ചെറുകിട വ്യവസായ സംരംഭങ്ങൾ പ്രോത്സാഹിപ്പിക്കുന്നതിന്റെ ഭാഗമായി വൈദ്യുതി വകുപ്പ് സംരംഭകർക്കായി എന്തൊക്കെ സഹായങ്ങൾ നൽകുന്നുണ്ടെന്ന് വ്യക്തമാക്കാമോ;

പുതിയ സംരംഭങ്ങൾ ആരംഭിക്കുമ്പോൾ വോൾട്ടേജ് വ്യതിയാനം വരാത്ത വിധത്തിൽ വൈദ്യുതി ലഭിക്കുന്നതിന് എന്തൊക്കെ നടപടികളാണ് സ്വീകരിക്കുന്നതെന്ന് വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം കുന്നത്തുനാട് മണ്ഡലത്തില്‍ വൈദ്യുതി വകുപ്പ് വിവിധ പദ്ധതികള്‍ വഴി ആവിഷ്കരിച്ച് നടപ്പിലാക്കിയ പദ്ധതികള്‍ ഏതെല്ലാമെന്ന് വ്യക്തമാക്കാമോ;

ഓരോ പദ്ധതിയ്ക്കും വേണ്ടി അനുവദിച്ചിട്ടുള്ള തുക എത്ര വീതമെന്നും ഓരോ പദ്ധതിയുടെയും നിലവിലെ സ്ഥിതി എന്തെന്നും വ്യക്തമാക്കാമോ;

പ്രസ്തുത പദ്ധതികളിൽ പൂര്‍ത്തീകരിക്കുവാന്‍ ഇനിയും ശേഷിക്കുന്ന പ്രവൃത്തികള്‍ എന്നത്തേക്ക് പൂര്‍ത്തീകരിക്കുവാന്‍ കഴിയുമെന്ന് വ്യക്തമാക്കാമോ?

വീട്, കടമുറികൾ, കോട്ടേജ്, പമ്പ് ഹൗസ്, ഷെഡുകൾ (കൃഷി ആവശ്യത്തിന്), തുടങ്ങി വിവിധ ആവശ്യങ്ങൾക്കായുള്ള വൈദ്യുതി ലഭിക്കുന്നതിന് വേണ്ടി അപേക്ഷ നൽകുമ്പോൾ ഒരേതരത്തിലുള്ള നടപടിക്രമങ്ങളാണോ സ്വീകരിക്കേണ്ടത്; വിശദമാക്കാമോ;

ഒക്യുപ്പൻസി അനുസരിച്ച് അപേക്ഷ നടപടിക്രമങ്ങളിൽ മാറ്റമുണ്ടോ; എങ്കിൽ വിശദാംശം ലഭ്യമാക്കാമോ;

പ്രസ്തുത സ്ഥാപനങ്ങളിലേക്കെല്ലാം അപേക്ഷ സമർപ്പിച്ച് വൈദ്യുതി കണക്ഷൻ ലഭിക്കുന്നതിനുള്ള സമയപരിധി എത്രയാണെന്ന് വ്യക്തമാക്കാമോ?

ഇലക്ട്രിക് വാഹനങ്ങള്‍ ചാര്‍ജ്ജ് ചെയ്യുന്നതിനായി കേരളത്തില്‍ എത്ര ചാര്‍ജ്ജിംഗ് സ്റ്റേഷനുകള്‍ സ്ഥാപിച്ചിട്ടുണ്ടെന്ന് ജില്ല തിരിച്ച് വ്യക്തമാക്കാമോ;

കണ്ണൂര്‍ ജില്ലയിലുള്ള ചാര്‍ജ്ജിംഗ് സ്റ്റേഷനുകള്‍ എവിടെയെല്ലാമാണെന്ന് അറിയിക്കാമോ?

മലപ്പുറം മണ്ഡലത്തിൽ വൈദ്യുതി വകുപ്പിന്റെ കീഴിൽ നടന്നു വരുന്ന വിവിധ പ്രവർത്തനങ്ങളും അവയുടെ പുരോഗതിയും വെളിപ്പെടുത്തുമോ;

വോൾട്ടേജ് മെച്ചപ്പെടുത്തൽ പ്രവൃത്തികളുടെ ഭാഗമായി വിവിധ പ്രദേശങ്ങളിൽ ട്രാൻസ്‍ഫോമറുകളും ത്രീഫേസ് ലൈനുകളും സ്ഥാപിക്കുന്ന പ്രവൃത്തികളുടെ വിശദാംശം നൽകുമോ;

പ്രവൃത്തികൾ എത്രയും വേഗം പൂർത്തീകരിക്കുവാൻ നിർദേശം നൽകുമോ; വിശദമാക്കാമോ?

2016-17 മുതല്‍ വൈദ്യുതി വകുപ്പില്‍ നിന്നും മാവേലിക്കര മണ്ഡലത്തിലെ വിവിധ ഇലക്ട്രിക് സെക്ഷന്‍ ഓഫീസുകള്‍ മുഖേന അനുവദിച്ച പ്രവൃത്തികളുടെ വിശദാംശം ലഭ്യമാക്കുമോ; അവയുടെ തല്‍സ്ഥിതി അറിയിക്കുമോ?

മണലൂര്‍ മണ്ഡലത്തില്‍ ഇലക്ട്രിക് വാഹനങ്ങള്‍ റീചാര്‍ജ്ജ് ചെയ്യുന്നതിന് കെ. എസ്. ഇ. ബി. യുടെ കീഴിലുള്ള എത്ര ചാര്‍ജ്ജിംഗ് സ്റ്റേഷനുകള്‍ നിലവിലുണ്ടെന്നും അവ എവിടെയെല്ലാമാണെന്നും വ്യക്തമാക്കാമോ;

പുതുതായി എവിടെയെല്ലാം ചാര്‍ജ്ജിംഗ് സ്റ്റേഷനുകള്‍ സ്ഥാപിക്കുവാന്‍ നിശ്ചയിച്ചിട്ടുണ്ടെന്നുള്ള വിവരം നല്‍കാമോ?

സംസ്ഥാനത്ത് ആട്ടോമാെബെെല്‍ ചാര്‍ജ്ജിംഗ് ഇന്‍ഫ്രാസ്ട്രക്ചര്‍ നവീകരണവുമായി ബന്ധപ്പെട്ട് സര്‍ക്കാര്‍ നടത്തിയിട്ടുള്ള ഇടപെടലുകള്‍ വിലയിരുത്തിയിട്ടുണ്ടോ; വിശദാംശം നല്‍കുമോ;

ആട്ടോമാെബെെല്‍ ചാര്‍ജ്ജിംഗ് ഇന്‍ഫ്രാസ്ട്രക്ചര്‍ നവീകരണ രംഗത്ത് ആധുനിക സാങ്കേതിക വിദ്യ നടപ്പാക്കുന്നത് പരിഗണനയിലുണ്ടോ; ചെറിയ വാഹനങ്ങളുടെ ബാറ്ററി സ്വാപ്പിംഗ് സാധ്യമാക്കുന്നത് പരിഗണിക്കുമോ ; വിശദവിവരം ലഭ്യമാക്കുമോ;

വെെദ്യുതി വാഹനരംഗത്ത് കൂടുതല്‍ നിക്ഷേപം ആകര്‍ഷിക്കുന്നതും വെെദ്യുത വാഹനങ്ങള്‍ സാര്‍വത്രികമാക്കുന്നതും ലക്ഷ്യമിട്ട് കേന്ദ്ര സര്‍ക്കാര്‍ പുറത്തിറക്കിയ പുതിയ ഇ. വി. നയം 2025 പ്രാബല്യത്തില്‍ വരുന്നതോടുകൂടി സംസ്ഥാനത്തുണ്ടായേക്കാവുന്ന അധിക വെെദ്യുതിയുടെ ആവശ്യകത പഠനവിധേയമാക്കിയിട്ടുണ്ടോ; വിശദമാക്കുമോ?

നാദാപുരം മണ്ഡലത്തില്‍ വൈദ്യുതിക്ഷാമം പരിഹരിക്കുന്നതിന് വകുപ്പ് മുഖേന പൂര്‍ത്തിയായ പ്രോജക്ടുകൾ ഏതൊക്കെയാണെന്ന് വ്യക്തമാക്കാമോ;

2016 ജൂണ്‍ മുതല്‍ നാളിതുവരെ ഈ മണ്ഡലത്തിലെ പത്ത് പഞ്ചായത്തുകളിൽ വൈദ്യുതിക്ഷാമം പരിഹരിക്കുന്നതിന് നടപ്പിലാക്കിയ പദ്ധതികൾ ഏതൊക്കെയാണെന്ന് അടങ്കല്‍ തുക സഹിതം വിശദമാക്കാമോ;

ഈ പദ്ധതികള്‍ നടപ്പിലാക്കിയത് വഴി ഏതൊക്കെ ഗ്രാമ പഞ്ചായത്തിൽ വൈദ്യുതി ക്ഷാമത്തിന് പരിഹാരം ആയിട്ടുണ്ടെന്ന് വിശദമാക്കാമോ?

ഇരിട്ടി കെ. എസ്. ഇ. ബി. സെക്ഷന് കീഴിൽ വരുന്ന ഉളിയിൽ ആവിലാട് താമസിക്കുന്ന ഷെർമിന എന്ന വ്യക്തി വൈദ്യുതി കണക്ഷൻ ലഭിക്കുന്നതിനുവേണ്ടി അപേക്ഷ സമർപ്പിച്ചിട്ടുണ്ടോ; ഉണ്ടെങ്കിൽ പ്രസ്തുത അപേക്ഷയുടെ നിലവിലെ സ്ഥിതി എന്താണ് ;

വൈദ്യുതി കണക്ഷൻ ലഭിക്കുന്നതിന് എന്തെങ്കിലും തടസ്സമുള്ളതായി അപേക്ഷക സർക്കാരിന്റെ ശ്രദ്ധയിൽപ്പെടുത്തിയിട്ടുണ്ടോ; പ്രസ്തുത വിഷയവുമായി ബന്ധപ്പെട്ട ഏതെങ്കിലും നിവേദനം ലഭിച്ചിട്ടുണ്ടോ; ഉണ്ടെങ്കിൽ എന്നാണ് നിവേദനം ലഭിച്ചതെന്നും ആയതിന്മേൽ സ്വീകരിച്ച നടപടിയുടെ നിലവിലെ സ്ഥിതിയെന്താണെന്നും അറിയിക്കുമോ ;നിവേദനം നൽകി പത്തുമാസം കഴിഞ്ഞിട്ടും കണക്ഷന്റെ കാര്യത്തിൽ യാതൊരു തീരുമാനവും എടുത്തിട്ടില്ല എന്നത് ശ്രദ്ധയിൽപ്പെട്ടിട്ടുണ്ടോ; വിശദമാക്കാമോ;

ഭവന നിർമ്മാണ സഹായ പദ്ധതിയിൽ ഉൾപ്പെടുത്തി വീട് ലഭിച്ച അപേക്ഷക ഉള്‍പ്പെടെയുള്ള 5 പേർ വീട് നിർമ്മിക്കുന്ന പ്രദേശത്ത് വൈദ്യുതി കണക്ഷൻ ലഭിക്കുന്നതിനായി രണ്ടര ലക്ഷത്തോളം രൂപ അടക്കണമെന്ന വ്യവസ്ഥയിൽ ഇളവ് നല്‍കി വൈദ്യുതി കണക്ഷൻ നല്‍കാന്‍ ആവശ്യമായ നടപടി സ്വീകരിക്കാമോ?

ഇടുക്കി ജില്ലയിലെ അപ്പര്‍ ചെങ്കുളം ചെറുകിട ജലവൈദ്യുത പദ്ധതിയുടെ വിശദാംശവും നിര്‍മ്മാണ പുരോഗതിയും വിശദമാക്കാമോ;

പ്രസ്തുത പ്രവൃത്തിയുടെ നിര്‍മ്മാണവുമായി ബന്ധപ്പെട്ട് വീടും സ്ഥലവും നഷ്ടപ്പെടുന്നവരുടെ പരാതിയില്‍ എന്തൊക്കെ നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കുമോ?

വോൾട്ടേജ് ക്ഷാമം പരിഹരിക്കണമെന്നാവശ്യപ്പെട്ട് പേരാമ്പ്ര മണ്ഡലത്തിലെ ഏതൊക്കെ പ്രദേശങ്ങളിൽ നിന്നും അപേക്ഷകൾ ലഭിച്ചിട്ടുണ്ടെന്ന് വ്യക്തമാക്കാമോ;

പ്രസ്തുത അപേക്ഷകളിൽ എന്ത് നടപടി സ്വീകരിച്ചുവെന്ന് വിശദമാക്കാമോ?

2024-2025 സാമ്പത്തിക വര്‍ഷം കെ. എസ്. ഇ. ബി. യുടെ പ്രവര്‍ത്തന ലാഭം എത്രയാണെന്ന് വ്യക്തമാക്കുമോ;

ഈ സര്‍ക്കാരിന്റെ കാലയളവില്‍ പ്രവര്‍ത്തനലാഭം നേടുന്നതിനായി നടത്തിയിട്ടുള്ള ഇടപെടലുകള്‍ പരിശോധിച്ചിട്ടുണ്ടോ; വ്യക്തമാക്കാമോ;

വൈദ്യുതി വാങ്ങല്‍ സംബന്ധിച്ച് എടുത്ത നടപടികള്‍ കാരണം ശരാശരി വൈദ്യുതി വാങ്ങല്‍ വിലയില്‍ കുറവുണ്ടായിട്ടുണ്ടോ; വ്യക്തമാക്കുമോ;

വൈദ്യുതി ചാര്‍ജ്ജിനത്തില്‍ ബോര്‍ഡിന് കിട്ടേണ്ട കുടിശിക ഈടാക്കാനുള്ള നടപടികളിലെ പുരോഗതി അറിയിക്കാമോ?

കുറ്റ്യാടി മണ്ഡലത്തിൽ പുതുതായി വൈദ്യുതി ചാർജിംഗ് സ്റ്റേഷനുകൾ സ്ഥാപിക്കുന്നതിന് നടപടി സ്വീകരിക്കുമോ; വിശദമാക്കുമോ;

കുറ്റ്യാടി, കക്കട്ടിൽ, ആയഞ്ചേരി, വില്യാപ്പള്ളി, തിരുവള്ളൂർ, തണ്ണീർപ്പന്തൽ, പള്ളിയത്ത്, മണിയൂർ, പുറമേരി എന്നീ പ്രധാന സ്ഥലങ്ങളിൽ വൈദ്യുതി ചാർജിംഗ് സ്റ്റേഷനുകൾ ഇല്ലാത്തത് കാരണം നേരിടുന്ന പ്രതിസന്ധി പരിഹരിക്കുന്നതിന് നടപടി സ്വീകരിക്കുമോ; വിശദമാക്കുമോ?

കാഞ്ഞൂര്‍ ഗ്രാമപഞ്ചായത്തിലെ ഹാപ്പിനസ് പാര്‍ക്കിന്റെ മദ്ധ്യത്തിലൂടെ കടന്നുപോകുന്ന ഹൈടെന്‍ഷന്‍/ ലോ ടെന്‍ഷന്‍ ലൈനുകള്‍ ഭൂമിക്കടിയിലൂടെ കേബിളുകളിലേയ്ക്ക് മാറ്റി സ്ഥാപിക്കണമെന്നാവശ്യപ്പെട്ട് കാഞ്ഞൂര്‍ പഞ്ചായത്ത് പ്രസിഡന്റ് 25.02.2025-ന് സമര്‍പ്പിച്ച 223/എം (ഇഎല്‍ഇ)/വിഐപി/ ആര്‍എല്‍/2025 നമ്പര്‍ നിവേദനത്തിന്മേല്‍ കെ. എസ്. ഇ. ബി. എല്‍ സി. എം. ഡി. നാളിതുവരെ എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കാമോ;

ഈ വിഷയത്തില്‍ സി.എം.ഡി. നാളിതുവരെ എന്തെങ്കിലും റിപ്പോര്‍ട്ടുകള്‍ ശേഖരിച്ചിട്ടുണ്ടോ; എങ്കില്‍ ആയതിന്റെ പകര്‍പ്പ് ലഭ്യമാക്കാമോ;

ഈ വിഷയത്തില്‍ അടിയന്തര തുടര്‍ നടപടികള്‍ സ്വീകരിക്കുമോ; വ്യക്തമാക്കാമോ?

ഇലക്ട്രിക് വാഹനങ്ങൾ സംസ്ഥാനത്ത് വർധിച്ച് വരുന്ന സാഹചര്യത്തിൽ കൂടുതൽ ചാർജിംഗ് സ്റ്റേഷനുകൾ ആരംഭിക്കേണ്ടതിന്റെ അനിവാര്യത സർക്കാറിന്റെ ശ്രദ്ധയിൽപ്പെട്ടിട്ടുണ്ടോയെന്ന് അറിയിക്കാമോ;

കെ. എസ്. ഇ. ബി. ക്ക് കീഴിൽ നിലവിൽ സംസ്ഥാനത്ത് എത്ര ചാർജിംഗ് സ്റ്റേഷനുകൾ പ്രവർത്തിക്കുന്നുണ്ടെന്ന് ജില്ല തിരിച്ചുള്ള കണക്ക് ലഭ്യമാക്കുമോ?

തിരൂരങ്ങാടി മണ്ഡലത്തിലെ കക്കാട് മുതൽ കോഴിച്ചെന വരെയുള്ള പ്രദേശത്ത് ഹൈവേയുടെ വശത്തുള്ള സ്വകാര്യ ഭൂമിയിലൂടെ കടന്നുപോകുന്ന വൈദ്യുതി മെയിൻ ലൈനുകൾ അപകടസാധ്യത കണക്കിലെടുത്ത് മാറ്റി സ്ഥാപിക്കണമെന്ന ആവശ്യത്തിൽ എന്തെങ്കിലും നടപടി സ്വീകരിച്ചിട്ടുണ്ടോയെന്ന് വിശദമാക്കാമോ;

പ്രസ്തുത വൈദ്യുതി ലൈനുകൾ മാറ്റി സ്ഥാപിക്കുന്നതിനാവശ്യമായ ചെലവുകൾ വൈദ്യുതി ബോർഡ് വഹിക്കുമോയെന്ന് വ്യക്തമാക്കാമോ?

ഈ സർക്കാർ അധികാരത്തിൽ വന്ന ശേഷം നാളിതുവരെ കോഴിക്കോട് സൗത്ത് മണ്ഡലത്തിൽ ഏതെല്ലാം പദ്ധതികളാണ് വൈദ്യുതി വകുപ്പ് അനുവദിച്ചതെന്ന് വിശദമാക്കാമോ;

ഈ പദ്ധതികളുടെ വിശദവിവരങ്ങൾ, ഓരോ പദ്ധതിക്കും അനുവദിച്ച തുക, നിർവഹണ ഏജൻസി എന്നിവ സംബന്ധിച്ച വിവരം ലഭ്യമാക്കാമോ;

പദ്ധതികളുടെ നിലവിലെ സ്ഥിതി വ്യക്തമാക്കാമോ?

പത്തനംതിട്ട ജില്ലയിലെ മണിയാര്‍ ജലവൈദ്യുത പദ്ധതിയുടെ കരാര്‍ കാലാവധി അവസാനിച്ച ശേഷവും കാര്‍ബൊറാണ്ടം യൂണിവേഴ്സല്‍ കമ്പനി, പ്രസ്തുത പദ്ധതി കെ. എസ്. ഇ. ബി. -ക്ക് കൈമാറാത്തതിന്റെ കാരണം അറിയിക്കാമോ;

കരാര്‍കാലാവധിക്ക് ശേഷം മണിയാര്‍ ജലവൈദ്യുതി പദ്ധതിയില്‍ നിന്നും പ്രസ്തുത കമ്പനി നടത്തിയ വൈദ്യുതി ഉല്പാദനത്തിന്റേയും വിതരണത്തിന്റേയും വിശദാംശം ലഭ്യമാക്കാമോ;

കരാര്‍ കാലാവധിക്ക് ശേഷവും പ്രസ്തുത കമ്പനി പ്രസ്തുത പ്രോജക്ടിന്റെ നടത്തിപ്പുമായി മുന്നോട്ട് പോകുന്നുവെന്നത് തികച്ചും നിയമവിരുദ്ധമാണെന്നിരിക്കേ ഇക്കാര്യത്തില്‍ എന്ത് നിയമനടപടിയാണ് കെ. എസ്. ഇ. ബി. സ്വീകരിച്ചിട്ടുള്ളതെന്ന് അറിയിക്കാമോ;

മണിയാര്‍ ജലവൈദ്യുത പദ്ധതി അടിയന്തരമായി കെ. എസ്. ഇ. ബി. -ക്ക് കൈമാറുന്നതിനുള്ള നടപടി സ്വീകരിക്കുമോയെന്ന് വ്യക്തമാക്കാമോ?

പാറശ്ശാല മണ്ഡലത്തിൽ സ്ഥാപിച്ച ഇലക്ട്രിക് വെഹിക്കിള്‍ ചാര്‍ജിംഗ് സ്റ്റേഷനുകളുടെ വിശദാംശം ലഭ്യമാക്കാമോ; ഇതിൽ ഫാസ്റ്റ് ചാര്‍ജിംഗ് സ്റ്റേഷനുകള്‍ ഉണ്ടോ; വിശദമാക്കാമോ;

ഇവിടെ സ്ഥാപിച്ച എല്ലാ സ്റ്റേഷനുകളും സുഗമമായി പ്രവർത്തിച്ചു വരുന്നുണ്ടോ; വിശദമാക്കാമോ;

ഇക്കാലയളവില്‍ പ്രസ്തുത ചാർജിംഗ് സ്റ്റേഷുകളിലൂടെ കെ. എസ്. ഇ. ബി. ക്ക് എത്ര രൂപയുടെ വരുമാനം ഉണ്ടായി എന്നുള്ള വിവരം അറിയിക്കാമോ;

കൂടുതൽ സ്ഥലങ്ങളിലേക്ക് ചാർജിംഗ് സ്റ്റേഷനുകൾ വ്യാപിപ്പിക്കുന്നതിനുള്ള നടപടികൾ ആലോചനയിലുണ്ടോ; വിവരം അറിയിക്കാമോ?

സംസ്ഥാനത്ത് ആകെയുള്ള വ്യാവസായിക കണക്ഷനുകളുടെ എണ്ണം എത്രയാണ്; ഇതില്‍ ലോ ടെന്‍ഷന്‍ (LT), ഹൈ ടെന്‍ഷന്‍ (H T), എക്സ്ട്രാ ഹൈ ടെന്‍ഷന്‍ (EHT) ഉപഭോക്താക്കളുടെ എണ്ണം എത്ര വീതമാണ്; ജില്ല തിരിച്ചുള്ള കണക്ക് ലഭ്യമാക്കുമോ;

കഴിഞ്ഞ സര്‍ക്കാരിന്റെയും ഈ സര്‍ക്കാരിന്റെയും കാലത്ത് ഓരോ വര്‍ഷവും പുതിയതായി നല്‍കിയ വ്യാവസായിക കണക്ഷനുകളുടെ എണ്ണം എത്ര വീതം ആണ്; ഇതില്‍ ലോ ടെന്‍ഷന്‍ (LT), ഹൈ ടെന്‍ഷന്‍ (HT), എക്സ്ട്രാ ഹൈ ടെന്‍ഷന്‍ (EHT) ഉപഭോക്താക്കളുടെ എണ്ണം എത്ര വീതമാണ്; വര്‍ഷം തിരിച്ചുള്ള കണക്ക് ലഭ്യമാക്കുമോ;

സംസ്ഥാനത്ത് നിലവിലുള്ള വൈദ്യുതി നിരക്ക് ഗാര്‍ഹിക കണക്ഷനും വ്യവസായ സംരംഭങ്ങള്‍ക്കുള്ള കണക്ഷനും ഉള്‍പ്പടെ ഓരോന്നിനും ഏത് നിരക്കിലാണ്; വിശദാംശം ലഭ്യമാക്കുമോ;

രാത്രി 10 മുതല്‍ രാവിലെ 6 വരെ സാധാരണ വ്യാവസായിക നിരക്കിനേക്കാള്‍ അധിക നിരക്ക് ഏര്‍പ്പെടുത്തിയിട്ടുണ്ടോ; ഇല്ലെങ്കില്‍ അധിക വര്‍ദ്ധന ആവശ്യപ്പെട്ട് കെ. എസ്. ഇ. ബി. റഗുലേറ്ററി കമ്മീഷനെ സമീപിച്ചിട്ടുണ്ടോ; എങ്കില്‍ അത് രാത്രി പ്രവര്‍ത്തിക്കുന്ന ഐ. ടി. അനുബന്ധ വ്യവസായങ്ങള്‍ക്ക് ഉള്‍പ്പടെ തിരിച്ചടിയാവും എന്നത് ശ്രദ്ധയില്‍പ്പെട്ടിട്ടുണ്ടോ;

സംസ്ഥാനത്ത് വ്യവസായ സൗഹൃദമായ വൈദ്യുതി നയം നടപ്പിലാക്കുമോ?

വെെദ്യുതിയില്‍ നിന്നുള്ള അപകടങ്ങള്‍, മരണങ്ങൾ എന്നിവ കുറയ്ക്കുന്നതിന് വൈദ്യുതി വകുപ്പ് എന്തൊക്കെ നടപടികളാണ് സ്വീകരിച്ചിട്ടുള്ളത്; വിശദമാക്കാമോ?

1166 276 00 9151 നമ്പർ വൈദ്യുത കണക്ഷൻ നിലവിൽ ആരുടെ പേരിൽ ആണെന്നും ഈ കണക്ഷൻ എത്ര വർഷമായിട്ടുള്ളതാണെന്നും വ്യക്തമാക്കാമോ;

കെട്ടിട ഉടമയുടെ സമ്മത പ്രകാരം വർഷങ്ങളായി ഗ്രൗണ്ട് ഫ്ലോറിൽ സ്ഥാപിച്ച് ഉപയോഗിച്ച് കൊണ്ടിരിക്കുന്ന ഒന്നാം നിലയിലെ പ്രസ്തുത വൈദ്യുത കണക്ഷൻ മീറ്റർ താഴത്തെ നിലയിൽ നിന്നും മാറ്റണം എന്ന് ആവശ്യപ്പെട്ട് കെട്ടിട ഉടമയുടെ മകൻ മീറ്ററിലെ ഫ്യൂസ് ഊരിമാറ്റി ഡിബി ബോർഡിലേക്കുള്ള വയർ പൊട്ടിച്ചത് സംബന്ധിച്ച് വാച്ചാൽ ശ്രീ. ശ്രീധരൻ നൽകിയ പരാതിയിൽ വൈദ്യുത വകുപ്പ് നാളിതുവരെ എന്തൊക്കെ നടപടികൾ സ്വീകരിച്ചിട്ടുണ്ടെന്ന് വിശദമാക്കാമോ;

ഇത്തരം പരാതിയിൽ വൈദ്യുത കണക്ഷൻ മീറ്റർ മാറ്റി നൽകേണ്ട സാമ്പത്തിക ഉത്തരവാദിത്തം വൈദ്യുത വകുപ്പിന്റേതാണോ പരാതി ഉന്നയിച്ച ആളിന്റേതാണോ അതോ കണക്ഷൻ ഉടമയുടേതാണോ എന്ന് വ്യക്തമാക്കുമോ;

മേൽ പറഞ്ഞ വൈദ്യുതി കണക്ഷനിൽ കഴിഞ്ഞ മൂന്ന് വർഷമായി എത്ര യുണിറ്റ് വൈദ്യുതി ഉപയോഗിച്ചിട്ടുണ്ടെന്ന് മാസം (വൈദ്യുത ബിൽ മാസം ) തിരിച്ച് പറയാമോ; മേൽ ബില്ലിൽ ഓരോ മാസവും അടച്ച തുകയുടെ ബില്ല് ലഭ്യമാക്കാമോ;

വൈദ്യുതവകുപ്പിന്റെ നിരുത്തരവാദിത്തം കാരണം പരാതിക്കാരന് ജനറേറ്റർ ഉപയോഗിച്ച് ഓഫീസ് പ്രവൃത്തിച്ചത് മൂലം വന്നിട്ടുള്ള സാമ്പത്തിക നഷ്ടം ബന്ധപ്പെട്ട ഉദ്യോഗസ്ഥയിൽ നിന്നും ഈടാക്കുവാൻ നടപടി സ്വീകരിക്കുമോ?

മട്ടന്നൂര്‍ മണ്ഡലത്തില്‍ സ്ഥാപിച്ച വൈദ്യുത വാഹന ചാര്‍ജിംഗ് സ്റ്റേഷനുകളുടെ വിശദാംശം ലഭ്യമാക്കാമോ; ഇവയുടെ പ്രവര്‍ത്തനം വിലയിരുത്തിയിട്ടുണ്ടോ; വിശദമാക്കാമോ;

മട്ടന്നൂര്‍ മണ്ഡലത്തിലെ വിദ്യാഭ്യാസ സ്ഥാപനങ്ങളുടെ സമീപത്തുകൂടി കടന്നുപോകുന്ന വൈദ്യുതി ലൈനുകളുടെ പരിശോധന പൂര്‍ത്തിയായിട്ടുണ്ടോ; ഉണ്ടെങ്കില്‍ ഏതൊക്കെ വിദ്യാലയങ്ങളുടെ സമീപത്തുകൂടെ പോകുന്ന വൈദ്യുതി ലൈനുകളാണ് മാറ്റേണ്ടത് എന്ന് കണ്ടെത്തിയിട്ടുള്ളത്; വിശദാംശം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം വൈദ്യുതി വിതരണ രംഗം ശാക്തീകരിക്കുന്നതിന്റെ ഭാഗമായി അരുവിക്കര കമണ്ഡലത്തില്‍ മാറ്റി സ്ഥാപിച്ച പഴക്കം ചെന്ന ട്രാന്‍സ്‍ഫോമറുകളുടെ എണ്ണം സംബന്ധിച്ച വിശദാംശം അറിയിക്കുമോ?

നെയ്യാറ്റിന്‍കര മണ്ഡലത്തില്‍ നെയ്യാറ്റിന്‍കര നഗരസഭയിലും അതിയന്നൂര്‍, തിരുപുറം, ചെങ്കല്‍, കാരോട്, കുളത്തൂര്‍ എന്നീ പഞ്ചായത്തുകളിലുമായി എത്ര സ്ഥലങ്ങളിലാണ് വൈദ്യുത ചാര്‍ജിംഗ് സ്റ്റേഷനുകള്‍ സ്ഥാപിച്ചതെന്ന് വിശദമാക്കാമോ; പ്രസ്തുത സ്ഥലങ്ങളുടെ പേരുവിവരം നഗരസഭ, പഞ്ചായത്ത് അടിസ്ഥാനത്തില്‍ വ്യക്തമാക്കാമോ;

ഓരോ ചാര്‍ജിംഗ് സ്റ്റേഷനും എത്ര തുകയാണ് വിനിയോഗിച്ചതെന്ന് വിശദമാക്കാമോ?

വൈദ്യുതി കണക്ഷൻ ലഭിക്കുന്നതിന്റെ ഭാഗമായി ഇലക്ട്രിക് പോസ്റ്റുകൾ സ്ഥാപിക്കുന്നതിന് അപേക്ഷകർ അടക്കേണ്ട തുകയിൽ ബി. പി. എൽ. വിഭാഗത്തിൽപ്പെട്ടവർക്ക് ഇളവ് നൽകുന്നതിന് വ്യവസ്ഥയുണ്ടോ എന്ന് വ്യക്തമാക്കാമോ;

സൗജന്യ ഗാർഹിക വൈദ്യുതി കണക്ഷനുകൾ നിലവിൽ നൽകി വരുന്നുണ്ടോ; വിശദമാക്കാമോ;

സർക്കാറിന്റെ ധനസഹായത്തോടെ പൂർത്തീകരിക്കുന്ന വീടുകൾക്ക് വൈദ്യുതി കണക്ഷനുകൾ നൽകുന്നതിന് നിലവിൽ ഫീസ് ഈടാക്കുന്നുണ്ടോ; ഉണ്ടെങ്കിൽ ആയത് സൗജന്യമായി നൽകുന്നത് പരിഗണനയിലുണ്ടോ; വ്യക്തമാക്കാമോ?

കുറ്റ്യാടി മണ്ഡലത്തില്‍ കുറ്റ്യാടി ബൈപാസ്, വടകര വില്യാപ്പള്ളി ചേലക്കാട് റോഡ്, കുറ്റ്യാടി വലകെട്ട് കൈപ്രം കടവ് റോഡ് എന്നീ പ്രവൃത്തികളുടെ ഭാഗമായുള്ള കെ. എസ്. ഇ. ബി.യുടെ യൂട്ടിലിറ്റി ഷിഫ്റ്റിംഗ് പ്രവൃത്തികള്‍ ഏത് ഘട്ടത്തിലാണെന്ന് അറിയിക്കാമോ;

പ്രസ്തുത റോഡ് പ്രവൃത്തികള്‍ സമയബന്ധിതമായി പൂര്‍ത്തീകരിക്കുന്നതിന് കെ. എസ്. ഇ. ബി.യുടെ യൂട്ടിലിറ്റി ഷിഫ്റ്റിംഗ് പ്രവൃത്തികള്‍ അടിയന്തരമായി നടപ്പിലാക്കാനുള്ള നടപടി സ്വീകരിക്കാമോ; വിശദമാക്കാമോ?

സംസ്ഥാനത്ത് അഡ്വാൻസ്ഡ് മീറ്ററിംഗ് ഇൻഫ്രാസ്ട്രക്ചർ (എ. എം. ഐ. ) നടപ്പിലാക്കുന്നത് കെ. എസ്. ഇ. ബി. എൽ. വൈകിപ്പിക്കുന്നതിനാൽ കേന്ദ്ര സർക്കാർ നല്കിയിട്ടുള്ള നിശ്ചിത തീയതിക്കുള്ളിൽ ഈ പദ്ധതി പൂർണ്ണമായും നടപ്പിലാക്കാൻ പറ്റാത്ത സാഹചര്യത്തിൽ എനർജി ഓഡിറ്റിംഗ് പോലെയുള്ള ഭാവി പ്രശ്നങ്ങളെ അതിജീവിക്കുവാൻ കെ. എസ്. ഇ. ബി. എൽ. സ്വീകരിച്ച നടപടികൾ വിശദമാക്കാമോ;

ഇതര സംസ്ഥാനങ്ങൾ വൈദ്യുതി ഉൽപ്പാദന വിതരണ സംവിധാനത്തിനായി കേന്ദ്ര ഊർജ വകുപ്പ് നിർദേശിച്ച പൊതു മാനദണ്ഡങ്ങളെ അവലംബിച്ച് പ്രവർത്തനം വിജയകരമായി നടപ്പിലാക്കുമ്പോൾ സംസ്ഥാനം അതിന് വിരുദ്ധമായി ഒരു ബദൽ നയം മുന്നോട്ടു വയ്ക്കുന്നതിന്റെ കാരണം വിശദമാക്കാമോ;

2040-ഓടെ 100% പുനരുപയോഗ ഊർജ്ജ ഉപയോഗവും 2050-ഓടെ നെറ്റ് സീറോ എമിഷനും കൈവരിക്കുന്നതിനുള്ള സംസ്ഥാനത്തിന്റെ എനർജി ട്രാൻസിഷൻ റോഡ് മാപ്പ് എന്താണെന്ന് വ്യക്തമാക്കാമോ;

2025 മാർച്ച് 31-ന് അവസാനിക്കുന്ന വർഷത്തേക്ക് പുരപ്പുറ സോളാർ ഉല്പാദകർ കയറ്റുമതി ചെയ്ത മിച്ച സൗരോർജ്ജത്തിനുള്ള സെറ്റിൽമെന്റ് നിരക്ക് (എ. പി. പി. സി. ) പ്രഖ്യാപിക്കുന്നതിന് കെ. എസ്. ഇ. ആർ. സി. സ്വന്തം റെഗുലേഷൻ ( കെ. എസ്. ഇ. ആർ. സി. പുനരുപയോഗ ഊർജ്ജ, നെറ്റ്മീറ്ററിംഗ് റെഗുലേഷൻ 2020) ലംഘിച്ചതായി സർക്കാരിന്റെ ശ്രദ്ധയിൽ പെട്ടിട്ടുണ്ടോ; എങ്കിൽ സർക്കാർ എന്ത് നടപടി സ്വീകരിച്ചുവെന്ന് വ്യക്തമാക്കാമോ;

2020-ലെ പുനരുപയോഗ ഊർജ്ജ, നെറ്റ്മീറ്ററിംഗ് ചട്ടങ്ങളെ മറികടന്ന് കെ. എസ്. ഇ. ആർ. സി. ഉപഭോക്താക്കൾക്ക് കുറഞ്ഞ സെറ്റിൽമെന്റ് നിരക്ക് പ്രഖ്യാപിച്ചത് സർക്കാരിന്റെ ശ്രദ്ധയിൽപ്പെട്ടിട്ടുണ്ടോ; എങ്കിൽ സർക്കാർ സ്വീകരിച്ച നടപടി വ്യക്തമാക്കാമോ?

സാമ്പത്തികമായി പിന്നാക്കം നില്‍ക്കുന്നവര്‍ക്കും പട്ടികജാതി വിഭാഗക്കാര്‍ക്കും പുതിയ വൈദ്യുതി കണക്ഷന്‍ നല്‍കുമ്പോള്‍ എന്തെല്ലാം ഇളവുകളാണ് കെ. എസ്. ഇ. ബി. നല്‍കിവരുന്നതെന്ന് വിശദീകരിക്കാമോ;

പ്രസ്തുത വിഭാഗക്കാര്‍ നിര്‍മ്മിക്കുന്ന നിശ്ചിത വിസ്തീർണ്ണത്തിൽല് കുറവുള്ള വീടുകള്‍ക്ക് വൈദ്യുത തൂണുകള്‍ സൗജന്യമായി സ്ഥാപിച്ചു നല്‍കുന്ന നിലവിലെ ആനുകൂല്യം പുതിയ വീട് നിര്‍മ്മിക്കുമ്പോള്‍ കണ്‍സ്ട്രക്ഷന്‍ പര്‍പ്പസിനായി എടുക്കുന്ന താത്കാലിക കണക്ഷന് അപേക്ഷിക്കുമ്പോള്‍ ലഭിക്കുന്നില്ല എന്ന കാര്യം ശ്രദ്ധയില്‍ പെട്ടിട്ടുണ്ടോ; വിശദമാക്കാമോ;

സൗജന്യമായി വൈദ്യുത തൂണുകള്‍ സ്ഥാപിച്ചു കിട്ടാന്‍ അര്‍ഹതയുള്ള വീടുകള്‍ നിര്‍മ്മിക്കുന്നവര്‍ക്ക്, പ്രസ്തുത വീടിന്റെ നിര്‍മ്മാണ ആവശ്യത്തിനായി താല്‍ക്കാലിക വൈദ്യുത കണക്ഷന് അപേക്ഷിക്കുമ്പോള്‍ തന്നെ സൗജന്യമായി വൈദ്യുത തൂണുകള്‍ അനുവദിക്കാന്‍ നടപടി സ്വീകരിക്കുമോ; വിശദമാക്കാമോ?

കേരളത്തിലെ ആദ്യത്തെ ജലവൈദ്യുതി പദ്ധതിയായ പള്ളിവാസൽ ജലവൈദ്യുതി പദ്ധതിയുടെ പഴയ പവർഹൗസ് കെട്ടിടവും അനുബന്ധ യന്ത്രസാമഗ്രികളുടെ കൺട്രോൾ റൂമും നാശത്തിന്റെ വക്കിലെത്തിയത് ശ്രദ്ധയിൽപ്പെട്ടിട്ടുണ്ടോ; ഇവ സംരക്ഷിക്കുന്നതിന് എന്തെങ്കിലും നടപടികൾ സ്വീകരിച്ചിട്ടുണ്ടോയെന്ന് അറിയിക്കാമോ;

പൊതുജനങ്ങൾക്കും വിനോദസഞ്ചാരികൾക്കും ഉപയോഗപ്പെടുത്താവുന്ന രീതിയിൽ പ്രസ്തുത പവർഹൗസ് മ്യൂസിയമാക്കി മാറ്റുന്നതിന് നടപടികൾ സ്വീകരിക്കുമോ?

വള്ളിക്കുന്ന് മണ്ഡലത്തിൽ ചേലേമ്പ്ര, പള്ളിക്കൽ, പെരുവള്ളൂർ, മൂന്നിയൂർ, വള്ളിക്കുന്ന്, തേഞ്ഞിപ്പലം എന്നീ പഞ്ചായത്തുകളിൽ 2021 ജനുവരി മുതൽ 2025 സെപ്റ്റംബർ വരെ കെ. എസ്. ഇ. ബി. നടത്തിയ വോൾട്ടേജ് ഇംപ്രൂവ്മെന്റ് പദ്ധതികളുടെയും മറ്റ് പദ്ധതികളുടെയും വിശദാംശം ലഭ്യമാക്കാമോ;

ചേലേമ്പ്ര ഗ്രാമ പഞ്ചായത്തിൽ കടലുണ്ടി, ചേളാരി, രാമനാട്ടുകര എന്നീ സെക്ഷനുകൾ മുഖേനയും പള്ളിക്കൽ ഗ്രാമ പഞ്ചായത്തിൽ ചേളാരി, പുളിക്കൽ, കൊണ്ടോട്ടി, കുന്നുംപുറം എന്നീ സെക്ഷനുകൾ മുഖേനയും മൂന്നിയൂർ ഗ്രാമ പഞ്ചായത്തിൽ ചേളാരി, തലപ്പാറ, പരപ്പനങ്ങാടി എന്നീ സെക്ഷനുകൾ മുഖേനയും വള്ളിക്കുന്ന് ഗ്രാമ പഞ്ചായത്തിൽ വള്ളിക്കുന്ന്, കടലുണ്ടി എന്നീ സെക്ഷനുകൾ മുഖേനയും പെരുവള്ളൂർ ഗ്രാമ പഞ്ചായത്തിൽ ചേളാരി, കുന്നുംപുറം, തലപ്പാറ എന്നീ സെക്ഷനുകൾ മുഖേനയും തേഞ്ഞിപ്പലം ഗ്രാമ പഞ്ചായത്തിൽ ചേളാരി, വള്ളിക്കുന്ന് എന്നീ സെക്ഷനുകൾ മുഖേനയും നടത്തിയ വികസന പ്രവർത്തനങ്ങൾ വിശദമാക്കാമോ?

കോങ്ങാട് മണ്ഡലത്തിലെ ആറ്റില 1, ആറ്റില 2 എന്നീ ജലവൈദ്യുത പദ്ധതികള്‍ സ്ഥാപിക്കുന്നതുമായി ബന്ധപ്പെട്ട നടപടികള്‍ ഏത് ഘട്ടത്തിലാണെന്ന് വിശദമാക്കാമോ;

പദ്ധതികള്‍ നടപ്പിലാക്കുന്നതിന് കാലതാമസം നേരിടുന്ന കാര്യം ശ്രദ്ധയില്‍പ്പെട്ടിട്ടുണ്ടോ;

പ്രസ്തുത പദ്ധതികള്‍ എന്നത്തേക്ക് ആരംഭിക്കാൻ കഴിയും എന്ന് വ്യക്തമാക്കാമോ?

2016 മേയ് മാസം മുതല്‍ നാളിതുവരെ പാലക്കാട് ജില്ലയില്‍ വൈദ്യുതി വകുപ്പ് നടപ്പിലാക്കിയ വിവിധ പ്രവൃത്തികളുടെ വിശദവിവരം ലഭ്യമാക്കാമോ;

പ്രസ്തുത പ്രവൃത്തികളുടെ പ്രവര്‍ത്തന പുരോഗതിയുടെ വിശദാംശം ലഭ്യമാക്കാമോ?

ഈ സർക്കാർ അധികാരത്തിൽ വന്നതിനുശേഷം നാളിതുവരെ ബാലുശ്ശേരി നിയോജക മണ്ഡലത്തിൽ വൈദ്യുതി വിതരണ-പ്രസരണ മേഖലയിൽ സർക്കാർ നടപ്പിലാക്കിവരുന്ന വിവിധ പദ്ധതികളുടെയും വൈദ്യുതിയുമായി ബന്ധപ്പെട്ട മറ്റ് മേഖലകളിൽ സർക്കാർ നടപ്പിലാക്കിവരുന്ന വിവിധ പദ്ധതികളുടെയും വിശദാംശം, ചെലവഴിച്ച തുക, പ്രവൃത്തി പുരോഗതി എന്നിവ സെക്ഷൻ തിരിച്ച് ലഭ്യമാക്കാമോ?

കോട്ടക്കല്‍ മണ്ഡലത്തിലെ വിവിധ ഭാഗങ്ങളില്‍ നിരന്തരമായി ഉണ്ടാകുന്ന വൈദ്യുതി പ്രശ്നങ്ങളും വോള്‍ട്ടേജ് ക്ഷാമവും പരിഹരിക്കുന്നതിന് മലപ്പുറം പാക്കേജ് പദ്ധതിയില്‍ ഉള്‍പ്പെടുത്തി മണ്ഡലത്തില്‍ നടപ്പാക്കുന്ന പ്രവൃത്തികളുടെ പുരോഗതിയും നിലവിലെ സ്ഥിതിയും വിശദമാക്കാമോ;

കോട്ടക്കല്‍ മണ്ഡലത്തിലെ വൈദ്യുതി ആവശ്യം പൂര്‍ണ്ണമായും നിറവേറ്റുന്നതിനായി പ്രസരണ വിഭാഗം നടപ്പിലാക്കാന്‍ ഉദ്ദേശിച്ചിട്ടുള്ള വിവിധ പദ്ധതികളുടെ പുരോഗതിയും ഓരോന്നിന്റെയും നിലവിലെ സ്ഥിതിയും വിശദമാക്കാമോ; പദ്ധതികള്‍ എന്നത്തേക്ക് യാഥാര്‍ത്ഥ്യമാക്കാന്‍ കഴിയുമെന്ന് അറിയിക്കാമോ?

2021-22 സാമ്പത്തിക വര്‍ഷം മുതല്‍ നാളിതുവരെ കുണ്ടറ മണ്ഡലത്തില്‍ വൈദ്യുതി വകുപ്പിന് കീഴില്‍ അനുവദിച്ചിട്ടുളള പദ്ധതികള്‍ ഏതൊക്കെയാണെന്നും ആയതിനായി ചെലവഴിച്ച തുക എത്രയാണെന്നും പ്രസ്തുത പദ്ധതികളുടെ പ്രവര്‍ത്തന പുരോഗതി എന്താണെന്നും വിശദമാക്കാമോ?

മലപ്പുറം പാക്കേജിന്റെ ഭാഗമായി നിലമ്പൂര്‍ സര്‍ക്കിളിന് വേണ്ടി നിലവിൽ അനുവദിച്ചിരിക്കുന്ന 45 കോടി രൂപയുടെ പാക്കേജ് നടപ്പിലാക്കുന്നതിന് കാലതാമസം നേരിടുന്നത് ശ്രദ്ധയില്‍പ്പെട്ടിട്ടുണ്ടോ; വിശദമാക്കാമോ;

പ്രസ്തുത പ്രവൃത്തി കാലതാമസം കൂടാതെ പൂര്‍ത്തീകരിക്കുവാന്‍ വേണ്ട നടപടികൾ സ്വീകരിക്കുമോ; വിശദമാക്കാമോ?

സംസ്ഥാനത്ത് 2016 മുതല്‍ നാളിതുവരെ വൈദ്യുതി ഉല്പാദന മേഖലയില്‍ എത്ര മെഗാവാട്ട് അധിക വൈദ്യുതി ഉല്പാദിപ്പിച്ചിട്ടുണ്ടെന്നുള്ള വിവരം ലഭ്യമാക്കാമോ;

പ്രസ്തുത കാലഘട്ടത്തില്‍ എത്ര മെഗാവാട്ട് വൈദ്യുതി ഉപഭോഗം വര്‍ദ്ധിച്ചിട്ടുണ്ടെന്നുമുള്ള വിവരം ലഭ്യമാക്കാമോ?

2024 - 25, 2025 - 26 വർഷങ്ങളിൽ മഞ്ചേരി ഇലക്ട്രിക്കൽ സർക്കിളിന് കീഴിൽ കൊണ്ടോട്ടി നിയോജകമണ്ഡലത്തിൽ ഏതെല്ലാം പദ്ധതികളാണ് കെ. എസ്. ഇ. ബി. എൽ. - ന്റെ മലപ്പുറം പാക്കേജിൽ ഉൾപ്പെടുത്തിയിട്ടുള്ളത് എന്ന് വ്യക്തമാക്കാമോ;

പ്രസ്തുത പദ്ധതിയിൽ ഉൾപ്പെടുത്തി പുളിക്കൽ ഇലക്ട്രിക്കൽ സെക്ഷനിലെ പുളിക്കൽ പഞ്ചായത്തിലെ കൊട്ടപ്പുറം പാണ്ടിയാട്ടുപുറത്ത് അപകടകരമായ നിലയിലുള്ള 11 കെ. വി. ലൈൻ മാറ്റുന്നതിന് നടപടി സ്വീകരിച്ചിട്ടുണ്ടോ; വിശദാംശം ലഭ്യമാക്കാമോ?

ഈ സര്‍ക്കാര്‍ അധികാരത്തില്‍ വന്നതിനുശേഷം ഉടുമ്പന്‍ചോല മണ്ഡലത്തില്‍ വൈദ്യുതി വകുപ്പ് മുഖേന നടപ്പിലാക്കിയ പദ്ധതികളുടെ വിശദാംശം നല്‍കാമോ?

സംസ്ഥാനത്ത് നാഷണല്‍ ഹൈഡ്രോ പവര്‍ കോര്‍പ്പറേഷനുമായി ചേര്‍ന്ന് നടപ്പാക്കുന്ന ബാറ്ററി എനര്‍ജി സ്റ്റോറേജ് സംവിധാനം സ്ഥാപിക്കുന്ന നടപടി ഏത് ഘട്ടത്തിലാണ്; ഇവ എന്നത്തേയ്ക്കാണ് പൂര്‍ണ്ണമായി പ്രവര്‍ത്തന സജ്ജമാക്കുവാന്‍ ഉദ്ദേശിക്കുന്നതെന്ന് വ്യക്തമാക്കുമോ;

സംസ്ഥാനത്ത് പഴങ്ങള്‍, പച്ചക്കറികള്‍ തുടങ്ങിയവ കേടുകൂടാതെ സൂക്ഷിക്കുന്ന സൗകര്യങ്ങളുള്ള സോളാര്‍ കോള്‍ഡ് സ്റ്റോറേജ് സംവിധാനം ഏര്‍പ്പെടുത്തുന്ന പദ്ധതി എവിടെയെല്ലാം നടപ്പാക്കിയിട്ടുണ്ടെന്ന് വ്യക്തമാക്കുമോ;

പ്രസ്തുത പദ്ധതി ഏത് ഏജന്‍സി മുഖേനയാണ് നടപ്പാക്കുന്നതെന്നും പദ്ധതിപ്രദേശം തിരഞ്ഞെടുക്കുന്നതിലെ മാനദണ്ഡം എന്താണെന്നും അറിയിക്കുമോ?

വൈദ്യുതോല്പാദനം വർദ്ധിപ്പിക്കുന്നതിന്റെ ഭാഗമായി കേരള തീരത്ത് ലഭ്യമാകുന്ന തോറിയം ഇന്ധനമായി ഉപയോഗിച്ച് ന്യൂക്ലിയർ പവർ പ്ലാന്റുകൾ സ്ഥാപിക്കുന്നത് പഠിക്കുവാൻ ഏതെങ്കിലും ഏജൻസിയെ ചുമതലപ്പെടുത്തിയിട്ടുണ്ടോ; വ്യക്തമാക്കാമോ;

പഠന റിപ്പോർട്ട് എന്നത്തേക്ക് ലഭിക്കുമെന്നാണ് പ്രതീക്ഷിക്കുന്നത്; വിശദമാക്കാമോ?

കോതമംഗലം മണ്ഡലത്തിലെ കുട്ടമ്പുഴ, കീരംപാറ പ‍ഞ്ചായത്തുകളിലെ വൈദ്യുതി വിതരണം കാര്യക്ഷമമാക്കുന്നതിന് വേണ്ടി വൈദ്യുതി വകുപ്പ് നടപ്പാക്കി വരുന്ന പദ്ധതികളുടെ വിശദാംശം ലഭ്യമാക്കാമോ;

പ്രസ്തുത പദ്ധതികളുടെ നിര്‍മ്മാണ പുരോഗതി വ്യക്തമാക്കാമോ;

പദ്ധതികളുടെ നിര്‍മ്മാണം വേഗത്തില്‍ പൂര്‍ത്തീകരിക്കുന്നതിനാവശ്യമായ നടപടി സ്വീകരിക്കുമോ; വ്യക്തമാക്കാമോ?

ഈ സര്‍ക്കാര്‍ അധികാരത്തില്‍ വന്നശേഷം വോള്‍ട്ടേജ് ക്ഷാമം പരിഹരിക്കുന്നതിനായി മണലൂര്‍ മണ്ഡലത്തില്‍ പുതിയതായി എത്ര ട്രാന്‍സ്ഫോര്‍മറുകള്‍ സ്ഥാപിച്ചുവെന്നും എവിടെയൊക്കെയാണ് സ്ഥാപിച്ചിട്ടുള്ളതെന്നും അറിയിക്കാമോ;

പ്രസ്തുത പ്രവൃത്തികള്‍ക്ക് എത്ര തുക ചെലവഴിച്ചു എന്ന് വ്യക്തമാക്കാമോ?

കോതമംഗലം നഗരത്തില്‍ വൈദ്യുതി വിതരണം കാര്യക്ഷമമാക്കുന്നതിനുവേണ്ടി സ്വീകരിച്ചിട്ടുള്ള നടപടികള്‍ വ്യക്തമാക്കാമോ;

പ്രവൃത്തികള്‍ വേഗത്തില്‍ പൂര്‍ത്തീകരിക്കുന്നതിനാവശ്യമായ നടപടി സ്വീകരിക്കുമോ; വ്യക്തമാക്കാമോ?

സംസ്ഥാനത്ത് വൈദ്യുത അപകടങ്ങൾ വർദ്ധിച്ചു വരുന്നതായി ശ്രദ്ധയിൽപ്പെട്ടിട്ടുണ്ടോ; എങ്കിൽ കാര്യം പരിശോധിച്ചിട്ടുണ്ടോയെന്ന് വ്യക്തമാക്കാമോ;

അനധികൃതമായി സ്ഥാപിക്കുന്ന വൈദ്യുത വേലികളിൽ നിന്ന് ഷോക്കേറ്റ് ഉണ്ടാകുന്ന മരണം തടയാൻ വൈദ്യുത ബോർഡ് ഉദ്യോഗസ്ഥർ നിരീക്ഷണം നടത്താറുണ്ടോ;

വൈദ്യുത വേലികൾ സ്ഥാപിക്കുമ്പോൾ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പു വരുത്താൻ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

കാസർകോട് ജില്ലയിൽ എത്ര വൈദ്യുതി സെക്ഷൻ ഓഫീസുകൾ പ്രവർത്തിക്കുന്നുണ്ടെന്ന് വ്യക്തമാക്കാമോ;

പ്രസ്തുത സെക്ഷൻ ഓഫീസുകളിൽ അനുവദിച്ച തസ്തികകൾ ഏതൊക്കെയാണെന്നും ഒഴിഞ്ഞുകിടക്കുന്ന തസ്തികകൾ ഏതൊക്കെയാണെന്നും സെക്ഷൻ തിരിച്ചു വ്യക്തമാക്കാമോ; എത്രകാലമായി തസ്തികകൾ ഒഴിഞ്ഞുകിടക്കുന്നുണ്ടെന്നും എപ്പോൾ നികത്തുമെന്നും വ്യക്തമാക്കാമോ;

പ്രസ്തുത സെക്ഷൻ ഓഫീസുകളിൽ അനുവദിച്ച വാഹനങ്ങള്‍ എത്രയാണെന്നും ഇപ്പോള്‍ വാഹനങ്ങളുടെ കുറവുണ്ടോ എന്നും സെക്ഷന്‍ തിരിച്ചു വ്യക്തമാക്കാമോ;

സാമഗ്രികളുടെ അപര്യാപ്തതമൂലം തക്കസമയത്ത് ഉപഭോക്താക്കള്‍ക്ക് സേവനം ലഭ്യമാക്കാന്‍ സാധിക്കാത്ത അവസ്ഥയുണ്ടോ എന്ന് സെക്ഷന്‍ തിരിച്ചു വ്യക്തമാക്കാമോ?

കെ. എസ്. ഇ. ബി.യുടെ നിര്‍ദിഷ്ട നെല്ലിക്കാപറമ്പ് സബ്സ്റ്റേഷന്‍ നിർമ്മാണ നടപടികള്‍ ഇപ്പോള്‍ ഏതു ഘട്ടത്തിലാണെന്ന് വിശദമാക്കുമോ;

പ്രസ്തുത പ്രവൃത്തി എപ്പോള്‍ ആരംഭിക്കാന്‍ കഴിയുമെന്ന് വ്യക്തമാക്കുമോ?

പൂഞ്ഞാർ മണ്ഡലത്തിലെ കണമല പ്രദേശത്ത് നിരന്തരമുണ്ടാകുന്ന വൈദ്യുതി തടസ്സത്തിന് ശാശ്വത പരിഹാരം കാണുന്നതിനായി പ്രസ്തുത പ്രദേശത്ത് ഒരു സബ്‍‍സ്റ്റേഷന്‍‍ സ്ഥാപിക്കുന്നതിനാവശ്യമായ നടപടികൾ സ്വീകരിക്കുമോയെന്ന് വ്യക്തമാക്കുമോ?

കൊണ്ടോട്ടി മണ്ഡലത്തിനും പരിസര പ്രദേശങ്ങൾക്കും ഉപകാരപ്പെടുന്ന പുളിക്കൽ 110 കെ. വി. സബ് സ്റ്റേഷൻ, കൊണ്ടോട്ടി 33 കെ. വി. സബ്സ്റ്റേഷൻ എന്നിവ സ്ഥാപിക്കുന്നതിന് തീരുമാനിച്ചിട്ടുണ്ടോ; ഉണ്ടെങ്കിൽ ഇത് സംബന്ധിച്ച ഉത്തരവുകളുടെ പകർപ്പ് ലഭ്യമാക്കുമോ;

പ്രസ്തുത പദ്ധതികളുടെ നിലവിലെ പുരോഗതി സംബന്ധിച്ച വിശദാംശം പ്രത്യേകമായി ലഭ്യമാക്കുമോ?

ചങ്ങനാശ്ശേരി മണ്ഡലത്തിലെ വൈദ്യുതി ക്ഷാമം പരിഹരിക്കുന്നതിന് പുതിയ സബ് സ്റ്റേഷന്‍ സ്ഥാപിക്കുന്നതിന് നടപടികള്‍ ആരംഭിച്ചിട്ടുണ്ടോ എന്ന് വ്യക്തമാക്കാമോ;

സബ് സ്റ്റേഷന്‍ സ്ഥാപിക്കുന്നതിന് കുറിച്ചി പഞ്ചായത്തിലെ ഹോമിയോ കോളേജിന് സമീപമുള്ള സര്‍ക്കാര്‍ പുറമ്പോക്ക് അനുയോജ്യമാണെന്ന് കണ്ടെത്തിയിട്ടുണ്ടോ എന്ന് വ്യക്തമാക്കാമോ;

പ്രസ്തുത സ്ഥലത്ത് കെ.എസ്.ഇ.ബി.യുടെ സബ് സ്റ്റേഷന്‍ സ്ഥാപിക്കുന്നതിന് ആവശ്യമായ അനുമതികള്‍ ലഭ്യമാക്കുന്നതിന് എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ?

കെ. എസ്. ഇ. ബി. ഇലക്ട്രിക്കല്‍ വിഭാഗത്തില്‍ അസിസ്റ്റന്റ് എഞ്ചിനീയര്‍ തസ്തികയില്‍ അംഗീകൃത തസ്തികകള്‍ എത്രയെണ്ണം ഉണ്ടെന്ന് ക്വാട്ട തിരിച്ച് വ്യക്തമാക്കാമോ; ഇവയില്‍ നിലവിലുള്ള വേക്കന്‍സികളുടെ വിശദാംശവും ക്വാട്ട തിരിച്ച് ലഭ്യമാക്കാമോ;

അവയില്‍ നേരിട്ടുള്ള നിയമനങ്ങള്‍ക്കായുള്ള 40% ഡിഗ്രി ക്വാട്ട ഒഴിവുകളില്‍ എത്ര എണ്ണം പി. എസ്. സി. യ്ക്ക് റിപ്പോര്‍ട്ട് ചെയ്യാത്തതായി നിലവിലുണ്ടെന്ന് വ്യക്തമാക്കുമോ;

ഇലക്ട്രിക്കല്‍ വിഭാഗത്തില്‍ അസിസ്റ്റന്റ് എഞ്ചിനീയര്‍ തസ്തികയില്‍ നേരിട്ടുള്ള നിയമനങ്ങള്‍ക്കായുള്ള 40% ക്വാട്ടയിലെ ഫ്രെഷ് വേക്കന്‍സി പി. എസ്. സി. യിലേയ്ക്ക് എന്നാണ് അവസാനമായി റിപ്പോര്‍ട്ട് ചെയ്തത്; ഏത് തീയതി മുതല്‍ നിലവില്‍ വന്ന ഒഴിവുകളാണ് പി. എസ്. സി. യിലേയ്ക്ക് റിപ്പോര്‍ട്ട് ചെയ്യാനായി ഉള്ളത്; പ്രസ്തുത വേക്കന്‍സികള്‍ പി. എസ്. സി. യിലേക്ക് റിപ്പോര്‍ട്ട് ചെയ്യാന്‍ സ്വീകരിച്ച നടപടികള്‍ വ്യക്തമാക്കാമോ?

കെ. എസ്. ഇ. ബി അസിസ്റ്റന്റ് എഞ്ചിനീയർ (ഇലക്ട്രിക്കൽ) തസ്തികയിലേക്കുള്ള ഡയറക്റ്റ് ക്വാട്ടയിൽ നിലവിൽ എത്ര ഒഴിവുകൾ ഉണ്ടെന്ന് വ്യക്തമാക്കാമോ;

പ്രസ്തുത തസ്തികയിലേക്കുള്ള ഡയറക്റ്റ് ക്വാട്ടയിൽ നിലവിൽ ഉള്ള ഒഴിവുകളിൽ എത്രയെണ്ണം പി. എസ്. സി.ക്ക് റിപ്പോർട്ട് ചെയ്തിട്ടുണ്ട്; റിപ്പോർട്ട് ചെയ്തിട്ടില്ല എങ്കിൽ ആയതിനുളള നടപടി സ്വീകരിക്കുമോയെന്നും വ്യക്തമാക്കാമോ;

പ്രസ്തുത തസ്തികയിലേക്കുള്ള പ്രൊമോഷൻ ക്വാട്ടയിൽ നിലവിൽ എത്ര ഒഴിവുകൾ ഉണ്ടെന്നും ഉണ്ടെങ്കില്‍ പ്രസ്തുത ഒഴിവുകള്‍ നികത്താതിരിക്കുന്നതിനുളള കാരണം എന്തെന്നും വ്യക്തമാക്കാമോ?

സംസ്ഥാനത്ത് ഇലക്ട്രിസിറ്റി ബോർഡിന്റെ ഓഫീസുകളിൽ ആവശ്യത്തിന് ലൈൻമാൻമാർ ഇല്ല എന്നുള്ള കാര്യം ശ്രദ്ധയിൽപ്പെട്ടിട്ടുണ്ടോ;

ലൈൻമാന്‍മാരെ പുതുതായി നിയമിക്കാൻ ഉദ്ദേശിക്കുന്നുണ്ടോ; വിശദമാക്കുമോ;

ലൈൻമാൻമാരുടെ അഭാവംമൂലം വൈദ്യുതി തകരാറുകൾ സമയബന്ധിതമായി പരിഹരിക്കുന്നതിന് നടപടി സ്വീകരിക്കാന്‍ കഴിയാത്തതു കാരണം ജനങ്ങൾക്കുണ്ടാകുന്ന ബുദ്ധിമുട്ട് പരിഹരിക്കാൻ എന്ത് മാർഗമാണ് സ്വീകരിക്കുന്നതെന്ന് വ്യക്തമാക്കാമോ;

കെ. എസ്. ഇ. ബി. യിൽ ലൈൻമാൻ തസ്തികയിൽ എന്നാണ് അവസാനമായി നിയമനം നടന്നത്; വിശദാംശങ്ങൾ ലഭ്യമാക്കാമോ;

സംസ്ഥാനത്ത് കെ. എസ്. ഇ. ബി. യുടെ കീഴിൽ എത്ര ലൈൻമാൻമാർ ജോലി നോക്കി വരുന്നു; ജില്ലതിരിച്ചുള്ള കണക്കുകൾ ലഭ്യമാക്കാമോ?

കെ. എസ്. ഇ. ബി. യിൽ ഇലക്ട്രിക്കൽ വിഭാഗത്തിലുള്ള അസിസ്റ്റന്റ് എഞ്ചിനീയർ തസ്തികയിലെ അംഗീകൃത തസ്തികകളുടെ എണ്ണം എത്രയാണെന്ന വിവരം ക്വാട്ട തിരിച്ചു ലഭ്യമാക്കുമോ;

പ്രസ്തുത തസ്തികയിൽ നിലവിലുള്ള ഒഴിവുകളുടെ വിശദാംശം സംബന്ധിച്ച വിവരം ക്വാട്ട തിരിച്ചു ലഭ്യമാക്കാമോ;

അസിസ്റ്റന്റ് എഞ്ചിനീയർ തസ്തികയിലെ 40% ഡിഗ്രി ക്വാട്ട ഒഴിവുകൾ പി. എസ്. സി. യ്ക്ക് റിപ്പോർട്ട്‌ ചെയ്തത് എന്നാണെന്ന് അറിയിക്കാമോ;

നിലവിലെ ഒഴിവുകൾ പി. എസ്. സി. യ്ക്ക് റിപ്പോർട്ട്‌ ചെയ്യാൻ നടപടി സ്വീകരിക്കുമോയെന്ന് അറിയിക്കാമോ?

കെ. എസ്. ഇ. ബി. സബ് എഞ്ചിനീയർ (ഇലക്ട്രിക്കൽ) തസ്‌തികയിലേക്ക് സ്ഥാനക്കയറ്റം നൽകാൻ മതിയായ യോഗ്യതയുള്ളവരുടെ കുറവ് ശ്രദ്ധയില്‍പ്പെട്ടിട്ടുണ്ടോ; ഉണ്ടെങ്കില്‍ അവ പരിഹരിക്കുന്നതിന് സ്വീകരിച്ച നടപടികള്‍ എന്തൊക്കെയാണെന്ന് വിശദമാക്കാമോ;

കെ. എസ്. ഇ. ബി. സബ് എഞ്ചിനീയർ (ഇലക്ട്രിക്കൽ) തസ്‌തികയില്‍ പ്രൊമോഷന്‍ ക്വാട്ടയിലേയ്ക്ക് നിലവില്‍ നികത്താന്‍ സാധിക്കാത്ത എത്ര ഒഴിവുകളുണ്ടെന്ന് വിശദമാക്കാമോ;

കെ. എസ്. ഇ. ബി. സബ് എഞ്ചിനീയർ (ഇലക്ട്രിക്കൽ) തസ്‌തികയിലേക്ക് സ്ഥാനക്കയറ്റം നൽകാൻ മതിയായ യോഗ്യത ഉള്ളവരുടെ കുറവ് മൂലം സബ് എഞ്ചിനീയർ (ഇലക്ട്രിക്കൽ) തസ്തികയിൽ പ്രൊമോഷൻ ക്വാട്ടയിൽ ഉള്ള ഒഴിവുകൾ കേരള സർക്കാർ ഉത്തരവ് സ.ഉ.(കൈ)നം. 13/2021/ഉ.ഭ.പ.വ. തീയതി 08/06/2021 പ്രകാരം ഡയറക്ട് ക്വാട്ടയിലേക്ക് ഡീകേഡർ ചെയ്തു പി.എസ്.സി. വഴി ഒഴിവുകൾ നികത്തുന്നതിനുളള നടപടി സ്വീകരിക്കുമോ; വ്യക്തമാക്കാമോ?

ഇലക്ട്രിസിറ്റി ബോര്‍ഡിന്റെ പ്രവർത്തനത്തെ ജീവനക്കാരുടെ കുറവ് പ്രതികൂലമായി ബാധിച്ചതായി കണ്ടെത്തിയിട്ടുണ്ടോയെന്ന് വ്യക്തമാക്കാമോ; ഇത് പരിഹരിക്കുന്നതിനായി താല്കാലിക ജീവനക്കാരെയും കരാർ ജീവനക്കാരെയും നിയോഗിക്കാറുണ്ടോയെന്ന് വ്യക്തമാക്കാമോ;

വൈദ്യുത അപകടങ്ങൾ വർദ്ധിച്ച് വരുന്ന സാഹചര്യത്തിൽ കെ. എസ്. ഇ. ബി. യി. ലെ പതിനായിരത്തിലധികം ഒഴിവുകൾ സമയബന്ധിതമായി നികത്തുന്നതിന് നടപടി സ്വീകരിക്കുമോ?

കേരള ഹൈഡൽ ടൂറിസം സെന്റർ കഴിഞ്ഞ നാല് വർഷത്തിനുള്ളിൽ നടത്തിയ ഇ-ടെൻഡറുകളുടെ ലിസ്റ്റ്, ടെൻഡറിൽ പങ്കെടുക്കുന്നതിന് സ്ഥാപനങ്ങൾക്ക് നിശ്ചയിച്ചിരുന്ന യോഗ്യതാമാനദണ്ഡങ്ങൾ, ഓരോ ടെൻഡറിലും പങ്കെടുത്ത സ്ഥാപനങ്ങൾ, ടെക്നിക്കൽ ബിഡിൽ യോഗ്യത നേടിയ സ്ഥാപനങ്ങൾ, ഫിനാന്‍സ് ബിഡിൽ അവർ ക്വോട്ട് ചെയ്ത നിരക്കുകൾ എന്നിവയുടെ വിവരം ലഭ്യമാക്കാമോ; ടെൻഡർ ഫയലുകളുടെ പകർപ്പ് ലഭ്യമാക്കാമോ;

ഓരോ ടെൻഡറിലെയും ടെക്നിക്കൽ ബിഡ്, ഫിനാൻസ് ബിഡ്, ഇന്റര്‍വ്യൂ എന്നിവയ്ക്ക് മാർക്ക് നല്കുന്നതിന് നിശ്ചയിച്ചിരുന്ന മാനദണ്ഡങ്ങളും, ഓരോ ഇനത്തിലുമുള്ള പരമാവധി മാർക്കിന്റെയും വിവരം ലഭ്യമാക്കാമോ; ടെൻഡറിൽ പങ്കെടുത്ത സ്ഥാപനങ്ങൾക്ക് ഓരോ ഇനത്തിലും ലഭിച്ച മാർക്ക് സംബന്ധിച്ച സ്റ്റേറ്റ്മെന്റിന്റെ പകർപ്പുകൾ ലഭ്യമാക്കാമോ;

വർക്ക് ഓർഡർ ലഭിച്ച കമ്പനികൾ ടെൻഡറിനോടൊപ്പം സമർപ്പിച്ച അവരുടെ യോഗ്യത സംബന്ധിച്ച രേഖകളുടെയും, വർക്ക് ഓർഡറുകളുടെയും പകർപ്പുകൾ ലഭ്യമാക്കാമോ; ഏതെങ്കിലും ടെൻഡറിൽ ഫിനാസ് ബിഡ് തുറന്നതിന് ശേഷം സ്ഥാപനങ്ങളെ ഇന്റർവ്യൂ നടത്തി അതിൽ ലഭിച്ച മാർക്കുകൂടി പരിഗണിച്ച് വർക്ക് ഓർഡർ നല്കിയിരുന്നോ; എങ്കിൽ അതിന്റെ വിശദാംശം വ്യക്തമാക്കാമോ;

ടെൻഡർ ഫയലുകൾ കൈകാര്യം ചെയ്ത ഉദ്യോഗസ്ഥരുടെ പേര്, തസ്തിക, ഇ-ടെൻഡർ പോർട്ടലിൽ നിന്നുള്ള സമ്മറി റിപ്പോർട്ടിന്റെ പകർപ്പ് എന്നിവ ലഭ്യമാക്കാമോ;

ടെൻഡറുകൾ സംബന്ധിച്ച് കെ.എസ്.ഇ.ബി.എൽ വിജിലൻസ് വിഭാഗം പരിശോധന നടത്തിയിരുന്നോ? എങ്കില്‍ പരിശോധനാ റിപ്പോർട്ടിന്റെ പകർപ്പ് ലഭ്യമാക്കാമോ; പ്രസ്തുത റിപ്പോര്‍ട്ടിന്റെ അടിസ്ഥാനത്തിൽ സ്വീകരിച്ച തുടർനടപടികൾ എന്തെല്ലാമാണെന്ന് വ്യക്തമാക്കാമോ?

വടക്കാഞ്ചേരിയില്‍ എങ്കക്കാട് 110 കെ. വി. സബ് സ്റ്റേഷന് സമീപം സ്ഥാപിച്ച ചാർജിംഗ് സ്റ്റേഷൻ സ്ലോ ചാർജിംങ് സംവിധാനത്തിലുള്ളതായതിനാലും ഇവിടെ ചാർജിംഗ് ചെയ്യാൻ കഴിയുന്ന വാഹനങ്ങള്‍ വളരെ കുറവായതിനാലും ഉപയോഗശൂന്യമായി കിടക്കുന്ന പ്രശ്നം ശ്രദ്ധയില്‍പ്പെട്ടിട്ടുണ്ടോ;

ഇലക്ട്രിക്ക് വാഹനങ്ങളുടെ ചാർജിങ് സാങ്കേതികവിദ്യ സംബന്ധിച്ച് മുൻകാലങ്ങളില്‍ ഉണ്ടായിരുന്ന ആശയകുഴപ്പം നീങ്ങി, നിലവില്‍ ബഹുഭൂരിപക്ഷം ഇലക്ട്രിക്ക് വാഹനങ്ങളും സി. സി. എസ്.- 2 ചാർജിങ് സംവിധാനമാണ് ഉപയോഗിക്കുന്നത് എന്ന കാര്യം ശ്രദ്ധയില്‍പ്പെട്ടിട്ടുണ്ടോ;

ഇ.വി. ചാ‍ർജിംഗ് സ്റ്റേഷനുകളുടെ ഫലപ്രദമായ ഉപയോഗത്തിന് ഭാരത് ഡി. സി.001, സി. എച്ച്. എ. ഡി. ഇ. എം. ഒ. (CHAdeMO) ചാർജറുകള്‍ മാറ്റി സി. സി. എസ്.-2 ചാർജറുകള്‍ സ്ഥാപിക്കുന്ന പ്രവൃത്തിയുടെ നിലവിലെ പുരോഗതി വ്യക്തമാക്കാമോ;

പ്രസ്തുത സാങ്കേതികവിദ്യ എങ്കക്കാട് ചാർജിംഗ് സ്റ്റേഷനിലും സ്ഥാപിച്ച് ആയത് പ്രവര്‍ത്തന സജ്ജമാക്കുന്നതിനുള്ള നടപടി സ്വീകരിക്കാമോ;

സി. സി. എസ്. - 2 ചാർജിങ് സ്റ്റാൻഡേർഡിന്റെ പ്രചാരം വർദ്ധിക്കുന്ന സാഹചര്യത്തില്‍ ഇത്തരത്തിലുള്ള കൂടുതല്‍ ചാർജിങ് സ്റ്റേഷനുകള്‍ സ്ഥാപിക്കുന്ന കാര്യം കെ. എസ്. ഇ. ബി. യുടെ പരിഗണനയിലുണ്ടോയെന്ന് വ്യക്തമാക്കാമോ?

ഇടുക്കി ജില്ലയിൽ കല്ലാർകുട്ടി ഡാമിന്റെ 10 ചെയിൻ മേഖലയിലും, കാഞ്ചിയാർ, അയ്യപ്പൻകോവിൽ, ഉപ്പുതറ വില്ലേജുകളിലെ 3 ചെയിൻ മേഖലയിലും പട്ടയം നൽകുന്നതിന് വൈദ്യുതി വകുപ്പ് എന്‍.ഒ.സി. നൽകിയിട്ടുണ്ടോ; വിശദമാക്കാമോ?

കല്ല്യാശ്ശേരി മണ്ഡലത്തിൽ കെ. എസ്. ഇ. ബി. മുഖേന എത്ര ഇലക്ട്രിക് വെഹിക്കിൾ ചാർജിംഗ് സ്റ്റേഷനുകളാണ് സ്ഥാപിച്ചിട്ടുള്ളത്; ഇവയുടെ കാര്യക്ഷമമായ പ്രവർത്തനത്തിനായി എന്തൊക്കെ നടപടികളാണ് സ്വീകരിച്ചിട്ടുള്ളത്; വ്യക്തമാക്കാമോ?

കാഞ്ഞങ്ങാട് മണ്ഡലത്തിൽ 2016 മുതൽ നാളിതുവരെ വൈദ്യുതി വകുപ്പ് നടപ്പിലാക്കിയ പ്രവൃത്തികളുടെ വിശദാംശം നൽകാമോ;

പ്രസ്തുത പ്രവൃത്തികളുടെ നിലവിലെ സ്ഥിതി, അനുവദിച്ച തുക എന്നിവ ഇനം തിരിച്ച് വ്യക്തമാക്കാമോ?

സംസ്ഥാനത്ത് പുതുതായി ബാറ്ററി ചാര്‍ജിംഗ് യൂണിറ്റുകള്‍ അനുവദിക്കുന്നതിന് ആലോചിക്കുന്നുണ്ടോ; വ്യക്തമാക്കുമോ;

പുതുക്കാട് മണ്ഡലത്തില്‍ പാലിയേക്കര, പുതുക്കാട് ഉള്‍പ്പെടെയുള്ള വിവിധ സെന്ററുകളില്‍ വിവിധ ബാറ്ററി വാഹനങ്ങള്‍ ചാര്‍ജ് ചെയ്യാവുന്ന തരത്തില്‍ ചാര്‍ജിംഗ് സ്റ്റേഷനുകള്‍ അനുവദിക്കുന്നതിന് നടപടി സ്വീകരിക്കുമോ?

നിലവിലെ സർക്കാരിന്റെ കാലയളവിൽ വൈദ്യുതി വകുപ്പിന്റെ കീഴിലുള്ള വിവിധ സ്ഥാപനങ്ങളും ഏജൻസികളും നാളിതുവരെ നൽകിയിട്ടുള്ള പരസ്യങ്ങളുടെ വിശദാംശങ്ങൾ, പരസ്യം നൽകിയ സ്ഥാപനം, പരസ്യത്തിനായി ചെലവഴിച്ച തുക, ഏത് ഏജൻസി മുഖേനയാണ് പരസ്യം നൽകിയത്, പ്രസ്തുത ഏജൻസിയെ തെരഞ്ഞെടുത്ത നടപടിക്രമം, ഏത് പദ്ധതിയുടെ ഭാഗമായാണ് പരസ്യം നൽകിയത് എന്നിവ സംബന്ധിച്ച വിശദാംശം ലഭ്യമാക്കാമോ;

പ്രസ്‌തുത കാലയളവിൽ പരസ്യ ഇനത്തിൽ ആകെ ചെലവഴിച്ച തുക വ്യക്തമാക്കാമോ?

സംസ്ഥാനത്തെ കെട്ടിടങ്ങളിൽ സോളാർ പാനൽ സ്ഥാപിക്കുന്നതിന് നൽകുന്ന സബ്സിഡിയുടെ നിലവിലെ സ്ഥിതി എന്താണെന്ന് വിശദമാക്കാമോ;

സോളാർ, വിൻഡ് മില്‍ ഊർജ്ജ പദ്ധതികൾ സംസ്ഥാനത്തെ വൈദ്യുതി ഉത്പാദനത്തിന്റെ എത്ര ശതമാനം സംഭാവന ചെയ്യുന്നുണ്ടെന്ന് വിശദമാക്കാമോ?

പുരപ്പുറ സോളാർ പദ്ധതി പ്രകാരം ഗാർഹിക ഉപഭോക്താക്കൾ സ്ഥാപിക്കുന്ന സോളാർ യൂണിറ്റുകളില്‍ നിന്നുള്ള വൈദ്യുതിയുടെ വില, ഉപഭോക്താക്കൾക്ക് കെ. എസ്. ഇ. ബി നൽകുന്ന വൈദ്യുതിയുടെ വിലയേക്കാള്‍ കുറവാണോ; എങ്കില്‍ ഒരു യൂണിറ്റിന് എത്ര രൂപയുടെ വ്യത്യാസമാണുള്ളത്;

പുരപ്പുര സോളാർ പദ്ധതി നടപ്പാക്കുന്ന ഉപഭോക്താക്കൾക്ക് സംസ്ഥാന സര്‍ക്കാരും കേന്ദ്ര സർക്കാരും ബോർഡും മറ്റു സ്ഥാപനങ്ങളും മുഖേന നൽകുന്ന സഹായങ്ങൾ എന്തൊക്കെയാണ്; ഓരോ വിഭാഗവും നൽകുന്ന സാമ്പത്തിക സഹായങ്ങളുടെ നിരക്ക് എത്രവീതമാണെന്ന് അറിയിക്കുമോ;

പുരപ്പുര സോളാർ പദ്ധതി നടപ്പാക്കുന്ന ഉപഭോക്താക്കൾ നൽകുന്ന വൈദ്യുതിക്ക് കുറഞ്ഞ നിരക്ക് നൽകുകയും രാത്രികാലങ്ങളിൽ കൂടിയ നിരക്കിൽ അവർക്ക് വൈദ്യുതി വിൽക്കുകയും ചെയ്യുന്നത് ഉപഭോക്താക്കൾക്ക് നഷ്ടമുണ്ടാക്കുമെന്ന് സർക്കാർ കരുതുന്നുണ്ടോ;

എങ്കിൽ പുരപ്പുര സോളാർ പദ്ധതിയിൽ നിന്ന് ഉപഭോക്താക്കൾ പിന്നാക്കം പോകുന്നതിന് ഇടയാകും എന്നും പുനരുപയോഗ ഊർജ്ജം പരമാവധി ഉല്‍പാദിപ്പിക്കുക എന്ന ആശയത്തെ ഇത് ദോഷകരമായി ബാധിക്കും എന്നും കരുതുന്നുണ്ടോ ;

എങ്കിൽ കൂടുതൽ ജനങ്ങളെ ഇതിലേക്ക് ആകർഷിക്കുന്നതിന് എന്തൊക്കെ നടപടികളാണ് കൈക്കൊള്ളാൻ ഉദ്ദേശിക്കുന്നത്; വിശദാംശം ലഭ്യമാകുമോ ?

പകൽ സമയത്ത് സോളാർ ഉൾപ്പെടെയുളള ​​സ്രോതസ്സുകൾ വഴി ഉല്പാദിപ്പിക്കുന്ന വൈദ്യുതി പിന്നീടുളള ഉപയോഗത്തിനായി ശേഖരിക്കുന്ന ബാറ്ററി എന​ർജി സ്റ്റോറേജ് സിസ്റ്റം സംസ്ഥാനത്തിന്റെ വിവിധ ഭാഗങ്ങളിലായി ആരംഭിക്കുന്നതിന് ഉദ്ദേശിക്കുന്നുണ്ടോയെന്ന് അറിയിക്കാമോ;

ഇപ്രകാരം എത്ര മെഗാവാട്ട് വൈദ്യുതി ശേഖരിക്കാമെന്നാണ് കണക്കാക്കുന്നതെന്ന് അറിയിക്കാമോ;

പ്രസ്തുത ബാറ്ററി എന​ർജി സ്റ്റോറേജ് സിസ്റ്റം സ്ഥാപിക്കുന്നതിനാവശ്യമായി വരുന്ന ചെലവ് എത്രയാണെന്ന് കണക്കാക്കിയിട്ടുണ്ടോയെന്ന് അറിയിക്കാമോ; ഈ പദ്ധതിക്ക് കേന്ദ്ര സഹായം ലഭ്യമാണോ; വിശദമാക്കുമോ?

ഈ സർക്കാർ കാലയളവിൽ അനെർട്ട് മുഖേന നടപ്പിലാക്കിയ പദ്ധതികൾ ഏതൊക്കെയാണെന്നും പദ്ധതി ചെലവ് എത്രയാണെന്നും ഭാവി പദ്ധതികൾ എന്തൊക്കെയാണെന്നും വിശദമാക്കാമോ;

അനെർട്ടിൽ പദ്ധതി നടത്തിപ്പിന് ആവശ്യമായ സ്ഥിരം ജീവനക്കാർ നിലവിലുണ്ടോയെന്നും ഡെപ്യുട്ടേഷൻ ഒഴികെയുള്ള സ്ഥിരം ജീവനക്കാരുടെ എണ്ണം എത്രയെന്നും ഇവരുടെ പെൻഷൻ കാലാവധി എന്ന് വരെയാണെന്നും വ്യക്തമാക്കാമോ;

അനെർട്ടിലെ നിയമനങ്ങൾ പി. എസ്. സി. മുഖേന നടത്തുന്നതിന് സർക്കാർ ഉത്തരവ് പുറപ്പെടുവിച്ചിട്ടുണ്ടോ; എങ്കില്‍ ഉത്തരവിന്റെ പകര്‍പ്പ് ലഭ്യമാക്കുമോ; ഉത്തരവായതിന് ശേഷം സർക്കാർ സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ; സ്‌പെഷ്യൽ റൂൾ സംബന്ധമായി ഊർജ വകുപ്പ് ഓഫീസിലെ നോട്ട് ഫയലിന്റെയും കറണ്ട് ഫയലിന്റെയും പകർപ്പുകൾ ലഭ്യമാക്കുമോ;

കരാർ ജീവനക്കാർ ഉൾപ്പെടെ അനെർട്ടിലെ നിലവിലെ ജീവനക്കാരുടെ വിവരം ലഭ്യമാക്കാമോ; സർക്കാർ അംഗീകരിച്ച തസ്തികയിലാണോ കരാർ ജീവനക്കാർ ജോലി ചെയ്യുന്നത് എന്ന് വിശദമാക്കുമോ;

അനെർട്ടിൽ അവസാനമായി ആശ്രിത നിയമനം ഒഴികെയുള്ള സ്ഥിരം നിയമനം നടന്നത് എന്നാണ് എന്ന് വ്യക്തമാക്കുമോ; പ്രസ്തുത നിയമന ഉത്തരവിന്റെ പകർപ്പ് ലഭ്യമാക്കുമോ;

അനെർട്ടിൽ സർക്കാർ അംഗീകരിച്ച തസ്തികകൾ ഏതെല്ലാമാണെന്ന് വ്യക്തമാക്കുമോ; ഓരോ തസ്തികയിലും അനുവദിച്ച ജീവനക്കാരുടെ എണ്ണം എത്രയെന്ന് അറിയിക്കുമോ; പ്രസ്തുത തസ്തികകളില്‍ ഏറ്റവുമൊടുവിൽ ഒഴിവ് റിപ്പോർട്ട് ചെയ്ത വര്‍ഷം ഏതാണെന്നും നിലവിലെ ഓരോ തസ്തികയിലെയും ഒഴിവുകൾ എത്രയാണെന്നും വ്യക്തമാക്കുമോ;

അനെർട്ടിലെ കണ്ണൂര്‍ ജില്ലാ കാര്യാലയത്തിന്റെ പ്രവർത്തനം വിശദമാക്കുമോ; പ്രസ്തുത കാര്യാലയത്തിൽ സർക്കാർ അംഗീകരിച്ച തസ്തികകൾ എതെല്ലാമാണെന്ന് വ്യക്തമാക്കുമോ; പ്രസ്തുത തസ്തികയിൽ നിലവിൽ ജോലി ചെയ്ത് വരുന്നത് ആരെല്ലാമാണെന്ന് വിശദമാക്കുമോ; പ്രസ്തുത ജില്ലാ കാര്യാലയത്തിന്റെ ബാങ്ക് അക്കൗണ്ട് കൈകാര്യം ചെയ്യുന്നത് ഏത് തസ്തികയിലുള്ള ഉദ്യോഗസ്ഥനാണ്; നിലവിൽ അക്കൗണ്ട് കൈകാര്യം ചെയ്യുന്ന ഉദ്യോഗസ്ഥന്റെ പേരും തസ്തികയും ഉള്‍പ്പെടെയുള്ള വിവരങ്ങൾ ലഭ്യമാക്കുമോ?

സംസ്ഥാനത്ത് സോളാർ എനർജി ഉല്പാദനത്തിൽ മുന്നേറ്റം നടത്താൻ സ്വീകരിച്ചു വരുന്ന നടപടികള്‍ എന്തൊക്കെയെന്ന് വ്യക്തമാക്കുമോ ;

ഗാർഹിക ഉല്പാദകരില്‍ നിന്നും കെ. എസ്. ഇ. ബി. എടുക്കുന്ന സോളാർ വൈദ്യുതിയുടെ വില യഥാസമയം നൽകുന്നതിന് എന്തൊക്കെ നടപടി സ്വീകരിക്കുമെന്ന് വ്യക്തമാക്കുമോ;

സോളാർ വൈദ്യുതി ഉല്പാദനത്തിന് കൂടുതൽ സബ്‌സിഡി നൽകുന്ന കാര്യം പരിഗണിക്കുമോ; വിശദാംശം ലഭ്യമാക്കുമോ?

അനെർട്ട് സി. ഇ. ഒ. സ്ഥാപനത്തിന്റെ തനതു ഫണ്ട് ഉപയോഗിച്ച് ഇലക്ട്രിക്ക് കാറുകൾ പർച്ചേസ് ചെയ്യുകയും അവ ഇതര വകുപ്പ്/സ്ഥാപന മേധാവികൾക്ക് പാട്ടത്തിന് കൊടുക്കുകയും ചെയ്തിട്ടുണ്ടോ; എങ്കിൽ ഇപ്രകാരം വാങ്ങിയ കാറുകളുടെ എണ്ണം, മോഡൽ, റേറ്റ്, ആകെ എത്ര കോടി രൂപ ചെലവഴിച്ചു എന്നീ വിവരങ്ങൾ നൽകാമോ; ഈ പർച്ചേസ് നടത്തിയ അനെർട്ട് സി. ഇ. ഒ. ആരാണ് ;

ഇവ പാട്ടത്തിന് കൊടുക്കാനായി അനെർട്ട് സി. ഇ. ഒ. ഏർപ്പെടുത്തിയ വ്യവസ്ഥകൾ എന്തെല്ലാമാണ്; വാങ്ങിയ കാറുകളിൽ എത്ര എണ്ണം, ഏതു നിരക്കിൽ, എത്ര വർഷത്തേക്ക്, ആർക്കെല്ലാം, ഇതിനകം പാട്ടത്തിന് നൽകിയിട്ടുണ്ട് എന്നും ഇപ്പോഴത്തെ പാട്ട കാലാവധിക്ക് ശേഷം തുടർന്നുള്ള വർഷങ്ങളിൽ ഈ കാറുകൾ എന്തു ചെയ്യാനാണ് അനെർട്ട് ഉദ്ദേശിക്കുന്നത് എന്നും അറിയിക്കാമോ;

ഇപ്രകാരം കാറുകൾ പാട്ട വ്യവസ്ഥയിൽ സ്വീകരിച്ച സർക്കാർ വകുപ്പുകൾക്ക് ഈ പദ്ധതി സമ്പത്തികമായി വൻ നഷ്ടം ഉണ്ടാക്കുന്നതായി പരിശോധന നടത്തിയിട്ടുണ്ടോ;

ഇപ്രകാരം അനെർട്ടിന്റെ തനതു ഫണ്ട് ഉപയോഗിച്ച് കാറുകൾ വാങ്ങാനും അവ മേൽപറഞ്ഞ പാട്ട വ്യവസ്ഥ പ്രകാരം സർക്കാർ വകുപ്പ്/സ്ഥാപന മേധാവികൾക്ക് പാട്ടത്തിനു നൽകാനും അനെർട്ട് സി. ഇ. ഒ. യ്ക്ക് സർക്കാരിന്റെ മുൻകൂർ അനുമതി വേണമായിരുന്നോ; എങ്കിൽ പ്രസ്തുത അനുമതി ഉണ്ടായിരുന്നോ;

ഇല്ലെങ്കിൽ അനെർട്ട് സി. ഇ. ഒ. സ്വന്തം നിലക്ക് നടത്തിയ ഈ സാമ്പത്തിക ക്രമക്കേടിനെയും അഴിമതിയെയും പറ്റി അന്വേഷിക്കാനും അനെർട്ടിനും ഇതര സർക്കാർ വകുപ്പുകൾക്കും സംഭവിച്ച സാമ്പത്തിക നഷ്ടങ്ങൾ തിരിച്ചു പിടിക്കാനും സർക്കാർ തയ്യാറാകുമോ?

സോളാർ വൈദ്യുതി ഉല്പാദനം വർദ്ധിച്ചു വരുന്നത് നിയന്ത്രിക്കുവാൻ കെ. എസ്. ഇ. ബി. ഉദ്ദേശിക്കുന്നുണ്ടോ; എങ്കിൽ കാരണം വിശദമാക്കുമോ;

സോളാർ, മറ്റ് പുനരുപയോഗ ​സ്രോതസ്സുകള്‍ എന്നിവയില്‍ നിന്നുളള വൈദ്യുതി ഉല്പാദനം വർദ്ധിക്കുന്നതനുസരിച്ച് പ്രസരണ വിതരണ ശൃംഖലകൾ ശക്തിപ്പെടുത്താൻ നടപടി സ്വീകരിച്ചിട്ടുണ്ടോ;

സോളാർ ഉല്പാദകർക്കുളള ആനുകൂല്യങ്ങൾ നിയന്ത്രിക്കുവാൻ നടപടി സ്വീകരിച്ചിട്ടുണ്ടോ; സോളാർ ഉല്പാദകരുടെ താൽപര്യം സംരക്ഷിക്കുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നത്; വിശദമാക്കുമോ?

മേലേതുടുക്കി, ഗലസി, ഊരടം എന്നീ ആദിവാസി ഉന്നതികളുടെ വൈദ്യുതീകരണത്തിനായി അനെർട്ട് 2023 ഫെബ്രുവരി 8 ന് ക്ഷണിച്ച ടെൻഡറിന്റെ ടെക്നിക്കൽ ബിഡ് തുറന്നതിന് ശേഷമാണോ സാങ്കേതിക വിലയിരുത്തൽ മാനദണ്ഡം നിശ്ചയിച്ചതെന്ന് വ്യക്തമാക്കുമോ; ടെൻഡറിൽ പങ്കെടുത്ത കമ്പനികൾക്ക് ഓരോ ഇനത്തിലും ലഭിച്ച മാർക്കും നിശ്ചയിച്ചിരുന്ന മാനദണ്ഡങ്ങളും വ്യക്തമാക്കാമോ; മാർക്ക് ലഭിക്കുന്നതിനുള്ള മാനദണ്ഡപ്രകാരം ഓരോ ഇനത്തിലും കമ്പനികൾ സമർപ്പിച്ച യോഗ്യത സംബന്ധിച്ച രേഖകളുടെയും സാങ്കേതിക വിലയിരുത്തൽ രേഖയുടെയും പകർപ്പ് ലഭ്യമാക്കാമോ;

ടെക്നിക്കൽ ബിഡും ഫിനാൻസ് ബിഡും തുറന്നതിന് ശേഷം പ്രസ്തുത ടെൻഡർ റദ്ദാക്കാനുള്ള കാരണം വ്യക്തമാക്കാമോ; ടെൻഡർ റദ്ദാക്കിയ തീരുമാനം എടുത്ത ഫയലിന്റെ പകർപ്പ് ലഭ്യമാക്കുമോ;

2023 ഏപ്രിൽ 20 ന് ക്ഷണിച്ച റീ ടെൻഡറിൽ മുൻ ടെൻഡറിലെ ടെക്നിക്കൽ ബിഡ് പരിശോധിക്കുന്നതിനായി നിശ്ചയിച്ചിരുന്ന സാങ്കേതിക വിലയിരുത്തൽ മാനദണ്ഡത്തിൽ ഓരോ ഇനത്തിനും ലഭിക്കുന്ന മാർക്കുകളിൽ മാറ്റം വരുത്തിയിരുന്നോയെന്നും ഏതെല്ലാം ഇനങ്ങളിലാണ് മാറ്റം വരുത്തിയതെന്നും വ്യക്തമാക്കുമോ?

സോളാർ കണക്ഷനുമായി ബന്ധപ്പെട്ട ഹൈബ്രിഡ് സംവിധാനം സംബന്ധിച്ച് റെഗുലേറ്ററി കമ്മീഷൻ അന്തിമമായി തീരുമാനം എടുത്തിട്ടില്ലെന്നിരിക്കെ ഹൈബ്രിഡ് സോളാർ സ്ഥാപിക്കുന്നതുമായി ബന്ധപ്പെട്ട് കെ. എസ്. ഇ. ബി. യുടെ സോഫ്റ്റ്‌വെയറിൽ നാളിതുവരെ മാറ്റം വരാത്തത് ഹൈബ്രിഡ് സോളാർ സ്ഥാപിക്കുവാൻ ഉദ്ദേശിക്കുന്നവർക്ക് ബുദ്ധിമുട്ട് ഉണ്ടാക്കുന്നുവെന്ന കാര്യം ശ്രദ്ധയിൽപ്പെട്ടിട്ടുണ്ടോ; ഈ വിഷയം പരിഹരിക്കുന്നതിനായി എന്തെല്ലാം നടപടികളാണ് സ്വീകരിച്ചിരിക്കുന്നതെന്ന് അറിയിക്കാമോ;

ബയോ ഫ്ലോക്ക് കൃഷി നടത്തുന്നവർക്ക് 24 മണിക്കൂറും വൈദ്യുതി അത്യന്താപേക്ഷിതമാണ്. ഇവർക്ക് താരിഫ് നിരക്കിൽ സോളാർ വെക്കുന്നതിനായി എന്തെല്ലാം ആനുകൂല്യങ്ങളാണ് ലഭ്യമാക്കുന്നതെന്ന് വിശദമാക്കാമോ?

പി. എം. കുസും പദ്ധതിയ്ക്കായുള്ള അനെർട്ട് 2022 ഡിസംബർ 12 ന് ക്ഷണിച്ച ടെന്‍ഡറില്‍ പങ്കെടുത്ത സൺടാസ്റ്റിക് എഞ്ചിനീയറിംഗ് പ്രൈവറ്റ് ലിമിറ്റഡ് എന്ന കമ്പനി നിലത്ത് സ്ഥാപിക്കുന്ന പ്ലാന്റുകൾക്ക് ക്വോട്ട് ചെയ്ത നിരക്കുകൾ എത്രയായിരുന്നുവെന്നും കമ്പനിക്ക് ഈ ഇനത്തിൽ നൽകിയ വർക്ക് ഓർഡറിലെ നിരക്കുകൾ എത്രയായിരുന്നുവെന്നും കമ്പനി ഇതുവരെ സ്ഥാപിച്ച പ്ലാന്റുകളുടെ ശേഷിയും എണ്ണവും അനുവദിച്ച തുകയും സംബന്ധിച്ച കാര്യങ്ങളും വിശദീകരിക്കാമോ;

മേൽ ടെൻഡറിൽ കോണ്ടാസ് ഓട്ടോമേഷൻ പ്രൈവറ്റ് ലിമിറ്റഡ് എന്ന കമ്പനി എക്സൽ ഫയലിൽ ക്വോട്ട് ചെയ്ത നിലത്ത് സ്ഥാപിക്കുന്ന പ്ലാന്റുകളുടെ നിരക്കുകൾ എത്രയായിരുന്നുവെന്ന് അറിയിക്കാമോ;

പ്രസ്തുത കരാറിന്റെ ഫിനാന്‍സ് ബിഡ് ആരംഭിച്ച തീയതി എന്നായിരുവെന്നും ഈ നിരക്കുകളിൽ മാറ്റം വരുത്തിയ തീയതിയും മാറ്റം വരുത്തിയതിനുള്ള കാരണവും വ്യക്തമാക്കാമോ; നിരക്കുകളിൽ മാറ്റം വരുത്തിയതിലൂടെ പദ്ധതിയിൽ വന്ന അധിക ചിലവ് എത്രയാണെന്ന് അറിയിക്കാമോ;

അക്കൗണ്ടന്റ് ജനറല്‍ ഓഫീസ് 2023-ൽ അനെർട്ടിൽ നടത്തിയ പരിശോധന റിപ്പോർട്ടിൽ പി. എം. കുസും പദ്ധതിയുമായി ബന്ധപ്പെട്ട ടെൻഡറുകളെ സംബന്ധിച്ചുള്ള പരാമർശങ്ങളുടെ വിശദാംശങ്ങൾ ലഭ്യമാക്കാമോ; കേന്ദ്ര മാർഗനിർദേശം പൂർണ്ണമായും പാലിച്ചാണ് പദ്ധതി നടപ്പിലാക്കുന്നതെന്നും ടെൻഡറുകളിൽ അപാകതകൾ ഇല്ലായെന്നും സി. എ. ജി. ഓഡിറ്റ് റിപ്പോർട്ടിൽ രേഖപ്പെടുത്തിയിട്ടുണ്ടോ; എങ്കില്‍ റിപ്പോർട്ടിന്റെ പകർപ്പ് ലഭ്യമാക്കാമോ?

ഇക്കോമേറ്റ് എനർജി സൊല്യൂഷൻസ് എന്ന കമ്പനിയ്ക്ക് കഴിഞ്ഞ നാല് വർഷത്തിനുള്ളിൽ സോളാര്‍ പവര്‍ പ്ലാന്റ്, സോളാർ സ്ട്രീറ്റ് ലൈറ്റ് എന്നിവ സ്ഥാപിക്കുന്നതിന് അനെർട്ടിന്റെ കേന്ദ്രകാര്യാലയം, ജില്ലാ ഓഫീസുകൾ എന്നിവ മുഖേന എത്ര രൂപയുടെ വർക്ക് ഓർഡറുകൾ നല്കിയെന്ന് അറിയിക്കാമോ; വർക്ക് ഓർഡറുകളുടെ പകർപ്പും ഇതിനായി ക്ഷണിച്ച ടെൻഡറുകളുമായി ബന്ധപ്പെട്ട ഫയലുകളുടെ പകർപ്പും ലഭ്യമാക്കാമോ;

ഈ കമ്പനിയ്ക്ക് നൽകിയ വർക്ക് ഓർഡറിലെ പ്രവൃത്തികൾ പരിശോധിക്കുന്നതിന് ചുമതലപ്പെടുത്തിയ ഉദ്യോഗസ്ഥർ, സോളാർ ഇൻസ്പെക്ടർ, സ്ഥാപനങ്ങൾ എന്നിവരുടെ വിശദാംശങ്ങൾ ലഭ്യമാക്കാമോ; പരിശോധനാ റിപ്പോർട്ടിന്റെയും പേയ്‌മെന്റ് ഉത്തരവുകളുടെയും പകർപ്പ് ലഭ്യമാക്കാമോ;

ഈ കമ്പനി കഴിഞ്ഞ നാല് വർഷത്തിനുള്ളിൽ സ്ഥാപിച്ച സോളാര്‍ ഉപകരണങ്ങളുടെ ഇൻഷുറൻസ് പോളിസി, വാർഷിക പ്രീമിയം പേയ്‌മെന്റ് രസീത്, പ്രിവൻറ്റീവ് മെയിൻന്റനൻസ് റിപ്പോർട്ട്, ജനറേഷൻ ഡാറ്റ എന്നിവ സമർപ്പിച്ചിരുന്നോ; എങ്കിൽ അവയുടെ പകർപ്പുകൾ ലഭ്യമാക്കാമോ; ഇല്ലെങ്കിൽ ഈ കമ്പനിയ്ക്കെതിരെ സ്വീകരിച്ച നടപടി സംബന്ധിച്ച വിശദാംശം വ്യക്തമാക്കാമോ;

ഈ കമ്പനിയ്ക്ക് പി.എം. കുസും പദ്ധതിയുമായി ബന്ധപ്പെട്ട് വർക്കുകൾ നല്കിയിട്ടുണ്ടോ; എങ്കിൽ അതിന്റെ വിശദാംശം വ്യക്തമാക്കാമോ?

തനത് ഫണ്ടില്‍ നിന്ന് സ്വന്തമായി ഇലക്ട്രിക് കാറുകള്‍ വാങ്ങുന്നതിന് അനെർട്ടിന് സർക്കാരിന്റെ മുൻകൂർ അനുമതി ആവശ്യമാണോ; അനെര്‍ട്ട് തനത് ഫണ്ട് വിനിയോഗിച്ച് ഇലക്ട്രിക് കാറുകള്‍ വാങ്ങിയിട്ടുണ്ടോ ; ഇതിന് മുൻകൂർ അനുമതി നല്കിയിട്ടുണ്ടോ ;

അനെര്‍ട്ട് തനത് ഫണ്ട് വിനിയോഗിച്ച് വാങ്ങിയ കാറുകളുടെ എണ്ണം, മോഡൽ, വില, കാറുകളുടെ വിനിയോഗം എന്നീ വിവരങ്ങൾ ലഭ്യമാക്കാമോ ; ഇതുമായി ബന്ധപ്പെട്ട ഫയലുകളുടെ പകര്‍പ്പ് ലഭ്യമാക്കാമോ ;

അനെർട്ടിലെ വാഹന ഉപയോഗത്തെ സംബന്ധിച്ച് പരാതി ലഭിച്ചിട്ടുണ്ടോ; ഇത് സംബന്ധിച്ച് സ്വീകരിച്ച നടപടിയുടെ വിശദാംശം വ്യക്തമാക്കാമോ ;

അനെർട്ടിലെയും, അനെർട്ട് മുഖേന വിവിധ സ്ഥാപനങ്ങൾക്ക് നൽകിയിട്ടുള്ള കാറുകളിലെയും ഡ്രൈവർമാരെ സ്വകാര്യ ഏജൻസി വഴി കരാർ അടിസ്ഥാനത്തിൽ നിയമിച്ചിട്ടുണ്ടോ; ഉണ്ടെങ്കിൽ എത്ര പേരെയാണ് നിയമിച്ചിരിക്കുന്നത്; ഈ ഏജൻസിയും, അനെർട്ടും തമ്മിൽ നിലവിലുള്ള കരാറിന്റെയും, വേതന വ്യവസ്ഥയുടെയും പകർപ്പ് ലഭ്യമാക്കാമോ ?

സോളാർ ഉൾപ്പെടെയുള്ള പുനരുപയോഗ വൈദ്യുതി ഉല്പാദകർക്കുള്ള ആനുകൂല്യങ്ങൾ കുറയ്ക്കുന്നതിനായുള്ള പുതിയ ചട്ടം രൂപീകരിക്കുന്നതിന് സംസ്ഥാന വൈദ്യുതി റഗുലേറ്ററി കമ്മീഷൻ ശിപാർശ ചെയ്തിട്ടുണ്ടോ; വ്യക്തമാക്കാമോ;

പ്രസ്തുത ആനുകൂല്യങ്ങൾ അനുവദിക്കുന്നതുമായി ബന്ധപ്പെട്ട് ഓൺലൈനായി നടത്തിയ പൊതു തെളിവെടുപ്പ് സംബന്ധിച്ച് ഹൈക്കോടതി വിധി പുറപ്പെടുവിച്ചിട്ടുണ്ടോ; വ്യക്തമാക്കാമോ;

പ്രസ്തുത ഹൈക്കോടതി ഉത്തരവിനെതിരെ വൈദ്യുതി റഗുലേറ്ററി കമ്മീഷൻ അപ്പീൽ നൽകുന്നതിന് തീരുമാനിച്ചിട്ടുണ്ടോ; വ്യക്തമാക്കാമോ;

സോളാർ വൈദ്യുതി ഉല്പാദകരും ഫിക്‌സഡ് ചാർജ് നൽകണമെന്ന് കമ്മീഷൻ ശിപാർശ ചെയ്തിട്ടുണ്ടോ; വ്യക്തമാക്കാമോ?

റിന്യൂവബിൾ എനർജി കെയർ എന്ന സ്ഥാപനം അനെർട്ടിന് നല്കിയ കണ്‍സോര്‍ഷ്യം കരാറിലെ ലീഡ് പാർട്ട്നർ ഊർജമിത്ര വെഞ്ച്വേഴ്സ് പ്രൈവറ്റ് ലിമിറ്റഡ് എന്ന സ്വകാര്യ കമ്പനിയായിരുന്നോ; ഒരു സ്വകാര്യ കമ്പനി മുഖ്യ പങ്കാളിയായ ഈ സ്ഥാപനവുമായി അനെർട്ട് ധാരണപത്രം ഒപ്പിട്ടിട്ടുണ്ടോ ; എങ്കിൽ നിലവിലുള്ള ധാരണപത്ര കരാറിന്റെ പകർപ്പ് ലഭ്യമാക്കാമോ ;

മൈക്രോ എന്റർപ്രൈസസ് എന്ന നിലയിൽ ഉദ്യം രജിസ്ട്രേഷൻ സർട്ടിഫിക്കറ്റ് ഉള്ള ഈ സ്ഥാപനം മുഖേന അനെർട്ട് പദ്ധതിയിൽ ജീവനക്കാരെ നിയമിച്ചിട്ടുണ്ടോ; ഇവർക്കുള്ള വേതനം ഈ സ്ഥാപനത്തിന്റെ ബാങ്ക് അക്കൗണ്ടിലേക്കാണോ നല്കുന്നത്; ഇതുവരെ എത്ര രൂപ നല്കിയിട്ടുണ്ട്; ജീവനക്കാരുടെ നിയമനവുമായി ബന്ധപ്പെട്ട ഫയലിന്റെ പകർപ്പ് ലഭ്യമാക്കാമോ;

റിന്യൂവബിൾ എനർജി കെയർ എന്ന സ്ഥാപനത്തിന് കഴിഞ്ഞ മൂന്ന് വർഷത്തിനുള്ളിൽ എത്ര രൂപ അനെർട്ട് നല്കിയിട്ടുണ്ട്; പേയ്‌മെന്റ് ഉത്തരവുകളുടെ പകർപ്പ് ലഭ്യമാക്കാമോ ;

റിന്യൂവബിൾ എനർജി കെയറിന് എത്ര കിലോവാട്ട് ശേഷി വരെയുള്ള സോളാര്‍ പ്ലാന്റുകള്‍ പരിശോധിക്കാനാണ് ചുമതല നല്‍കിയിരുന്നത് ; ഈ സ്ഥാപനത്തിന്റെ ഭാരവാഹികള്‍ സോളാര്‍ ബിസിനസ്സുമായി ബന്ധമുള്ളവരാണ് എന്ന ആക്ഷേപം ശ്രദ്ധയില്‍പ്പെട്ടിട്ടുണ്ടോ ; ഇല്ലെങ്കില്‍ ഇത് സംബന്ധിച്ച് അന്വേഷണത്തിനുള്ള നടപടി സ്വീകരിക്കുമോ?

പുനരുപയോഗ ഊർജോത്പാദന ഉപകരണങ്ങളുടെ ജി. എസ്‌. ടി. എത്ര ശതമാനത്തിൽ നിന്ന് എത്ര ശതമാനമായി കുറച്ചു; വ്യക്തമാക്കാമോ;

ജി. എസ്‌. ടി. കുറച്ചതിലൂടെ ഒരു കിലോവാട്ട് സോളാർ നിലയത്തിന്റെ ചെലവിൽ എത്രത്തോളം കുറവ് പ്രതീക്ഷിക്കപ്പെടുന്നു; വിശദമാക്കാമോ;

സോളാർ നിലയങ്ങൾ സ്ഥാപിക്കുന്നതിനുള്ള സേവന നികുതി എത്ര ശതമാനമായി തുടരുന്നു; വ്യക്തമാക്കാമോ;

കേരളത്തിൽ പുതുതായി സ്ഥാപിക്കുന്ന സോളാർ നിലയങ്ങളുടെ എണ്ണം കുറയാനുള്ള കാരണം സൂചിപ്പിച്ചുകൊണ്ടുള്ള കേരള റിന്യൂവബിൾ എനർജി എന്റർപ്രെനേഴ്സ് ആൻഡ് പ്രൊമോട്ടേഴ്സ് അസോസിയേഷൻസ് (ക്രീപ) യുടെ വിശദീകരണം സംബന്ധിച്ച നിലപാട് വ്യക്തമാക്കാമോ;

പുതിയ ചട്ടങ്ങൾ വന്നാലും പുരപ്പുറ സോളാർ നിലയങ്ങൾ ലാഭകരമാണെന്നു വ്യക്തമാക്കുന്നത് ഏത് സ്ഥാപനമാണ്; വ്യക്തമാക്കാമോ;

പുതിയ ചട്ടങ്ങൾ പ്രാബല്യത്തിൽ വരുന്നത് സംബന്ധിച്ച അന്തിമ തീരുമാനം ഏത് കോടതിയുടെ നിലപാടിനെ ആശ്രയിച്ചിരിക്കുന്നു; വ്യക്തമാക്കാമോ;

താപവൈദ്യുത നിലയങ്ങളിൽ ഉപയോഗിക്കുന്ന കൽക്കരി, ലിഗ്നൈറ്റ് എന്നിവയുടെ നികുതി എത്ര ശതമാനമായാണ് വർധിപ്പിച്ചിരിക്കുന്നതെന്ന് വ്യക്തമാക്കാമോ ?

വിൻഡ്‌സ്ട്രീം എനർജി ടെക്‌നോളജീസ് ഇന്ത്യ പ്രൈവറ്റ് ലിമിറ്റഡ് എന്ന കമ്പനി മുഖേന അനെർട്ട് സ്ഥാപിച്ച സോളാര്‍ വിൻഡ് ഹൈബ്രിഡ് പ്ലാന്റുകളുമായി ബന്ധപ്പെട്ട് പരാതികൾ ലഭിച്ചിട്ടുണ്ടോ; ഉണ്ടെങ്കിൽ എത്ര പരാതികൾ ലഭിച്ചുവെന്ന് അറിയിക്കാമോ;

പരാതികള്‍ അന്വേഷിക്കുന്നതിന് കമ്മിറ്റിയെ നിയമിച്ചിട്ടുണ്ടോ; കമ്മിറ്റിയെ നിയമിച്ച ഉത്തരവിന്റെയും കമ്മിറ്റി സമർപ്പിച്ച റിപ്പോർട്ടിന്റെയും പകർപ്പ് ലഭ്യമാക്കാമോ?