സംസ്ഥാനത്ത് വ്യാപാര ഇടപാടുകള്‍ നടക്കുന്ന നോണ്‍ മേജര്‍ തുറമുഖങ്ങളുടെ അടിസ്ഥാന സൗകര്യ വികസനത്തിനും വ്യാപാര മേഖലയിലെ അവയുടെ സാദ്ധ്യത വിപുലീകരിക്കുന്നതിനും നടത്തുന്ന പ്രവര്‍ത്തനങ്ങള്‍ എന്തെല്ലാമാണ്; വിശദമാക്കുമോ;

മലബാറിലെ വ്യാവസായിക മേഖലയ്ക്ക് കുതിപ്പേകാന്‍ സാധ്യതയുള്ള അഴീക്കല്‍ തുറമുഖത്തെ ആധുനിക തുറമുഖമായി വികസിപ്പിക്കുന്നതിന് നടത്തിവരുന്ന പ്രവര്‍ത്തനങ്ങളുടെ പുരോഗതി അറിയിക്കാമോ;

എല്ലാ കാലാവസ്ഥയിലും പ്രവര്‍ത്തിക്കുന്ന തുറമുഖമായി പൊന്നാനി തുറമുഖം വികസിപ്പിക്കുന്നതിന് പി. പി. പി. മോഡലില്‍ നടന്ന് വരുന്ന പ്രവര്‍ത്തനത്തിന്റെ പുരോഗതി വിലയിരുത്തിയിട്ടുണ്ടോ; വിശദമാക്കുമോ?

സംസ്ഥാനത്ത് എല്ലാ കുട്ടികള്‍ക്കും ഡിജിറ്റല്‍ പഠനോപകരണങ്ങള്‍ ലഭ്യമാക്കിയിട്ടുണ്ടോ; എങ്കില്‍ വിശദാംശം നല്‍കുമോ;

പ്രസ്തുത പഠനോപകരണങ്ങള്‍ ലഭ്യമാക്കാന്‍ സ്പോൺസര്‍മാരെ കണ്ടെത്തുന്നതായ റിപ്പോര്‍ട്ടിന്റെ നിജസ്ഥിതി വെളിപ്പെടുത്തുമോ?

തുടർച്ചയായ രണ്ട് പ്രളയവും കോവിഡ് വ്യാപനവും മൂലം പ്രതിസന്ധിയിലായ വിനോദസഞ്ചാര മേഖലയുടെ പുനരുജ്ജീവനത്തിനായി കഴിഞ്ഞ സർക്കാർ സ്വീകരിച്ച നടപടികളുടെ തുടർച്ചയായി എന്തൊക്കെ പദ്ധതികളാണ് ആവിഷ്കരിച്ച് നടപ്പിലാക്കുവാൻ ഉദ്ദേശിക്കുന്നതെന്ന് വ്യക്തമാക്കാമോ;

കോവിഡ് മൂലം പ്രവർത്തനങ്ങൾ നിലച്ച ടൂറിസ്റ്റ് കേന്ദ്രങ്ങളിൽ ടൂറിസ്റ്റുകളുടെ വരവ് മുന്നിൽ കണ്ട് അടിസ്ഥാനസൗകര്യ വികസനം നടത്തുന്നതിന് ശ്രദ്ധ നൽകുമോയെന്ന് അറിയിക്കാമോ;

അടുത്ത രണ്ട് വർഷത്തേ​ക്കെങ്കിലും കോവിഡുമായി ജീവിച്ചു പോകേണ്ട സാഹചര്യം നിലനിൽക്കുന്നതിനാൽ ആയതുകൂടി പരിഗണിച്ചുകൊണ്ട് ടൂറിസത്തെ ഏതൊ​ക്കെ രീതിയിൽ ​പ്രോത്സാഹിപ്പിക്കാനാണ് ഉദ്ദേശിക്കുന്നതെന്ന് വിശദമാക്കാമോ;

കോവിഡ് ​പ്രോട്ടോക്കോൾ പാലിച്ചുകൊണ്ട് പരിമിതമായ രീതിയിൽ തീർത്ഥാടക ടൂറിസം സർക്യൂട്ട് ആരംഭിക്കുന്നതിന് ഉദ്ദേശിക്കുന്നുണ്ടോ; എങ്കിൽ വിശദാംശം നൽകാമോ;

ടൂറിസം ഡെസ്റ്റിനേഷനുകളുടെ സമഗ്രവും സുസ്ഥിരവും പരിസ്ഥിതി സൗഹാർദപരവുമായ വികസനത്തിനുവേണ്ടിയുള്ള മാസ്റ്റർ പ്ലാനുകളുടെ നടത്തിപ്പ് ഏത് ഘട്ടത്തിലാണെന്ന് വ്യക്തമാക്കാമോ?

ഗുണമേന്മയുള്ള വിദ്യാഭ്യാസം കുട്ടികളുടെ അവകാശമെന്ന പ്രഖ്യാപിത നിലപാട് യാഥാര്‍ത്ഥ്യമാക്കാന്‍ അധ്യാപന ഗുണനിലവാരം ഉയര്‍ത്തേണ്ടതിന്റെ പ്രാധാന്യം കണക്കിലെടുത്ത് നടത്തുന്ന പ്രവ‍ര്‍ത്തനങ്ങള്‍ എന്തൊക്കെയെന്ന് അറിയിക്കാമോ;

അധ്യാപകര്‍ക്കായുള്ള പരിശീലന പരിപാടികളും നവീകരണ പരിശീലനവും കാലികമായി നവീകരിക്കാനും കാര്യക്ഷമമാക്കാനും പരിപാടിയുണ്ടോ;

പൊതു വിദ്യാഭ്യാസ വകുപ്പിന് കീഴിലുള്ള അധ്യാപക ഒഴിവുകള്‍ നികത്തുന്നതിന് സ്വീകരിച്ച നടപടികള്‍ അറിയിക്കുമോ?

സംസ്ഥാനത്ത് പൊതുവിദ്യാഭ്യാസമേഖലയിലെ അടിസ്ഥാനസൗകര്യ വികസനത്തിന്റെ കരുത്തില്‍ വിദ്യാഭ്യാസത്തിന്റെ ഗുണനിലവാരം ലോകോത്തരമാക്കുന്നതിന് പരിപാടിയുണ്ടോ; വിശദമാക്കുമോ;

ഓരോ പഠിതാവിന്റെയും ശേഷിയും പ്രതിഭയും കണ്ടെത്തി വികസിപ്പിക്കുന്ന തരത്തില്‍ വിദ്യാഭ്യാസരീതിയെ പരിവര്‍ത്തനം നടത്താനായിട്ടുണ്ടോ;

ഗ്രേഡ് നിര്‍ണയത്തില്‍ പാഠപുസ്തകങ്ങളിലെ അറിവ് സ്വായത്തമാക്കിയത് പകര്‍ത്തുന്നതാണ് പ്രധാനമെന്നതിനാല്‍ പരീക്ഷാസമ്പ്രദായത്തില്‍ ഉചിതമായ മാറ്റം വരുത്തേണ്ടതിന്റെ ആവശ്യകത സംബന്ധിച്ച് പഠനം നടത്തിയിട്ടുണ്ടോ; വിശദമാക്കുമോ?

സംസ്ഥാനത്ത് കോവിഡ് വ്യാപനത്തിന്റെ പശ്ചാത്തലത്തില്‍ അടച്ചിട്ട ടൂറിസം കേന്ദ്രങ്ങള്‍ തുറന്ന് പ്രവര്‍ത്തിപ്പിക്കാന്‍ തീരുമാനിച്ചിട്ടുണ്ടോ; എങ്കിൽ ഇതിനായി എന്തെല്ലാം മുന്‍കരുതലാണ് കൈക്കൊണ്ടുവരുന്നതെന്ന് വ്യക്തമാക്കാമോ;

ടൂറിസം കേന്ദ്രങ്ങളില്‍ സമ്പൂര്‍ണ്ണ വാക്സിനേഷന്‍ പദ്ധതി നടപ്പാക്കുന്നതിനായി ഏതെല്ലാം ടൂറിസം കേന്ദ്രങ്ങളാണ് തെരഞ്ഞെടുക്കപ്പെട്ടിട്ടുള്ളതെന്ന് അറിയിക്കുമോ;

ടൂറിസം കേന്ദ്രങ്ങള്‍ തുറക്കുന്നത് സംബന്ധിച്ച തീരുമാനം എന്തെല്ലാം നിബന്ധനകളുടെ അടിസ്ഥാനത്തിലാണ് എടുത്തിട്ടുള്ളതെന്നും പ്രസ്തുത തീരുമാനങ്ങള്‍ പാലിക്കപ്പെടുന്നുണ്ടെന്ന് ഉറപ്പുവരുത്തുന്നതിന് എന്തെല്ലാം മാര്‍ഗ്ഗങ്ങള്‍ സ്വീകരിച്ചിട്ടുണ്ടെന്നും അറിയിക്കാമോ?

സംസ്ഥാനത്ത് സ്കൂള്‍ പാഠ്യപദ്ധതി രൂപീകരിക്കുന്നതിന് ചുമതലപ്പെട്ട ഏജന്‍സി ഏതാണെന്ന് അറിയിയ്ക്കാമോ; പാഠ്യ പദ്ധതി രൂപീകരണത്തിന്റെ പ്രക്രിയ വിശദമാക്കാമോ;

പാഠ്യ പദ്ധതി രൂപീകരണം സര്‍ക്കാരിന്റെ സ്വതന്ത്രമായ ചുമതലയില്‍ നടത്തുന്നതിന് നിലവില്‍ തടസ്സങ്ങളുണ്ടോ; എങ്കില്‍ എന്താണെന്ന് വ്യക്തമാക്കാമോ;

പാഠ്യ പദ്ധതി നടപ്പാക്കുന്നതിന് കേന്ദ്രസര്‍ക്കാര്‍ ഏതെങ്കിലും നിര്‍ദ്ദേശം നല്‍കിയിട്ടുണ്ടെങ്കില്‍ അത് സംസ്ഥാനത്തെ വിദ്യാഭ്യാസത്തിന്റെ ജനാധിപത്യ ഉള്ളടക്കത്തെ എങ്ങിനെ ബാധിക്കുമെന്ന് വ്യക്തമാക്കാമോ?

സംസ്ഥാനത്ത് റവന്യൂ ഭൂമി കയ്യേറ്റം അവസാനിപ്പിക്കുന്നതിനും അര്‍ഹരായവരുടെ കൈവശ ഭൂമിക്ക് രേഖ നല്‍കുന്നതിനും സ്വീകരിച്ചുവരുന്ന നടപടികള്‍ എന്തെല്ലാമാണെന്ന് അറിയിക്കാമോ;

പട്ടയ വിതരണത്തില്‍ ഉണ്ടാകുന്ന കാലതാമസം ഒഴിവാക്കുന്നതിന് നടപടിക്രമങ്ങള്‍ സുതാര്യവും കാര്യക്ഷമവുമാക്കുന്നതിനുവേണ്ട ഇടപെടല്‍ ഉണ്ടാകുമോയെന്ന് വെളിപ്പെടുത്താമോ;

ലാന്‍ഡ് ട്രിബ്യൂണലുകളില്‍ കേസ്സുകള്‍ വര്‍ഷങ്ങളായി കെട്ടിക്കിടക്കുന്നത് പരിഹരിക്കാന്‍ നടപടി സ്വീകരിക്കുമോ?

സംസ്ഥാനത്തെ റോഡുകളുടെ സ്ഥിതി മോശമാകാനുള്ള പ്രധാന കാരണങ്ങൾ കാലാവസ്ഥയും ജലനിര്‍ഗ്ഗമനചാലുകളുടെ അപര്യാപ്തതയും ആയതിനാല്‍ ഉചിതമായ നിര്‍മ്മാണസാമഗ്രികളും നിര്‍മ്മാണ സാങ്കേതികവിദ്യയും പ്രയോഗിക്കുന്നതിന് പ്രത്യേകം ശ്രദ്ധപതിപ്പിക്കുന്നുണ്ടോ; എങ്കിൽ വ്യക്തമാക്കുമോ;

നൂതന നിര്‍മ്മാണരീതികളെക്കുറിച്ചും നിര്‍മ്മാണസാമഗ്രികളെക്കുറിച്ചും മനസ്സിലാക്കുന്നതിന് കരാറുകാര്‍ക്കും ഉദ്യോഗസ്ഥര്‍ക്കും പരിശീലനം ഏര്‍പ്പെടുത്താന്‍ ഉദ്ദേശിക്കുന്നുണ്ടോ;

സംസ്ഥാനത്തെ ഹെെവേ റിസര്‍ച്ച് ഇന്‍സ്റ്റിറ്റ്യൂട്ട് നടത്തുന്ന പ്രവര്‍ത്തനങ്ങളെക്കുറിച്ച് വിശദമാക്കാമോ?

സംസ്ഥാനത്ത് എസ്. എസ്. എൽ. സി. യ്ക്ക് ശേഷം പ്ലസ് വൺ പ്രവേശനം ലഭിക്കാത്ത വിദ്യാർത്ഥികൾ ഉപരിപഠനത്തിനായി ഏറെയും ആശ്രയിക്കുന്നത് ഐ. ടി. ഐ. കളെ ആണെന്ന കാര്യം കണക്കിലെടുത്ത് കൂടുതല്‍ ഐ. ടി. ഐ. കൾ ആരംഭിക്കുന്നതിനെക്കുറിച്ച് ആലോചിക്കുമോ;

എല്ലാ നിയമസഭാ മണ്ഡലങ്ങളിലും ഐ. ടി. ഐ. കൾ പ്രവർത്തിക്കുന്നുണ്ടോ;

ഒരു ബ്ലോക്ക് പഞ്ചായത്ത് പരിധിയിൽ ഒന്ന് എന്ന തരത്തിൽ ഐ. ടി. ഐ. കൾ ആരംഭിക്കുന്ന കാര്യം ആലോചിക്കുമോ?

സംസ്ഥാനത്ത് നദികളില്‍ നിന്നുള്ള മണല്‍ വാരല്‍ നിരോധിച്ചിട്ടുണ്ടോ;

2018-ലെ അതിതീവ്ര പ്രളയത്തില്‍ നദികളില്‍ വന്‍ തോതില്‍ അടിഞ്ഞ മണ്ണും മണലും നീക്കാന്‍ കഴിയാത്ത സാഹചര്യമുണ്ടോ; എങ്കില്‍ ഇത് നദികളുടെയും ജലാശയങ്ങളുടെയും ജല വാഹക ശേഷി കുറയ്ക്കുന്നത് പരിഹരിക്കാന്‍ നടപടി സ്വീകരിക്കുമോ;

ഏതെല്ലാം നദികളുടെ സാന്‍ഡ് ഓഡിറ്റ് റിപ്പോര്‍ട്ട് ലഭ്യമായിട്ടുണ്ട്; റിപ്പോര്‍ട്ടിന്റെ അടിസ്ഥാനത്തില്‍ നിയന്ത്രിത രീതിയില്‍ മണല്‍ മാറ്റാന്‍ അനുമതി നല്‍കാന്‍ ഉദ്ദേശിക്കുന്നുണ്ടോ;

നദതീര സംരക്ഷണത്തിനായി റവന്യൂ വകുപ്പ് നടത്തുന്ന പ്രവര്‍ത്തനങ്ങള്‍ അറിയിക്കാമോ?

തിരുവനന്തപുരം-പാരിപ്പള്ളി റിംഗ് റോഡ് പോലുള്ള വന്‍കിട പദ്ധതികള്‍ വിഭാവനം ചെയ്ത് മുന്നോട്ടുപോകുകയും തീരദേശ-മലയോര ഹൈവേകള്‍ പോലുള്ള ബൃഹദ് പദ്ധതികള്‍ നിര്‍വ്വഹണ ഘട്ടത്തില്‍ ആയിരിക്കുകയും ചെയ്യുന്ന പശ്ചാത്തലത്തില്‍ ഇത്തരം പദ്ധതികള്‍ സമയബന്ധിതമായി പൂര്‍ത്തിയാക്കുന്നുവെന്നുറപ്പ് വരുത്താന്‍ പൊതുമരാമത്ത് വകുപ്പിന്റെ പ്രവര്‍ത്തനങ്ങള്‍ ശാക്തീകരിക്കുന്നതിന് സ്വീകരിക്കാന്‍ ഉദ്ദേശിക്കുന്ന നവീകരണ, വിപുലീകരണ പ്രവര്‍ത്തനങ്ങള്‍ എന്തെല്ലാമാണ്;

റോഡ് ഡിസൈനിംഗ് വിംഗ് ആധുനികീകരിക്കാന്‍ നടപടിയെടുത്തിട്ടുണ്ടോ;

നിരത്തുനിര്‍മ്മാണത്തിന് പ്രയോജനപ്പെടുത്തുന്ന നവീന സാങ്കേതിക വിദ്യകള്‍ എന്തെല്ലാമാണെന്ന് വ്യക്തമാക്കാമോ?

സംസ്ഥാനത്ത് ശാസ്ത്രവിഷയങ്ങളിൽ അഭിരുചിയുള്ള വിദ്യാർത്ഥികൾക്ക് ആവശ്യമായ പഠനസൗകര്യങ്ങൾ ഉറപ്പുവരുത്തേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ;

പൊതു വിദ്യാഭ്യാസരംഗത്ത് ശാസ്ത്രാദ്ധ്യയനം പ്രോത്സാഹിപ്പിക്കുന്നതിന് സ്വീകരിച്ച നടപടികൾ വ്യക്തമാക്കാമോ;

ശാസ്ത്രവിഷയങ്ങളിൽ അഭിരുചിയുള്ള വിദ്യാർത്ഥികളുടെ കഴിവുകൾ പ്രോത്സാഹിപ്പിക്കുന്നതിന് എന്തെല്ലാം പരിപാടികളാണ് പരിഗണനയിലുള്ളത്; വ്യക്തമാക്കാമോ;

ശാസ്ത്രമേഖലയിലെ പുതിയ കണ്ടെത്തലുകൾ അവയുടെ ആധികാരികത ഉറപ്പിച്ച് വിദ്യാർത്ഥികളിലേക്ക് എത്തിക്കുന്നതിന് എന്തെല്ലാം മാർഗ്ഗങ്ങളാണ് സർക്കാർ തലത്തിലുള്ളത്; വിശദമാക്കുമോ?

സംസ്ഥാനത്തെ റീസര്‍വ്വേ നടപടികള്‍ സമയബന്ധിതമായി പൂര്‍ത്തീകരിക്കുന്നതിന് ഡിജിറ്റല്‍ സാങ്കേതിക വിദ്യ ഉപയോഗപ്പെടുത്തുവാൻ ഉദ്ദേശിക്കുന്നുണ്ടോ;

എങ്കില്‍ ഇതുസംബന്ധിച്ച് എന്തെങ്കിലും പഠനം നടത്തിയിട്ടുണ്ടോയെന്ന് വ്യക്തമാക്കാമോ;

റീസര്‍വ്വേ നടപടികള്‍ എന്നത്തേക്ക് പൂര്‍ത്തീകരിക്കാൻ കഴിയുമെന്ന് വിശദമാക്കുമോ?

കോവിഡ് 19 മഹാമാരിക്കാലത്ത് സ്കൂളുകളില്‍ നിയമനങ്ങള്‍ നടത്തുന്നതിന് നിയമപരമായ തടസ്സം നിലവിലുണ്ടോ; എങ്കിൽ തടസ്സം എന്താണെന്ന് വിശദമാക്കാമോ;

പ്രസ്തുത തടസ്സം നീക്കുന്നതിന് തീരുമാനമായിട്ടുണ്ടോ; ഇതുവഴി എത്ര അദ്ധ്യാപകര്‍ക്ക് പുതിയതായി നിയമനം നല്‍കാന്‍ കഴിയുമെന്ന് വ്യക്തമാക്കാമോ;

കേന്ദ്ര വിദ്യാഭ്യാസ മന്ത്രാലയത്തിന്റെ ഗ്രേഡിംഗ് സൂചികകളില്‍ കേരളത്തിന്റെ സ്ഥാനം എന്താണെന്ന് അറിയിക്കാമോ; ഇതിനടിസ്ഥാനമായ മാനദണ്ഡങ്ങള്‍ എന്തൊക്കെയെന്ന് വ്യക്തമാക്കാമോ?

കോവിഡ് ലോക്ക്ഡൗൺ കാരണം വിദ്യാഭ്യാസം വീടുകളിലേക്ക് ചുരുങ്ങിയതിനാല്‍ വിദ്യാർത്ഥികളിൽ മാനസിക പ്രശ്നങ്ങൾ കൂടിവരുന്നതായി ശ്രദ്ധയിൽപ്പെട്ടിട്ടുണ്ടോ;

എങ്കിൽ ഇത് പരിഹരിക്കാൻ സ്കൂൾ തലങ്ങളിൽ എന്തൊക്കെ നടപടികളാണ് സ്വീകരിച്ചിരിക്കുന്നതെന്നും പുതുതായി എന്തൊക്കെ നടപടികളാണ് സ്വീകരിക്കാൻ ഉദ്ദേശിക്കുന്നതെന്നും വ്യക്തമാക്കാമോ;

കുട്ടികളിൽ മാനസിക സമ്മർദ്ദം ലഘൂകരിക്കാൻ പാഠ്യപദ്ധതിക്കൊപ്പം മാനസികാരോഗ്യം ഉറപ്പുവരുത്തുന്നതിന് എന്തെങ്കിലും നടപടികൾ സ്വീകരിച്ചിട്ടുണ്ടോ; വിശദാംശങ്ങൾ നൽകാമോ?

സംസ്ഥാനത്ത് വില്ലേജ് ഓഫീസുകളുടെ നവീകരണത്തിനായി നടപ്പിലാക്കി വരുന്ന പദ്ധതികള്‍ എന്തൊക്കെയെന്ന് വിശദമാക്കുമോ;

കാലപ്പഴക്കം നിമിത്തം ജീര്‍ണ്ണിച്ച വില്ലേജ് ഓഫീസ് കെട്ടിടങ്ങള്‍ പുനര്‍ നിര്‍മ്മിക്കുന്നതിനുള്ള പദ്ധതിയുടെ പുരോഗതി സംബന്ധിച്ച വിശദാംശങ്ങള്‍ അറിയിക്കുമോ?

സംസ്ഥാനത്തെ പത്താം ക്ലാസ്സ് പൊതുപരീക്ഷയില്‍ ഉന്നതവിജയം കൈവരിക്കാനായതിന്റെ തുടര്‍ച്ച ഉറപ്പാക്കന്നതിന് ഹയര്‍സെക്കന്ററി മേഖലയില്‍ ഉപരിപഠനത്തിന് എല്ലാവര്‍ക്കും അവസരം ഒരുക്കാന്‍ വേണ്ട സൗകര്യം ഏര്‍പ്പെടുത്തുമോ;

അദ്ധ്യാപക-വിദ്യാര്‍ത്ഥി ആശയവിനിമയം വേണ്ടത്രയില്ലാതെയാണ് പത്താംക്ലാസില്‍ പഠനം നടത്തിയതെന്ന് ആക്ഷേപം ഉയ‍ർന്നിട്ടുണ്ടോ; എങ്കില്‍ ഇതുകൊണ്ടുണ്ടാകാനിടയുള്ള പോരായ്മ പരിഹരിക്കാന്‍ പരിപാടി ആവിഷ്കരിക്കുമോ;

സ്കൂള്‍ അക്കാദമിക മാസ്റ്റര്‍ പ്ലാനില്‍ എന്തെല്ലാം കാര്യങ്ങളാണ് ഉള്‍പ്പെടുത്തിയിട്ടുള്ളതെന്ന് അറിയിക്കാമോ?

സംസ്ഥാനത്ത് റവന്യൂ വകുപ്പിന് കീഴില്‍ നടന്നുവരുന്ന പ്രവര്‍ത്തനങ്ങള്‍ വകുപ്പ് മന്ത്രിയുടെ അദ്ധ്യക്ഷതയില്‍ ചേര്‍ന്ന ഉന്നതതലയോഗത്തില്‍ വിലയിരുത്തിയിട്ടുണ്ടോ; എങ്കില്‍ വിശദമാക്കാമോ;

റവന്യൂ വകുപ്പ് നല്‍കുന്ന സേവനങ്ങള്‍ ആധുനികവല്‍ക്കരിക്കുന്നതിനും കാര്യക്ഷമമാക്കുന്നതിനും എന്തെല്ലാം നടപടികളാണ് സ്വീകരിച്ചിട്ടുള്ളത്;

റവന്യൂ ഇന്‍ഫര്‍മേഷന്‍ ബ്യൂറോ, റവന്യൂ ബുള്ളറ്റിന്‍, റവന്യൂ കോള്‍സെന്റര്‍ എന്നിവ നടപ്പിലാക്കാൻ തീരുമാനിച്ചിട്ടുണ്ടോ;

പൊതുജനങ്ങള്‍ക്ക് സേവനങ്ങള്‍ ലളിതമായ മാര്‍ഗ്ഗത്തിലൂടെ ലഭ്യമാക്കുന്നതിന് ആവശ്യമായ നടപടികള്‍ സ്വീകരിക്കാന്‍ നിര്‍ദ്ദേശം നല്‍കിയിട്ടുണ്ടോ?

പരമ്പരാഗത മേഖലയിലെ തൊഴിലാളികളുടെ ക്ഷേമം ഉറപ്പുവരുത്തുന്നതിന് സ്വീകരിച്ചുവരുന്ന നടപടികൾ വിശദമാക്കുമോ;

പ്രസ്തുത മേഖലയിലെ തൊഴിലാളികൾക്കുള്ള ക്ഷേമ പദ്ധതികൾ വിപുലീകരിക്കുന്നതിനെക്കുറിച്ച് ആലോചിക്കുന്നുണ്ടോ; വ്യക്തമാക്കാമോ;

പ്രസ്തുത മേഖലയിലെ തൊഴിലാളികൾക്കായി കേന്ദ്ര സഹായ പദ്ധതികൾ നിലവിലുണ്ടോ; എങ്കിൽ വ്യക്തമാക്കാമോ;

കോവിഡ് കാലത്ത് പ്രതിസന്ധിയിലായ പ്രസ്തുത മേഖലയിലെ തൊഴിലാളികളെ സംരക്ഷിക്കുന്നതിന് എന്തെല്ലാം സാമ്പത്തിക സഹായങ്ങൾ നൽകിയിട്ടുണ്ട്; വിശദമാക്കുമോ?

സംസ്ഥാനത്ത് അസംഘടിത മേഖലയിലെ തൊഴിലാളികൾക്ക് സാമൂഹ്യ സുരക്ഷ ഒരുക്കുന്ന കാര്യത്തിൽ സ്വീകരിച്ച നടപടികൾ വ്യക്തമാക്കാമോ;

ഈ മേഖലയിലെ തൊഴിലാളികൾക്ക് സാമൂഹ്യ സുരക്ഷ ഉറപ്പുവരുത്തുന്നതിന് എന്തെല്ലാം പദ്ധതികളാണ് നിലവിലുള്ളത്; വ്യക്തമാക്കാമോ;

പ്രസ്തുത മേഖലയിലെ തൊഴിലാളികൾക്ക് സാമൂഹ്യ സുരക്ഷ ഉറപ്പുവരുത്താൻ കേന്ദ്ര സഹായ പദ്ധതികൾ നിലവിലുണ്ടോ; വ്യക്തമാക്കാമോ;

കൊവിഡ് കാലത്ത് ഈ മേഖലയിലെ തൊഴിലാളികൾക്ക് സഹായം ലഭ്യമാക്കുന്നതിന് സ്വീകരിച്ച നടപടികൾ വിശദമാക്കുമോ?

രാജ്യത്ത് നിലവിലുണ്ടായിരുന്ന തൊഴില്‍ നിയമങ്ങള്‍ക്ക് പകരം തൊഴില്‍ കോഡ് നടപ്പിലാക്കുകയും അതില്‍ തൊഴിലാളികളുടെ അവകാശങ്ങള്‍ കവര്‍ന്നെടുക്കാനുള്ള വ്യവസ്ഥകള്‍ ഉള്‍പ്പെടുത്തുകയും ചെയ്തത് തൊഴിലാളികളുടെ ക്ഷേമത്തിനും തൊഴില്‍ സുരക്ഷിതത്വത്തിനും പ്രതികൂലമായതിനാല്‍ സംസ്ഥാനത്ത് തൊഴിലാളിക്ഷേമവും തൊഴിലവകാശങ്ങളും ഉറപ്പുവരുത്താന്‍ നടത്തുന്ന പ്രവര്‍ത്തനങ്ങളെക്കുറിച്ച് അറിയിക്കാമോ;

സംസ്ഥാനത്തെ ജീവിത നിലവാരം കൂടി കണക്കിലെടുത്ത് തൊഴിലാളികൾക്ക് രാജ്യത്തെ ഏറ്റവും ഉയര്‍ന്ന നിരക്കിലുള്ള മിനിമം വേതനം ലഭ്യമാക്കാനായിട്ടുണ്ടോ; തൊഴിലുടമകള്‍ ഇത് കൃത്യമായി പാലിക്കുന്നുവെന്ന് ഉറപ്പുവരുത്താന്‍ ഏര്‍പ്പെടുത്തിയിട്ടുള്ള ക്രമീകരണങ്ങള്‍ എന്തെല്ലാമാണെന്ന് അറിയിക്കുമോ?

സംസ്ഥാനത്തെ പൊതുവിദ്യാലയങ്ങളിൽ ഓൺലൈന്‍ ക്ലാസുകൾ നടത്തുന്നതിന് ഗൂഗിൾ ജി സ്യൂട്ട് പ്ലാറ്റ്ഫോം ഉപയോഗിക്കുന്നതിന് സർക്കാർ തീരുമാനിച്ചിട്ടുണ്ടോ;

എങ്കില്‍ ഇതിനായി ഗൂഗിൾ ജി സ്യൂട്ട് സേവനങ്ങൾ സൗജന്യമായാണോ നൽകുന്നതെന്ന് വ്യക്തമാക്കാമോ;

ഗൂഗിൾ ജീ സ്യൂട്ട് പ്ലാറ്റ്ഫോം ഉപയോഗിക്കുമ്പോൾ കുട്ടികളുടെയും അധ്യാപകരുടെയും എന്തൊക്കെ വിവരങ്ങളാണ് ഗൂഗിളുമായി പങ്കുവയ്ക്കേണ്ടി വരുന്നതെന്ന് വിശദമാക്കാമോ;

റെക്കോർഡ് ചെയ്യപ്പെടുന്ന ക്ലാസ്സുകളും വ്യക്തിഗത വിവരങ്ങളും ഉൾപ്പെടെയുള്ള വിവരങ്ങൾ സൂക്ഷിക്കുന്ന സെർവ്വറുകൾ ഇന്ത്യയിൽ തന്നെ ഉള്ളവയാണോ എന്ന് അറിയിക്കാമോ;

ഈ പ്ലാറ്റ്ഫോമിലേക്ക് കൈമാറുന്ന വിവരങ്ങൾ സുരക്ഷിതമാണെന്ന് ഉറപ്പുവരുത്തുന്നതിന് സർക്കാർ എന്തൊക്കെ നടപടികളാണ് കൈക്കൊള്ളുന്നതെന്ന് വ്യക്തമാക്കാമോ?

സംസ്ഥാനത്ത് തോട്ട ഭൂമിയില്‍ മറ്റ് വിളകള്‍ കൃഷി ചെയ്യുന്നതിന് അനുമതി നല്‍കുന്ന കാര്യം പരിഗണനയിലുണ്ടോ;

അതിനനുസൃതമായി ഭൂപരിഷ്ക്കരണ നിയമം ഭേദഗതി ചെയ്യുവാൻ തീരുമാനിച്ചിട്ടുണ്ടോയെന്ന് വെളിപ്പെടുത്താമോ;

തോട്ടങ്ങള്‍ ലാഭകരമാക്കി നടത്താൻ കഴിയാത്ത സാഹചര്യത്തില്‍ തോട്ട ഭൂമിയുടെ അഞ്ച് ശതമാനം മറ്റ് വിളകള്‍ കൃഷിചെയ്യാനും ടൂറിസത്തിനും ഉപയോഗിക്കുന്നതിന് അനുമതി നല്‍കുമോയെന്ന് അറിയിക്കാമോ?

വില്ലേജ് ഓഫീസുകള്‍ ജന സൗഹൃദമാക്കുന്നതിനായി നൂറ് ദിവസത്തിനുള്ളില്‍ പൂര്‍ത്തിയാക്കാന്‍ ലക്ഷ്യമിടുന്ന പ്രവര്‍ത്തനങ്ങള്‍ എന്തെല്ലാമാണ്;

വില്ലേജ് ഓഫീസുകളുടെ പ്രവര്‍ത്തനം കാര്യക്ഷമാക്കുന്നതിന്റെ ഭാഗമായി അടിസ്ഥാന സൗകര്യ വര്‍ദ്ധനവിന് പദ്ധതിയുണ്ടോ;

വില്ലേജ് ഓഫീസുകളിലെ ജീവനക്കാരുടെ കുറവ് മൂലം അഴിമതിയും കെടുകാര്യസ്ഥതയും ഉണ്ടാകുന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇത് പരിഹരിക്കുന്നതിന് സ്വീകരിക്കാനുദ്ദേശിക്കുന്ന നടപടികള്‍ അറിയിക്കാമോ;

റവന്യൂ വകുപ്പുമായി ബന്ധപ്പെട്ട് പൊതുജനങ്ങള്‍ക്കുണ്ടാകുന്ന ബുദ്ധിമുട്ടുകള്‍ മന്ത്രിയെ നേരിട്ടറിയിക്കാന്‍ സൗകര്യം ഏര്‍പ്പെടുത്തിയിട്ടുണ്ടോ; വിശദാംശം നല്‍കുമോ?

സംസ്ഥാനത്ത് ആദിവാസി മേഖലകളിൽ അടക്കം ഇന്റർനെറ്റ് സൗകര്യം ലഭ്യമല്ലാത്തത് കാരണം ഓൺലൈൻ പഠനം സാധ്യമല്ലാത്ത സാഹചര്യമുണ്ടെന്ന ബാലാവകാശ കമ്മീഷന്റെ കണ്ടെത്തൽ ശ്രദ്ധയിൽപ്പെട്ടിട്ടുണ്ടോ;

സാങ്കേതിക സംവിധാനങ്ങള്‍ ലഭ്യമല്ലാത്ത കുട്ടികളെ കണ്ടെത്താൻ എന്തൊക്കെ മാർഗ്ഗങ്ങളാണ് സർക്കാർ അവലംബിക്കുന്നത്; വിശദമാക്കാമോ; സർക്കാർ തലത്തിൽ ഇത് സംബന്ധിച്ച് എന്തെങ്കിലും റിപ്പോർട്ടുകൾ ലഭ്യമാണോ;

ഓൺലൈൻ ക്ലാസ്സുകളിൽ പഠനം നല്ല രീതിയിൽ നടക്കുന്നുണ്ടോ എന്ന് ഉറപ്പുവരുത്താൻ എന്തൊക്കെ നടപടികളാണ് സ്വീകരിച്ചിരിക്കുന്നത്; മാതാപിതാക്കളെയും അദ്ധ്യാപകരെയും ഉൾപ്പെടുത്തി കുട്ടികളുടെ ഓൺലൈൻ പഠനനിലവാരം ഉറപ്പുവരുത്താൻ എന്തെങ്കിലും പദ്ധതിക്ക് രൂപം നൽകിയിട്ടുണ്ടോ; വിശദമാക്കാമോ?

സംസ്ഥാനത്ത് റവന്യൂ വകുപ്പിന്റെ സമഗ്ര നവീകരണത്തിനും പ്രവര്‍ത്തന മികവിനുമായി വിഷന്‍ ആൻഡ് മിഷന്‍ എന്ന പേരില്‍ പദ്ധതി ആവിഷ്കരിച്ച് നടപ്പിലാക്കാന്‍ ഉദ്ദേശിക്കുന്നുണ്ടോയെന്ന് വ്യക്തമാക്കുമോ;

എങ്കില്‍ പ്രസ്തുത പദ്ധതിയുടെ ഉദ്ദേശ്യലക്ഷ്യങ്ങള്‍ എന്തെല്ലാമെന്ന് വ്യക്തമാക്കുമോ?

സംസ്ഥാനത്ത് നടന്നുവരുന്ന റീസര്‍വ്വേ നടപടികളുടെ പുരോഗതി വിലയിരുത്തിയിട്ടുണ്ടോ; ഇതുവരെ എത്ര ശതമാനം പൂര്‍ത്തീകരിക്കാന്‍ സാധിച്ചിട്ടുണ്ടെന്ന് അറിയിക്കാമോ;

ആധുനിക സൗകര്യങ്ങളോടു കൂടിയ റീസര്‍വ്വേ പ്രവര്‍ത്തനങ്ങള്‍ കാര്യക്ഷമമാക്കുന്നതിനും വേഗത്തിലാക്കുന്നതിനും കഴിഞ്ഞിട്ടുണ്ടോ;

കോവി‍ഡും പ്രകൃതി ദുരന്തങ്ങളും സര്‍വ്വേ പ്രവര്‍ത്തനങ്ങളെ ദോഷകരമായി ബാധിച്ചിട്ടുണ്ടോ;

റീസര്‍വ്വേ പ്രവര്‍ത്തനങ്ങള്‍ സമയബന്ധിതമായി പൂര്‍ത്തീകരിക്കുന്നതിന് നടപടി സ്വീകരിക്കുമോ?

കഴിഞ്ഞ സര്‍ക്കാരിന്റെ കാലത്ത് നടപ്പാക്കിയ ഉത്തരവാദിത്ത ടൂറിസം പദ്ധതി വ്യാപകമാക്കുവാന്‍ ഉദ്ദേശിക്കുന്നുണ്ടോ;

പ്രസ്തുത പദ്ധതിയില്‍ കൂടുതലായി എന്തെല്ലാം കാര്യങ്ങള്‍ ഉള്‍പ്പെടുത്താനാണ് ലക്ഷ്യമിടുന്നതെന്ന് അറിയിക്കുമോ;

പദ്ധതിയുടെ ഭാഗമായിരുന്ന അനേകം പേർക്ക് അടച്ചുപൂട്ടലില്‍ തൊഴിലും വരുമാനവും നഷ്ടപ്പെട്ടത് ശ്രദ്ധയില്‍പ്പെട്ടിട്ടുണ്ടോ;

എങ്കില്‍ ഇവര്‍ക്ക് പ്രസ്തുത മേഖലയില്‍ സംരംഭം പുനരാരംഭിക്കുന്നതിന് സാമ്പത്തിക സഹായമോ വായ്പയോ അനുവദിക്കുന്നതിന് നടപടി സ്വീകരിക്കുമോ?

കോവിഡാനന്തരം സംസ്ഥാനത്തെ വിനോദസഞ്ചാര മേഖലയെ വീണ്ടെടുക്കുന്നതിനും വികസിപ്പിക്കുന്നതിനും എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ;

സംസ്ഥാനത്ത് പ്രവര്‍ത്തിക്കുന്ന ടൂറിസം സഹകരണ സംഘങ്ങളെ വകുപ്പിന്റെ പ്രവര്‍ത്തനവുമായി കൂട്ടിയിണക്കാന്‍ ശ്രദ്ധപതിപ്പിക്കുമോ;

നിലവിലുള്ള നിയമത്തിന്റെയും അംഗീകൃത നിയമാവലിയുടെയും പിന്‍ബലത്തില്‍ ഓഡിറ്റിങ്ങിനും പരിശോധനകള്‍ക്കും വിധേയമായി പ്രവര്‍ത്തിക്കുന്ന പ്രസ്തുത സംഘങ്ങള്‍ വഴിയുള്ള ടൂറിസം വികസനം കൂട്ടുത്തരവാദിത്തത്തോടെയും ജനപങ്കാളിത്തത്തോടെയും കുറ്റമറ്റ നിലയില്‍ നടത്താന്‍ കഴിയുമെന്നത് പരിഗണിച്ചിട്ടുണ്ടോ;

പുതിയ ഡസ്റ്റിനേഷന്‍ കണ്ടെത്തി പ്രവര്‍ത്തനമാരംഭിക്കുന്നതിനും കെ. റ്റി. ഡി. സി., ഡി. റ്റി. പി. സി. തുടങ്ങിയവയുടെ സ്ഥാപനങ്ങള്‍ ഏറ്റെടുത്തുനടത്തുന്നതിനും ഇത്തരം സംഘങ്ങളെ ഉള്‍പ്പെടുത്തുന്നതിന് നടപടി സ്വീകരിക്കുമോ?