സംസ്ഥാനത്ത് ഓണ്‍ലൈന്‍ വിദ്യാഭ്യാസത്തില്‍ ഏര്‍പ്പെട്ടിരിക്കുന്ന വിദ്യാര്‍ത്ഥികളുടെ മാനസിക സംഘ‍ർഷം ഒഴിവാക്കുന്നതിനുള്ള നടപടികളുടെ ഭാഗമായി രക്ഷിതാക്കള്‍ക്ക് ഇതുസംബന്ധിച്ച് ബോധവത്കരണം നടത്താനും വിദ്യാര്‍ത്ഥികള്‍ക്ക് വേണ്ടി കൗണ്‍സിലിംഗ് ക്ലാസ്സുകള്‍ ഏർപ്പെടുത്താനും നടപടി സ്വീകരിക്കുമോ; വിശദാംശം നല്‍കുമോ?

സംസ്ഥാനത്ത് തീര്‍ത്ഥാടന കേന്ദ്രങ്ങളെയും സാംസ്കാരിക കേന്ദ്രങ്ങളെയും ബന്ധിപ്പിച്ച് ടൂറിസം പദ്ധതികള്‍ നടപ്പിലാക്കി വരുന്നുണ്ടോയെന്ന് അറിയിക്കുമോ;

പ്രസ്തുത പദ്ധതികള്‍ക്ക് കേന്ദ്ര സഹായം ലഭിക്കുന്നുണ്ടോയെന്ന് വെളിപ്പെടുത്തുമോ;

കേന്ദ്ര സഹായത്തോടെ കൂടുതല്‍ തീര്‍ത്ഥാടക ടൂറിസം പദ്ധതികള്‍ ആരംഭിക്കുന്നതിന് നടപടി സ്വീകരിക്കുമോ;

കോവിഡ് കാരണം വിദേശികളുള്‍പ്പെടെയുള്ള ടൂറിസ്റ്റുകളുടെ വരവ് നിലച്ചതിനാല്‍ ആഭ്യന്തര ടൂറിസ്റ്റുകളുടെ വരവ് വര്‍ദ്ധിപ്പിക്കാനും ടൂറിസം പരിപോഷിപ്പിക്കാനും നടപടി ഉണ്ടാകുമോയെന്ന് വ്യക്തമാക്കാമോ?

സംസ്ഥാനത്ത് വിനോദസഞ്ചാര വികസനത്തിന് കിഫ്ബി മുഖേന നടപ്പാക്കുന്ന പ്രധാന പദ്ധതികള്‍ ഏതൊക്കെയെന്നും അവയുടെ പുരോഗതിയും അറിയിക്കാമോ;

വിനോദസഞ്ചാര രംഗത്ത് ഏറെ സാദ്ധ്യതയുള്ള സ്പൈസ് റൂട്ട്, പൈതൃക ടൂറിസം എന്നിവ ബൃഹദ് പദ്ധതികളായി വിപുലീകരിക്കാന്‍ പരിപാടിയുണ്ടോയെന്ന് അറിയിക്കാമോ;

സംസ്ഥാനത്തെ വിനോദസഞ്ചാര വ്യവസായം ചിലയിടങ്ങളില്‍ മാത്രം കേന്ദ്രീകരിച്ചിരിക്കുന്നതിന് പകരം വികേന്ദ്രീകൃത രീതിയില്‍ വിപുലപ്പെടുത്താന്‍ ഉദ്ദേശിക്കുന്നുണ്ടോയെന്ന് വ്യക്തമാക്കുമോ?

വിഴിഞ്ഞം തുറമുഖ നിർമ്മാണവുമായി ബന്ധപ്പെട്ട് തദ്ദേശീയരായ മത്സ്യത്തൊഴിലാളികളുടെ പുനരധിവാസം, ഉപജീവനം, തൊഴിൽ സുരക്ഷ തുടങ്ങിയ കാര്യങ്ങളിലെ പ്രശ്നങ്ങൾ പരിഹരിക്കുന്നതിന് നാളിതുവരെ എന്തെല്ലാം നടപടികളാണ് സ്വീകരിച്ചിട്ടുള്ളതെന്ന് വ്യക്തമാക്കാമോ;

2015-ൽ വിഴിഞ്ഞം തുറമുഖ കമ്പനി സമർപ്പിച്ച ഉപജീവന ആഘാത നിർണയ സമിതി റിപ്പോർട്ടിലുൾപ്പെട്ട നഷ്ടപരിഹാര പുനരധിവാസ പാക്കേജിലെ ഏതൊക്കെ കാര്യങ്ങളാണ് ഇതിനകം നടപ്പിലാക്കിയത്; വ്യക്തമാക്കുമോ;

തുറമുഖ നിർമ്മാണത്തിന്റെ ഫലമായി മത്സ്യബന്ധനത്തിനിടെ അപകടങ്ങൾ സംഭവിക്കുന്നത് തടയുന്നതിന് ശാശ്വത നടപടികൾ സ്വീകരിച്ചിട്ടുണ്ടോയെന്ന് അറിയിക്കുമോ?

സംസ്ഥാനത്ത് ആദിവാസി, തീരദേശ, പ്ലാ​ന്റേഷൻ മേഖലകളിൽ നിന്നുള്ള വിദ്യാർത്ഥികൾക്ക് പ്രത്യേക പഠന സഹായം ആവശ്യമാണെന്നത് ശ്രദ്ധയിൽപ്പെട്ടിട്ടുണ്ടോ;

പാർശ്വവത്ക്കരിക്കപ്പെട്ട കുട്ടികളുടെ സാമൂഹിക, സാംസ്കാരിക പശ്ചാത്തലം മനസ്സിലാക്കി പ്രത്യേക ഇടപെടൽ നടത്തുന്ന കാര്യത്തിൽ നിലപാട് വ്യക്തമാക്കാമോ;

പ്രസ്തുത വിദ്യാർത്ഥികൾക്ക് പഠനാവസരം ഉറപ്പുവരുത്തുവാൻ ബന്ധപ്പെട്ട വകുപ്പുകളുടെ സഹായത്തോടെ എന്തെല്ലാം പദ്ധതികളാണ് പരിഗണനയിലുള്ളതെന്ന് വ്യക്തമാക്കാമോ?

സംസ്ഥാനത്തെ വിനോദസഞ്ചാര കേന്ദ്രങ്ങള്‍ ഭിന്നശേഷി സൗഹൃദമാണോ എന്ന് പരിശോധിച്ചിട്ടുണ്ടോ;

എല്ലാ വിനോദസഞ്ചാര കേന്ദ്രങ്ങളും ഭിന്നശേഷി സൗഹൃദമാക്കാന്‍ നടപടി സ്വീകരിക്കുമോയെന്ന് വ്യക്തമാക്കാമോ;

ടൂറിസ്റ്റ് കേന്ദ്രങ്ങളിൽ മദ്യ, മയക്കുമരുന്ന് മാഫിയ ഉള്‍പ്പെടെയുള്ള സാമൂഹ്യ വിരുദ്ധരുടെ പ്രവര്‍ത്തനം നിയന്ത്രിക്കുന്നതിന് ടൂറിസം പോലീസിനെ നിയോഗിക്കുവാൻ നിര്‍ദ്ദേശിച്ചിട്ടുണ്ടോ; വ്യക്തമാക്കുമോ?

വനം വകുപ്പ് ഭൂമി വിട്ടുനൽകാത്തതിനാൽ തടസ്സപ്പെട്ടിരുന്ന മലയോര ഹൈവേയുടെ നിർമ്മാണം പുനരാരംഭിക്കാൻ സാധിച്ചിട്ടുണ്ടോ;

മലയോര ഹൈവേ നിർമ്മാണത്തിനായി ഒരു ഹെക്ടറിലധികം വനഭൂമി ഏറ്റെടുക്കേണ്ട റീച്ചുകളിൽ ഭൂമിയേറ്റെടുക്കൽ സാധ്യമായിട്ടുണ്ടോ; ഇല്ലെങ്കിൽ ഇതിനായി എന്തെങ്കിലും സംവിധാനം ഏർപ്പെടുത്തിയിട്ടുണ്ടോ;

മലയോര ഹൈവേയുടെ മുഴുവൻ റീച്ചുകളിലെയും പ്രവൃത്തി സമയബന്ധിതമായി പൂർത്തീകരിക്കുവാൻ പ്രത്യേക കർമ്മപദ്ധതി തയ്യാറാക്കുമോ?

സംസ്ഥാനത്ത് വിദ്യാഭ്യാസരംഗത്ത് അന്താരാഷ്ട്രനിലവാരം കൈവരിക്കുകയെന്ന ലക്ഷ്യത്തോടെ ഓരോ ക്ലാസ്സിലെയും പഠിതാക്കള്‍ അന്താരാഷ്ട്രതലത്തിലുള്ള ധാരണയും നൈപുണ്യവും കൈവരിക്കുന്നുണ്ടോ എന്ന് പരിശോധിക്കാറുണ്ടോ; വിശദമാക്കാമോ;

ദേശീയതലത്തില്‍ സംസ്ഥാനത്തിന് വിദ്യാഭ്യാസമേഖലയിൽ കൈവരിക്കാന്‍ കഴിഞ്ഞ നേട്ടങ്ങള്‍ എന്തൊക്കെയെന്ന് വിശദമാക്കാമോ;

പൊതുവിദ്യാലയങ്ങളില്‍ നിലവിലുള്ളതും പുതുതായി നിയമിക്കപ്പെടുന്നതുമായ അദ്ധ്യാപകരുടെ മികവുയര്‍ത്താന്‍ പദ്ധതിയുണ്ടോ; വിശദാംശം ലഭ്യമാക്കുമോ;

സര്‍ക്കാര്‍ വിദ്യാലയങ്ങളിൽ വിദ്യാര്‍ത്ഥികള്‍ വര്‍ദ്ധിച്ചുവരുന്നതിന് ആനുപാതികമായി പുതിയ തസ്തികകള്‍ സൃഷ്ടിക്കുന്നതിനും അദ്ധ്യാപകരെ നിയമിക്കുന്നതിനും നടപടി സ്വീകരിച്ചുവരുന്നുണ്ടോ;

സംരക്ഷിത അദ്ധ്യാപകരുടെ താല്പര്യം പരിരക്ഷിച്ചുകൊണ്ടാണോ എയ്ഡഡ് വിദ്യാലയങ്ങളില്‍ മാനേജര്‍മാര്‍ നടത്തിയ നിയമനങ്ങൾക്ക് അംഗീകാരം നല്‍കിയതെന്ന് വ്യക്തമാക്കാമോ?

ഭൂമി ഏറ്റെടുക്കലിന്റെ ചെലവിന്റെ നാലിലൊന്ന് സംസ്ഥാനം ഏറ്റെടുത്തതിനെ തുടര്‍ന്ന് ദേശീയ പാത 66 നാലുവരിയാക്കുന്ന പ്രവര്‍ത്തനം ത്വരിതപ്പെടുത്താന്‍ ദേശീയപാത അതോറിറ്റിയോട് ആവശ്യപ്പെട്ടിട്ടുണ്ടോ;

പദ്ധതിയ്ക്കായുള്ള സ്ഥലമെടുപ്പിന്റെ പുരോഗതിയും വിവിധ റീച്ചുകളുടെ നിര്‍മ്മാണത്തിന്റെ നിലവിലെ സ്ഥിതിയും അറിയിക്കാമോ;

ദേശീയ പാത 212-ല്‍ ബന്ദിപ്പൂര്‍ മേഖലയിലെ രാത്രിയാത്ര നിരോധനം സൃഷ്ടിക്കുന്ന തടസ്സം പരിഹരിക്കാന്‍ മേല്‍പ്പാലം നിര്‍മ്മിക്കണമെന്നും അതിനായി വേണ്ടിവരുന്ന ചെലവിന്റെ പകുതി വഹിക്കാമെന്നുമുള്ള സംസ്ഥാന സര്‍ക്കാരിന്റെ നിലപാടിനോട് കേന്ദ്ര സര്‍ക്കാര്‍ പ്രതികരണം അറിയിച്ചിട്ടുണ്ടോ?

സംസ്ഥാനത്ത് ദേശീയ ജലപാത യാഥാര്‍ത്ഥ്യമാകുന്നതോടെ ഉള്‍നാടന്‍ ജലഗതാഗതം ഏറെ വര്‍ദ്ധിക്കാനിടയുള്ള സാഹചര്യത്തില്‍ ഉള്‍നാടന്‍ ജലപാതകളിലെ ഗതാഗതവും ജലയാനങ്ങളെയും നിയന്ത്രിക്കുന്നതിനായുള്ള കേരള ഇന്‍ലാന്‍ഡ് വെസ്സല്‍ നിയമങ്ങള്‍ കാര്യക്ഷമമായി നടപ്പിലാക്കാന്‍ നടപടിയെടുത്തിട്ടുണ്ടോ;

ഹൗസ് ബോട്ടുകള്‍ ഉള്‍പ്പെടെയുള്ള ജലയാനങ്ങള്‍ രജിസ്ട്രേഷനില്ലാതെയാണ് പ്രവര്‍ത്തിക്കുന്നതെന്ന കാര്യം ശ്രദ്ധയില്‍പ്പെട്ടിട്ടുണ്ടോ;

തുടരെയുണ്ടാകുന്ന അപകടങ്ങളുടെ പശ്ചാത്തലത്തില്‍ ഉല്ലാസയാനങ്ങള്‍ ഉള്‍പ്പെടെ എല്ലാ ജലയാനങ്ങളും രജിസ്റ്റര്‍ ചെയ്യപ്പെടുന്നുണ്ടെന്നും അവ സുരക്ഷാ സംവിധാനങ്ങളോടെയാണ് പ്രവര്‍ത്തിക്കുന്നതെന്നും ഉറപ്പുവരുത്താന്‍ നടപടി സ്വീകരിക്കുമോ?

സംസ്ഥാനത്ത് 25 സെന്റ് വരെ വിസ്തീർണമുള്ള പാടമോ വയലോ ഫീസ് സൗജന്യത്തോടെ പുരയിടമോ പറമ്പോ ആക്കി മാറ്റുന്നതിനുള്ള ഉത്തരവ് ഇറക്കിയിട്ടുണ്ടോ; വിശദാംശങ്ങൾ നൽകാമോ;

2021 ഫെബ്രുവരി 25-നോ അതിനു ശേഷമോ സമർപ്പിക്കപ്പെട്ട അപേക്ഷകൾക്കായി മാത്രം പ്രസ്തുത ഉത്തരവ് നിജപ്പെടുത്തിയതിന്റെ ഉദ്ദേശ്യം വ്യക്തമാക്കാമോ;

ഭൂമിയുടെ തരംമാറ്റല്‍ സംബന്ധിച്ചുള്ള നിരവധി അപേക്ഷകൾ കെട്ടികിടക്കുന്ന സാഹചര്യത്തിൽ 2021 ഫെബ്രുവരി 25-ന് മുൻപുള്ള അപേക്ഷകൾക്ക് പ്രസ്തുത ഉത്തരവ് ബാധകമാക്കാൻ നടപടികൾ സ്വീകരിക്കുമോയെന്ന് വ്യക്തമാക്കാമോ?

റോഡ് നിര്‍മ്മാണത്തിലെ അശാസ്ത്രീയത സംസ്ഥാനത്ത് റോഡപകടങ്ങള്‍ക്ക് കാരണമാകുന്നതായി വിലയിരുത്തിയിട്ടുണ്ടോ; എങ്കില്‍ വിശദമാക്കുമോ;

സംസ്ഥാനത്ത് അപകടസാദ്ധ്യതയുള്ള റോഡുകളുള്ള പ്രദേശങ്ങള്‍ കണ്ടെത്തിയിട്ടുണ്ടോ;

എങ്കിൽ പ്രസ്തുത പ്രദേശങ്ങളില്‍ റോഡുകളുടെ വളവ് മാറ്റിയും വീതി കൂട്ടിയും റോഡപകടങ്ങള്‍ ഒഴിവാക്കാൻ സത്വര നടപടി സ്വീകരിക്കുമോ?

സംസ്ഥാനത്ത് ഭൂരേഖാ സംവിധാനം കാര്യക്ഷമമാക്കുന്നതിന് സര്‍വ്വേ വകുപ്പിന്റെ പ്രവര്‍ത്തനം നവീകരിക്കുന്നതിന് ഉദ്ദേശിക്കുന്നുണ്ടോ; വിശദമാക്കാമോ;

എല്ലാ ഭൂമിക്കും രേഖ എന്ന ആശയം നടപ്പിലാക്കുവാന്‍ ഉദ്ദേശിക്കുന്നുണ്ടോ; വിശദമാക്കാമോ;

സംസ്ഥാനത്ത് മാന്വലായി നടന്നുവരുന്ന സര്‍വ്വേ പ്രവര്‍ത്തനങ്ങളുടെ പുരോഗതി വെളിപ്പെടുത്താമോ;

സര്‍ക്കാരിന്റെ ആദ്യ നൂറുദിന കര്‍മ്മപരിപാടിയില്‍ സര്‍വ്വേ വകുപ്പുമായി ബന്ധപ്പെട്ട പ്രവര്‍ത്തനങ്ങള്‍ ഉള്‍പ്പെടുത്തിയിട്ടുണ്ടോ; വിശദമാക്കാമോ;

സര്‍വ്വേ നടപടികള്‍ വേഗത്തിലാക്കുന്നതിനായി ഡിജിറ്റല്‍ സര്‍വ്വേ സംവിധാനം ഏര്‍പ്പെടുത്തുവാന്‍ ഉദ്ദേശിക്കുന്നുണ്ടോ; വിശദമാക്കാമോ?

ലോകബാങ്ക് സഹായത്തോടെയുള്ള സ്റ്റാര്‍സ് പദ്ധതിയില്‍ കേന്ദ്ര സര്‍ക്കാര്‍ സംസ്ഥാനത്തെ ഉള്‍പ്പെടുത്തിയിട്ടുണ്ടോ; പദ്ധതിയില്‍ എന്തെല്ലാം ഘടകങ്ങളാണ് ഉള്‍പ്പെടുത്തിയിരിക്കുന്നതെന്ന് അറിയിക്കുമോ;

ഏകപക്ഷീയമായി പ്രഖ്യാപിച്ച വിദ്യാഭ്യാസ നയം 2020 പ്രാവര്‍ത്തികമാക്കുന്നതിന്റെ ഭാഗമാണോ സ്റ്റാര്‍സ് പദ്ധതി എന്ന് വ്യക്തമാക്കുമോ; പാഠ്യ പദ്ധതി നിര്‍ണ്ണയാവകാശം കേന്ദ്ര സര്‍ക്കാര്‍ ഏറ്റെടുക്കുന്നത് സൃഷ്ടിക്കാനിടയുള്ള പ്രത്യാഘാതം വിലയിരുത്തിയിട്ടുണ്ടോ;

പ്രസ്തുത നയം സംബന്ധിച്ച് സംസ്ഥാന സര്‍ക്കാരിന്റെ നിര്‍ദ്ദേശം കേന്ദ്ര സര്‍ക്കാരിന് സമര്‍പ്പിച്ചിരുന്നോ?

സംസ്ഥാനത്ത് സര്‍ക്കാര്‍ വക ഭൂമിയുടെ വിസ്തൃതി കുറഞ്ഞുവരുന്നതായ റിപ്പോര്‍ട്ടുകള്‍ ശ്രദ്ധയില്‍പ്പെട്ടിട്ടുണ്ടോ;

എങ്കില്‍ അതിനുള്ള കാരണങ്ങള്‍ പരിശോധിച്ചിട്ടുണ്ടോ; വിശദവിവരം വെളിപ്പെടുത്തുമോ;

ഭൂമിനഷ്ടം ഒഴിവാക്കാന്‍ എന്തെങ്കിലും നിര്‍ദ്ദേശങ്ങള്‍ പരിഗണനയിലുണ്ടോ; ഇക്കാര്യത്തില്‍ ഫലപ്രദമായ നടപടികള്‍ സ്വീകരിക്കുമോ?

ഈ സര്‍ക്കാര്‍ അധികാരത്തില്‍ വന്നശേഷം വിനോദസഞ്ചാര വികസനത്തിന് എന്തെല്ലാം നടപടികള്‍ സ്വീകരിച്ചിട്ടുണ്ടെന്ന് വ്യക്തമാക്കാമോ;

പുതിയ വികസന പദ്ധതികള്‍ നടപ്പിലാക്കുന്നതിന് കേന്ദ്ര സഹായം ലഭ്യമാക്കിയിട്ടുണ്ടോ; എങ്കില്‍ സഹായം അനുവദിക്കുന്നതിന് കേന്ദ്രം എന്തെങ്കിലും നിബന്ധന നിര്‍ദ്ദേശിച്ചിരുന്നുവോ; എങ്കില്‍ വിശദമാക്കുമോ;

വിനോദസഞ്ചാര വികസനത്തിനുവേണ്ടി നിക്ഷേപം നടത്തേണ്ട സ്ഥലങ്ങളുടെ മുൻഗണന തീരുമാനിച്ചിട്ടുണ്ടോ; എങ്കില്‍ അതിന്റെ അടിസ്ഥാനം എന്താണെന്ന് വിശദീകരിക്കാമോ;

പ്രസ്തുത വിഷയത്തില്‍ മലബാര്‍ മേഖലയ്ക്ക് പ്രത്യേക പരിഗണന നല്‍കുന്ന കാര്യം ഗൗരവമായി പരിഗണിക്കുമോ?

ഭൂരേഖകളുടെ കൃത്യതയ്ക്ക് എല്ലാ ഭൂവുടമകളുടെയും തണ്ടപ്പേര്‍ നമ്പര്‍ ആധാരവുമായി ലിങ്ക് ചെയ്യാനുള്ള പദ്ധതി സംസ്ഥാനത്ത് പ്രാവര്‍ത്തികമായിട്ടുണ്ടോ; പദ്ധതിയുടെ ലക്ഷ്യങ്ങള്‍ എന്തെല്ലാമാണെന്ന് അറിയിക്കാമോ;

ഭൂമി സംബന്ധമായി റവന്യൂ, രജിസ്ട്രേഷന്‍ വകുപ്പുകളിലെ സോഫ്റ്റ്‍വെയര്‍ ബന്ധിപ്പിച്ച് ആധാരം രജിസ്റ്റർ ചെയ്യുന്നതോടൊപ്പം തന്നെ ഓണ്‍ലൈനായി പോക്കുവരവും സാധ്യമാക്കുന്നതിന് നടപടി സ്വീകരിക്കുമോ;

ഭൂനികുതി രജിസ്റ്റര്‍ ഡിജിറ്റൈസ് ചെയ്ത് ഓണ്‍ലൈനായി നികുതി അടയ്ക്കാനുള്ള സംവിധാനം പൂര്‍ണ്ണമായും പ്രാവര്‍ത്തികമായിട്ടുണ്ടോ എന്ന് വ്യക്തമാക്കുമോ?

സംസ്ഥാനത്തെ സ്ക്കൂളുകളില്‍ ഇംഗ്ലീഷ് ഭാഷാ പഠനം മെച്ചപ്പെടുത്തുന്നതിന് പ്രത്യേകമായി ആസൂത്രണം ചെയ്ത പദ്ധതികള്‍ ഏതൊക്കെയെന്ന് വിശദമാക്കാമോ;

ഹൈദരാബാദിലുള്ള സെന്‍ട്രല്‍ ഇന്‍സ്റ്റിറ്റ്യൂട്ട് ഓഫ് ഇംഗ്ലീഷ് ആന്റ് ഫോറിന്‍ ലാംഗ്വേജസിന്റെ മാതൃകയില്‍ സംസ്ഥാനത്ത് ഇംഗ്ലീഷ് ഭാഷാ കേന്ദ്രങ്ങള്‍ സ്ഥാപിച്ചിട്ടുണ്ടോ; എങ്കില്‍ ഇത്തരം കേന്ദ്രങ്ങള്‍ സ്ഥാപിക്കുന്നതിലുടെ ലക്ഷ്യമിട്ടത് എന്തൊക്കെയെന്നും പ്രസ്തുത കേന്ദ്രങ്ങള്‍ സ്ഥാപിച്ചത് എവിടെയൊക്കെയെന്നും വ്യക്തമാക്കാമോ;

പ്രസ്തുത കേന്ദ്രങ്ങളുടെ പ്രവര്‍ത്തനങ്ങള്‍ ഏതൊക്കെ രീതിയില്‍ സ്കൂളുകളിലെ ഇംഗ്ലീഷ് ഭാഷാ പഠന നിലവാരം മെച്ചപ്പെടുത്താന്‍ ഉപകരിച്ചു എന്ന് വ്യക്തമാക്കാമോ;

കോവിഡ് മഹാമാരിയുടെ പശ്ചാത്തലത്തില്‍ പ്രസ്തുത ഭാഷാ കേന്ദ്രങ്ങള്‍ എന്തൊക്കെ പ്രവര്‍ത്തനങ്ങള്‍ നടത്തിയെന്ന് വിശദമാക്കാമോ?

സംസ്ഥാനത്തെ സ്കൂളുകളില്‍ പത്താംതരം വരെ മലയാള ഭാഷ പഠിപ്പിക്കണമെന്ന് നിര്‍ദ്ദേശിച്ചിട്ടുണ്ടോയെന്നറിയിക്കാമോ;

സംസ്ഥാനത്തെ കേന്ദ്രീയ വിദ്യാലയങ്ങള്‍ ഉള്‍പ്പെടെയുള്ള സി.ബി.എസ്.ഇ. സ്കൂളുകളിലും മലയാള ഭാഷാ പഠനം നടക്കുന്നുണ്ടെന്ന് ഉറപ്പുവരുത്താൻ എന്തെല്ലാം നടപടികള്‍ സ്വീകരിച്ചിട്ടുണ്ട്; വിശദാംശം നല്‍കുമോ?

സംസ്ഥാനത്ത് സ്ക്കൂൾ പാഠ്യപദ്ധതിയുടെയും പഠനാനുബന്ധ പ്രവർത്തനങ്ങളുടെയും ഭാഗമായി വിദ്യാർത്ഥികളിലെ സ്പോര്‍ട്സ് അഭിരുചി പ്രോത്സാഹിപ്പിക്കേണ്ടതിന്റെ ആവശ്യകത ശ്രദ്ധയിൽപ്പെട്ടിട്ടുണ്ടോ;

വിദ്യാർത്ഥികളിൽ കായിക സംസ്കാരം വളർത്തിയെടുക്കുന്നതിന് പരിപാടികൾ നിലവിലുണ്ടോ; വിശദമാക്കാമോ;

ഇതിനായി കേന്ദ്രസഹായ പദ്ധതികൾ നിലവിലുണ്ടോ; വ്യക്തമാക്കാമോ;

കഴിഞ്ഞ സർക്കാരിന്റെ കാലത്ത് നടപ്പിലാക്കിയ പ്ളേ ഫോര്‍ ഹെല്‍ത്ത് എന്ന പദ്ധതിയുടെ വിലയിരുത്തൽ നടത്തിയിട്ടുണ്ടോ; ഇതിന്റെ തുടർനടപടികൾ വിശദമാക്കാമോ?

ഇരുപത്തിയഞ്ച് സെന്റ് വരെ വിസ്തീർണ്ണമുള്ള പാടമോ വയലോ ഫീസ് സൗജന്യത്തോടെ പുരയിടമോ പറമ്പോ ആക്കി മാറ്റുന്നതിനുള്ള ഉത്തരവിലെ അപാകതകൾ പരിഹരിക്കുവാൻ എന്തെല്ലാം നടപടികളാണ് സ്വീകരിച്ചിരിക്കുന്നത്;

നെൽവയൽ തണ്ണീർത്തട ഡേറ്റാ ബാങ്കിൽ ഉൾപ്പെടാത്ത ഇരുപത്തിയഞ്ച് സെന്റ് വരെയുള്ള ഭൂമി നികത്തുന്നതിനായുള്ള അപേക്ഷകൾ തീർപ്പാക്കാൻ കഴിയാതെ ഓഫീസുകളിൽ കെട്ടിക്കിടക്കുന്ന സ്ഥിതിവിശേഷം സർക്കാർ തലത്തിൽ പരിശോധിച്ചിട്ടുണ്ടോ; വിശദമാക്കാമോ?

സംസ്ഥാനത്തെ മലയോര പ്രദേശങ്ങളുടെ സമഗ്ര വികസനം ലക്ഷ്യമിട്ടുകൊണ്ടുള്ള മലയോര ഹൈവേയുടെ നിര്‍മ്മാണ പ്രവര്‍ത്തനങ്ങള്‍ ജനങ്ങള്‍ സൗജന്യമായി ഭൂമി വിട്ടുനല്‍കിയിട്ടും വനം ഭൂമി വിട്ടുകിട്ടാത്തതിനാല്‍ മന്ദീഭവിക്കുന്നുണ്ടോ;

പ്രസ്തുത പാത നിര്‍മ്മാണത്തിന്റെ എത്ര റീച്ചുകള്‍ക്ക് കിഫ്ബി അംഗീകാരം ലഭ്യമായിട്ടുണ്ട്;

മലയോര പ്രദേശത്തിന്റെ പാരിസ്ഥിതിക പ്രത്യേകതകള്‍ കണക്കിലെടുത്തുകൊണ്ടുള്ളതാണോ നിര്‍മ്മാണ രീതി എന്ന് അറിയിക്കുമോ?

പൊതു വിദ്യാഭ്യാസ സംരക്ഷണ യജ്ഞം മൂലം അടിസ്ഥാന സൗകര്യത്തിലും അക്കാദമിക നിലവാരത്തിലും മികവ് സൃഷ്ടിക്കുവാനായെങ്കിലും സംസ്ഥാനത്തെ നാലിലൊന്നോളം പൊതുവിദ്യാലയങ്ങളില്‍ മാനദണ്ഡപ്രകാരം മതിയായ എണ്ണം കുട്ടികളില്ലാത്തവയാണെന്നതിന്റെ കാരണം പരിശോധനാ വിധേയമാക്കിയിട്ടുണ്ടോ;

ഇത്തരം സ്കൂളുകള്‍ ഓരോന്നിന്റെയും സാഹചര്യം വിലയിരുത്താന്‍ ഉദ്ദേശിക്കുന്നുണ്ടോ;

അക്കാദമിക ഗുണമേന്മ വര്‍ദ്ധിപ്പിക്കാന്‍ പൊതുവേ നടത്തി വരുന്ന പ്രവര്‍ത്തനങ്ങള്‍ വിശദമാക്കുമോ?

സംസ്ഥാനത്ത് ഉത്തരവാദിത്ത ടൂറിസം മിഷന്‍ നടപ്പാക്കുന്ന പാക്കേജുകള്‍ എന്തൊക്കെയാണ്;

ആര്‍.ടി. മിഷന് കീഴില്‍ രജിസ്റ്റര്‍ ചെയ്തിട്ടുള്ള യൂണിറ്റുകളുടെ ശൃംഖല രൂപീകരിച്ചിട്ടുണ്ടോ;

വിനോദസഞ്ചാര വികസനത്തിന്റെ സാമ്പത്തികഫലം ലഘുനിക്ഷേപത്തിന് മാത്രം കഴിവുള്ള പാവപ്പെട്ടവരിലേക്ക് വിശേഷിച്ചും സ്ത്രീകളിലേക്ക് എത്തിക്കുന്നതിന് ആര്‍.ടി. മിഷന് സാധിക്കുന്നുണ്ടോ; ഇതിനായി ആവിഷ്കരിച്ചിട്ടുള്ള പരിപാടികള്‍ എന്തെല്ലാമാണ്; വിശദമാക്കുമോ?

സംസ്ഥാനത്ത് അഞ്ച് ലക്ഷത്തോളം വിദ്യാർത്ഥികൾക്ക് ഓൺലൈൻ പഠനത്തിന് അടിസ്ഥാന സൗകര്യങ്ങൾ ഇല്ലെന്ന് റിപ്പോർട്ടുകൾ പുറത്തുവന്നതായി ശ്രദ്ധയില്‍പ്പെട്ടിട്ടുണ്ടോ; എങ്കില്‍ പ്രസ്തുത സാഹചര്യത്തിൽ മുഴുവൻ വിദ്യാർഥികൾക്കും അദ്ധ്യയനം ഉറപ്പാക്കുന്നതിന് സ്വീകരിച്ച നടപടികൾ അറിയിക്കുമോ;

ഡിജിറ്റൽ, ഓൺലൈൻ പഠനം ആരംഭിച്ചിട്ട് രണ്ടാമത്തെ അദ്ധ്യയന വർഷത്തിലും മുഴുവൻ വിദ്യാർഥികൾക്കും പഠന സൗകര്യങ്ങൾ ഏർപ്പെടുത്താൻ സാധിക്കാത്തതിന്റെ കാരണം വ്യക്തമാക്കുമോ;

കെ.എസ്.എഫ്.ഇ. മുഖേന ലാപ്ടോപ്പ് വിതരണം ചെയ്യുന്ന പദ്ധതിയിൽ അപേക്ഷിച്ച വിദ്യാർത്ഥികൾക്ക് ആയത് ലഭ്യമാകാത്തതിനാലും കിട്ടിയവയുടെ പ്രവർത്തനക്ഷമതയില്‍ പ്രശ്നങ്ങള്‍ നേരിടുന്നതിനാലും ഓൺലൈൻ പഠനത്തിൽ പങ്കെടുക്കാൻ സാധിക്കാത്തത് പരിഹരിക്കാൻ എന്തെങ്കിലും നടപടി സ്വീകരിച്ചിട്ടുണ്ടോ; വ്യക്തമാക്കുമോ?

സംസ്ഥാനത്ത് റവന്യൂ ഭൂമി വിവിധ ആവശ്യങ്ങള്‍ക്കായി സര്‍ക്കാര്‍ വകുപ്പുകള്‍ക്കും സ്വകാര്യ സ്ഥാപനങ്ങള്‍ക്കും പാട്ടത്തിന് നല്‍കുന്നത് സംബന്ധിച്ച നിലവിലെ വ്യവസ്ഥകള്‍ എന്തെല്ലാമാണെന്ന് വ്യക്തമാക്കുമോ;

പാട്ടക്കാലാവധി കഴിഞ്ഞ ഭൂമി തിരിച്ചെടുക്കുന്നതിനും പുതുക്കുന്നതിനും എന്തെല്ലാം മാനദണ്ഡങ്ങളാണ് പാലിച്ചുവരുന്നതെന്ന് അറിയിക്കുമോ;

അന്യാധീനപ്പെട്ട് പോകുന്ന റവന്യൂ ഭൂമി കണ്ടെത്തി തിരിച്ചെടുക്കുന്നതിനായി എന്തെല്ലാം പ്രവര്‍ത്തനങ്ങളാണ് നടത്തിവരുന്നതെന്ന് അറിയിക്കുമോ;

വികസന ആവശ്യങ്ങള്‍ക്കായി ഭൂമിയുടെ ലഭ്യതക്കുറവ് അനുഭവപ്പെടുന്ന സംസ്ഥാനമെന്ന നിലയില്‍ ലാന്റ് ബാങ്കിംഗ് സംവിധാനം മെച്ചപ്പെടുത്തുന്നതിന് നടപടികള്‍ സ്വീകരിക്കുമോ?

സംസ്ഥാനത്ത് അതിഥി തൊഴിലാളികള്‍ക്ക് താമസസൗകര്യം, ഭക്ഷണം, വേതനം, ആരോഗ്യസുരക്ഷ എന്നിവ ഉറപ്പുവരുത്തുന്നതിന് നടപ്പാക്കുന്ന പദ്ധതികള്‍ വ്യക്തമാക്കാമോ;

പാലക്കാട് കഞ്ചിക്കോട് പ്രവര്‍ത്തനമാരംഭിച്ച അപ്‍നാ ഘര്‍ മാതൃകയില്‍ എല്ലാ ജില്ലകളിലും അതിഥി തൊഴിലാളികള്‍ക്ക് താമസസൗകര്യമൊരുക്കാന്‍ പദ്ധതിയുണ്ടോയെന്ന് അറിയിക്കുമോ;

രണ്ടാം ലോക്ഡൗണിനെ തുടര്‍ന്ന് പ്രതിസന്ധിയിലായ അതിഥി തൊഴിലാളികള്‍ക്കായി നടപ്പിലാക്കിയ ക്ഷേമപ്രവര്‍ത്തനങ്ങള്‍ വിശദീകരിക്കാമോ;

അതിഥി തൊഴിലാളികളുടെ എണ്ണവും താെഴിലും സംബന്ധിച്ച് കൃത്യമായ വിവരം ലഭിക്കുന്നതിന് രജിസ്ട്രേഷന്‍ സംവിധാനം ഏര്‍പ്പെടുത്തുമോ; വിശദാംശങ്ങള്‍ നല്‍കുമോ?

സംസ്ഥാനത്ത് ജല അതോറിറ്റി അടക്കമുള്ള വകുപ്പുകൾ അറ്റകുറ്റപ്പണികള്‍ക്കായി റോഡുകൾ വെട്ടിപ്പൊളിക്കുന്ന സാഹചര്യത്തിൽ റോഡ് നിര്‍മ്മാണത്തിന് മുമ്പുതന്നെ പെെപ്പ് ലെെനുകളും വെെദ്യുതി കേബിളുകളും പോസ്റ്റുകളും മാറ്റി സ്ഥാപിക്കാൻ ബന്ധപ്പെട്ട വകുപ്പുകളുമായി ഏകോപനം നടത്താൻ എന്തൊക്കെ നടപടികളാണ് സ്വീകരിച്ചിരിക്കുന്നത് എന്ന് അറിയിക്കാമോ;

നിര്‍മ്മാണ പ്രവര്‍ത്തനത്തിലെ ആസൂത്രണ പിഴവുകളും നടത്തിപ്പിലെ പോരായ്മകളും മൂലം പല പൊതുമരാമത്ത് പദ്ധതികളുടെയും നിര്‍വ്വഹണത്തില്‍ കാലതാമസവും അധിക ചെലവും ഉണ്ടാകുന്നതായ ആക്ഷേപം ശ്രദ്ധയില്‍പ്പെട്ടിട്ടുണ്ടോ; എങ്കില്‍ ഇതുസംബന്ധിച്ച് വിലയിരുത്തല്‍ നടത്തിയിട്ടുണ്ടോയെന്ന് വ്യക്തമാക്കാമോ;

റവന്യൂ വകുപ്പ്, തദ്ദേശസ്വയംഭരണ വകുപ്പ്, കെ.എസ്.ഇ.ബി., വാട്ടര്‍ അതോറിറ്റി തുടങ്ങിയവയുമായുള്ള ഏകോപനത്തിനായി സമിതി രൂപീകരിച്ചിട്ടുണ്ടോ; എങ്കിൽ ഇതിന്റെ പ്രവർത്തനം വിലയിരുത്തിയിട്ടുണ്ടോ; വിശദമാക്കാമോ?

ആഗോളവല്‍കൃത തൊഴില്‍ വിപണിയുടെ ആവശ്യകത മനസ്സിലാക്കി ഉചിതമായ നൈപുണ്യശേഷി വികസന പരിപാടിയിലൂടെ തൊഴിലന്വേഷകരുടെ തൊഴില്‍ സാധ്യത വര്‍ദ്ധിപ്പിക്കുവാന്‍ ഉദ്ദേശിച്ചുകൊണ്ട് കരിയര്‍ നയം പ്രഖ്യാപിച്ചിട്ടുണ്ടോ;

ഗ്രാമവാസികളായ തൊഴിലന്വേഷകര്‍ക്ക് ഏറെ പ്രയോജനപ്രദമായ കരിയര്‍ ഡെവലപ്മെന്റ് സെന്ററുകളുടെ പ്രവര്‍ത്തനം വിപുലീകരിക്കുവാന്‍ ഉദ്ദേശിക്കുന്നുണ്ടോ;

ഉദ്യോഗാര്‍ത്ഥികള്‍ക്ക് ആവശ്യമായ നൈപുണ്യ പരിശീലനം നല്‍കുന്നതിന് എംപ്ലോയബിലിറ്റി സെന്ററുകളുടെ പ്രവര്‍ത്തനം എത്രമാത്രം ഫലപ്രദമാകുന്നുണ്ടെന്ന് അറിയിക്കാമോ?

സംസ്ഥാനത്ത് വില്ലേജ് ഓഫീസുകളിലെ തണ്ടപ്പേര് രജിസ്റ്റര്‍, അടിസ്ഥാന ഭൂനികുതി രജിസ്റ്റര്‍ എന്നിവ ഡിജിറ്റൈസ് ചെയ്യുന്നതിന് നടപടി സ്വീകരിച്ചിട്ടുണ്ടോ എന്നറിയിക്കാമോ;

റവന്യൂ രേഖകള്‍ കാലപ്പഴക്കം കാരണം നശിച്ചുപോകുന്നതും സൂക്ഷിക്കുന്നതിലുണ്ടാകുന്ന വീഴ്ചകളും പലപ്പോഴും പൊതുജനങ്ങള്‍ക്കും സര്‍ക്കാരിനും ബുദ്ധിമുട്ടുകള്‍ സൃഷ്ടിക്കുന്നത് ഒഴിവാക്കുന്നതിന് ഇവ ഡിജിറ്റൈസ് ചെയ്ത് സൂക്ഷിക്കേണ്ടത് അത്യാവശ്യമാണെന്നതിനാല്‍ അടിയന്തരമായി ഇത്തരം രേഖകള്‍ പൂര്‍ണ്ണമായും ഡിജിറ്റൈസ് ചെയ്യുന്നതിന് നടപടി സ്വീകരിക്കുമോ?