സംസ്ഥാനത്ത് തൊഴിലാളികൾക്ക് മിനിമം വേതനം നടപ്പിൽ വരുത്തുന്നതിന് സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ;

സ്ത്രീ-പുരുഷ തൊഴിലാളികളുടെ വേതന അന്തരം കുറയ്ക്കുന്നതിനായി സ്വീകരിച്ചിട്ടുള്ള നടപടികൾ എന്തൊക്കെയാണ്;

1948-ലെ മിനിമം വേതന നിയമപ്രകാരം സംസ്ഥാനത്ത് ഉൾപ്പെടുത്തിയിട്ടുള്ള തൊഴിൽ മേഖലകളുടെ എണ്ണം എത്രയാണെന്നും അതിൽ മിനിമം വേതനം നിശ്ചയിച്ച മേഖലകള്‍ ഏതെല്ലാമെന്നും വിശദമാക്കുമോ;

സംസ്ഥാനത്ത് നിർമ്മാണ, കാർഷിക, കാർഷികേതര മേഖലകളിലെ മിനിമം വേതനം മറ്റ് സംസ്ഥാനങ്ങളുമായി താരതമ്യം ചെയ്യുമ്പോൾ എത്രയധികം ഉയർന്നതാണെന്ന് വിലയിരുത്തിയിട്ടുണ്ടോ;

തൊഴിലാളികൾക്ക് തുല്യജോലിക്ക് തുല്യവേതനം ലഭിക്കുന്നതിനായി തൊഴിൽ വകുപ്പ് നടത്തുന്ന മാസാന്ത്യ പരിശോധനകളുടെ വിശദാംശം ലഭ്യമാക്കുമോ?

വിവിധ ക്ഷേമനിധി ബോർഡുകൾ വഴിയുളള പെൻഷനും മറ്റാനുകൂല്യങ്ങളും വിതരണം ചെയ്യുന്നതിൽ കുടിശിക വന്നിട്ടുണ്ടോയെന്ന് അറിയിക്കാമോ;

അംഗങ്ങളിൽ നിന്ന് അംശദായവും സർക്കാർ സഹായവും സ്വീകരിച്ച് പ്രവർത്തിക്കുന്ന ക്ഷേമനിധി ബോർഡുകൾ കൃത്യമായി പെൻഷൻ വിതരണം ചെയ്യാത്തതിന്റെ കാരണം പരിശോധിച്ചിട്ടുണ്ടോ;

ക്ഷേമനിധി ബോർഡുകൾ വഴിയുളള പെൻഷനും മറ്റ് ആനുകൂല്യങ്ങളും തടസ്സം കൂടാതെ വിതരണം ചെയ്യുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് അറിയിക്കാമോ; വിശദവിവരം നൽകാമോ?

മലപ്പുറത്തെ കൂരിയാട് അടക്കം ദേശീയപാത 66-ന്റെ ഭാഗമായുള്ള റോഡുകൾ തകർന്ന സംഭവങ്ങൾ ഗൗരവത്തോടെ കാണുന്നുണ്ടോ;

ദേശീയപാത 66-ലെ നിർമ്മാണത്തിലെ അപാകതകൾ സംബന്ധിച്ച് കേന്ദ്ര സർക്കാരിന് പരാതി നൽകിയിട്ടുണ്ടോ; വിശദമാക്കാമോ;

സംസ്ഥാനത്ത് നിരവധി സ്ഥലങ്ങളിൽ ദേശീയ പാത നിർമ്മാണത്തിൽ വിള്ളൽ അടക്കം സംഭവിച്ചിട്ടും സർക്കാർ ഗൗരവപൂർവ്വം ഇടപെടൽ നടത്തുന്നില്ല എന്ന ആക്ഷേപം ശ്രദ്ധയിൽപ്പെട്ടിട്ടുണ്ടോ; എങ്കിൽ ഇതിന്റെ കാരണം വിശദമാക്കാമോ?

2016 മുതല്‍ 2021 വരെയുള്ള കാലയളവില്‍ പൊതുമരാമത്ത് വകുപ്പ് കിഫ്ബി, റീ ബില്‍ഡ് കേരള, കെ. എസ്. ടി. പി, ആന്വറ്റി സ്കീമുള്‍ എന്നിവ മുഖേന പൂര്‍ത്തിയാക്കിയ പ്രവൃത്തികളുടെ വിശദാംശം നല്‍കാമാേ;

ഈ സര്‍ക്കാര്‍ അധികാരത്തില്‍ വന്നതിനുശേഷം പൊതുമരാമത്ത് വകുപ്പ് കിഫ്ബി, റീ ബില്‍ഡ്കേരള , കെ. എസ്. ടി. പി, ആന്വറ്റി സ്കീമുള്‍ എന്നിവ മുഖേന പൂര്‍ത്തിയാക്കിയ പ്രവൃത്തികള്‍ വിശദമാക്കാമോ;

2016-21 കാലയളവില്‍ പൊതുമരാമത്ത് റോഡുകള്‍ ബി. എം. & ബി. സി. നിലവാരത്തില്‍ നവീകരിച്ചതിന്റെ വിശദവിവരങ്ങള്‍ ലഭ്യമാണോ; എങ്കിൽ നല്‍കാമോ;

ഈ സര്‍ക്കാര്‍ അധികാരത്തില്‍ വന്നശേഷം പൊതുമരാമത്ത് റോഡുകള്‍ ബി. എം. & ബി. സി. നിലവാരത്തില്‍ നവീകരിച്ചതിന്റെ വിശദവിവരങ്ങള്‍ നല്‍കാമോ; നിലവില്‍ ഭരണാനുമതി റോഡുകളുടെ വിശദാംശം ലഭ്യമാക്കാമോ?

ടൂറിസം മേഖലയ്ക്ക് വ്യവസായ മേഖലയ്ക്ക് സമാനമായ ആനുകൂല്യങ്ങൾ നൽകുന്നതിനായി സ്വീകരിച്ച നടപടികൾ എന്തൊക്കെയാണെന്ന് വ്യക്തമാക്കാമോ;

ടൂറിസം മേഖലയിൽ നിക്ഷേപം നടത്തുന്നവർക്കായി എന്തെല്ലാം ആനുകൂല്യങ്ങൾ നൽകി വരുന്നുണ്ട്;

അൻപത് വർഷത്തിലധികം പഴക്കമുള്ള കെട്ടിടങ്ങൾ ഹെറിറ്റേജ് ടൂറിസം മേഖലയ്ക്ക് ലഭ്യമാക്കുന്നതിനായി എന്തെല്ലാം നടപടികൾ പൂർത്തിയാക്കിയിട്ടുണ്ടെന്ന് വിശദമാക്കാമോ;

ടൂറിസം ഇൻവെസ്റ്റേഴ്‍സ് ഫെസിലിറ്റേഷൻ സെന്ററിന്റെ പ്രധാന ലക്ഷ്യം എന്തൊക്കെയാണെന്ന് വ്യക്തമാക്കാമോ?

സംസ്ഥാനത്ത് സ്കൂളുകളില്‍ അടിസ്ഥാന സൗകര്യ വികസനത്തിനായി കഴിഞ്ഞ 9 വര്‍ഷത്തിനിടെ എന്തെല്ലാം പദ്ധതികള്‍ നടപ്പിലാക്കിയിട്ടുണ്ട്; വ്യക്തമാക്കുമോ;

സ്കൂളുകളിലെ സ്മാര്‍ട്ട് ക്ലാസ് മുറികളിൽ ഹൈടെക് ലാബുകള്‍ ഒരുക്കുന്നതിനായി ആവിഷ്കരിച്ച പദ്ധതികള്‍ എന്തൊക്കെയാണ്;

സ്കൂളുകളില്‍ അടിസ്ഥാന സൗകര്യ വികസന പദ്ധതികള്‍ നടപ്പാക്കുന്നതില്‍ പി.ടി.എ. യുടെയും തദ്ദേശസ്ഥാപനങ്ങളുടെയും പൂര്‍വ്വ വിദ്യാര്‍ത്ഥി സമൂഹങ്ങളുടെയും പങ്കാളിത്തം എങ്ങനെയാണ് ഉറപ്പുവരുത്തിയിട്ടുള്ളതെന്ന് വ്യക്തമാക്കുമോ;

സംസ്ഥാനത്തെ സ്കൂളുകള്‍ ദേശീയ തലത്തില്‍ മുൻ നിരയിലെത്താൻ എന്തെല്ലാം പദ്ധതികളാണ് ആവിഷ്കരിക്കാൻ ഉദ്ദേശിക്കുന്നതെന്ന് വ്യക്തമാക്കുമോ?

ഈ സര്‍ക്കാര്‍ അധികാരത്തില്‍ വന്നതിന് ശേഷം പൊതുമരാമത്ത് വകുപ്പിന്റെ വിവിധ വിംഗുകളിലായി എത്ര കിലോമീറ്റര്‍ റോഡുകളാണ് നവീകരിച്ചിട്ടുള്ളതെന്ന് വ്യക്തമാക്കാമോ;

ആയതില്‍ പൊതുമരാമത്ത് വകുപ്പിന്റേതല്ലാത്ത എത്ര കിലോമീറ്റര്‍ റോഡുകള്‍ നവീകരിച്ചിട്ടുണ്ടെന്ന വ്യക്തമാക്കാമോ;

ഈ സര്‍ക്കാരിന്റെ കാലത്ത് റോ‍‍ഡുകളുടെ നവീകരണത്തിന് എല്ലാ വിംഗുകളിലുമായി എത്ര തുക അനുവദിച്ചിട്ടുണ്ടെന്ന് അറിയിക്കാമോ;

പൊതുമരാമത്ത് വകുപ്പിന്റെ റോഡുകളില്‍ പകുതി റോഡുകള്‍ ബി. എം. & ബി. സി. നിലവാരത്തിലേയ്ക്ക് ഉയര്‍ത്തണമെന്ന പ്രഖ്യാപനം എത്രമാത്രം പ്രാവര്‍ത്തികമാക്കാന്‍ കഴിഞ്ഞിട്ടുണ്ടെന്ന് അറിയിക്കാമോ;

എത്ര കിലോമീറ്റര്‍ റോഡുകൾ ഇതിനകം ബി. എം. & ബി. സി. നിലവാരത്തിലേയ്ക്ക് മാറ്റുന്നതിന് സാധിച്ചിട്ടുണ്ട്; വിശദമാക്കാമോ?

2021-ലെ ദേശീയ വിദ്യാഭ്യാസ നിലവാര സർവേയില്‍ സംസ്ഥാനം നേടിയ മുന്നേറ്റത്തെക്കുറിച്ച് വിശദമാക്കുമോ;

സംസ്ഥാനത്തെ വിദ്യാർത്ഥികൾ ദേശീയ തലത്തിൽ മികവ് നേടുന്നതിന് കാരണമായ അനുകൂല ഘടകങ്ങൾ എന്തൊക്കെയാണെന്ന് വിശദമാക്കുമോ;

ദേശീയ സർവേയിലെ കണ്ടെത്തലുകൾ സംസ്ഥാനത്തിന്റെ വിദ്യാഭ്യാസ നയരൂപീകരണത്തെ എപ്രകാരമാണ് സ്വാധീനിച്ചതെന്ന് വ്യക്തമാക്കുമോ;

വിദ്യാഭ്യാസ ഗുണനിലവാരം ഉയർത്തുന്നതിന് ഈ സർക്കാർ മുന്നോട്ടുവയ്ക്കുന്ന പുതിയ പദ്ധതികൾ ഏതൊക്കെയാണെന്ന് വ്യക്തമാക്കുമോ?

സംസ്ഥാനത്ത് കായലുകളുടെ കാരിയിംഗ് കപ്പാസിറ്റി വിലയിരുത്തി ഹൗസ് ബോട്ടുകളുടെ എണ്ണത്തിൽ നിയന്ത്രണം ഏർപ്പെടുത്തുന്നതിനായി സ്വീകരിച്ച നടപടികൾ എന്തൊക്കെയാണെന്ന് വ്യക്തമാക്കാമോ;

ഹൗസ് ബോട്ടുകളും റിസോർട്ടുകളും കായലുകളിൽ മാലിന്യം തള്ളുന്നത് തടയുന്നതിനായി എന്തെല്ലാം നടപടികളാണ് സ്വീകരിച്ചു വരുന്നത്;

ഹൗസ്ബോട്ടിൽ നിന്നുള്ള മാലിന്യം സംസ്കരിക്കുന്നതിനായി സർക്കാർ സ്ഥാപിച്ച സെപ്‍റ്റേജുകളുടെ പ്രവർത്തന രീതി വിശദമാക്കാമോ;

നിയമസഭാ സമിതികളുടെ നിർദേശാനുസരണം കായലുകളുടെ കാരിയിംഗ് കപ്പാസിറ്റിയും ഹൗസ് ബോട്ട് മേഖലയിലെ പ്രശ്നങ്ങളും സംബന്ധിച്ച് സമർപ്പിച്ച പഠന റിപ്പോർട്ടിന്റെ പ്രധാന ശിപാർശകൾ എന്തൊക്കെയാണ്;

അനധികൃത ഹൗസ്ബോട്ടുകളുടെ പ്രവർത്തനം നിയന്ത്രിക്കുന്നതിനായി സർക്കാർ ഏർപ്പെടുത്തിയ ലൈസൻസിംഗ്, ക്ലാസിഫിക്കേഷൻ സംവിധാനത്തിന്റെ പ്രത്യേകതകൾ എന്തൊക്കെയാണെന്ന് വിശദമാക്കുമോ?

സംസ്ഥാനത്ത് ലിറ്റില്‍ കൈറ്റ്സ് ഐ. ടി. ക്ലബ് പദ്ധതി ആരംഭിച്ചതിന്റെ പ്രധാന ലക്ഷ്യങ്ങള്‍ എന്തൊക്കെയാണെന്ന് അറിയിക്കുമോ;

ഈ പദ്ധതിയില്‍ വിദ്യാര്‍ത്ഥികളുടെ പങ്കാളിത്തം വര്‍ദ്ധിപ്പിക്കുന്നതിനായി സ്വീകരിച്ച നടപടികള്‍ വ്യക്തമാക്കുമോ;

ലിറ്റില്‍ കൈറ്റ്സ് ക്ലബ്ബുകള്‍ വഴി വിദ്യാര്‍ത്ഥികള്‍ക്ക് ലഭിക്കുന്ന പരിശീലനങ്ങളും ഐ. ടി. സൗകര്യങ്ങളും എന്തൊക്കെയാണെന്ന് അറിയിക്കുമോ;

പ്രസ്‌തുത പദ്ധതി വിദ്യാര്‍ത്ഥികളുടെ ഭാവി തൊഴില്‍ സാധ്യതകള്‍ക്ക് സഹായകരമാണോ; വിശദമാക്കുമോ;

സംസ്ഥാനത്തുടനീളം പ്രസ്തുത പദ്ധതി വിജയകരമായി നടപ്പാക്കുന്നതിനായി സര്‍ക്കാര്‍ നല്‍കിയ സാമ്പത്തികവും സാങ്കേതികവുമായ സഹായങ്ങള്‍ എന്തൊക്കെയാണെന്ന് അറിയിക്കാമോ?

സംസ്ഥാനത്ത് വിദ്യാർത്ഥികളുടെ സർഗ്ഗവാസനകള്‍ കണ്ടെത്തി പരിപോഷിപ്പിക്കുന്നതിനായി നടപ്പിലാക്കിയ പദ്ധതികളുടെ വിശദാംശം അറിയിക്കുമോ;

കുസാറ്റുമായി ചേർന്ന് ആരംഭിച്ച സ്ട്രീം എക്കോ സിസ്റ്റം പദ്ധതിയും ടെക് ടാലന്റ് പ്രതിഭാ പോഷണ പദ്ധതിയും വിശദമാക്കുമോ;

സഹിതം പോർട്ടലുകള്‍ വഴിയുള്ള ആർട്ടിഫിഷ്യല്‍ ഇന്റലിജൻസ് അധിഷ്ഠിത പഠന വിശകലന സംവിധാനം വിശദമാക്കാമോ;

വായനാ വസന്തം പരിപാടിയുടെ ഭാഗമായി എന്തെല്ലാം കാര്യങ്ങളാണ് നടപ്പില്‍ വരുത്തിയതെന്ന് വ്യക്തമാക്കാമോ?

സംസ്ഥാനത്ത് പ്രത്യേക ആവശ്യങ്ങൾക്കായി പതിച്ചു നൽകിയ ഭൂമി പതിച്ചു നൽകിയ ആവശ്യങ്ങൾക്കല്ലാതെ പട്ടയമുടമകൾ വിനിയോഗിക്കേണ്ടിവന്ന സാഹചര്യം ശ്രദ്ധയിൽപ്പെട്ടിട്ടുണ്ടോ; വിശദമാക്കുമോ;

പട്ടയ ഭൂമിയിൽ ജീവനോപാധികൾക്കായി നടത്തിയ ചെറു നിർമ്മാണങ്ങളും വകമാറ്റിയുള്ള ഉപയോഗവും ക്രമീകരിച്ച് നൽകേണ്ട ആവശ്യം വിലയിരുത്തിയിട്ടുണ്ടോ; ഇതിനാവശ്യമായ ചട്ടങ്ങളില്‍ ഭേദഗതികൾ കൊണ്ടുവരാൻ ഉദ്ദേശിക്കുന്നുണ്ടോ; വിശദമാക്കുമോ;

പട്ടയഭൂമിയിലെ ഇത്തരത്തിലുള്ള ഉപയോഗം ക്രമീകരിക്കുന്നതിന് നിശ്ചിത കാലപരിധി നിശ്ചയിച്ചിട്ടുണ്ടോയെന്നും എങ്കിൽ നിശ്ചിത കാലപരിധിക്ക് ശേഷമുള്ള നിർമ്മാണം ക്രമീകരിക്കുന്നതിന് സൗകര്യമൊരുക്കുമോയെന്നും വ്യക്തമാക്കാമോ?

സംസ്ഥാനത്ത് ആരോഗ്യകരമായ തൊഴില്‍ ബന്ധങ്ങള്‍ വളര്‍ത്തുന്നതിനായി സ്വീകരിച്ച നടപടികള്‍ എന്തൊക്കെയാണ്;

ചുമട്ടുതൊഴിലാളികളുടെ തൊഴിലും വരുമാനവും സംരക്ഷിക്കുന്നതിനായി സ്വീകരിച്ചിട്ടുള്ള നടപടികള്‍ വിശദമാക്കാമോ;

നോക്കുകൂലി പ്രശ്നം പരിഹരിക്കുന്നതിനായി ജില്ലാതലത്തില്‍ ഏര്‍പ്പെടുത്തിയ സംവിധാനങ്ങള്‍ എന്തെല്ലാമാണ്; അതിന്റെ പ്രവര്‍ത്തനം വിലയിരുത്തിയിട്ടുണ്ടോ; വിശദമാക്കുമോ;

ചുമട്ടുതൊഴിലാളികളുടെ ബോധവല്‍ക്കരണത്തിനും പരിശീലനത്തിനും നടത്തിയ പ്രധാന പരിപാടികള്‍ എന്തൊക്കെയാണെന്ന് അറിയിക്കാമോ?

സംസ്ഥാനത്ത് സ്കൂളുകളിലെ സുരക്ഷാപ്രശ്നങ്ങൾ പരിശോധിക്കാൻ ഓഡിറ്റ് നടത്തിയിട്ടുണ്ടോ; വിശദാംശം ലഭ്യമാക്കാമോ;

കൊല്ലം തേവലക്കര ബോയ്സ് ഹൈസ്കൂളിൽ എട്ടാം ക്ലാസ് വിദ്യാർത്ഥി ഷോക്കേറ്റ് മരിച്ചതും ചെല്ലാനത്ത് നിർമ്മാണം പൂർത്തിയാക്കിയ സ്കൂൾ കെട്ടിടത്തിൽ ചോർച്ചയും ഭിത്തിയിൽ വിള്ളലും രൂപപ്പെട്ടതും തൃശൂർ കോടാലിയിൽ സ്കൂൾ ഓഡിറ്റോറിയത്തിന്റെ മേൽക്കൂര തകർന്നതും ഉൾപ്പെടെയുള്ള സംഭവങ്ങള്‍ ശ്രദ്ധയിൽപ്പെട്ടിട്ടുണ്ടോ; എങ്കിൽ ഇക്കാര്യത്തിൽ നടത്തിയ ഇടപെടലുകൾ വിശദമാക്കാമോ;

സംസ്ഥാനത്തെ എല്ലാ സ്കൂളുകളിലും സുരക്ഷാ പ്രശ്നങ്ങൾ പരിശോധിക്കാൻ ഒരു സമഗ്ര ഓഡിറ്റ് നടത്താൻ തീരുമാനിച്ചിട്ടുണ്ടോ; എങ്കിൽ വിശദാംശം നല്‍കാമോ?

കൊല്ലം തേവലക്കര ബോയ്സ് ഹൈസ്കൂളിൽ വിദ്യാർത്ഥി ഷോക്കേറ്റു മരിച്ച സംഭവത്തിൽ അന്വേഷണം നടത്തിയിട്ടുണ്ടോ; ഉണ്ടെങ്കിൽ കുറ്റക്കാരായവർ ആരെല്ലാമാണെന്ന് പ്രസ്തുത അന്വേഷണത്തിൽ കണ്ടെത്തിയിട്ടുണ്ടോ; വിശദമാക്കാമോ;

സുരക്ഷ ഒരുക്കുന്നതിൽ വീഴ്ചവരുത്തിയ മാനേജ്മെന്റിനെതിരെ എന്തെല്ലാം നടപടികളാണ് സ്വീകരിച്ചതെന്ന് അറിയിക്കുമോ;

അദ്ധ്യയനവർഷം ആരംഭിക്കുന്നതിന് മുൻപ് സ്കൂളുകളുടെ സുരക്ഷ ഉറപ്പാക്കണമെന്ന നിർദേശം പാലിക്കാത്തവർക്കെതിരെ എന്തെല്ലാം നടപടികളാണ് സ്വീകരിക്കാൻ ഉദ്ദേശിക്കുന്നതെന്ന് വ്യക്തമാക്കാമോ?

മലബാർ-മലനാട് റിവർ ക്രൂയിസ്  പദ്ധതിയുടെ വികസനം ഇപ്പോൾ ഏത് ഘട്ടത്തിലാണെന്ന് വ്യക്തമാക്കാമോ;

ഈ പദ്ധതി സ്വദേശി ദർശൻ സ്കീമിൽ ഉൾപ്പെടുത്തിയതിന് ശേഷമുള്ള പുരോഗതി എന്താണെന്ന് വ്യക്തമാക്കാമോ;

പ്രസ്തുത പദ്ധതിയിൽ ഉൾപ്പെടുത്തി വികസിപ്പിക്കുന്ന മുഴുപ്പിലങ്ങാട്-ധർമ്മടം ബീച്ച് സമഗ്ര വികസന പദ്ധതിയുടെ പ്രവർത്തനങ്ങൾ വിലയിരുത്തിയിട്ടുണ്ടോ; പദ്ധതിയുടെ പുരോഗതി വിശദമാക്കാമോ;

ഈ പദ്ധതിയുടെ ഭാഗമായി കാസർഗോഡ് ജില്ലയിൽ പൂർത്തീകരിച്ച ബോട്ട് ടെർമിനലുകളുടെ വിശദാംശങ്ങൾ നല്‍കാമോ;

പദ്ധതി പൂർത്തിയാക്കുന്നതിലൂടെ ലഭ്യമാകുന്ന പ്രാദേശിക തൊഴിൽ സാധ്യതകളും സാമ്പത്തിക പ്രയോജനങ്ങളും വിലയിരുത്തിയിട്ടുണ്ടോ; എങ്കില്‍ വ്യക്തമാക്കാമോ?

സംസ്ഥാനത്ത് നിലവില്‍ നടപ്പാക്കുന്ന പ്രധാനപ്പെട്ട പെെതൃക ടൂറിസം പദ്ധതികള്‍ ഏതൊക്കെയാണെന്ന് വ്യക്തമാക്കാമോ;

മുസിരിസ് പെെതൃക ടൂറിസം പദ്ധതിയുടെ ഭാഗമായി പൂര്‍ത്തീകരിച്ച പ്രധാന പ്രവര്‍ത്തനങ്ങള്‍ ഏതൊക്കെയാണ്; വിശദമാക്കാമോ;

ആലപ്പുഴ പെെതൃക ടൂറിസം പദ്ധതിയുടെ ഭാഗമായി പൂര്‍ത്തിയാക്കിയ പ്രധാന പദ്ധതികളുടെ വിശദാംശം നല്‍കാമോ;

സ്പെെസസ് റൂട്ട് പദ്ധതിയുടെ ലക്ഷ്യവും നിലവിലെ പുരോഗതിയും വിശദമാക്കാമോ;

പാലക്കാട് ജില്ലയിൽ ആവിഷ്കരിച്ച പൈതൃക-സാംസ്കാരിക വിനോദസഞ്ചാര പദ്ധതിയുടെ പ്രത്യേകതകൾ എന്തെല്ലാമാണെന്ന് വിശദമാക്കാമോ?

സംസ്ഥാനത്ത് ഭൂമി കൈമാറ്റവുമായി ബന്ധപ്പെട്ട നടപടികൾ സുതാര്യവും ലളിതവും കാര്യക്ഷമവുമാക്കേണ്ടതിന്റെ ആവശ്യകത പരിശോധനയ്ക്ക് വിധേയമാക്കിയിട്ടുണ്ടോ; വിശദമാക്കാമോ;

റവന്യൂ, സർവേ, രജിസ്ട്രേഷൻ വകുപ്പുകളുടെ സംയോജിത പോർട്ടൽ നിലവിൽ വരുന്നതോടെ ഭൂമി കൈമാറ്റവുമായി ബന്ധപ്പെട്ട നടപടിക്രമങ്ങൾ വേഗത്തിൽ തീർപ്പാക്കുന്നതിന് കഴിയുമോ; വിശദമാക്കാമോ;

ഡിജിറ്റൽ സർവേ പൂർത്തീകരിച്ച വില്ലേജുകളില്‍ ഭൂമിയുടെ പോക്കുവരവ് നടപടികളോടൊപ്പം സർവേ സ്കെച്ച് ഉള്‍പ്പടെ ലഭ്യമാക്കുന്നതിന് നടപടി സ്വീകരിക്കുമോ; വിശദമാക്കാമോ;

അപ്പാർട്ട്മെന്റുകളിലെയും ഫ്ലാറ്റുകളിലെയും വിഭജിക്കപ്പെടാത്ത അവകാശങ്ങൾ സംയോജിത പോർട്ടൽ വഴി പോക്കുവരവ് ചെയ്യുന്നതിനുള്ള സൗകര്യം ഉറപ്പാക്കുമോയെന്ന് വ്യക്തമാക്കാമോ?

സംസ്ഥാനത്തെ സ്കൂളുകളില്‍ വൈദ്യുതി ലൈനിൽ നിന്നടക്കമുള്ള സുരക്ഷാ പ്രശ്നങ്ങൾ ഉണ്ടാകുന്നത് പരിശോധനയ്ക്ക് വിധേയമാക്കിയിട്ടുണ്ടോ;

കൊല്ലം തേവലക്കര ബോയ്സ് ഹൈസ്ക്കൂളിൽ എട്ടാം ക്ലാസ് വിദ്യാർത്ഥി ഷോക്കേറ്റ് മരിച്ച സംഭവത്തിൽ സ്വീകരിച്ച നടപടികൾ വിശദമാക്കാമോ;

സമാനമായ സംഭവങ്ങൾ ആവർത്തിക്കാതിരിക്കാൻ എന്തൊക്കെ നടപടികളാണ് സ്വീകരിച്ചിട്ടുള്ളതെന്ന് വിശദമാക്കാമോ?

സംസ്ഥാനത്ത് ടൂറിസം മേഖലകളിൽ അനധികൃത റിസോർട്ടുകളും ഹോം ​സ്റ്റേകളും പ്രവർത്തിച്ചു വരുന്നതായി കണ്ടെത്തിയിട്ടുണ്ടോ;

ഇത്തരം സ്ഥാപനങ്ങളിൽ അടിസ്ഥാന സൗകര്യവും സുരക്ഷാ സംവിധാനവും ഇല്ലായെന്നത് പരിശോധിച്ചിട്ടുണ്ടോ;

ഇത്തരം അനധികൃത സ്ഥാപനങ്ങളിൽ ഏതെങ്കിലും തകര്‍ന്ന് വീണ് വിനോദ സഞ്ചാരികൾക്ക് അപകടം ഉണ്ടായതായി റിപ്പോർട്ട് ചെയ്യപ്പെട്ടിട്ടുണ്ടോ;

വിനോദ സഞ്ചാരികളുടെ സുരക്ഷിതത്വം ഉറപ്പാക്കാൻ എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വിശദമാക്കാമോ?

സംസ്ഥാനത്ത് വിദ്യാർത്ഥികൾക്ക് ഡിജിറ്റൽ പഠന സൗകര്യങ്ങൾ ലഭ്യമാക്കുന്നതിനായി സ്വീകരിച്ച നടപടികൾ എന്തൊക്കെയാണെന്ന് വിശദമാക്കാമോ;

സ്കൂളുകളിലെ ഐ. സി. ടി. ലാബുകൾ, സ്മാർട്ട് ക്ലാസ് മുറികൾ, ഹൈ-സ്പീഡ് ഇന്റർനെറ്റ് തുടങ്ങിയ സൗകര്യങ്ങളുടെ പുരോഗതി സംബന്ധിച്ച വിശദാംശം ലഭ്യമാക്കാമോ;

സാമ്പത്തികമായി പിന്നാക്കം നിൽക്കുന്ന വിഭാഗങ്ങളിലെ വിദ്യാർത്ഥികൾക്ക് ഡിജിറ്റൽ പഠന സഹായങ്ങൾ ലഭ്യമാക്കുന്നതിനായി എന്തെല്ലാം നടപടികളാണ് സ്വീകരിച്ചു വരുന്നതെന്ന് വ്യക്തമാക്കുമോ;

ഓൺലൈൻ പഠനത്തിനായി ഒരുക്കിയിട്ടുള്ള ഇ-ടെക്സ്റ്റ് ബുക്കുകൾ, വെബ്സൈറ്റുകൾ, മൊബൈൽ ആപ്ലിക്കേഷനുകൾ എന്നിവയുടെ പ്രയോജനം വിദ്യാർത്ഥികൾക്ക് ലഭ്യമാക്കുന്നതിന് സ്വീകരിച്ച നടപടികൾ വിശദമാക്കാമോ?

മലയോര ഹൈവേ പദ്ധതിയുടെ പുരോഗതി വിശദമാക്കാമോ;

മലയോര ഹൈവേ പദ്ധതിയിൽ ഇപ്പോൾ നടക്കുന്ന വിവിധ റീച്ചുകളിലെ പ്രവൃത്തികൾ വിശദമാക്കാമോ;

പ്രസ്തുത പദ്ധതിക്കായി നിലവിൽ എത്ര കോടി രൂപയുടെ സാമ്പത്തിക അനുമതിയാണ് നൽകിയിട്ടുള്ളതെന്ന് വ്യക്തമാക്കാമോ;

ഏതെല്ലാം റീച്ചുകളിലെ പ്രവൃത്തികള്‍ പൂര്‍ത്തിയായിട്ടുണ്ട്; വിശദമാക്കാമോ;

പദ്ധതി എപ്പോള്‍ പൂർത്തീകരിക്കാൻ കഴിയുമെന്നാണ് വിലയിരുത്തിയിട്ടുള്ളതെന്ന് വ്യക്തമാക്കാമോ?

1960-ല്‍ നിയമസഭ പാസാക്കിയ ഭൂമി പതിച്ചു കൊടുക്കൽ നിയമത്തിന്റെ പ്രധാന ലക്ഷ്യം എന്തായിരുന്നുവെന്ന് വിശദമാക്കാമോ;

1964-ലെ ഭൂപതിവ് ചട്ടപ്രകാരം പട്ടയഭൂമി ഏത് ആവശ്യങ്ങൾക്കായി മാത്രം ഉപയോഗിക്കണമെന്നായിരുന്നു വ്യവസ്ഥ; വിശദമാക്കാമോ;

മൂന്നാർ പ്രദേശത്തെ നിർമ്മാണപ്രവർത്തനങ്ങൾ 2010-ൽ ഹൈക്കോടതി ഉത്തരവുപ്രകാരം നിർത്തിവെക്കേണ്ടിവന്നതിന്റെ പ്രധാന കാരണം എന്തായിരുന്നു; വ്യക്തമാക്കാമോ;

ഭൂപതിവ് നിയമഭേദഗതി കൊണ്ടുവരാൻ സർക്കാർ മുന്നോട്ടുവന്നതിന്റെ പ്രധാന ഉദ്ദേശ്യം എന്താണെന്ന് വ്യക്തമാക്കാമോ?

പൊതു വിദ്യാഭ്യാസത്തിന്റെ ഗുണനിലവാരം ഉയർത്തുന്നതിനായി സ്വീകരിച്ച നടപടികള്‍ വിശദമാക്കുമോ;

ഐ. ടി. അധിഷ്ഠിത അദ്ധ്യയനത്തിന് ഊന്നല്‍ നല്‍കുന്നതിനായി നടപ്പിലാക്കിയ ടെക്കി ടീച്ചർ പദ്ധതി ഉള്‍പ്പെടെയുള്ള അദ്ധ്യാപക പരിശീലന പരിപാടികളുടെ വിശദാംശങ്ങളും ഇതിലൂടെ കൈവരിച്ച നേട്ടങ്ങളും വ്യക്തമാക്കാമോ;

പാർശ്വവല്‍കൃത മേഖലകളിലെ ജനങ്ങള്‍ തിങ്ങിപാർക്കുന്ന പ്രദേശങ്ങളില്‍ ഗുണമേന്മയുള്ള വിദ്യാഭ്യാസം ഉറപ്പാക്കുന്നതിന് ആവിഷ്കരിച്ച പദ്ധതികള്‍ വിലയിരുത്തിയിട്ടുണ്ടോ; വിശദമാക്കാമോ;

സ്കൂളുകളില്‍ സ്ഥാപിച്ച ടിങ്കറിംഗ് ലാബുകള്‍ മുഖേന നടപ്പാക്കിയ പ്രോഗ്രാമുകള്‍ എന്തെല്ലാമാണെന്ന് വിശദമാക്കാമോ?

തുടർച്ചയായുണ്ടാകുന്ന മണ്ണിടിച്ചിൽ മൂലം താമരശ്ശേരി ചുരത്തിലൂടെ വയനാട്ടിലേക്കും തിരിച്ചുമുളള യാത്രയ്ക്ക് ഏറെ ബുദ്ധിമുട്ടനുഭവിക്കുന്നത് പരിശോധിച്ചിട്ടുണ്ടോ; എങ്കിൽ വിശദമാക്കാമോ;

ചുരത്തിലെ കൊടുംവളവുകൾ വീതി കൂട്ടി നവീകരിക്കുന്നതിനുളള നടപടികൾ വേഗത്തിലാക്കണമെന്ന ആവശ്യം പരിഗണനയിലുണ്ടോ; വിശദമാക്കാമോ;

മണ്ണിടിച്ചിൽ സാധ്യതയുളള സ്ഥലങ്ങളിൽ സംരക്ഷണഭിത്തി നിർമ്മിക്കുന്നതിന് എന്തെങ്കിലും പദ്ധതി ആവിഷ്കരിച്ചിട്ടുണ്ടോ; വിശദമാക്കാമോ;

ചുരം പാതയിലെ പ്രശ്നങ്ങൾക്ക് ശാശ്വത പരിഹാരം കാണുന്നതിന് എന്തെല്ലാം നടപടികൾ സ്വീകരിക്കാനാണ് ഉദ്ദേശിക്കുന്നതെന്ന് വിശദമാക്കാമോ?

സംസ്ഥാനത്ത് നിലവിലെ പാഠ്യപദ്ധതി പരിഷ്കരണം സംബന്ധിച്ച നടപടികളുടെ പുരോഗതി അറിയിക്കുമോ; ഇതിന്റെ നേട്ടങ്ങളും കോട്ടങ്ങളും വിലയിരുത്തിയിട്ടുണ്ടോ; വിശദാംശം ലഭ്യമാക്കുമോ;

പുതുക്കിയ പാഠ്യപദ്ധതി സംബന്ധിച്ച പരാതികള്‍ ലഭിച്ചിട്ടുണ്ടോ; എങ്കില്‍ ഏതൊക്കെ കാര്യങ്ങളെ സംബന്ധിച്ച പരാതികളാണ് പ്രധാനമായും ലഭിച്ചത്; പ്രസ്തുത പരാതികളിന്മേൽ എന്തൊക്കെ നടപടികൾ സ്വീകരിച്ചുവെന്ന് അറിയിക്കുമോ;

സംസ്ഥാനത്ത് ഹയർ സെക്കണ്ടറിതലത്തിലെ പാഠ്യപദ്ധതി പരിഷ്കരണത്തിന്റെ പുരോഗതി അറിയിക്കുമോ; ഇത് എന്നത്തേക്ക് പൂർത്തിയാക്കാനാണ് ലക്ഷ്യമിടുന്നതെന്ന് വ്യക്തമാക്കുമോ; ഏതൊക്കെ ഏജന്‍സികള്‍ മുഖേനയാണ് ഇത് നടപ്പിലാക്കുന്നത്; വിശദാംശം അറിയിക്കുമോ;

കുട്ടികള്‍ക്ക് ജീവന്‍രക്ഷാ സംബന്ധമായ കാര്യങ്ങളില്‍ പ്രാഥമികജ്ഞാനം ലഭിക്കുന്ന തരത്തിലുള്ള സംഗതികള്‍ പുതിയ പാഠ്യപദ്ധതിയില്‍ ഉള്‍പ്പെടുത്തുന്നതിന് നടപടി സ്വീകരിക്കുമോ?

കേന്ദ്ര സർക്കാരിന്റെ ചുമതലയിലുള്ള ദേശീയപാത 66-ന്റെ കേരളത്തിലെ നിർമ്മാണപ്രവർത്തനങ്ങളുടെ ആരംഭത്തിൽ തന്നെ വലിയ രീതിയിലുള്ള വീഴ്ചകൾ സംഭവിച്ചിട്ടുള്ളതായ വാർത്തകൾ ശ്രദ്ധയിൽപ്പെട്ടിട്ടുണ്ടോ; എങ്കിൽ വിശദമാക്കാമോ;

നിർമ്മാണത്തിലിരിക്കുന്ന ദേശീയപാതയുടെ വിവിധ ഭാഗങ്ങൾ തകർന്ന് ഗതാഗതം തടസ്സപ്പെടുന്ന സാഹചര്യം ഉണ്ടായത് ശ്രദ്ധയിൽപ്പെട്ടിട്ടുണ്ടോ; എങ്കിൽ വിശദമാക്കാമോ;

പ്രസ്തുത ദേശീയപാതയുടെ രൂപരേഖ തയ്യാറാക്കിയപ്പോൾ ഭൂമിയുടെ കിടപ്പും മണ്ണിന്റെ സ്വഭാവവും ശാസ്ത്രീയ പരിശോധനകൾക്ക് വിധേയമാക്കിയിട്ടില്ല എന്ന ആക്ഷേപം ശ്രദ്ധയിൽപ്പെട്ടിട്ടുണ്ടോ; വ്യക്തമാക്കാമോ?

ദേശീയ പാത 66-ന്റെ നിർമ്മാണത്തിൽ സംസ്ഥാന സർക്കാരിന്റെ ചുമതലകൾ എന്തൊക്കെയായിരുന്നുവെന്ന് വിശദമാക്കാമോ;

പ്രസ്തുത ദേശിയപാത നിർമ്മാണത്തിലെ അശാസ്ത്രീയതയും അഴിമതിയും സംബന്ധിച്ച് സംസ്ഥാന സർക്കാർ അന്വേഷണം നടത്തുകയോ കേന്ദ്ര സർക്കാരിനോട് അന്വേഷണത്തിന് ആവശ്യപ്പടുകയോ ചെയ്തിട്ടുണ്ടോ;

കേരളത്തിലെ കാലാവസ്ഥയ്ക്ക് അനുസൃതമായുള്ള നിർമ്മാണമല്ല മലപ്പുറത്തെ കൂരിയാട് അടക്കമുള്ള ദേശിയപാത 66-ന്റെ നിർമ്മാണത്തിൽ നടന്നത് എന്നത് വസ്തുതയാണോ; വിശദമാക്കാമോ?

സംസ്ഥാനത്തെ റോഡുകള്‍ കാലാവസ്ഥാ വ്യതിയാനത്തെ പ്രതിരോധിക്കുന്ന തരത്തില്‍ പുനരുദ്ധരിക്കുന്നതിന് സ്വീകരിച്ചിട്ടുള്ള നടപടികള്‍ വിശദമാക്കാമോ;

വെബ് അധിഷ്ഠിത റോഡ് മാനേജ്മെന്റ് സംവിധാനം ഏർപ്പെടുത്തിയിട്ടുണ്ടോയെന്നും അതിന്റെ നേട്ടങ്ങളും കോട്ടങ്ങളും വിലയിരുത്തിയിട്ടുണ്ടോയെന്നും വിശദമാക്കാമോ;

റോഡുകള്‍ ശക്തിപ്പെടുത്തുന്നതിനും അറ്റകുറ്റപ്പണികളിലെ കാലതാമസം ഒഴിവാക്കുന്നതിനും ചെലവ് കുറയ്ക്കുന്നതിനും സ്വീകരിച്ചിട്ടുള്ള നടപടികള്‍ വിശദമാക്കാമോ?

ഗ്രാമ, നഗര വ്യത്യാസമില്ലാതെ കേരളത്തെ ആഗോള വിനോദസഞ്ചാരത്തിന്റെ പ്രധാന ആകർഷണ കേന്ദ്രമാക്കുകയെന്ന ലക്ഷ്യത്തോടെ ഈ സർക്കാർ ആഗോള ടൂറിസം വിപണിയിൽ നടത്തിയ ഇടപെടലുകൾ എന്തെല്ലാമാണെന്ന് വിശദമാക്കാമോ;

വിനോദസഞ്ചാര കേന്ദ്രങ്ങൾ ശുചിത്വപൂർണ്ണവും പരിസ്ഥിതി സൗഹൃദവും ആകർഷകവുമാക്കുന്നതിന്റെ ഭാഗമായി നടപ്പിലാക്കിവരുന്ന പ്രധാന പദ്ധതികൾ എന്തെല്ലാമാണ്;

സംസ്ഥാനത്തെ ഉത്സവങ്ങളും ആഘോഷങ്ങളും ഇവിടെ എത്തുന്ന സഞ്ചാരികളുടെ പ്രധാന ആകർഷണമാക്കുന്നതിന് എന്തെല്ലാം പദ്ധതികളാണ് വിനോദസഞ്ചാര വകുപ്പ് നടപ്പിലാക്കുന്നത്; വിശദമാക്കാമോ;

വിനോദസഞ്ചാരമേഖലയുടെ നൂതനകാലത്തെ സാഹചര്യങ്ങളും സാധ്യതകളും പരിഗണിച്ച് ഈ മേഖലയുടെ ഭാവികാല പ്രവർത്തനങ്ങൾ ആസൂത്രണം ചെയ്യുവാൻ ഉദ്ദേശിക്കുന്നുണ്ടോയെന്ന് വിശദീകരിക്കാമോ?