ജനങ്ങൾ പാലിക്കേണ്ട കുറ്റമറ്റ ജല ജാഗ്രത സംബന്ധിച്ച് വ്യാപക പ്രചരണം നടത്തേണ്ട സാഹചര്യം പരിശോധനാ വിധേയമാക്കിയിട്ടുണ്ടോ; വിശദീകരിക്കുമോ;

ജനങ്ങൾ വീട്ടാവശ്യത്തിനുവേണ്ടി ഉപയോഗപ്പെടുത്തുന്ന എല്ലാ ജലസ്രോതസ്സുകളിലും ജലസംഭരണികളിലും അപകടകാരികളായ രോഗാണുക്കളുടെ സാന്നിധ്യം ഇല്ലെന്നുറപ്പുവരുത്തുന്നതിനുവേണ്ടി ജല ഗുണനിലവാര പരിശോധന സൗകര്യങ്ങൾ വർദ്ധിപ്പിക്കേണ്ട സാഹചര്യം നിലവിലുണ്ടോ; വിശദീകരിക്കുമോ;

വിവിധ ആവശ്യങ്ങൾക്കായി ജനങ്ങൾ ജലം ശേഖരിക്കുന്ന ജലസ്രോതസ്സുകളായ കിണറുകളെയും കുളങ്ങളെയും തദ്ദേശസ്വയംഭരണ സ്ഥാപനങ്ങളുടെ സഹകരണത്തോടെ മാപ്പ് ചെയ്യുന്നതിന് ഉദ്ദേശിക്കുന്നുണ്ടോ; വിശദീകരിക്കുമോ;

സ്വകാര്യ ഏജൻസികൾ കുടിവെള്ളമായി വിതരണം ചെയ്യുന്ന ജലം കൂടുതൽ സുരക്ഷിതവും ഉപഭോക്താക്കളുടെ ആരോഗ്യത്തിന് ഹാനികരമല്ലാത്ത തരത്തിലുമുള്ളതുമാണെന്നും ഉറപ്പുവരുത്തുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളത്; വിശദമാക്കുമോ?

സംസ്ഥാനത്തിന്റെ പല ഭാഗങ്ങളിലും വാട്ടര്‍ അതോറിറ്റിയുടെ പൈപ്പ് ലൈന്‍ പൊട്ടി ജലവിതരണം തടസ്സപ്പെടുന്നത് ശ്രദ്ധയില്‍പ്പെട്ടിട്ടുണ്ടോ;

നിലവാരമില്ലാത്ത പൈപ്പുകള്‍ ഉപയോഗിക്കുന്നതാണ് നിരന്തരം പൈപ്പ് പൊട്ടാന്‍ കാരണമെന്ന് അതോറിറ്റിയുടെ വിജിലന്‍സ് വിഭാഗം കണ്ടെത്തിയിട്ടുണ്ടോ; ഇക്കാര്യത്തിൽ എന്തൊക്കെ തുടർ നടപടികൾ സ്വീകരിച്ചിട്ടുണ്ട്; വ്യക്തമാക്കുമോ;

ഇരുപത്തിനാല് മണിക്കൂറും മുടക്കമില്ലാതെ ഗുണനിലവാരമുള്ള ജലവിതരണത്തിന് ന‌ടപടി സ്വീകരിക്കാൻ തയ്യാറാകുമോ; വ്യക്തമാക്കുമോ?

സംസ്ഥാനത്തെ വാട്ടർ അതോറിറ്റിയുടെ, ഭൂമിക്കടിയിലൂടെ പോകുന്ന കുടിവെള്ള വിതരണ പൈപ്പുകൾ ഉപരിതലത്തിലെ മർദ്ദം താങ്ങാനാവാതെ പൊട്ടുന്നതുമൂലം അടിക്കടിയുണ്ടാകുന്ന ജലവിതരണ തടസ്സങ്ങളും റോഡുകൾ കുത്തിപ്പൊളിക്കുന്നത് മൂലമുള്ള സാമ്പത്തിക നഷ്ടവും കണക്കിലെടുത്ത് ബദൽ സംവിധാനം ആവിഷ്കരിക്കാൻ നടപടി സ്വീകരിക്കുമോ; വ്യക്തമാക്കുമോ;

സംസ്ഥാനത്തൊട്ടാകെയുള്ള, വാട്ടർ അതോറിറ്റിയുടെ കുടിവെള്ള വിതരണ സംവിധാനം ഭാവിയിലെ വികസന സാധ്യതകൾ കൂടി കണക്കിലെടുത്ത് പരിഷ്കരിക്കാൻ ആവശ്യമായ നടപടികൾ സ്വീകരിക്കുമോ; വ്യക്തമാക്കാമോ?

കാസര്‍ഗോഡ് നഗരത്തില്‍ അമൃത് പദ്ധതി പ്രവൃത്തികള്‍ എത്ര ശതമാനം പൂര്‍ത്തീകരിച്ചു എന്ന് വ്യക്തമാക്കാമോ;

കാസര്‍ഗോഡ് നഗരത്തിലെ എല്ലാ വാര്‍ഡുകളിലും അമൃത് പദ്ധതി നടപ്പിലാക്കുന്നുണ്ടോ എന്ന് വ്യക്തമാക്കാമോ;

അമൃത് പദ്ധതിക്ക് കാസര്‍ഗോഡ് നഗരത്തിന് ആവശ്യമായ തുക എത്രയാണെന്നും ആയത് എങ്ങനെ കണ്ടെത്തുമെന്നും വ്യക്തമാക്കാമോ;

അമൃത് പദ്ധതിയുടെ ഭാഗമായി കാസര്‍ഗോഡ് നഗരത്തില്‍ വെട്ടിപ്പൊളിച്ച റോഡുകള്‍ നന്നാക്കാന്‍ നടപടികള്‍ സ്വീകരിക്കുമോ എന്ന് വ്യക്തമാക്കാമോ?

പാറശ്ശാല മണ്ഡലത്തിലെ പാറശ്ശാല, വെള്ളറട എന്നീ ഗ്രാമപഞ്ചായത്തുകളില്‍ നിലനില്‍ക്കുന്ന കടുത്ത കുടിവെള്ളക്ഷാമം പരിഹരിക്കുന്നതിനായി സര്‍ക്കാര്‍ എന്തൊക്കെ തനത് പദ്ധതികളാണ് ആവിഷ്കരിച്ചിട്ടുള്ളതെന്ന് വിശദമാക്കാമോ;

പാറശ്ശാല പഞ്ചായത്തിലെ നിലവിലുള്ള വണ്ടിച്ചിറ കുടിവെള്ള പദ്ധതി വഴി പഞ്ചായത്തിന്റെ എല്ലാ വാര്‍ഡുകളിലും കുടിവെള്ളം എത്തിക്കാന്‍ കഴിയുന്നില്ല എന്ന പരാതി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതിന് പരിഹാരമായി പദ്ധതി നവീകരിക്കാനോ പുതിയ പദ്ധതികള്‍ നടപ്പിലാക്കാനോ നിര്‍ദ്ദേശമുണ്ടോ;

വെള്ളറട പഞ്ചായത്തിലെ മലയോര മേഖലകളിലെ കുടിവെള്ള ക്ഷാമം പരിഹരിക്കുന്നതിനായി ജലജീവന്‍ മിഷന്‍ വഴിയോ മറ്റ് പ്രത്യേക ഫണ്ടുകള്‍ വഴിയോ പുതിയ പദ്ധതികള്‍ അനുവദിച്ചിട്ടുണ്ടോ; ഉണ്ടെങ്കില്‍ അവയുടെ നിലവിലെ പുരോഗതിയും നീക്കിവച്ച തുകയും എത്രയെന്ന് അറിയിക്കാമോ; വണ്ടിച്ചിറ പദ്ധതിയുടെ ശേഷി വര്‍ദ്ധിപ്പിക്കുന്നതിനോ പൈപ്പ് ലൈനുകള്‍ വിപുലീകരിക്കുന്നതിനോ ആയി നിലവില്‍ ഏതെങ്കിലും ഭരണാനുമതി നല്‍കിയിട്ടുണ്ടോ; ഇല്ലെങ്കില്‍ ആയത് പരിഗണനയിലുണ്ടോ;

ജലജീവന്‍ മിഷന്‍ പദ്ധതിയില്‍ ഉള്‍പ്പെടുത്തി കുടിവെള്ള കണക്ഷനുകള്‍ നല്‍കുന്നതിനായും കേടായ പൈപ്പുലൈനുകള്‍ റിപ്പയര്‍ ചെയ്യുന്നതിനും വിവിധ പി.ഡബ്ള്യു.ഡി, പഞ്ചായത്ത് റോഡുകള്‍ വെട്ടിപ്പൊളിച്ചശേഷം അവ റിപ്പയര്‍ ചെയ്തു നല്‍കുന്നതിനുമുള്ള നടപടികള്‍ സ്വീകരിച്ചിട്ടുണ്ടോ; ആയതിന്റെ വിശദാംശം അറിയിക്കാമോ; ഇനിയും റിപ്പയര്‍ ചെയ്യാനുള്ള റോഡുകളുടെ പ്രവൃത്തി എന്നേക്ക് പൂര്‍ത്തിയാക്കാന്‍ കഴിയും എന്ന് അറിയിക്കാമോ?

വേനൽക്കാലം ആരംഭിച്ചതോടു കൂടി സംസ്ഥാനത്തിന്റെ പല ഭാഗത്തും കുടിവെളളക്ഷാമം അനുഭവപ്പെടുന്നത് പരിശോധിച്ചിട്ടുണ്ടോ; വ്യക്തമാക്കുമോ ;

ഈ ഭാഗങ്ങളിൽ കുടിവെളളം ലഭ്യമാക്കുന്നതിന് സ്വീകരിക്കാനുദ്ദേശിക്കുന്ന നടപടികൾ വ്യക്തമാക്കുമോ;

വേനൽകാലത്ത് ജല ലഭ്യത ഉറപ്പു വരുത്തുന്നതിന് എന്തെങ്കിലും ദീർഘകാല പദ്ധതി ആവിഷ്ക്കരിക്കാൻ ആലോചനയുണ്ടോ; വിശദാംശം നൽകുമോ?

തൃക്കരുവ-പനയം-മണ്‍ട്രോതുരുത്ത്-പെരിനാട് സമഗ്ര കുടിവെള്ള പദ്ധതിയുടെ നിര്‍വ്വഹണ പുരോഗതി അറിയിക്കുമോ; പദ്ധതിയുടെ ഭാഗമായി ഏതെല്ലാം ഘടക പ്രവര്‍ത്തനങ്ങളാണ് ആരംഭിച്ചിട്ടുള്ളതെന്നും ടെന്‍ഡര്‍ നടപടികള്‍ സ്വീകരിച്ചിട്ടുള്ളതെന്നുമുള്ള വിശദാംശം ലഭ്യമാക്കുമോ?

കുടിവെള്ള പദ്ധതികൾ മുഖേന ജലം ലഭിക്കുന്നു എന്നതിന് പുറമേ ജലഗുണനിലവാരം പരിശോധിക്കാൻ സര്‍ക്കാര്‍ കൊണ്ടുവന്ന പുതിയ മോണിറ്ററിംഗ് സംവിധാനങ്ങള്‍ എന്തെല്ലാമെന്ന് വിശദമാക്കാമോ;

കുടിവെള്ള വിതരണ ശൃംഖലയിൽ (പൈപ്പ് ലൈൻ) നടക്കുന്ന ജലനഷ്ടം (നോൺ റവന്യു വാട്ടർ) കുറയ്ക്കാൻ സ്വീകരിച്ച ശാസ്ത്രീയ നടപടികള്‍ എന്തൊക്കെയാണെന്ന് വിശദമാക്കുമോ;

സംസ്ഥാനത്ത് കുടിവെള്ളം ലഭ്യമാക്കുന്നതിന് പുറമെ അതിന്റെ ഗുണനിലവാരം സ്ഥിരമായി ഉറപ്പാക്കുന്നതിനായി സർക്കാർ നടപ്പാക്കുന്ന നിരീക്ഷണ സംവിധാനങ്ങള്‍ എന്തെല്ലാമാണെന്ന് അറിയിക്കാമോ?

2025-26 സാമ്പത്തിക വര്‍ഷം ബഡ്ജറ്റില്‍ പ്രഖ്യാപിച്ച വേമ്പനാട്ടുകായൽ സംരക്ഷണവുമായി ബന്ധപ്പെട്ട് അരൂര്‍ മണ്ഡലത്തിലെ വേമ്പനാട്ടുകായൽ പ്രദേശത്ത് ഡ്രഡ്ജിംഗ്, കല്ലുകെട്ട് മുതലായ പ്രവൃത്തികളുടെ എസ്റ്റിമേറ്റില്‍ സ്വീകരിച്ച നടപടി വിശദമാക്കാമോ;

പ്രസ്തുത പ്രവൃത്തിയുമായി ബന്ധപ്പെട്ട് സമര്‍പ്പിച്ച ഡി.പി.ആര്‍. നിലവില്‍ എവിടെയാണെന്നും ആയതിന് ഭരണാനുമതി ലഭിക്കാതിരിക്കാനുള്ള കാരണവും വിശദമാക്കാമോ?

കേരള വാട്ടർ അതോറിറ്റിയിലെ ഓവർസിയർ ഗ്രേഡ്-3 യിലേക്കുള്ള എത്ര ഒഴിവുകൾ നിലവിലുണ്ടെന്ന് വ്യക്തമാക്കാമോ;

വിവരാവകാശ നിയമ പ്രകാരം മറുപടി ലഭിച്ച വിവിധ ജില്ലകളിലെ ഓവർസിയർ ഗ്രേഡ്-3 തസ്തികയിലേക്കുള്ള 113 ൽ പരം ഒഴിവുകൾ പി. എസ്. സി. ക്ക് റിപ്പോർട്ട് ചെയ്തിട്ടില്ലായെന്ന വിവരം ശ്രദ്ധയിൽപ്പെട്ടിട്ടുണ്ടോ;

പ്രസ്തുത ഒഴിവുകൾ പി. എസ്. സി. ക്ക് റിപ്പോർട്ട് ചെയ്യുന്നതിനുള്ള സത്വര നടപടികൾ സ്വീകരിക്കുമോ; വിശദാംശം നൽകുമോ?

വാട്ടര്‍ അതോറിറ്റിക്ക് നിലവില്‍ കുടിശ്ശികയിനത്തില്‍ ലഭിക്കാനുളള തുകയുടെ വിശദാംശം തരംതിരിച്ച് വ്യക്തമാക്കാമോ;

വാട്ടര്‍ അതോറിറ്റിക്ക് എത്ര ലക്ഷം ഗാര്‍ഹിക പൈപ്പ് കണക്ഷനുകളാണുളളതെന്നും അതില്‍ പ്രവര്‍ത്തിക്കാത്ത മീറ്ററുകളുടെ എണ്ണം എത്രയെന്നും ഇതുമൂലം അതോറിറ്റിക്കുള്ള നഷ്ടം എത്രയെന്നും വ്യക്തമാക്കുമോ?

ജല അതോറിറ്റിയുടെ പ്രതിമാസ വൈദ്യുത ബിൽ അതതു മാസം തന്നെ അടയ്ക്കാൻ കഴിയുന്നുണ്ടോ;

വൈദ്യുത ചാർജ് ഇനത്തിലുളള ചെലവ് കുറയ്ക്കുന്നതിന് സൗരോർജ്ജ പദ്ധതി ആവിഷ്ക്കരിക്കാൻ ഉദ്ദേശിക്കുന്നുണ്ടോ;

ഇതിനായി പുതിയ കമ്പനി രൂപീകരിക്കാൻ തീരുമാനിച്ചിട്ടുണ്ടോ; വിശദാംശം നൽകാമോ?

2024-25, 2025-26 എന്നീ സാമ്പത്തിക വർഷങ്ങളിലെ കേന്ദ്രസർക്കാർ ബജറ്റിൽ ജലജീവൻ മിഷൻ പദ്ധതിയുടെ ബജറ്റ് വിഹിതമായി സംസ്ഥാനത്തിന് വകയിരുത്തിയ തുക സംബന്ധിച്ച വിശദാംശം നൽകാമോ;

പ്രസ്തുത വിഹിതത്തിൽ കേന്ദ്രസർക്കാർ ഓരോ സാമ്പത്തിക വർഷവും അനുവദിച്ച തുകയും ഇനി അനുവദിക്കാനുള്ള തുകയും സംബന്ധിച്ച വിശദാംശം ലഭ്യമാക്കുമോ;

പ്രസ്തുത വർഷങ്ങളിൽ കേന്ദ്രം ബജറ്റ് വിഹിതം പൂർണമായും അനുവദിക്കാത്തതിന്റെ കാരണം എന്താണെന്ന് വിശദമാക്കാമോ?

കായംകുളം മണ്ഡലത്തിൽ ജല്‍ജീവൻ മിഷൻ അമൃത് പദ്ധതി പ്രകാരം പൈപ്പുകൾ സ്ഥാപിച്ചശേഷം എത്രറോഡുകൾ പുനസ്ഥാപനം ചെയ്യാനുണ്ട് എന്നും അവ ഏതൊക്കെ എന്നും നഗരസഭ, പഞ്ചായത്തുകൾ തിരിച്ച് വിശദമാക്കാമോ; പ്രസ്തുത പ്രവൃത്തികൾ എന്നേക്ക് പൂർത്തീകരിക്കാൻ കഴിയും എന്നും വ്യക്തമാക്കാമോ?

ജലജീവൻ മിഷൻ, അമൃത് പദ്ധതി പ്രകാരം കായംകുളം മണ്ഡലത്തിൽ ഉൾപ്പെട്ട കായംകുളം നഗരസഭ, വിവിധ പഞ്ചായത്തുകൾ എന്നിവ വഴി അനുവദിച്ച വാട്ടർ കണക്ഷനുകളുടെ വിശദാംശങ്ങൾ ലഭ്യമാക്കാമോ?

ജൽജീവന്‍ മിഷന്‍ പദ്ധതിയുടെ ഭാഗമായി പുതുക്കാട് മണ്ഡലത്തിലെ മാട്ടുമലയില്‍ വാട്ടര്‍ടാങ്ക് നിര്‍മ്മിക്കുന്നതിനുള്ള നടപടികള്‍ ഇനിയും ആരംഭിയ്ക്കാത്തത് ശ്രദ്ധയില്‍പ്പെട്ടിട്ടുണ്ടോ;

നിര്‍മ്മാണം ആരംഭിക്കുന്നതിന് എന്തെങ്കിലും തടസ്സങ്ങള്‍ നിലനില്‍ക്കുന്നുണ്ടോ; എങ്കിൽ തടസ്സങ്ങള്‍ നീക്കി പദ്ധതിയുടെ നിര്‍മ്മാണം ആരംഭിയ്ക്കുന്നതിനാവശ്യമായ നടപടികള്‍ സ്വീകരിക്കുമോ?

പൂഞ്ഞാർ നിയോജക മണ്ഡലത്തിലെ ജലജീവന്‍ മിഷന്‍ പ്രവൃത്തികളുടെ പുരോഗതി സംബന്ധിച്ച വിശദാംശം പഞ്ചായത്ത് അടിസ്ഥാനത്തിൽ ലഭ്യമാക്കുമോ;

പ്രസ്തുത പ്രവൃത്തികള്‍ എപ്പോൾ പൂര്‍ത്തിയാക്കാനാകുമെന്ന് വിശദമാക്കാമോ?

മണലൂർ മണ്ഡലത്തിൽ വാട്ടർ അതോറിറ്റിയുടെ കീഴിൽ നിലവിൽ പുരോഗമിച്ച് വരുന്ന പ്രവ‍ൃത്തികൾ ഏതെല്ലാമാണ്; പ്രസ്തുത ഓരോ പ്രവൃത്തിയും ഏത് ഘട്ടത്തിലാണെന്നും ഇവ എന്നത്തേക്ക് പൂർത്തീകരിക്കാനാകുമെന്നും വ്യക്തമാക്കാമോ?

അരൂർ മണ്ഡലത്തിലെ കുടിവെളള പ്രശ്നം പരിഹരിക്കുന്നതിനായി തുറവൂർ-കുത്തിയതോട് പഞ്ചായത്തുകളിലെ പൈപ്പ്-ലൈൻ മാറ്റുന്നതുമായി ബന്ധപ്പെട്ട് 2023-24 ബഡ്ജറ്റിൽ അനുവദിച്ച തുകയുടെ ഭരണാനുമതി ലഭിച്ചോ എന്ന് വിശദമാക്കാമോ;

ടി പ്രവൃത്തിക്ക് ഭരണാനുമതി ലഭിക്കുന്നതിന് കാലതാമസം വരുന്നതിന്റെ കാരണം വിശദമാക്കാമോ?

നിലവിലെ സര്‍ക്കാര്‍ അധികാരത്തില്‍ വന്നതിനുശേഷം ആലത്തൂര്‍ മണ്ഡലത്തില്‍ ജലജീവന്‍ മിഷന്‍ മുഖേന നടപ്പിലാക്കുന്ന പദ്ധതികള്‍ ഏതെല്ലാമാണ്; പഞ്ചായത്ത് തിരിച്ചുള്ള വിവരം ലഭ്യമാക്കാമോ;

പ്രസ്തുത മണ്ഡലത്തിലെ ഓരോ പഞ്ചായത്തിലും എത്ര തുക വീതമാണ് പദ്ധതിക്ക് അനുവദിച്ചിട്ടുള്ളതെന്ന് വ്യക്തമാക്കാമോ?