അഡാക്കിന്റെ എറണാകുളം റീജിയണല്‍ ഓഫീസില്‍ വാച്ച്മാന്‍ തസ്തികയില്‍ സേവനം അനുഷ്ഠിച്ചുവരവെ 16.04.2017-ന് മരണപ്പെട്ട വൈപ്പിന്‍ നിയോജകമണ്ഡലത്തിലെ എളങ്കുന്നപ്പുഴകരയില്‍ പുത്തന്‍കാട് വീട്ടില്‍ പി.കെ.ദിനേശന്റെ മകന്‍ രജിഷ് പി.ആര്‍. ആശ്രിത നിയമനത്തിനായി സമര്‍പ്പിച്ച അപേക്ഷയിന്മേല്‍ സ്വീകരിച്ചിട്ടുള്ള നടപടി എന്താണെന്ന് വിശദമാക്കാമോ;

24.05.2017-ന് സമര്‍പ്പിച്ച അപേക്ഷയില്‍ നിയമനം ലഭ്യമാക്കുന്നതില്‍ നേരിടുന്ന കാലതാമസത്തിന് കാരണം വ്യക്തമാക്കാമോ; ആശ്രിത നിയമനം എന്നത്തേക്ക് ലഭ്യമാകുമെന്ന് വ്യക്തമാക്കാമോ?

മത്സ്യത്തൊഴിലാളികള്‍ സഹകരണസംഘങ്ങളില്‍ നിന്നെടുത്ത വായ്പകളിലെ ജപ്തി നടപടികളില്‍ ഏര്‍പ്പെടുത്തിയിരുന്ന മൊറട്ടോറിയം പിൻവലിച്ചിട്ടുണ്ടോ; ഈ പ്രതിസന്ധി രൂക്ഷമായി തുടരുന്ന സാഹചര്യത്തിൽ മൊറട്ടോറിയം ദീർഘിപ്പിക്കാൻ നടപടി സ്വീകരിക്കുമോ?

മത്സ്യത്തൊഴിലാളി ജോയിന്റ് ലയബിലിറ്റി ഗ്രൂപ്പുകള്‍ക്ക് പലിശ രഹിത വായ്പ നല്‍കി വള്ളവും വലയും വാങ്ങുന്നതിനുള്ള പദ്ധതിയുടെ പുരോഗതി വിലയിരുത്തിയിട്ടുണ്ടോ;

ഈ പദ്ധതിയിൽ മുൻ സർക്കാരിന്റെ കാലത്തും ഈ സർക്കാരിന്റെ കാലയളവിലും എത്രപേർക്ക് ആനുകൂല്യം നൽകിയെന്ന് ജില്ലതിരിച്ച് വ്യക്തമാക്കുമോ?

മത്സ്യബന്ധന മേഖലയില്‍ എന്തെല്ലാം മാറ്റങ്ങള്‍ ലക്ഷ്യമിട്ടാണ് നിലവിലെ സംസ്ഥാന ഫിഷറീസ് നയം രൂപീകരിച്ചിട്ടുള്ളതെന്ന് അറിയിക്കാമോ;

സംസ്ഥാന ഫിഷറീസ് നയത്തില്‍ കാലികമായ മാറ്റം വരുത്തുന്നതിന് എന്തെങ്കിലും നടപടികള്‍ സ്വീകരിച്ചിട്ടുണ്ടോ; വിശദാംശങ്ങള്‍ ലഭ്യമാക്കാമോ;

പുതിയ നയത്തിന്റെ കരട് രൂപീകരണത്തിന് എന്തൊക്കെ വിഷയങ്ങളാണ് പരിഗണിക്കുന്നതെന്ന് വ്യക്തമാക്കാമോ?

സംസ്ഥാനത്തെ സജീവ മത്സ്യത്തൊഴിലാളികളുടെ കണക്കെടുപ്പ് നടത്തിയിട്ടുണ്ടോ; ഉണ്ടെങ്കിൽ ജില്ല തിരിച്ച് വിശദാംശങ്ങൾ നൽകുമോ?

ഉള്‍നാടന്‍ മത്സ്യസമ്പത്ത് വര്‍ദ്ധിപ്പിക്കുന്നതിന് സ്വീകരിച്ച നടപടികളുടെ വിശദാംശം ലഭ്യമാക്കാമോ;

ഭക്ഷ്യ സുരക്ഷ പദ്ധതിയിൽ ഉൾപ്പെടുത്തി തദ്ദേശസ്ഥാപനങ്ങള്‍ വഴി എത്ര മത്സ്യകൃഷി പദ്ധതികൾ വകുപ്പ് നടപ്പിലാക്കി എന്ന വിവരം ജില്ല തിരിച്ച് ലഭ്യമാക്കാമോ?

മാവേലിക്കര മണ്ഡലത്തില്‍ മത്സ്യഫെഡിന്റെ ഒരു ഔട്ട്‍ലെറ്റ് ആരംഭിക്കുന്നതിനുള്ള നടപടികള്‍ സ്വീകരിക്കുമോയെന്ന് വ്യക്തമാക്കുമോ?

കുന്നത്തുനാട് മണ്ഡലത്തിലെ ഏതെല്ലാം മത്സ്യമാര്‍ക്കറ്റുകളാണ് ആധുനിക മത്സ്യ മാര്‍ക്കറ്റുകളായി ഉയര്‍ത്തുന്നതിന് തെരഞ്ഞെടുത്തിട്ടുള്ളതെന്ന് വ്യക്തമാക്കാമോ;

പ്രസ്തുത മാർക്കറ്റുകൾക്ക് ഓരോന്നിനും അനുവദിച്ചിട്ടുള്ള ഫണ്ട് എത്രയെന്ന് വ്യക്തമാക്കാമോ;ഓരോന്നിന്റെയും നിര്‍മ്മാണ പുരോഗതി വ്യക്തമാക്കാമോ?

കടലില്‍ നിന്നും പിടിക്കുന്ന മത്സ്യത്തിന്റെ ന്യായവില ഉറപ്പാക്കാന്‍ ആദ്യ വില്പനാവകാശം തങ്ങള്‍ക്ക് നല്‍കണം എന്ന മത്സ്യത്തൊഴിലാളികളുടെ ആവശ്യം പരിഗണിക്കുമോ;

പ്രസ്തുത അവകാശം നിലവിൽ ഹാര്‍ബര്‍ മാനേജ്മെന്റ് സൊസൈറ്റികള്‍ക്ക് ആണോയെന്ന് വ്യക്തമാക്കാമോ;

പ്രസ്തുത അധികാരം ഹാര്‍ബര്‍ മാനേജ്മെന്റ് സൊസൈറ്റികള്‍ക്ക് നൽകാനുള്ള തീരുമാനത്തിന്റെ അടിസ്ഥാനം വിശദമാക്കാമോ?

മത്സ്യത്തൊഴിലാളികളുടെ മക്കള്‍ക്ക് മെഡിക്കല്‍, എഞ്ചിനീയറിംഗ് എൻട്രൻസ് പരിശീലനത്തിനായി സംസ്ഥാനത്ത് സര്‍ക്കാര്‍ അംഗീകരിച്ച എത്ര സെന്ററുകളാണ് പ്രവര്‍ത്തിച്ചുവരുന്നത്; വിശദവിവരം ലഭ്യമാക്കാമോ;

ഇവിടെ , 2016 മുതൽ 2021 നാളിതുവരെ എത്ര മത്സ്യതൊഴിലാളികളുടെ കുട്ടികൾക്കാണ് പരിശീലനം നല്‍കി വരുന്നത്; വ്യക്തമാക്കാമോ ;

2016-21 കാലയളവില്‍ പ്രസ്തുത പരിശീലനത്തിനായി എത്ര തുകയാണ് സര്‍ക്കാര്‍ ചെലവഴിച്ചത് എന്ന് വ്യക്തമാക്കുമോ?

സംസ്ഥാനത്തെ തീരദേശത്ത് വേലിയേറ്റ രേഖയില്‍ നിന്നും 50 മീറ്ററിനുള്ളില്‍ താമസിക്കുന്ന മത്സ്യത്തൊഴിലാളി കുടുംബങ്ങളെ മാറ്റി സുരക്ഷിത മേഖലയില്‍ പുനരധിവസിപ്പിക്കുന്ന പദ്ധതിയുടെ ഭാഗമായി ഓരോ ഗുണഭോക്താവിനും പത്ത് ലക്ഷം രൂപ സഹായമാണോ നല്‍കുന്നത് എന്ന് വ്യക്തമാക്കാമോ;

ഉപ്പുകലര്‍ന്ന കടല്‍ക്കാറ്റിലും മറ്റു പ്രതികൂല സാഹചര്യത്തിലും മത്സ്യത്തൊഴിലാളി മേഖലയിലെ വീടുകൾക്ക് സംഭവിക്കുന്ന കേടുപാടുകൾ പരിഹരിക്കാൻ അറ്റകുറ്റ പണിയ്ക്കുള്ള ഫണ്ട് ലഭ്യമാക്കാന്‍ തയ്യാറാകുമോ എന്ന് അറിയിക്കുമോ?

ഭൂരഹിതരായ മത്സ്യത്തൊഴിലാളികള്‍ക്ക് ഭൂമിവാങ്ങുന്ന പദ്ധതി പ്രകാരം കഴിഞ്ഞ സർക്കാരിന്റെ കാലയളവിൽ എത്ര കുടുംബങ്ങള്‍ക്കാണ് ധനസഹായം അനുവദിച്ചിട്ടുള്ളതെന്ന് ജില്ലതിരിച്ച് അറിയിക്കാമോ?

സമുദ്ര തീരത്തിന്റെ അമ്പത് മീറ്റര്‍ പരിധിക്കുള്ളില്‍ താമസിക്കുന്ന മത്സ്യത്തൊഴിലാളികളെ പുനരധിവസിപ്പിക്കുന്ന പദ്ധതിയിൽ നാളിതുവരെ എത്ര മത്സ്യത്തൊഴിലാളി കുടുംബങ്ങളെ മാറ്റിപ്പാർപ്പിക്കാൻ സാധിച്ചിട്ടുണ്ട്; ഈ പദ്ധതി നടപ്പാക്കുന്നതിൽ പ്രായോഗിക വൈഷമ്യങ്ങൾ നേരിടുന്നുണ്ടോയെന്ന് വ്യക്തമാക്കുമോ?

സംസ്ഥാനത്ത് മത്സ്യത്തൊഴിലാളി കുടുംബങ്ങളിലെ അഭ്യസ്തവിദ്യരായ യുവതികള്‍ക്ക് തൊഴില്‍ പ്രാവീണ്യം നേടിയെടുക്കുന്നതിന് പരിശീലന പരിപാടി ആവിഷ്ക്കരിച്ചിട്ടുണ്ടോ;

അമിത പലിശക്കാരില്‍ നിന്ന് സ്ത്രീകളായ മത്സ്യവിപണന തൊഴിലാളികളെ സംരക്ഷിക്കുന്നതിന് ജോയിന്റ് ലയബിലിറ്റി ഗ്രൂപ്പുകൾ രൂപീകരിച്ച് നടത്തിയ പ്രവര്‍ത്തനത്തിന്റെ ഫലം അറിയിക്കാമോ;

തീരമെെത്രി യൂണിറ്റുകളുടെ പ്രവര്‍ത്തനം വിപുലീകരിക്കാനും ശാക്തീകരിക്കാനും നടത്തിയ ഇടപെടലുകള്‍ എന്തെല്ലാമായിരുന്നു; വിശദീകരിക്കുമോ?

പുനർഗേഹം പദ്ധതിയിലൂടെ നാളിതുവരെ എത്ര കുടുംബങ്ങൾക്ക് വീട് നൽകാൻ സാധിച്ചിട്ടുണ്ട്; ഈ പദ്ധതി കൂടുതൽ കാര്യക്ഷമമാക്കാൻ നടപടി സ്വീകരിക്കുമോയെന്ന് അറിയിക്കുമോ?

സംസ്ഥാനത്ത് പരമ്പരാഗത മത്സ്യത്തൊഴില്‍ മേഖലയിലും അനുബന്ധ മേഖലയിലും പണിയെടുക്കുന്ന സ്ത്രീകളുടെ വിവിധങ്ങളായ പ്രശ്നങ്ങള്‍ പ്രത്യേകമായി പരിശോധിച്ചിട്ടുണ്ടോ;

കഴിഞ്ഞ സര്‍ക്കാരിന്റെ കാലത്ത് അവര്‍ക്കായി എന്തെല്ലാം പുതിയ പദ്ധതികളാണ് ആവിഷ്കരിച്ച് നടപ്പാക്കിയത്;

രാജ്യത്തിന് വിദേശ നാണ്യം നേടിത്തരുന്ന കയറ്റുമതി സ്ഥാപനങ്ങളുടെ ഭാഗമായി പ്രവര്‍ത്തിക്കുന്ന ഈ താെഴിലാളികള്‍ അനാരോഗ്യകരമായ പശ്ചാത്തലത്തില്‍ യാതാെരുവിധ സുരക്ഷാ സൗകര്യങ്ങളുമില്ലാതെയാണ് തൊഴിലെടുക്കുന്നതെന്ന കാര്യം പരിശോധിക്കുമോ;

ആലപ്പുഴ ജില്ലയില്‍ അരൂര്‍ മണ്ഡലത്തില്‍ മാത്രം നൂറിലധികം പീലിങ്ങ് ഷെഡുകളും അവിടങ്ങളില്‍ അരലക്ഷത്തിലധികം സ്ത്രീ താെഴിലാളികളും തൊഴിലെടുത്തുവരുന്ന കാര്യം ശ്രദ്ധയില്‍പ്പെട്ടിട്ടുണ്ടോ;

സംസ്ഥാനത്തെ വിവിധ ജില്ലകളില്‍ പീലിങ്ങ് ഷെഡില്‍ താെഴിലെടുക്കുന്ന സ്ത്രീ തൊഴിലാളികളുടെ പ്രശ്നങ്ങള്‍ പഠിക്കുന്നതിനും അവ പരിശോധിക്കുന്നതിനും ആവശ്യമായ അടിയന്തിര നടപടികള്‍ സ്വീകരിക്കുമോ?

ബ്ലൂ റെവല്യൂഷൻ പദ്ധതിയില്‍ ഉള്‍പ്പെടുത്തി കേന്ദ്ര സർക്കാരിന്റെ അനുമതി ലഭിച്ചിട്ടുള്ള പദ്ധതികളുടെ വിശദാംശങ്ങൾ നൽകുമോ?

2018 ഓഗസ്റ്റ് മാസത്തിലെ പ്രളയത്തോടനുബന്ധിച്ച് മത്സ്യമേഖലയുടെ വികസനവുമായി ബന്ധപ്പെട്ട് ആയിരത്തി എൺപത്തിയാറ് കോടി രൂപയുടെ പദ്ധതി രൂപരേഖ തയ്യാറാക്കി കേന്ദ്ര സർക്കാരിന് സമർപ്പിച്ചിട്ടുണ്ടോ; പ്രസ്തുത പദ്ധതിയുടെ പുരോഗതി വിശദമാക്കാമോ;

ഓഖി ദുരന്തത്തിൽ മരണമടഞ്ഞവരുടെയും നാശനഷ്ടം സംഭവിച്ചവരുടെയും കുടുംബങ്ങൾക്ക് എന്തൊക്കെ ആശ്വാസ നടപടികളാണ് നാളിതുവരെ നൽകിയതെന്ന് വ്യക്തമാക്കാമോ?

സംസ്ഥാന സര്‍ക്കാര്‍ 2016 മേയ് മാസം മുതല്‍ 2021 ജൂൺ മാസം വരെ മത്സ്യത്തൊഴിലാളികള്‍ക്കായി വിവിധ ബജറ്റുകളിൽ അയ്യായിരം കോടി രൂപയുടെ പാക്കേജ് പ്രഖ്യാപിച്ചിരുന്നോ; ഇതില്‍ എത്ര കോടി രൂപയുടെ പദ്ധതികൾ നാളിതുവരെ പൂർത്തിയായി എന്ന് വിശദമാക്കാമോ;

2018-ല്‍ ഉണ്ടായ ഓഖി ദുരന്തത്തിനുശേഷം പ്രഖ്യാപിച്ച രണ്ടായിരം കോടി രൂപയുടെ പാക്കേജ് നാളിതുവരെ നടപ്പിലാക്കിയിട്ടുണ്ടോ;

ഇത് നടപ്പിലാക്കുന്നതിനായി നിയമിച്ച റിട്ടയേര്‍ഡ് ചീഫ് സെക്രട്ടറി എസ്. എം. വിജയാനന്ദ് ചെയര്‍മാനായ എക്‌സ്‌പെര്‍ട്ട് കമ്മിറ്റിയുടെ പ്രവർത്തനം വിലയിരുത്തിയിട്ടുണ്ടോ; അറിയിക്കുമോ?

2016-21 കാലഘട്ടത്തില്‍ മത്സ്യത്തൊഴിലാളികളുടെ മക്കള്‍ക്ക് ലംപ്‍സംഗ്രാന്റ് ഇനത്തില്‍ ചെലവഴിച്ച തുക എത്രയെന്ന് വ്യക്തമാക്കാമോ;

ഓഖി ദുരന്തത്തില്‍ മരിച്ച മത്സ്യത്തൊഴിലാളികളുടെ മക്കള്‍ക്ക് വേണ്ടി പ്രഖ്യാപിച്ച വിദ്യാഭ്യാസ പദ്ധതിക്കായി എന്തു തുകയാണ് ചെലവഴിക്കുന്നത്; ഈ പദ്ധതിയുടെ വിശദാംശം ലഭ്യമാക്കാമോ?

കടലോരത്ത് നിന്ന് 50 മീറ്റര്‍ ദൂരപരിധിക്കുള്ളില്‍ താമസിക്കുന്ന ആളുകളെ പുനരധിവസിപ്പിക്കുന്നതിന് വേണ്ടിയുള്ള പുനര്‍ഗേഹം പദ്ധതിയില്‍ ഉള്‍പ്പെടുത്തുന്നതിനായി പുറത്തൂര്‍, മംഗലം എന്നീ പഞ്ചായത്തുകളില്‍ നിന്നും എത്ര അപേക്ഷകള്‍ ലഭിച്ചിട്ടുണ്ട്; അതില്‍ എത്ര പേര്‍ അര്‍ഹരായിട്ടുണ്ട്; വ്യക്തമാക്കാമോ;

ഇതില്‍ എത്ര പേര്‍ക്ക് സ്ഥലം വാങ്ങാനുള്ള തുക നല്‍കിയെന്നും എത്ര പേര്‍ക്ക് വീട് നിർമ്മാണത്തിനായി തുക നല്‍കിയെന്നും വിശദമാക്കാമോ;

ഇനി എത്ര പേര്‍ക്ക് ഈ ആനുകൂല്യം നല്‍കാനുണ്ടെന്നും അത് എന്നത്തേക്ക് നല്‍കാനാകുമെന്നും താമസം നേരിടുന്നുണ്ടെങ്കില്‍ അതിന്റെ കാരണം എന്താണെന്നും വിശദമാക്കാമോ?

വള്ളിക്കുന്ന് നിയോജകമണ്ഡലത്തിൽ പുനര്‍ഗേഹം പദ്ധതി നടപ്പാക്കിയിട്ടുണ്ടോ;

പ്രസ്തുത പദ്ധതി മുഖേന, മണ്ഡലത്തിലെ എത്ര പേർക്കാണ് വീടുകൾ നല്‍കുവാന്‍ നടപടി സ്വീകരിച്ചിട്ടുള്ളത്;

പദ്ധതിക്കായി നിലവില്‍ അനുവദിക്കുന്ന തുക പരിമിതമാണോ; അത് വര്‍ധിപ്പിക്കുന്നതിന് നടപടി സ്വീകരിക്കുമോ;

പ്രസ്തുത പദ്ധതി പ്രകാരം വീട് ലഭിച്ചവർ ഉപേക്ഷിച്ച സ്ഥലത്തിന്റെ ഉടമസ്ഥാവകാശം അവരില്‍ തന്നെ നിക്ഷിപ്തമാക്കുമോ ; വ്യക്തമാക്കാമോ?

ഉള്‍നാടന്‍ മത്സ്യത്തൊഴിലാളികളുടെ ജീവിത നിലവാരം മെച്ചപ്പെടുത്തുന്നതിന് എന്തെല്ലാം പദ്ധതികളാണ് ആവിഷ്കരിച്ചിട്ടുള്ളതെന്ന് വിശദമാക്കുമോ;

മത്സ്യപ്രജനന സമയത്ത് ഉള്‍നാടന്‍ ജലാശയങ്ങളിലെ മണലൂറ്റ് തടയുന്നതിനുള്ള നടപടികള്‍ സ്വീകരിക്കുമോ; വ്യക്തമാക്കുമോ?

ചാവക്കാട് നഗരസഭയിലെ ഫിഷറീസ് കോളനിയില്‍ അങ്കണവാടി കെട്ടിട നിര്‍മ്മാണവുമായി ബന്ധപ്പെട്ട് വകുപ്പ് സ്വീകരിച്ച നടപടികള്‍ വ്യക്തമാക്കാമോ;

പ്രസ്തുത കോളനിയിലെ ഇരട്ട വീടുകള്‍ ഒറ്റ വീടുകളാക്കി മാറ്റുന്നതിന് പദ്ധതി ആവിഷ്കരിക്കുമോ;

പ്രസ്തുത കോളനിയിലെ കാലപഴക്കം വന്ന് കേടുപാടുകള്‍ സംഭവിച്ച വീടുകളുടെ പുനരുദ്ധാരണത്തിന് വകുപ്പ് പദ്ധതി തയ്യാറാക്കിയിട്ടുണ്ടോ; ധനസഹായം നല്‍കിയിട്ടുണ്ടോ എന്ന് വ്യക്തമാക്കാമോ?

വൈപ്പിന്‍ ഫിഷ് ലാന്റിംഗ് സെന്ററിന്റെ വികസനത്തിനായി ആവിഷ്കരിച്ചിട്ടുള്ള നടപടികള്‍ എന്തെല്ലാമെന്ന് വിശദമാക്കാമോ;

ഫിഷ് ലാന്റിംഗ് സെന്ററിലേക്കുള്ള അപ്രോച്ച് റോഡിന്റെയും പാര്‍ക്കിംഗ് ഏരിയയുടെയും നിര്‍മ്മാണത്തിനായി സ്ഥലം ഏറ്റെടുക്കുന്ന പ്രവൃത്തിയുടെ പുരോഗതി വ്യക്തമാക്കാമോ;

സ്ഥലം ഏറ്റെടുക്കല്‍ നടപടികള്‍ എന്നത്തേക്ക് പൂര്‍ത്തിയാക്കാന്‍ സാധിക്കുമെന്ന് വ്യക്തമാക്കാമോ?

കാഞ്ഞങ്ങാട് മണ്ഡലത്തിൽ തീരദേശ ഹൈവേയുടെ നിർമ്മാണം ഏത് ഘട്ടത്തിലാണെന്ന് വിശദീകരിക്കാമോ;

ആയതിന് ഭൂമി ഏറ്റെടുക്കൽ വഴി എത്ര തീരദേശവാസികൾക്ക് താമസം മാറ്റേണ്ടി വരുമെന്ന് കണക്കാക്കിയിട്ടുണ്ടോ?

മത്സ്യത്തൊഴിലാളി മേഖലയിലെ വിദ്യാഭ്യാസ നിലവാരം ഉയര്‍ത്തുന്നതിന് സ്വീകരിച്ചിട്ടുള്ള നടപടികൾ ഫലപ്രാപ്തിയിൽ എത്തിക്കുന്നതിന് സാധിക്കാത്തതിന്റെ കാരണം വിലയിരുത്തിയിട്ടുണ്ടോ; വ്യക്തമാക്കുമോ?

മുന്‍ സര്‍ക്കാരിന്റെ കാലത്ത് മത്സ്യത്തില്‍ മായം ചേര്‍ത്തതിന് എത്ര കേസുകള്‍ രജിസ്റ്റര്‍ ചെയ്തിട്ടുണ്ട്; ഇതില്‍ എത്ര പേരെ ശിക്ഷക്ക് വിധേയമാക്കിയിട്ടുണ്ട്; വിശദമാക്കുമോ;

മത്സ്യത്തിൽ മായം കലർത്തുന്നത് കണ്ടെത്തുന്നതിന് നിലവിലുള്ള മാര്‍ഗ്ഗങ്ങള്‍ എന്തെല്ലാമാണെന്നും, മത്സ്യ മാര്‍ക്കറ്റുകളിലല്ലാതെ മറ്റ് വില്പന കേന്ദ്രങ്ങളിലും പരിശോധന നടത്താറുണ്ടോയെന്നും വെളിപ്പെടുത്തുമോ;

മത്സ്യ വിപണനകേന്ദ്രങ്ങള്‍ നവീകരിക്കുന്നതിന് കഴിഞ്ഞ സർക്കാ‍ർ ചെലവ് ചെയ്ത തുക എത്രയെന്നും ഏതെല്ലാം കേന്ദ്രങ്ങള്‍ പൂര്‍ണ്ണതോതില്‍ പ്രവൃത്തി പൂര്‍ത്തീകരിച്ചുവെന്നും ഏതെല്ലാം കേന്ദ്രങ്ങള്‍ ഭാഗികമായി പ്രവൃത്തി പൂര്‍ത്തീകരിച്ചുവെന്നും ജില്ല തിരിച്ച് വ്യക്തമാക്കുമോ?

ഇതര സംസ്ഥാനങ്ങളില്‍ നിന്ന് വരുന്ന മത്സ്യത്തിന്റെ ഗുണനിലവാരം പരിശോധിക്കാന്‍ എന്തെല്ലാം സംവിധാനങ്ങളാണ് സംസ്ഥാനത്ത് ഉള്ളതെന്ന് വ്യക്തമാക്കുമോ;

പൊതുമാര്‍ക്കറ്റുകളില്‍ വില്‍പ്പനയ്ക്ക് വച്ചിരിക്കുന്ന മത്സ്യങ്ങളില്‍ രാസവസ്തുക്കള്‍ ഉപയോഗിച്ചിട്ടുണ്ടോ എന്ന് പരിശോധിക്കാന്‍ സംവിധാനം ഉണ്ടോയെന്ന് വ്യക്തമാക്കുമോ; വിശദാംശം നല്‍കുമോ?

സംസ്ഥാനത്ത് തീരദേശ പരിപാലന പദ്ധതി പ്രാബല്യത്തിലാകാത്തത് കാരണം സംസ്ഥാനത്ത് പത്ത് ജില്ലകളിലെ ഭവന നിർമ്മാണം പ്രതിസന്ധിയിലായതായി ശ്രദ്ധയിൽപ്പെട്ടിട്ടുണ്ടോ; എങ്കില്‍ ഇത് പരിഹരിക്കാൻ സത്വര നടപടി സ്വീകരിക്കുമോ;

പ്രസ്തുത പദ്ധതി തയ്യാറാക്കുന്നതില്‍ ഏറ്റവും പ്രധാനപ്പെട്ട ഘട്ടമായ പൊതു അദാലത്ത് മുടങ്ങിയത് കാരണം പദ്ധതി വൈകുന്ന കാര്യം സർക്കാർ ഗൗരവമായി കാണുന്നുണ്ടോ;

2011-ലെ തീരദേശമേഖല ചട്ടം ലംഘിച്ചുള്ള നിര്‍മ്മാണത്തിന്റെ പേരില്‍ നടപടി നേരിടുന്ന നിരവധി പേർക്ക് 2019-ലെ കേന്ദ്ര വിജ്ഞാപനമനുസരിച്ച് കേരളം തയ്യാറാക്കുന്ന തീരമേഖല പരിപാലന (സി.ആര്‍.ഇസെഡ്.) പദ്ധതി നടപ്പിലാക്കിയാൽ ആശ്വാസം ലഭിക്കും എന്നത് പരിശോധിച്ചിട്ടുണ്ടോ; എങ്കില്‍ വിശദമാക്കുമോ?

അശാസ്ത്രീയമായ മത്സ്യബന്ധനവും കാലാവസ്ഥാ വ്യതിയാനവും മത്സ്യസമ്പത്തിനെ സാരമായി ബാധിക്കുന്നതു മൂലം മത്സ്യബന്ധന മേഖലയിൽ ഉണ്ടായിട്ടുള്ള പ്രതിസന്ധി പരിഹരിക്കുന്നതിന് ഇതര ഉപജീവനമാർഗ്ഗങ്ങൾ ലഭ്യമാക്കുന്ന പദ്ധതി ആവിഷ്കരിച്ചിട്ടുണ്ടോ; വിശദാംശങ്ങൾ നൽകുമോ?

സംസ്ഥാനത്ത് വംശനാശ ഭീഷണി നേരിടുന്ന മത്സ്യവര്‍ഗ്ഗങ്ങളെ സംരക്ഷിക്കുന്നതിന് എന്തെങ്കിലും നടപടി സ്വീകരിച്ചിട്ടുണ്ടോയെന്ന് വ്യക്തമാക്കുമോ?

സംസ്ഥാനത്ത് ഉള്‍നാടന്‍ ജലാശയങ്ങളില്‍ മത്സ്യകൃഷി പ്രോത്സാഹിപ്പിക്കുന്നതിന് സര്‍ക്കാര്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ;

ഉള്‍നാടന്‍ മത്സ്യകൃഷിക്കായി നല്ലയിനം മത്സ്യകുഞ്ഞുങ്ങളെ ലഭ്യമാക്കുന്നതിന് സര്‍ക്കാര്‍ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കുമോ; വിശദാംശം നല്‍കുമോ;

ഉള്‍നാടന്‍ മത്സ്യകര്‍ഷകര്‍ക്ക് എന്തെല്ലാം സഹായങ്ങളാണ് സര്‍ക്കാര്‍ ലഭ്യമാക്കുന്നതെന്ന് വ്യക്തമാക്കുമോ?

മത്സ്യ വിത്തുല്പാദനത്തില്‍ സ്വയം പര്യാപ്തത കൈവരിക്കുവാന്‍ എന്തെല്ലാം പദ്ധതികളാണ് നടപ്പാക്കി വരുന്നത്; വിശദമാക്കാമോ;

സര്‍ക്കാര്‍ ഉടമസ്ഥതയില്‍ എത്ര ഹാച്ചറികളാണ് നിലവിലുള്ളത്; അവയുടെ കഴിഞ്ഞ പത്ത് വര്‍ഷത്തെ സ്ഥാപിതശേഷി, ഉല്പാദനം എന്നിവ വര്‍ഷം തിരിച്ച് ലഭ്യമാക്കാമോ;

അത്യുല്പാദനശേഷിയുള്ള ഗിഫ്റ്റ് മത്സ്യത്തിന്റെ കുഞ്ഞുങ്ങളെ ആവശ്യാനുസരണം കര്‍ഷകര്‍ക്ക് ലഭിക്കുന്നതിന് എന്തെല്ലാം പദ്ധതികളാണ് ആവിഷ്കരിച്ചിട്ടുള്ളത്; 2016 മുതല്‍ നാളിതുവരെ എത്ര ഗിഫ്റ്റ് മത്സ്യകുഞ്ഞുങ്ങളെ കേരളത്തിലെ പൊതുമേഖലാ ഹാച്ചറികള്‍ വഴി ഉല്പാദിപ്പിച്ച് കര്‍ഷകര്‍ക്ക് ലഭ്യമാക്കിയിട്ടുണ്ട്; വര്‍ഷം തിരിച്ചുള്ള വിവരം ലഭ്യമാക്കാമോ;

ഗിഫ്റ്റ് ഹാച്ചറികള്‍ ആരംഭിക്കുന്നതിന് യഥാസമയം ലൈസന്‍സ് അനുവദിയ്ക്കുന്നില്ല എന്ന പരാതി ശ്രദ്ധയില്‍പ്പെട്ടിട്ടുണ്ടോ; എങ്കില്‍ ആയത് പരിഹരിക്കുന്നതിന് സ്വീകരിച്ച നടപടികള്‍ വിശദമാക്കാമോ?

സംസ്ഥാനത്ത് സുഭിക്ഷ കേരളം പദ്ധതി വഴിയും അല്ലാതെയും മത്സ്യകൃഷി ചെയ്യുന്നവർക്ക് സർക്കാർ നൽകിവരുന്ന ധനസഹായങ്ങൾ എന്തൊക്കെയാണെന്ന് വിശദമാക്കാമോ;

ഇത്തരം ധനസഹായങ്ങള്‍ വേഗത്തില്‍ ലഭ്യമാക്കാന്‍ എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കാമോ;

വിപണി കണ്ടെത്താനാവാത്തതും അകാരണമായി മത്സ്യങ്ങൾ ചത്തുപോകുന്നതും മൂലം വീടുകളിലും മറ്റും ശുദ്ധജല മത്സ്യകൃഷി നടത്തുന്നവർ നേരിടുന്ന പ്രയാസങ്ങൾ പരിഹരിക്കാനാവശ്യമായ എന്തൊക്കെ നടപടികളാണ് സ്വീകരിക്കുകയെന്ന് വിശദമാക്കാമോ;

വിളവെടുക്കുന്ന മത്സ്യം സർക്കാർ തലത്തിൽ ശേഖരിച്ച് വിപണനം ചെയ്ത് കർഷകർക്ക് ആശ്വാസം പകരുന്ന പദ്ധതികൾ ആവിഷ്കരിക്കുമോ; എങ്കിൽ എന്തൊക്കെ പദ്ധതികളാണ് നടപ്പിലാക്കുകയെന്ന് വിശദമാക്കാമോ;

ഫിഷറീസ് വകുപ്പ് ഓരുജല മത്സ്യകൃഷി പ്രോത്സാഹിപ്പിക്കുന്നതിന് പദ്ധതികൾ നടപ്പിലാക്കുന്നുണ്ടോ;

ആയതിന് ധനസഹായം അനുവദിക്കുന്നുണ്ടോയെന്നും എങ്കിൽ എന്തൊക്കെയാണെന്നും വിശദമാക്കാമോ;

കോവിഡ് കാലത്ത് തൊഴിൽ രഹിതരായ യുവാക്കളെയും പ്രവാസികളെയും സഹായിക്കുന്നതിനും ഈ തൊഴിൽ മേഖലയിലേക്ക് ആകർഷിക്കുന്നതിനും കൂത്തുപറമ്പ് നിയോജകമണ്ഡലത്തിൽ മയ്യഴി പുഴയോരത്ത് ഓരുജല മത്സ്യകൃഷി പ്രോത്സാഹിപ്പിക്കുന്നതിന് സർക്കാർ സഹകരണ ബാങ്കുകൾ വഴി ലോൺ ലഭ്യമാക്കുന്നതിന് നടപടി സ്വീകരിക്കുമോ; എങ്കിൽ എന്തൊക്കെ പദ്ധതികളാണ് നടപ്പിലാക്കുകയെന്ന് വിശദമാക്കാമോ?

സംസ്ഥാനത്ത് ജലസംഭരണികളിലെ മത്സ്യകൃഷിയുടെ സാധ്യത ശ്രദ്ധയിൽപ്പെട്ടിട്ടുണ്ടോ;

മത്സ്യോത്പാദനം വർദ്ധിപ്പിക്കുവാന്‍ ജലസംഭരണികളെ പ്രയോജനപ്പെടുത്തുന്നതിനായി എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

വന്യജീവി സങ്കേതങ്ങൾക്കുള്ളിലെ ജലസംഭരണികളിലെ മത്സ്യകൃഷിയുടെ സാധ്യത പ്രയോജനപ്പെടുത്തുന്നതിന് നടപടി സ്വീകരിക്കുമോ; വിശദമാക്കാമോ;?

ഉള്‍നാടന്‍ മത്സ്യകൃഷിയുമായി ബന്ധപ്പെട്ട് വാമനപുരം നിയോജകമണ്ഡലത്തില്‍ കഴിഞ്ഞ സര്‍ക്കാരിന്റെ കാലത്ത് എന്തെല്ലാം പദ്ധതികള്‍ നടപ്പായിട്ടുണ്ടെന്നതിന്റെ വിശദാംശങ്ങള്‍ നല്‍കാമോ;

പുതുതായി എന്തെല്ലാം പദ്ധതികള്‍ ഈ മേഖലയില്‍ നടപ്പാക്കാന്‍ ഉദ്ദേശിക്കുന്നുണ്ടെന്ന് വിശദമാക്കാമോ?

സംസ്ഥാനത്ത് മത്സ്യകൃഷി മേഖലയില്‍ മത്സ്യവിത്തിന്റെ അഭാവം നിമിത്തം മത്സ്യകൃഷിക്കാര്‍ നേരിടുന്ന പ്രയാസങ്ങള്‍ പരിഹരിക്കാന്‍ നടപടികള്‍ ഉണ്ടാകുമോ;

നിലവിലുള്ള ഹാച്ചറികള്‍ ശക്തിപ്പെടുത്തിയും ,ഫാമുകളിലൂടെയും മറ്റും മത്സ്യവിത്ത് ലഭ്യമാക്കാനും നടപടികള്‍ ഉണ്ടാകുമോയെന്ന് അറിയിക്കുമോ?

ചിറയിൻകീഴ് മണ്ഡലത്തിലെ അഞ്ചുതെങ്ങ് കഠിനംകുളം കേന്ദ്രീകരിച്ച് ഒരു മത്സ്യസംസ്ക്കരണ യൂണിറ്റ് സ്ഥാപിക്കുന്നതാണെന്ന് 2021- 2022- ലെ ബഡ്ജറ്റിൽ പ്രഖ്യാപിച്ചതിൻമേൽ സ്വീകരിച്ച നടപടികള്‍ എന്തൊക്കെയാണെന്ന് വ്യക്തമാക്കുമോ;

പ്രസ്തുത പദ്ധതി അടിയന്തരമായി ആരംഭിച്ച് സമയബന്ധിതമായി പൂർത്തികരിക്കുവാൻ ആവശ്യമായ നിർദേശം ബന്ധപ്പെട്ട ഉദ്യോഗസ്ഥർക്ക് നൽകുമോ?

വൈപ്പിന്‍ നിയോജകമണ്ഡലത്തിലെ എളങ്കുന്നപ്പുഴ ഗ്രാമപഞ്ചായത്തിലെ മാലിപ്പുറം ചാപ്പകടപ്പുറത്ത് നിന്ന് കടലാക്രമണ ഭീഷണിയെ തുടര്‍ന്ന് പുനരധിവസിപ്പിക്കപ്പെട്ട എഴുപത്തിയാറ് കുടുംബങ്ങള്‍ താമസിക്കുന്ന പെരുമാള്‍പ്പടി ഫിഷറീസ് കോളനിയില്‍ വെള്ളപ്പൊക്കവും മഴക്കെടുതിയും മൂലം നേരിടുന്ന ബുദ്ധിമുട്ടുകള്‍ പരിഹരിക്കാന്‍ നടപടികള്‍ സ്വീകരിച്ചിട്ടുണ്ടോ;

ഇല്ലെങ്കില്‍ ഇവിടെ താമസിക്കുന്ന കുടുംബങ്ങളുടെ ദയനീയ സ്ഥിതി കണക്കിലെടുത്ത് ഈ കോളനിയിലെ വെള്ളക്കെട്ട് പരിഹരിക്കാന്‍ നടപടി സ്വീകരിക്കുമോയെന്ന് വ്യക്തമാക്കുമോ?

നെയ്യാറ്റിന്‍കര നിയോജകമണ്ഡലത്തില്‍ 2020 - 21, 2021 - 22 സാമ്പത്തിക വര്‍ഷത്തില്‍ പൊഴിയൂര്‍ തീരദേശ മേഖലയില്‍ ഏതൊക്കെ പ്രവൃത്തികള്‍ക്കാണ് ഭരണാനുമതി നല്‍കിയതെന്ന് വിശദമാക്കാമോ;

ഓരോ പ്രവൃത്തിയ്ക്കും അനുവദിച്ച തുക എത്രയെന്ന് വ്യക്തമാക്കാമോ?

വിഴിഞ്ഞം തുറമുഖ പദ്ധതി പ്രദേശത്തുനിന്നും ഒഴിപ്പിക്കപ്പെട്ട മത്സ്യത്തൊഴിലാളികളെ പുനരധിവസിപ്പിക്കുന്നതിനായി സ്വീകരിച്ച പദ്ധതികളുടെ പുരോഗതി വിലയിരുത്തിയിട്ടുണ്ടോ; ഇനിയെത്ര മത്സ്യത്തൊഴിലാളി കുടുംബങ്ങളെ പുനരധിവസിപ്പിക്കാനുണ്ടെന്നും ഇവരുടെ പുനരധിവാസം വൈകുന്നതിന്റെ കാരണമെന്തെന്നും വ്യക്തമാക്കുമോ?

വര്‍ക്കല ചിലക്കൂര്‍ പൊഴിയില്‍ വേലിയേറ്റ സമയങ്ങളില്‍ മണ്ണ് അടിഞ്ഞു പൊഴി അടയുന്നതിനാല്‍ മത്സ്യത്തൊഴിലാളികളുടെ വീടിന് ചുറ്റും വെളളം കെട്ടുകയും വീടുകള്‍ നശിച്ച് പോകുകയും, പകര്‍ച്ചവ്യാധികള്‍ക്ക് ഇടവരുത്തുകയും ചെയ്യുന്നത് ഒഴിവാക്കുന്നതിനുളള ശാശ്വത നടപടി സ്വീകരിക്കുമോ?

ഈ സർക്കാർ അധികാരത്തിൽ വന്നതിന് ശേഷം എത്ര തീരദേശ റോഡുകൾക്ക് എത്ര രൂപ വീതം ഫണ്ടനുവദിച്ചിട്ടുണ്ടെന്ന് ജില്ല തിരിച്ച് വ്യക്തമാക്കാമോ;

തീരദേശ റോഡുകളുടെ പുനരുദ്ധാരണത്തിന് ഈ സർക്കാർ അധികാരത്തിൽ വന്നതിന് ശേഷം എത്ര പ്രൊപ്പോസലുകൾ ലഭിച്ചിട്ടുണ്ടെന്നും അവയിൽ എസ്റ്റിമേറ്റ് തയ്യാറാക്കിയവ എത്രയാണെന്നും ഭരണാനുമതി എപ്പോൾ നൽകുമെന്നും റോഡിന്റെ പേരു സഹിതം ജില്ല തിരിച്ച് വ്യക്തമാക്കാമോ;

തീരദേശ റോഡായി കണക്കാക്കുന്നതിന്റെ മാനദണ്ഡങ്ങൾ എന്തൊക്കെയാണെന്നും പ്രസ്തുത മാനദണ്ഡങ്ങളനുസരിച്ച് ഇനി എത്ര റോഡുകൾ പുനരുദ്ധരിക്കാൻ ബാക്കി ഉണ്ടെന്നും ജില്ല തിരിച്ച് വ്യക്തമാക്കാമോ?

തവനൂര്‍ മണ്ഡലത്തില്‍ 2019-20, 2020-21 വര്‍ഷങ്ങളില്‍ ഹാര്‍ബര്‍ എഞ്ചിനീയറിംഗ് വകുപ്പ് മുഖേന ഭരണാനുമതി ലഭിച്ച റോഡുകള്‍ ഏതെല്ലാമെന്ന് വിശദമാക്കാമോ;

ഇതില്‍ ഏതെല്ലാം പ്രവൃത്തികളാണ് പൂര്‍ത്തീകരിച്ചതെന്ന് അറിയിക്കുമോ;

ഇനിയും പൂര്‍ത്തീകരിക്കാത്തവ എന്നത്തേക്ക് പൂര്‍ത്തീകരിക്കാനാവുമെന്നും താമസം നേരിടുന്നുണ്ടെങ്കില്‍ ആയതിന്റെ കാരണവും വ്യക്തമാക്കാമോ?

തവനൂര്‍ മണ്ഡലത്തിലെ കൂട്ടായിയില്‍ ഫിഷ് ലാന്റിംഗ് സെന്റര്‍ നിര്‍മ്മിക്കാന്‍ ഉദ്ദേശിക്കുന്നുണ്ടോ;

എങ്കില്‍ ആയത് സംബന്ധിച്ച നടപടി ക്രമങ്ങളുടെ പുരോഗതി അറിയിക്കുമോ; ഇതിന്റെ നിര്‍മ്മാണ പ്രവൃത്തി എന്നത്തേക്ക് തുടങ്ങാനാകുമെന്ന് വിശദമാക്കാമോ?

കേരളത്തില്‍ സര്‍ക്കാരിന്റെ നിയന്ത്രണത്തിലുള്ള എത്ര സാംസ്കാരിക കേന്ദ്രങ്ങളാണ് ഉള്ളത്; വിശദ വിവരം നല്‍കാമോ;

കോവിഡ് കാലത്ത് ഈ സാംസ്കാരിക സ്ഥാപനങ്ങളുമായി ബന്ധപ്പെട്ട് പ്രവര്‍ത്തിക്കുന്ന കലാകാരന്മാരുടെ ക്ഷേമ പ്രവര്‍ത്തനങ്ങള്‍ ഉറപ്പ് വരുത്തുന്നതിനായി എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വിശദമാക്കാമോ;

പ്രസ്തുത കലാകാരന്മാരുടെ പെന്‍ഷന്‍ തുക വര്‍ദ്ധിപ്പിക്കുന്നതിനുള്ള നടപടി പരിഗണനയിലുണ്ടോയെന്നറിയിക്കാമോ?

കൊണ്ടോട്ടി മോയിൻ കുട്ടി വൈദ്യര്‍ അക്കാദമിയില്‍ നടന്ന് വരുന്ന പ്രവര്‍ത്തനങ്ങള്‍ ഏതെല്ലാമാണെന്ന് വിശദമാക്കുമോ;

അക്കാദമിക്ക് മറ്റ് ജില്ലകളില്‍ കേന്ദ്രങ്ങളുണ്ടോ; എങ്കില്‍ എവിടെയെല്ലാമാണെന്നും അവിടെ എന്തെല്ലാം പ്രവര്‍ത്തനങ്ങളാണ് നടന്ന് വരുന്നതെന്നും വ്യക്തമാക്കുമോ;

അക്കാദമിയുടെ പ്രവര്‍ത്തനം കേരളത്തിലുടനീളം വ്യാപിപ്പിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

കോവിഡ് മഹാമാരിയെ തുടര്‍ന്ന് ബുദ്ധിമുട്ട് അനുഭവിക്കുന്ന കലാകാരന്മാര്‍ക്ക് എന്തെല്ലാം സഹായങ്ങളാണ് നല്‍കിയിട്ടുള്ളതെന്ന് വ്യക്തമാക്കാമോ;

ഉത്സവങ്ങള്‍ ഒഴിവാക്കിയതിനാല്‍ കലാരംഗത്ത് പ്രവര്‍ത്തിച്ച് വന്നിരുന്ന കലാകാരന്മാരുടെ ക്ഷേമം ഉറപ്പ് വരുത്തുന്നതിന് എന്തെല്ലാം പദ്ധതികളാണ് ആസൂത്രണം ചെയ്തു വരുന്നതെന്ന് വ്യക്തമാക്കാമോ; ഇല്ലെങ്കില്‍ ആയതിനുള്ള അടിയന്തര നടപടി സ്വീകരിക്കുമോ?

മലപ്പുറം നിയോജകമണ്ഡലത്തിലെ ഏതെല്ലാം സാംസ്കാരിക സ്ഥാപനങ്ങള്‍ക്ക് കഴിഞ്ഞ സര്‍ക്കാരിന്റെ കാലത്ത് വിവിധ ഫണ്ടുകള്‍ അനുവദിച്ചിട്ടുണ്ടെന്ന് വിശദമാക്കാമോ;

ഓരോ സ്ഥാപനങ്ങള്‍ക്കും അനുവദിച്ചിട്ടുള്ള തുക എത്രയെന്ന് വിശദമാക്കാമോ;

ഓരോ സ്ഥാപനങ്ങളും അവയുടെ പ്രവർത്തനങ്ങൾക്കായി സമര്‍പ്പിച്ചിട്ടുള്ള പദ്ധതികള്‍ ഏതെല്ലാമെന്ന് വിശദമാക്കാമോ; അതില്‍ ഏതിനെല്ലാം അനുമതി ലഭിച്ചുവെന്ന് വ്യക്തമാക്കാമോ?

സാംസ്‌കാരിക വകുപ്പിന്റെ കീഴിൽ നടപ്പിലാക്കുന്ന പദ്ധതികൾ ഏതെല്ലാമെന്ന് വ്യക്തമാക്കാമോ;

സാംസ്‌കാരിക വകുപ്പിന് കീഴിലുള്ള വിവിധ കേന്ദ്രങ്ങൾ ഏതൊക്കെയെന്നും അവയിലെ സൗകര്യങ്ങളും സംവിധാനങ്ങളും എന്തൊക്കെയാണെന്നും ജില്ല തിരിച്ച് വ്യക്തമാക്കാമോ;

സാംസ്‌കാരിക വകുപ്പ് ആർക്കൊക്കെ ധനസഹായം നൽകുന്നുണ്ടെന്നും അതിനുള്ള മാനദണ്ഡങ്ങൾ എന്തൊക്കെയാണെന്നും അപേക്ഷിക്കേണ്ട രീതി എങ്ങനെയാണെന്നും വ്യക്തമാക്കാമോ;

കഴിഞ്ഞ അഞ്ചുവർഷം സാംസ്‌കാരിക വകുപ്പിന്റെ കീഴിൽ നടത്തിയ പരിപാടികളും ചെലവഴിച്ച തുകയും ജില്ല തിരിച്ച് വ്യക്തമാക്കാമോ?

സാംസ്കാരിക വകുപ്പ് മുഖേന കലാകാരന്മാര്‍ക്ക് പെന്‍ഷന്‍ നല്‍കുന്നുണ്ടോ; എങ്കില്‍ ഇത് ലഭിക്കുന്നതിനുള്ള അര്‍ഹതാമാനദണ്ഡം വിശദമാക്കാമോ;

എത്ര രൂപ വീതമാണ് ഈ ഇനത്തില്‍ മാസംതോറും പെന്‍ഷനായി നല്‍കി വരുന്നത്?

പ്രാദേശിക മാധ്യമപ്രവർത്തകരെ സാംസ്ക്കാരിക ക്ഷേമനിധിയിൽ ഉൾപ്പെടുത്താൻ നടപടി സ്വീകരിക്കുമോ; എന്തൊക്കെ നടപടികളാണ് ഇക്കാര്യത്തിൽ സ്വീകരിക്കുക എന്ന് വിശദമാക്കാമോ ?

കേരള നവോത്ഥാനത്തെക്കുറിച്ച് ഒരു സമഗ്ര പഠന മ്യൂസിയം സ്ഥാപിക്കുന്ന നടപടി ഏത് ഘട്ടത്തിലാണെന്ന് വെളിപ്പെടുത്തുമോ;

ഇതിനായി എന്ത് തുക വകയിരുത്തിയെന്നും എന്തു തുക ചെലവഴിച്ചുവെന്നും വ്യക്തമാക്കാമോ;

ഇതോടൊപ്പം സ്ഥാപിക്കുന്ന സ‍്മാരക മതിലിന്റെ പണി ഇപ്പോള്‍ ഏത് ഘട്ടത്തിലാണ്; ഇതിനായി എന്ത് തുകയുടെ പദ്ധതിയാണ് സര്‍ക്കാര്‍ തയ്യാറാക്കിയിട്ടുള്ളതെന്ന് അറിയിക്കാമോ?

വി ടി ഭട്ടതിരിപ്പാടിന്റെ പേരിലുള്ള പാലക്കാട്ടെ സാംസ്‌കാരിക സമുച്ചയത്തിന്റെ നിർമ്മാണ പുരോഗതിയുടെ വിശദാംശങ്ങൾ ലഭ്യമാക്കാമോ;

പ്രസ്തുത സമുച്ചയത്തിന്റെ നിർമ്മാണം എന്ന് പൂർത്തീകരിക്കാൻ കഴിയുമെന്ന് വ്യക്തമാക്കാമോ ?

ജില്ലയില്‍ ഒരു സാംസ്കാരിക സമുച്ചയം എന്ന പദ്ധതി വയനാട് ജില്ലയില്‍ നടപ്പാക്കാന്‍ എന്തൊക്കെ നടപടികളാണ് സാംസ്കാരിക വകുപ്പ് സ്വീകരിച്ചിട്ടുളളത് എന്ന് വ്യക്തമാക്കാമോ;

പദ്ധതി നടപ്പാക്കുന്നതുമായി ബന്ധപ്പെട്ട് ഇനി സ്വീകരിക്കേണ്ട നടപടികള്‍ എന്തെല്ലാമാണെന്നും ഇതിന് ചുമതലപ്പെട്ട ഉദ്യോഗസ്ഥന്‍ ആരാണെന്നും അറിയിക്കാമോ?

കാസര്‍ഗോഡ് ജില്ലയില്‍ യക്ഷഗാന കുലപതി പാര്‍ത്ഥി സുബ്ബയുടെ പേരിലുള്ള പാര്‍ത്ഥി സുബ്ബ കലാക്ഷേത്രത്തിന്റെ കെട്ടിടനിർമ്മാണ പ്രവ‍ൃത്തി പൂര്‍ത്തീകരിച്ചിട്ടുണ്ടോ; വിശദാംശങ്ങള്‍ അറിയിക്കാമോ;

പ്രസ്തുത പ്രവൃത്തിയുടെ നിലവിലുള്ള സ്ഥിതി പരിശോധിച്ചിട്ടുണ്ടോ; വിശദാംശങ്ങള്‍ അറിയിക്കാമോ;

പണി പൂര്‍ത്തിയാക്കാതെ സാമൂഹ്യവിരുദ്ധരുടെ താവളമായി മാറിയ പ്രസ്തുത കെട്ടിടത്തിന്റെ ഇന്നത്തെ പരിതാപകരമായ സ്ഥിതി മാറ്റിയെടുക്കാന്‍ തുടര്‍നടപടി സ്വീകരിക്കുമോ; വിശദാംശങ്ങള്‍ അറിയിക്കാമോ;

ഈ കലാക്ഷേത്രത്തിന് സര്‍ക്കാര്‍തല കമ്മിറ്റി ഉണ്ടായിരുന്നോ; ഇതിന്റെ നിലവിലുള്ള സ്ഥിതി എന്താണ്; വിശദാംശങ്ങള്‍ അറിയിക്കാമോ;

പ്രസ്തുത കലാക്ഷേത്രം യാഥാര്‍ത്ഥ്യമാക്കുന്നതിന്റെ ഭാഗമായി ഇതിന്റെ കമ്മിറ്റിയും പുനസംഘടിപ്പിക്കുന്ന വിഷയം പരിഗണിക്കുമോ; വിശദാംശങ്ങള്‍ അറിയിക്കാമോ?

നെയ്യാറ്റിന്‍കര നിയോജകമണ്ഡലത്തിലെ ആറാലുംമൂട്ടില്‍ സ്ഥാപിക്കാന്‍ ഉദ്ദേശിക്കുന്ന സിനിമാ തിയേറ്റര്‍ നിര്‍മ്മാണം സംബന്ധിച്ച ഡി.പി.ആര്‍. പൂര്‍ത്തീകരിച്ചിട്ടുണ്ടോ;

പ്രസ്തുത തിയേറ്റര്‍ നിര്‍മ്മാണത്തിന് കിഫ്ബി ഭരണാനുമതി നല്‍കിയിട്ടുണ്ടോ എന്ന് വിശദമാക്കാമോ;

സംസ്ഥാനത്ത് പുതിയതായി ഏതൊക്കെ സ്ഥലങ്ങളിലാണ് തിയേറ്റര്‍ നിര്‍മ്മിക്കുന്നത് എന്ന് വിശദമാക്കാമോ?

ആയിരത്തോളം മാപ്പിളപ്പാട്ടുകളും നിരവധി ലളിത ഗാനങ്ങളും നാടക ഗാനങ്ങളും എഴുതി, ചിട്ടപ്പെടുത്തി, പാടിയിട്ടുള്ള തൃശൂര്‍ എളവള്ളി പഞ്ചായത്തിലെ പൂവത്തൂര്‍ സ്വദേശി കെ.ജി. സത്താറെന്ന അബുസത്താര്‍ ബാവയ്ക്ക് ഉചിതമായ ഒരു സ്മാരകം നിലവിലില്ലെന്ന കാര്യം ശ്രദ്ധയില്‍പ്പെട്ടിട്ടുണ്ടോ;

നിരവധി പുരസ്കാരങ്ങളും പ്രശംസാ പത്രങ്ങളും നേടിയ കെ.ജി. സത്താറിന്റെ ഓര്‍മ്മ നിലനിര്‍ത്തുന്നതിന് സമുചിതമായ ഒരു സാംസ്കാരിക കേന്ദ്രം മണലൂര്‍ മണ്ഡലത്തിലെ പൂവത്തൂല്‍ കേന്ദ്രമാക്കി ആരംഭിക്കാന്‍ നടപടി സ്വീകരിക്കുമോ?

പൂഞ്ഞാർ നിയോജകമണ്ഡലത്തിൽ സാംസ്കാരിക വകുപ്പ് നടപ്പിലാക്കി വരുന്ന പദ്ധതികളുടെ വിശദാംശം വ്യക്തമാക്കുമോ;

മണ്ഡലത്തിൽ ഒരു സാംസ്കാരിക മ്യൂസിയം ആരംഭിക്കാൻ നടപടി സ്വീകരിക്കുമോയെന്ന് വ്യക്തമാക്കുമോ?

കോവിഡ് പ്രതിസന്ധി മൂലം കലാപരിപാടികൾ അവതരിപ്പിക്കാൻ കഴിയാത്ത സ്റ്റേജ് കലാകാരന്മാരെ സഹായിക്കുന്നതിനായി സാംസ്കാരിക വകുപ്പ് എന്തെങ്കിലും പദ്ധതി ഏർപ്പെടുത്തിയിട്ടുണ്ടോ; വിശദാംശം നൽകുമോ?

ലോകത്തെമ്പാടുമുള്ള മലയാളികള്‍ക്ക് മാതൃഭാഷാ പഠനത്തിന് അവസരമൊരുക്കാനായി പദ്ധതി ആവിഷ്ക്കരിച്ചിട്ടുണ്ടോ; എങ്കില്‍ വിശദാംശങ്ങള്‍ വ്യക്തമാക്കാമോ;

മലയാളം മിഷന്‍ പദ്ധതിയനുസരിച്ച് നടത്തുന്ന കോഴ്സുകള്‍, അവയുടെ കരിക്കുലം, ബോധന തന്ത്രം, വിദ്യാര്‍ത്ഥികളുടെ എണ്ണം എന്നിവ സംബന്ധിച്ച വിശദാംശങ്ങള്‍ അറിയിക്കാമോ;

സംസ്ഥാനത്തിന് പുറത്ത് ഏതൊക്കെ പ്രദേശങ്ങളിലേക്കും രാജ്യങ്ങളിലേക്കും മിഷന്‍ പ്രവര്‍ത്തനം വ്യാപിപ്പിക്കാന്‍ കഴിഞ്ഞിട്ടുണ്ട്;

മാതൃഭാഷ പഠനത്തോടൊപ്പം എവിടെയെല്ലാം മലയാളി അവിടെയെല്ലാം മലയാളം എന്ന മുദ്രാവാക്യം ലോക മലയാളികളില്‍ ഐക്യവും കൂട്ടായ്മയും ഉണ്ടാക്കുന്നതിന് സഹായകമായിട്ടുണ്ടോ; വിശദമാക്കാമോ?

കോവിഡ് കാരണം വരുമാനമാര്‍ഗ്ഗമില്ലാതെ ആയ കലാകാരന്മാര്‍ക്ക് സാമ്പത്തിക സഹായം നല്‍കുന്ന കാര്യം പരിഗണനയിലുണ്ടോ; വിശദാംശങ്ങള്‍ ലഭ്യമാക്കാമോ?

സംസ്ഥാനത്ത് ഗ്രാമീണ കലാകാരന്മാരെ സംരക്ഷിക്കുന്നതിന് സാംസ്കാരിക വകുപ്പ് സ്വീകരിച്ചുവരുന്ന നടപടികള്‍ അറിയിക്കാമോ;

കെ.എസ്.എഫ്.ഡി.സി.ക്ക് ഗ്രാമപ്രദേശങ്ങളില്‍ തീയേറ്റര്‍ ശൃംഖല സ്ഥാപിക്കാന്‍ പദ്ധതിയുണ്ടോ?

ടൂറിസം മേഖലയിൽ സംസ്ഥാനത്തിന്റെ അനന്തമായ സാധ്യതകള്‍ പരിഗണിച്ച് വിദേശ രാജ്യങ്ങളില്‍, കേരളത്തിന്റെ തനത് കലകളുടെ പ്രചാരണത്തിന് പ്രത്യേക പരിഗണന നല്‍കുമോ; എങ്കില്‍ ആയതിലേയ്ക്കായി എന്തെല്ലാം നടപടികള്‍ സ്വീകരിക്കുമെന്ന് വ്യക്തമാക്കുമോ;

സംസ്ഥാനത്തെ പ്രധാന ടൂറിസം കേന്ദ്രങ്ങളില്‍ സ്ഥിരമായ കലാ കേന്ദ്രങ്ങള്‍ സ്ഥാപിക്കുന്നതിന് നടപടികള്‍ സ്വീകരിക്കുമോ എന്ന് അറിയിക്കുമോ ?

കേരളത്തിലെ പ്രാദേശിക മാധ്യമ പ്രവര്‍ത്തകരെ സാംസ്കാരിക ക്ഷേമനിധിയില്‍ ഉള്‍പ്പെടുത്തുന്നതിന് എന്തെങ്കിലും നടപടികള്‍ സ്വീകരിച്ചിട്ടുണ്ടോ;

ഇല്ലെങ്കില്‍ ആയതിനുള്ള അടിയന്തര നടപടി സ്വീകരിക്കുമോയെന്ന് വ്യക്തമാക്കാമോ?

കോവിഡ് മഹാമാരി മൂലം തൊഴില്‍രഹിതരായ കലാകാരന്മാരുടെ വിവരശേഖരണം നടത്തിയിട്ടുണ്ടോ;

ഇവര്‍ക്കായി പ്രത്യേക പദ്ധതികള്‍ നടപ്പാക്കാന്‍ ആലോചിക്കുന്നുണ്ടോ; വിശദാംശം അറിയിക്കുമോ;

കേരളോത്സവം പോലുള്ള പദ്ധതികള്‍ക്കായി ചെലവുകള്‍ ഇല്ലാത്ത സാഹചര്യത്തില്‍ കലാ-കായിക രംഗത്തുള്ളവര്‍ക്കായി ഈ ഫണ്ട് വിനിയോഗിക്കുന്നതിന് നടപടി സ്വീകരിക്കുമോയെന്ന് വ്യക്തമാക്കുമോ?

കേരള തുളു അക്കാദമി നിലവില്‍ വന്നത് ഏത് വര്‍ഷമാണ്; ഇതിന്റെ പ്രവര്‍ത്തനങ്ങള്‍ എന്തൊക്കെയാണെന്ന് വിശദമാക്കുമോ;

ഇതിന് 2011‌-2016 വര്‍ഷം ഗ്രാന്റായി എന്ത് തുക നല്‍കിയിട്ടുണ്ടെന്ന് അറിയിക്കുമോ; 2016-2021 വര്‍ഷം അക്കാദമിക്ക് എന്തൊക്കെ സാമ്പത്തിക ആനുകൂല്യങ്ങളാണ് ലഭ്യമാക്കിയിട്ടുള്ളത് എന്ന് വിശദമാക്കുമോ;

2021 - 22 വര്‍ഷം തുളു അക്കാദമിക്കായി എത്ര തുക വകയിരുത്തിയിട്ടുണ്ടെന്ന് അറിയിക്കുമോ; ഈ തുക ഏതെല്ലാം ആവശ്യങ്ങള്‍ക്കാണ് വിനിയോഗിക്കുന്നത് എന്ന് വിശദമാക്കുമോ;

തുളു അക്കാദമിയുടെ പ്രവര്‍ത്തനം കൂടുതല്‍ വിപുലീകരിക്കുന്നതിന് ആവശ്യമായ ഫണ്ട് അനുവദിക്കുവാന്‍ നടപടി സ്വീകരിക്കുമോ?

കഴിഞ്ഞ സര്‍ക്കാരിന്റെ കാലത്ത് സാംസ്കാരിക വകുപ്പില്‍ നടപ്പിലാക്കപ്പെട്ട പ്രധാന പദ്ധതികളുടെ വിശദാംശം ലഭ്യമാക്കാമോ;

ഈ സര്‍ക്കാരിന്റെ കാലത്ത് പ്രസ്തുത വകുപ്പില്‍ നടപ്പിലാക്കാന്‍ ഉദ്ദേശിക്കുന്ന പ്രധാനപ്പെട്ട പദ്ധതികള്‍ എന്തൊക്കെയാണ്; വിശദാംശം ലഭ്യമാക്കുമോ?

കോവിഡ് വ്യാപനം കാരണം നാടൻ കലാകാരന്മാര്‍ക്ക് അവരുടെ പരിപാടികള്‍ അവതരിപ്പിക്കാൻ ഉത്സവങ്ങളോ മറ്റ് പരിപാടികളോ ഇല്ലാത്തത് കൊണ്ട് ജീവിക്കാൻ കഷ്ടപ്പെടുന്ന കാര്യം ശ്രദ്ധയില്‍പ്പെട്ടിട്ടുണ്ടോ;

സാംസ്കാരിക വകുപ്പിന്റെ സഹകരണത്തോടെ ഇത്തരം ഗ്രാമീണ കലാകാരന്മാരെ കണ്ടെത്തി പഞ്ചായത്ത് തലത്തില്‍ ധനസഹായം അനുവദിക്കാൻ നടപടി സ്വീകരിക്കുമോയെന്ന് വ്യക്തമാക്കാമോ?

വൈക്കം നിയോജകമണ്ഡലത്തില്‍ കിഫ്ബി പദ്ധയില്‍ ഉള്‍പ്പെടുത്തി പ്രഖ്യാപിച്ച സിനിമാ തീയേറ്ററിന്റെ നിര്‍മ്മാണ പുരോഗതി സംബന്ധിച്ച വിവരം അറിയിക്കുമോ?

കഴിഞ്ഞ സര്‍ക്കാരിന്റെ കാലത്ത് (2016 - 2021) ഒറ്റപ്പാലം നിയോജകമണ്ഡലത്തില്‍ യുവജന ക്ഷേമബോര്‍ഡ് എന്തൊക്കെ പദ്ധതികളാണ് നടപ്പിലാക്കിയതെന്ന് വിശദമാക്കാമോ;

പ്രസ്തുത മണ്ഡലത്തില്‍ യുവജന ക്ഷേമവുമായി ബന്ധപ്പെട്ട് പുതുതായി ആരംഭിക്കാന്‍ ഉദ്ദേശിക്കുന്ന പദ്ധതികള്‍ എന്തെല്ലാം; വിശദാംശങ്ങള്‍ ലഭ്യമാക്കാമോ?

സംസ്ഥാനത്ത്‌ യുവജനങ്ങള്‍ക്കിടയില്‍ വര്‍ദ്ധിച്ചുവരുന്ന മയക്കുമരുന്ന്, മദ്യം എന്നിവയുടെ ഉപഭോഗം നിയന്ത്രിക്കാന്‍ ഏതൊക്കെ പദ്ധതികളാണ് നിലവിലുള്ളതെന്ന് വിശദമാക്കുമോ?